ཧྥི་ལི་པིན་གྱིས་རྒྱ་ནག་ལ་དམག་འཁྲུག་རྒྱག་སྲིད་པའི་ཉེན་བརྡ་བཏང་བར་རྒྱ་ནག་གིས་ཧྥི་ལི་པིན་གྱིས་འཁྲུག་རྐྱེན་སློང་ཐབས་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་འདུག
དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༣༡ ནས་ཟླ་འདིའི་ཕྱི་ཚེས་ ༢ བར་ཉིན་གྲངས་གསུམ་རིང་སིངྒ་པོར་ (Singapore) རྟེན་གཞི་བྱས་པའི་ཤམ་བྷ་ལ་མགྲོན་ཁང་དུ་རྒྱལ་སྤྱིའི་བདེ་འཇགས་ཀྱི་ཚོགས་འདུ་འཚོག་བཞིན་ཡོད་པ་དང་བསྟུན། ཧྥི་ལི་པིན་སི་ (Philippines) གྱི་སྲིད་འཛིན་ཧྥར་ཌི་ནན་ཌི་མཱར་ཁོ་སི་ལགས་ཀྱིས། རྒྱ་ནག་ལྷོ་རྒྱ་ནག་རྒྱ་མཚོའི་ཁུལ་གྱི་ཆུ་མཚམས་དམར་ཐིག་ལས་བརྒལ་མི་ཆོག་པ་དང་། གལ་སྲིད་རྒྱ་ནག་གི་དྲག་འགུལ་གྱི་བྱ་སྤྱོད་ལ་བརྟེན་ནས་ཧྥི་ལི་པིན་གྱི་མི་སེར་གཅིག་ལ་འཆི་སྐྱོན་བྱུང་ཚེ། ཧྥི་ལི་པིན་གྱིས་དེ་ནི་དམག་འཁྲུག་གི་བསླངས་པ་ཞིག་ལ་ངོས་འཛིན་གྱིས་ཡ་ལན་སློག་རྒྱུ་ཡིན་པའི་ཉེན་བརྡ་བཏང་འདུག
གནས་ཚུལ་དེའི་ཐད་རྒྱ་ནག་དམག་གི་མགྲིན་ཚབ་པ་ཞིག་གིས། ཧྥི་ལི་པིན་གྱིས་རྒྱ་ནག་ལ་སྐྱོན་འཛུགས་དང་དམའ་འབེབ། དྲག་རྒོལ་བཏང་ནས་འཁྲུག་རྐྱེན་སློང་ཐབས་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་པ་དང་། ཚོགས་འདུའི་སྟེང་རྒྱ་ནག་གིས་ལྷོ་རྒྱ་ནག་རྒྱ་མཚོའི་ཁུལ་གྱི་བདག་དབང་སྲུང་བྱེད་བཞིན་ཡོད་སྐོར་བརྗོད་ཡོད་འདུག
ཉེ་བའི་ཟླ་ཁ་ཤས་རིང་རྒྱ་ནག་དང་ཧྥི་ལི་པིན་གཉིས་བར་ལྷོ་རྒྱ་ནག་རྒྱ་མཚོའི་བདག་དབང་རྩོད་རྙོག་གི་རྐྱེན་གྱིས་གདོང་ཐུག་མང་པོ་བྱུང་བཞིན་ཡོད་པ་མ་ཟད། རྒྱ་ནག་གིས་མཚོ་ཁུལ་དུ་གཏེར་རིགས་སྔོག་འདོན་དང་། ལྷོ་རྒྱ་ནག་རྒྱ་མཚོའི་ནང་མིས་བཟོས་གླིང་ཕྲན་བཙུགས་ཏེ་མཚོ་གླིང་དེ་རྒྱ་ནག་གི་ཡིན་པ་སྒྲུབ་ཀྱི་ཡོད་པ་དང་། ཧྥི་ལི་པིན་གྱིས་མཚོ་ཁུལ་དུ་མཁའ་དམག་དང་མཚོ་དམག་བཏང་སྟེ་མཚོ་ཁུལ་གྱི་བདག་དབང་ཧྥི་ལི་པིན་རང་ལ་ཡོད་ལུགས་གསལ་སྟོན་བྱས་ཏེ། ཧྥི་ལི་པིན་གྱི་མཚོ་དམག་གྲུ་གཟིངས་ཤིག་མཚོ་ཁུལ་དེར་མངགས་གཏོང་བྱས་ནས་མུ་མཐུད་བསྡད་ཡོད་འདུག
ཉམས་ཞིབ་པ་ཁག་ཅིག་གིས། ལྷོ་རྒྱ་ནག་རྒྱ་མཚོའི་ཁུལ་དུ་རྩོད་རྙོག་ཅིག་བྱུང་ཚེ། རྒྱ་ནག་དང་ཨ་རིའི་བར་དམག་འཁྲུག་འབྱུང་སྲིད་པའི་སེམས་འཚབ་བྱེད་བཞིན་འདུག་ལ། ཨ་རིའི་གཞུང་གིས་ཧྥི་ལི་པིན་དང་ལྷན་དུ་ཆིངས་ཡིག་བཞག་ཡོད་པའི་ནང་། ཨ་རིའི་གཞུང་གིས་ཧྥི་ལི་པེན་གྱི་མཐའ་མཚམས་སྲུང་བར་དམག་མི་འགྲེམས་འཇོག་བྱས་ཏེ། རྒྱལ་ཁབ་ཀྱི་མཐའ་མཚམས་སྲུང་སྐྱོབ་དང་། རྒྱ་ནག་གཞུང་གི་གནོན་ཤུགས་ལ་རྒོལ་ལན་སློག་ཐབས་བྱེད་ཀྱི་ཡིན་སྐོར་སོགས་བཀོད་ཡོད་པ་ལྟར། ཨ་རིས་མུ་མཐུད་དུ་མཐུན་ཕྱོགས་རྒྱལ་ཁབ་ཀྱི་བདེ་འཇགས་སླད་མཐུན་འགྱུར་གང་ཐུབ་བྱེད་ཀྱི་ཡོད་སྐོར་སོགས་བརྗོད་འདུག
རྒྱ་ནག་གཞུང་གིས། ཧྥི་ལི་པིན་ལ་ཕྱིའི་རྒྱལ་ཁབ་ཀྱི་རྒྱབ་སྐྱོར་ཤུགས་ཆེན་བྱེད་ཀྱི་ཡོད་པ་དང་། འཁྲུག་རྐྱེན་སློང་ཐབས་བྱེད་ཀྱི་ཡོད་པ་མ་ཟད། ཉེ་ལམ་ཨ་རི་དང་ཧྥི་ལི་པིན་གཉིས་ཀྱིས་དམག་སྦྱོང་བྱེད་བཞིན་པའི་སྐབས། ཨ་རིས་ཧྥི་ལི་པིན་ལ་མེ་ཤུགས་འཕུར་མདའ་མཁོ་སྤྲོད་བྱས་པར་ངོས་ལེན་མེད་པ་དང་། དེས་མངའ་ཁུལ་གྱི་བདེ་འཇགས་ལ་ཉེན་ཁ་བཟོ་ཡི་ཡོད་སྐོར་སོགས་བརྗོད་འདུག
འདས་ལོའི་ཕྱི་ཟླ་ ༤ པའི་ནང་རྒྱ་ནག་རྒྱ་མཚོའི་ཁུལ་གྱི་མཚོ་གླིང་རྒྱལ་ཁབ་ཧྥི་ལི་པིན་དང་ཨ་རི་གཉིས་ཀྱིས་དུས་ཡུན་ཟླ་ཕྱེད་ལྷག་རིང་གཞི་རྒྱ་ཆེ་ཤོས་ཀྱི་དམག་སྦྱོང་བྱས་ཡོད་ཅིང་། གནད་དོན་དབྱེ་ཞིབ་པ་མང་པོ་ཞིག་གིས། ཨ་རིས་ཨེ་ཤ་ཡའི་མཚོ་འགག་ཁུལ་དུ་རྒྱ་ནག་གི་དབང་ཤུགས་སྐྱེད་པར་འགོག་རྒོལ་ཤུགས་ཆེན་བྱེད་ཀྱི་ཡོད་པ་མ་ཟད། རྒྱ་ནག་གི་དབང་ཤུགས་དང་དྲག་གནོན་འགོག་ཐབས་བྱེད་ཀྱི་ཡོད་པར་ངོས་འཛིན་བྱས་འདུག
ལྷོ་རྒྱ་ནག་རྒྱ་མཚོ་ལ་ཁྱབ་ཚད་ཁྱོན་ཀེ་ལོ་མེ་ཊར་གྲུ་བཞི་མ་ས་ཡ་ ༣།༥ ཡོད་པ་དང་། འཛམ་གླིང་གི་མཚོ་གྲུའི་བརྒྱ་ཆ་གསུམ་ལས་ ༡ མཚོ་ཁུལ་དེ་བརྒྱུད་ནས་ཚོང་འབྲེལ་གཙོས་རྒྱལ་ཁབ་ཕན་ཚུན་བར་གྱི་འབྲེལ་ལམ་མཐུད་ཀྱི་ཡོད་པ་རེད། མཚོ་ཁུལ་དེའི་བདག་དབང་རྩོད་མཁན་རྒྱ་ནག་དང་ཝི་ཏི་ནམ། དེ་བཞིན་ཐའེ་ཝན་དང་ཧྥི་ལི་པིན། བྷི་རོ་ནེ། མ་ལི་ཤི་ཡ་བཅས་ཁྱོན་རྒྱལ་ཁབ་ཁག་ ༦ ཡོད་པ་དང་། ལྷོ་རྒྱ་ནག་རྒྱ་མཚོའི་ཁུལ་ནས་ལོ་རེར་རྒྱལ་སྤྱིའི་ཚོང་འབྲེལ་གྱི་རིན་འབབ་ཨ་སྒོར་ཁྲག་ཁྲིག་ ༥ ཙམ་གྱི་ཚོང་རྫས་སྐྱེལ་འདྲེན་བྱེད་ཀྱི་ཡོད་སྟབས། མཚོ་དེ་རྒྱལ་སྤྱི་རང་བཞིན་གྱི་མཚོ་ཞིག་ཏུ་བསྒྱུར་བར་རྩོད་ལེན་བྱེད་མཁན་ཨ་རི་གཙོའི་ཡུ་རོབ་མཉམ་འབྲེལ་མཐུན་ཚོགས་དང་། ཨོ་སི་ཊོ་ལི་ཡ། རྒྱ་གར། ཨིན་རྡུ་ནེ་ཞི་ཡ། དེ་བཞིན་ཉི་ཧོང་དང་ལྷོ་ཀོ་རི་ཡ། སིང་གྷ་པོར་བཅས་རྒྱལ་ཁབ་ཁག་མང་པོ་ཞིག་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ་སྐལ་བཟང་སྦྱིན་པ།
