དྲུག་བཞིའི་དོན་རྐྱེན། ཤོག་དཀར་གསར་བརྗེ་ལས་འགུལ། ངོ་རྒོལ་དང་དྲན་ཐོ།

སློབ་དཔོན་ཆེན་མོ་ ཧོ་ཞའོ་ཆིན 何晓清 ལགས་དང་གླེང་མོལ།

 མགོ་ལོག་ལྕགས་མོས་རྒྱ་ཡིག་ནས་བསྒྱུར།

ངོ་སྤྲོད།

ད་ལོ་ནི་དྲུག་བཞིའི་དོན་རྐྱེན་བྱུང་ནས་ལོ་འཁོར་སོ་ལྔ་འཁོར་བ་དང་། ཧོང་ཀོང་གི་ཉེས་ཅན་ཕྱིར་སློག་གི་ཁྲིམས་འཆར་ལག་བསྟར་བྱས་ནས་ལོ་འཁོར་ལྔ་པ་ཡིན། མ་འོངས་པར་ཨ་རིའི་གཞུང་སྒེར་གྱི་ངོས་ནས་དུས་དྲན་སྲུང་བརྩི་ཡི་བྱེད་སྒོ་སྣ་མང་སྤེལ་རྩིས་ཡོད། དེ་རིང་བཅར་འདྲི་བྱེད་ས་ནི་སློབ་དཔོན་ཆེན་མོ་ཧོ་ཞའོ་ཆིན་ཡིན། ཁོང་མོ་ནི་ཨ་རིའི་རྒྱ་ནག་ཉམས་ཞིབ་མཐུན་ཚོགས་ཀྱི་འགན་འཛིན་ལྷན་ཚོགས་ཀྱི་ཚོགས་མི། དྲུག་བཞིའི་དོན་རྐྱེན་སྐོར་གྱི་ལོ་རྒྱུས་ཆེད་མཁས་སློབ་དཔོན་ཆེན་མོ། ཧོང་ཀོང་རྒྱ་རིགས་སློབ་ཆེན་གྱི་ལོ་རྒྱུས་སློབ་དཔོན་ཆེན་མོ། དེ་བཞིན་དྲུག་བཞིའི་དོན་རྐྱེན་དང་ཧོང་ཀོང་ལས་འགུལ་གཉིས་ཀྱི་ནང་དུ་དངོས་སུ་མཉམ་ཞུགས་བྱས་མྱོང་མཁན་སློབ་དཔོན་ཆེན་མོ་ཧོ་ཞའོ་ཆིན་ལགས་དང་མཉམ་དུ་འདས་པའི་མི་ལོ་ ༣༥ ནང་གི་དམངས་གཙོ་དང་། འགྲོ་བ་མིའི་ཐོབ་ཐང་སྐོར་ནས་གླེང་མོལ་བྱ་རྒྱུ་ཡིན།

ཕྱི་ལོ་ ༢༠༡༠ ནས་བསྟུན་མར་ལོ་ལྔའི་རིང་ཧོ་ཞའོ་ཆིན་གྱིས་ཧར་ཝི་ཌི་སློབ་ཆེན་དུ་དྲུག་བཞིའི་དོན་རྐྱེན་དང་དྲན་ཐོ་ཞེས་པའི་ལོ་རྒྱུས་ཀྱི་སློབ་ཚན་ཁྲིད་ཡོད་པ་དང། སློབ་གྲྭའི་དཔེ་མཛོད་ཁང་ནས་རྒྱུན་དུ་དྲུག་བཞིའི་སྐོར་གྱི་གནས་ཚུལ་སྒྲོག་སྦྱང་བྱས་པས་ཕྱིའི་རྒྱལ་ཁབ་ཁག་གི་སློབ་ཕྲུག་མང་པོས་བསྟོད་བསྔགས་ཀྱི་མེ་ཏོག་ཕུལ། ཁོང་མོས་དེ་ལྟར་ཧུར་ཐག་གིས་དྲུག་བཞིའི་དོན་རྐྱེན་གྱི་ལོ་རྒྱུས་འཆད་པ་དང་། དོན་རྐྱེན་སྐོར་གྱི་གནས་ཚུལ་བསྡུ་རུབ་བྱས་ཀྱང་རྒྱལ་གཅེས་རིང་ལུགས་ཀྱི་ལྟ་བ་འཛིན་མཁན་རྒྱ་རིགས་ཀྱི་གཞོན་སྐྱེས་ཕོ་མོ་མང་པོས་སློབ་དཔོན་ཆེན་མོ་ཧོ་ཞའོ་ཆིན་ནི་རྒྱལ་འཚོང་བ་ཞིག་རེད་ཅེས་སྐྱོན་བརྗོད་བྱས་ཡོད།

ཕྱི་ལོ ༢༠༡༩ ལོར་སློབ་དཔོན་ཆེན་མོ་ཧོ་ཞའོ་ཆིན་ལགས་ཧོང་ཀོང་རྒྱ་རིགས་སློབ་གྲྭ་ཆེན་མོའི་ལོ་རྒྱུས་སྡེ་ཚན་དུ་དགེ་རྒན་གྱི་ལས་གནས་ཐོག་ཕྱག་ལས་གནང། ཡིན་ནའང་། ཧོང་ཀོང་ནང་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ཁྲིམས་ལུགས་ལག་བསྟར་བྱས་པའི་རྗེས་སུ་ཕྱི་ལོ་༢༠༢༢ ལོར་ཁོང་མོར་ཐོངས་མཆན་མ་སྤྲད་པའི་ཁར། ལོ་དེའི་ལོ་མཇུག་ཏུ་ཧོང་ཀོང་རྒྱ་རིགས་སློབ་ཆེན་ནས་ཀྱང་གནས་དབྱུང་བཏང་སྟེ་ཡུལ་གྱར་བ་ཞིག་ཏུ་གྱུར། གནམ་བདེ་སྒོ་མོ་ཆེའི་དམར་གསོད་དོན་རྐྱེན་གྱི་ལོ་འཁོར་དུས་དྲན་ཐེངས་སོ་ལྔ་པར་སླེབས་སྐབས་ཨ་རིའི་རླུང་འཕྲིན་ཁང་གིས། ཡ་རབས་ཚུལ་ལྡན་གྱི་སློབ་དཔོན་ཆེན་མོ་ཧོ་ཞའོ་ཆིན་ལགས་སུ་ཆེད་དུ་བཅར་འདྲི་ཞུས་ཏེ་བཙན་བྱོལ་གྱི་ལོ་རྒྱུས་དང་འགྲུལ་བཞུད་སྐོར་ནས་གླེང་མོལ་བྱས།

ད་དུང་ཁོང་མོས་བརྗོད་རྒྱུར་ལོ་རྒྱུས་ཀྱི་བདེན་དོན་དུ་གྱུར་པའི་ལུའུ་ཞའོ་པོ་ཡིས་ཞི་བདེའི་གཟེངས་རྟགས་དང་། ལས་འགུལ་བ་ཧྥང་ཞང་ལགས་ཀྱི་རྐང་པ་གཉིས་འཐབ་འཁོར་གྱིས་མནན་པའི་གནས་ཚུལ་དེ་ཚོས་དྲུག་བཞིའི་དོན་རྐྱེན་ནི་དམར་ཤོག་ཚོགས་པས་གཞུང་འབྲེལ་གྱིས་གསར་བརྗེར་ངོ་རྒོལ་གྱི་ཟིང་འཁྲུག་ཅིག་ལ་ངོས་འཛིན་བྱས་པ་བཞིན་ཡིན་མིན་དང་། ལས་འགུལ་དེ་ནི་ཞི་བདེ་དང་འཚེ་བ་མེད་པའི་རྒྱལ་གཅེས་མང་གཙོའི་ལས་འགུལ་ཞིག་ཡིན་མིན་སྐོར་ནས་འགྲེལ་བརྗོད་བྱས།

དྲུག་བཞིའི་དོན་རྐྱེན་ནས་ཧོང་ཀོང་གི་གནད་དོན་བར་གྱི་མི་རབས་རེ་རེའི་ཡུལ་བྱོལ་གྱི་མི་ཚེ།

ཕྱི་ལོ་ ༢༠༡༤ ལོར་སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་རང་ཉིད་ཀྱི་ལོ་མང་རིང་ཞིབ་འཇུག་བྱས་པའི་ཆེད་དེབ་( གནམ་སྡེ་སྒོ་མོ་ཆེའི་ཡུལ་བྱོལ་བ-ཀྲུང་གོའི་དམངས་གཙོ་རྩོད་ལེན་གྱི་སྐད་འབོད) ཅེས་པ་ཞིག་པར་བསྐྲུན་བྱས།  ཕྱི་ལོ ༢༠༡༩ ལོར་ཁོང་མོ་ཧོང་ཀོང་གི་རྒྱ་རིགས་སློབ་གྲྭ་ཆེན་མོའི་དགེ་རྒན་ལ་གདན་ཞུ་བྱས་སྟབས་ཧོང་ཀོང་གི་ཉེས་ཅན་ཕྱིར་སློག་གི་ཁྲིམས་འཆར་གྱི་བརྒྱུད་རིམ་ཆ་ཚང་དངོས་སུ་མཐོང་མྱོང་ཡོད། ཧོང་ཀོང་བདེ་འཇགས་ཁྲིམས་ལུགས་(港版国安法) ལག་བསྟར་བྱས་རྗེས། དྲུག་བཞིའི་དྲན་གསོའི་ཚོམས་ཆེན་ཡང་མཐོང་ཡུལ་དུ་མེད་པར་གྱུར། ཧོང་ཀོང་མནའ་འབྲེལ་ཚོགས་པ་ཡང་ཁ་འཐོར་དུ་སོང་། དཔའ་བོའི་གླིང་གའི་ནང་གི་མར་མེ་ཡང་གཟིམས་ཚར་འདུག ཕྱི་ལོ ༢༠༢༢ ལོའི་ལོ་མཇུག་ཏུ་ཧོང་ཀོང་སྲིད་གཞུང་གིས་སློབ་དཔོན་ཆེན་མོ་ཧོ་ཞའོ་ཆིན་ལ་ཐོངས་མཆན་མ་སྤྲད་པ་མ་ཟད། སློབ་གྲྭའི་དགེ་རྒན་ཆེན་མོའི་ལས་གནས་ནས་གནས་དབྱུང་བཏང་འདུག

ཁོང་མོས་བརྗོད་རྒྱུར་སྐབས་དེར་ང་ལ་སྒམ་ཆུང་གཉིས་ལས་ལྷག་མེད། དབྱར་དགུན་སྟོན་དཔྱིད་ཀྱི་གྱོན་ཆས་ཡོད་ཚད་སྒམ་ཆུང་དེའི་ནང་དུ་བླུགས་ཡོད། གྱོན་ཆས་དེ་དག་འཇོག་སའི་གོས་སྒམ་མེད།  རང་ཉིད་སང་ཉིན་གང་དུ་ཡོད་མེད་ཀྱང་མི་ཤེས་པའི་གནས་སྟངས་འོག་ཏུ་ལྷག། ངས་ཉིན་མ་རེ་རེར་གནས་སྐབས་ཀྱི་སྡོད་གནས་ཙམ་ལ་སྐྱབས་བཅོལ་བྱས་པ་ཡིན། སྔོན་ཆད་ངས་ཡུལ་བྱོལ་གྱི་འཚོ་བའི་སྐོར་ནས་ང་ལ་རྒྱུས་མངའ་ཆེན་པོ་ཡོད་པར་འདོད་ཀྱི་ཡོད། ཡིན་ནའང་། ང་རང་ཆེས་དགའ་མོས་ཡོད་སའི་སློབ་གྲྭའི་དགེ་རྒན་ཆེན་མོའི་ལས་གནས་ནས་གནས་དབྱུང་བཏང་རྗེས་གར་འགྲོ་འདིར་འགྲོ་མེད་སྐབས་གཞི་ནས་ཡུལ་བྱོལ་གྱི་འཚོ་བའི་དཀའ་ཁག་དག་རྟོགས་བྱུང་།

སྔོན་ཆད་མའོ་ཙེ་ཏུང་གིས་སྲིད་དབང་བཟུང་བའི་སྐབས་བྲོས་བྱོལ་ཆེན་པོ་ཟེར་བ་ཞིག་བྱུང་ཡོད། དེ་ནི་ཕྱི་ལོ་༡༩༨༩ ལོར་ཧོང་ཀོང་ནི་དམར་ཤོག་ཚོགས་པའི་ཆབ་སྲིད་ཀྱི་ལྟ་བ་མི་མཐུན་མཁན་ཚོའི་བདེ་འཇགས་ཀྱི་བསྟི་གནས་ཤིག་ཡིན། བྱ་སེར་གྱི་ལས་འགུལ་ཞེས་པ་དེས་སློབ་ཕྲུག་ལས་འགུལ་གྱི་འགོ་ཁྲིད་མང་པོ་ཞིག་བསྐྱབས་ཐུབ་ཡོད། དེང་སང་ཧོང་ཀོང་སྲིད་དབང་ནི་རྒྱ་ནག་དམར་ཤོག་ཚོགས་པས་ཆབ་སྲིད་ཀྱི་ལྟ་བ་མི་མཐུན་མཁན་ཚོར་དྲག་གནོན་བྱ་སའི་གནས་ཤིག་ཏུ་གྱུར་ཡོད། ཧོང་ཀོང་ནི་ཡུལ་བྱོལ་སྐྱབས་བཅོལ་ཀྱི་མི་གྲངས་ཇེ་མང་དུ་གཏོང་མཁན་གྱི་གནད་དོན་དང་ཉེན་ཚབས་ཆེ་ཤོས་དེ་རེད། རྒྱ་ནག་གི་ཤེས་ཡོན་པ་མང་པོ་མི་རབས་ནས་མི་རབས་གནམ་བདེ་སྒོ་མོ་ཆེ་ནས་ཧོང་ཀོང་བར་དུ་ཡུལ་བྱོལ་སྐྱབས་བཅོལ་དུ་སོང་ཡོད། དེ་ནི་མི་སྒེར་གྱི་སྡུག་བསྔལ་ཙམ་མ་ཡིན་པར། དུས་རབས་ཧྲིལ་པོ་ཞིག་གི་སྡུག་བསྔལ་ཡིན།

གནམ་བདེ་སྒོ་མོ་ཆེ་ནས་ཧོང་ཀོང་གི་སློབ་ཆེན་བར་དུ་རང་དབང་ལྷ་མོའི་སྐུ་བརྙན་གཉིས་ས་རུ་འགྱེལ་ཡོད།

ཁོང་མོས་བརྗོད་རྒྱུར་ཕྱི་ལོ་ ༡༩༨༩ ལོར་ང་དངོས་སུ་གནམ་བདེ་སྒོ་མོ་ཆེའི་མདུན་ཐང་དུ་མེད་ནའང་ངས་གང་ཀྲིག(广州) ནས་ཧོང་ཀོང་གི་བརྙན་འཕྲིན་བརྒྱུད་ནས་དྲུག་བཞིའི་དོན་རྐྱེན་ལ་དངོས་སུ་བལྟས་པ་ཡིན། ལས་འགུལ་ཁྲོད་དུ་མཐོང་བའི་ཨ་རིའི་རང་དབང་ལྷ་མོ་ནི་དྲུག་བཞིའི་དོན་རྐྱེན་ཁྲོད་ཀྱི་མི་རབས་དེའི་རེ་སྨོན་ཡིན། སྐབས་དེར་ང་ཚོའི་རྨི་ལམ་ནི་ཀྲུང་གོ་ལ་ཀྲུང་གོའི་རང་དབང་ལྷ་མོ་ཞིག་ཡོད་རྒྱུ་དེ་ཡིན། ཡིན་ནའང་སྐབས་དེའི་རང་དབང་ལྷ་མོ་བཙན་གནོན་གྱི་སྡུག་བསྔལ་ཁྲོད་ནས་ཐལ་རྡུལ་དུ་གྱུར་སོང་། རྗེས་སུ་ཕྱི་ལོ་ ༢༠༡༩ ལོར་ང་ཧོང་ཀོང་རྒྱ་རིགས་སློབ་ཆེན་དུ་འཛུལ་ཉིན་སློབ་རའི་ཁྲོད་དུ་བཞེངས་ཡོད་པའི་ཧོང་ཀོང་གི་རང་དབང་ལྷ་མོ་མཇལ་རྒྱུ་བྱུང་། ང་ལ་གྲོགས་པོ་རྙིང་པ་ཞིག་དང་མཇལ་བ་ལྟ་བུའི་འགྲོགས་འདྲིས་ཡོད་པའི་ཚོར་བ་སྐྱེས་སོང་། སློབ་རའི་སྐྱེད་ཚལ་གྱི་སྐུ་བརྙན་དེ་རྟག་པར་མཇལ་བཞིན་ཡོད་པ་མ་ཟད། ལོ་རྟག་པར་ང་རང་དྲུག་བཞིའི་དོན་རྐྱེན་དུས་དྲན་སྲུང་བརྩིའི་ཆེད་དུ་ཧོང་ཀོང་གི་རང་དབང་ལྷ་མོའི་མདུན་དུ་འགྲོ་བཞིན་ཡོད།

ཕྱི་ལོ་ ༢༠༢༡ ལོའི་ཡེ་ཤུའི་འཁྲུངས་སྐར་དུས་ཆེན་གྱི་སྔ་ནུབ་ཏུ་ཧོངཀོང་རང་དབང་ལྷ་མོ་རྩ་བ་ནས་གཏོར་བཤིག་བཏང་འདུག ང་རང་ལོ་ན་བཅུ་གྲངས་ཀྱི་བུ་མོ་ཞིག་གི་སྐབས་ནས་ནར་སོན་ཏེ་ད་སྐབས་དགེ་རྒན་ཞིག་ལ་ཆགས་བར་ཨ་རིའི་རང་དབང་ལྷ་མོའི་སྐུ་བརྙན་མིག་མདུན་ནས་ཡལ་སོང་བ་ཐེངས་གཉིས་བྱུང་སོང་། དོན་རྐྱེན་དེ་ལྟ་བུའི་སྡུག་བསྔལ་གྱི་ཚོར་བ་ངའི་མི་ཚེའི་ནང་དུ་ཐེངས་གཉིས་ལ་བྱུང་སོང་། དེ་ལྟ་བུའི་ཐབས་ཟད་འུ་ཐུག་གི་ཚོར་སྣང་ཧ་ཅང་ཤུགས་ཆེན་བྱུང་སོང་། ང་ཚོས་མི་རབས་ནས་མི་རབས་ལ་རང་དབང་དང་དམངས་གཙོའི་ཆེད་དུ་འབད་པ་བྱེད་བཞིན་ཡོད་ཀྱང་མཐའ་མཇུག་ང་ཚོ་ཡང་ནས་བསྐྱར་དུ་ཕམ་འགྲོ་བ་ལྟ་བུའི་ཚོར་སྣང་བྱུང་སོང་།

ཕྱི་ལོ ༡༩༨༩ ལོའི་ལྷག་བསམ་ལ་རྒྱབ་འགལ་བྱས་པ་དང་། ཕྱི་ལོ་༢༠༡༩ ལོའི་ཧོང་ཀོང་གི་ལས་འགུལ།

སློབ་དཔོན་ཆེན་མོ་ཧོ་ཞའོ་ཆིན་ལགས་དངོས་སུ་གནམ་བདེ་སྒོ་མོ་ཆེའི་དོན་རྐྱེན་དང་། ཧོང་ཀོང་གི་ཉེས་ཅན་ཕྱིར་སློག་གི་ཁྲིམས་འཆར་ལག་བསྟར་གྱི་བརྒྱུད་རིམ་ནང་དུ་དངོས་སུ་མཐོང་མྱོང་བས་མི་རབས་གཉིས་ཀྱི་གཞོན་སྐྱེས་ངོ་རྒོལ་བ་དེ་ཚོའི་རྩ་བའི་ཁྱད་པར་གང་ཡིན་ནམ་ཞེས་འདྲི་སྐབས། སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་སྔོན་ཆད་དྲུག་བཞིའི་དོན་རྐྱེན་བྱུང་སྐབས་རྒྱ་ནག་གི་སློབ་ཕྲུག་ཚོ་རྒྱལ་ཁབ་ལ་དགའ་ཞེན་ཡོད། འོན་ཀྱང་ཧོང་ཀོང་གི་གཞོན་སྐྱེས་ཚོར་སྔར་བཞིན་སྲིད་གཞུང་ལ་དགའ་ཞེན་མེད་པ་དང་། ཧོང་ཀོང་གི་ལས་འགུལ་བ་ཚོས་པུས་མོ་བཙུགས་ཏེ་སྙན་ཞུ་འབུལ་བའམ་ཡང་ན་ལས་གནས་ནས་ཕྱིར་འབུད་བྱེད་ཐབས་བྱས་ཀྱང་། རྒྱ་ནག་དམར་ཤོག་ཚོགས་པས་ཆེས་དོ་ཁུར་བྱེད་པ་ནི་དབང་ཆ་ཡིན་པས་མི་མང་གི་ལས་འགུལ་དང་ལྟ་ཚུལ་སོགས་ནོར་འཁྲུལ་ཅན་ལ་ངོས་འཛིན་བྱས་ཡོད།

ཕྱི་ལོ ༢༠༡༩ ལོའི་ཧོང་ཀོང་ལས་འགུལ་ནི་ཕྱི་ལོ ༡༩༨༩ ལོའི་དོན་རྐྱེན་དང་རྩ་བ་ནས་མི་འདྲ། ཕྱི་ལོ ༡༩༨༩ ལོར་ང་ཚོའི་སེམས་སུ་རང་ཉིད་རྒྱ་ནག་རྒྱལ་ཁབ་ཀྱི་བྱིས་པ་ཞིག་ཡིན་པ་ཚོར་ཞིང་། བརྩེ་སེམས་དང་། ཡིད་ཆེས། རེ་བ་དེ་ལྟ་བུ་ཞིག་གི་ཐོག་ནས་དྲུག་བཞིའི་ལས་འགུལ་ནང་དུ་མཉམ་ཞུགས་བྱས། བློ་ཡུལ་ལས་འདས་པ་ཞིག་ལ་རྒྱ་གཞུང་གིས་སྙིང་རྗེ་མེད་པའི་ཐོག་ནས་བཙན་གནོན་བྱས་པ་དང་། ཡ་ང་བའི་གནས་ཚུལ་དེ་ནི་ངས་རྒྱུན་དུ་འཆད་བཞིན་པའི་ལྷག་བསམ་ལ་རྒྱབ་འགལ་ཞེས་པ་དེ་ཡིན། ཕྱི་ལོ ༢༠༡༩ ལོར་ངས་ཧོང་ཀོང་གི་བྱིས་པ་ཚོར་སྲིད་གཞུང་ལ་བརྩེ་སེམས་མེད་པ་ཚོར་སོང་། ཧོང་ཀོང་གི་ལས་འགུལ་བ་ཚོས་མུ་མཐུད་ནས་རྒྱ་ནག་དམར་ཤོག་གཞུང་གིས་བཙན་གནོན་མི་བྱ་རྒྱུ་དང་། རྒྱ་གཞུང་ཧོང་ཀོང་དང་འབྲེལ་བ་མེད་པ།  ཧོང་ཀོང་གི་མང་གཙོ་དང་རང་དབང་གི་ཆེད་དུ་འཐབ་རྩོད་བྱེད་འདོད་ཡོད་པ་དེ་རེད།

ཆབ་སྲིད་ཀྱི་འཕོ་འགྱུར་ཁྲོད་དུ་མི་རབས་གསར་རྙིང་གི་ལས་འགུལ་སྤེལ་ཕྱོགས་དང་ངོ་རྒོལ་བྱེད་སྟངས་སྐོར་ནས་འགྲེལ་བརྗོད་བྱེད་རྒྱུར། ཕྱི་ལོ ༢༠༡༩ ལོར་ཧོང་ཀོང་ནང་གི་ངའི་སློབ་ཕྲུག་ཚོ་ནི་ཕྱི་ལོ ༡༩༨༩ སྐབས་ཀྱི་ང་ཚོའི་མི་རབས་དང་གཏན་ནས་མི་འདྲ། སྐབས་དེར་ང་ཚོའི་སེམས་སུ་སྲིད་གཞུང་གིས་འཐབ་འཁོར་དང་མེ་མདའ་བཀོལ་སྤྱོད་བྱས་ནས་ང་ཚོ་ལ་དྲག་གནོན་བྱེད་པ་བློ་ཡུལ་དུ་དྲན་མ་སོང་། འོན་ཀྱང་། ཧོང་ཀོང་གི་སློབ་ཕྲུག་ཚོས་དྲུག་བཞིའི་དོན་རྐྱེན་སྐབས་ཀྱི་འཇིགས་སུ་རུང་བའི་གནས་ཚུལ་མཁྱེན་གསལ་ཡིན། གལ་ཏེ་རྒྱ་གཞུང་གིས་ཧོང་ཀོང་གཏོར་བཤིག་བཏང་བ་ཡིན་ན་དམར་ཤོག་ཚོགས་པས་ལག་ནས་འཛམ་གླིང་དཔལ་འབྱོར་གྱི་ལྟེ་གནས་སུ་བརྩིས་པའི་ཧོང་ཀོང་གི་གནས་བབ་ཤོར་འགྲོ་བ་སློབ་ཕྲུག་ཚོས་ཤེས་ཀྱིན་ཡོད། སློབ་ཕྲུག་ཚོ་ལ་སེམས་ཁྲལ་ཆེ་ཤོས་ནི་རྒྱ་ནག་མ་རྩ་རིང་ལུགས་ཀྱི་སྤྱི་ཚོགས་ནང་ནས་འཚར་ལོངས་བྱུང་བའི་སློབ་གྲོགས་ཚོ་རེད། རང་ཉིད་འཚར་ལོངས་བྱུང་སའི་རྒྱབ་ལྗོངས་ཀྱི་ཁོར་ཡུག་མི་འདྲ་བའི་དབང་གིས་ཧོང་གི་ལས་འགུལ་བ་ཚོ་རྒྱལ་ཁབ་ཁ་བྲལ་གྱི་ལྟ་སྟངས་འཛིན་མཁན་མང། གནད་དོན་དེའི་རིགས་གལ་ཆེན་པོར་མཐོང་གི་ཡོད། འོན་ཀྱང་ཁོ་ཚོས་ད་དུང་ཤེས་མེད་པ་ནི་རྒྱ་ནག་དམར་ཤོག་ཚོགས་པས་ཆེས་དོ་ཁུར་བྱེད་ས་ནི་རྒྱལ་ཁབ་ཀྱི་སྲིད་དབང་ཡིན་པས་སྲིད་ཇུས་འགྱུར་ལྡོག་གི་ལས་དོན་རྩ་བ་ནས་ཡོང་མི་སྲིད། སྲིད་དབང་སྲུང་སྐྱོབ་བྱེད་ཆེད་མི་མང་གི་ལྷག་བསམ་ལ་རྒྱབ་འགལ་བྱ་ཐག་ཆོད་ཡིན།

ཤོག་དཀར་གསར་རྗེ་ལས་འགུལ་ནི་མི་རབས་མང་པོ་ཞིག་གི་མཐུན་སྒྲིལ་གྱི་མཚོན་བྱ་ཡིན།

སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་ཏོག་དབྱིབས་ནད་དུག་སྐབས་སུ་དྲ་ལམ་བརྒྱུད་སློབ་ཁྲིད་བྱེད་སྐབས་ཀྱི་མྱོང་ཚོར་གསུངས་སྐབས། ནད་ཡམས་ཁྱབ་གདལ་དུ་འགྲོ་བཞིན་པའི་སྐབས་སུ། ངས་རྒྱ་ནག་སྐམ་ས་ཆེན་པོའི་སློབ་ཕྲུག་བརྒྱ་ཕྲག་མང་པོ་དང་མཉམ་དུ་དྲ་ལམ་བརྒྱུད་ནས་གླེང་མོལ་བྱས་པ་ཡིན། དེ་ནི་ངའི་མི་ཚེའི་ནང་གི་རྒྱ་སྐད་ཐོག་ནས་དྲུག་བཞིའི་དོན་རྐྱེན་སྐོར་ནས་སློབ་ཁྲིད་དང་གཏམ་བཤད་སྤེལ་བ་ཐེངས་དང་པོ་ཡིན། སྐབས་དེར་ང་ལ་འཇིགས་སྣང་ཆེན་པོ་སྐྱེས་བྱུང་། མཚན་མོ་དེར་ངས་གཏམ་བཤད་གོ་སྒྲིག་ཚོགས་པ་ལ་ལས་རིམ་དེ་ཕྱིར་འཐེན་བྱེད་ཐུབ་བམ་ཞེས་སྐད་ཆ་དྲིས་པ་ཡིན། སྐབས་དེར་ཧོང་ཀོང་བདེ་འཇགས་ཁྲིམས་ལུགས་ལག་བསྟར་བྱས་ཟིན་པས་གཏམ་བཤད་ལ་མཉམ་ཞུགས་བྱེད་མཁན་སུ་ཞིག་ཡོང་མིན་མི་ཤེས་སྟབས། ངའི་སེམས་ལ་དངངས་སྐྲག་ཆེན་པོ་སྐྱེས།

མཇུག་མཐར་རྒྱ་ནག་སྐམ་ས་ཆེན་པོའི་སློབ་མ་དེ་ཚོས་ང་ལ་ཁ་ཞེ་གཉིས་མེད་ཀྱིས་དྲི་བ་མང་པོ་དྲིས་པ་མ་ཟད། རྒན་ཧོ་ལགས་ཁྱེད་ཀྱིས་ངེས་པར་དུ་སེམས་ལ་འཛིན་དགོས་པ་ཞིག་ལ་རྒྱ་ནག་སྐམ་ས་ཆེན་པོའི་གྲོང་ཁྱེར་རིམ་པ་གཉིས་པ་དང་གསུམ་པ། བཞི་པའི་སློབ་ཕྲུག་མང་པོ་ཞིག་ལ་ཁྱེད་ཚོ་དང་འདྲ་བའི་ཕྱི་རྒྱལ་ཁབ་ཀྱི་སློབ་སྦྱོང་གི་གོ་སྐབས་ཐོབ་མེད་ཀྱང་། ང་ཚོའི་ངོས་ནས་ཁྱེད་རང་ནམ་ཡང་རྒྱལ་འཚོང་བ་ཞིག་རེད་བསམ་མྱོང་མེད། སྔོན་ཆད་ང་ཚོ་ལ་དྲུག་བཞིའི་དོན་རྐྱེན་སྐོར་གྱི་བདེན་དོན་དེ་ཤེས་རྟོགས་ཐུབ་པའི་གོ་སྐབས་ཐོབ་མ་བྱུང་། དོ་དགོང་ཤེས་རྟོགས་བྱུང་བ་དང་རིན་ཐང་ལྡན་པའི་མྱོང་ཚོར་སྐྱེས་སོང་ཟེར། ཁོ་ཚོས་སེམས་འགུལ་ཐེབས་པའི་དོན་དག་རེ་རེ་བཞིན་ང་ལ་བཤད་སོང་། ཁོ་ཚོས་ང་ལ་བཤད་རྒྱུར། ཁྱེད་ཀྱིས་ངེས་པར་དུ་ང་ཚོ་དྲན་དགོས་པ་དང་། ང་ཚོས་དེ་རིང་གི་མཚན་མོ་འདི་སེམས་ལ་ཉར་རྒྱུ་ཡིན་ཟེར། སྙན་ངག་པ་པེའུ་ཏའོ་ལགས་ཀྱིས་གསུངས་བའི་སྙན་ཚིག་(ང་ཤི་ཡང་བློས་གཏོང་མི་ཐུབ་པའི་མཚན་མོ) ཞེས་པ་ལྟར་ངས་མི་རབས་འདིའི་ན་གཞོན་ཚོ་སེམས་ཀྱི་ཟབ་སར་ཉར་ནས་ཡོད།

ཕྱི་ལོ ༡༩༨༩ ལོའི་དྲུག་བཞིའི་དོན་རྐྱེན་དང་། ཧོང་ཀོང་ནང་གི་ཉེས་ཅན་ཕྱིར་སློག་གི་ཁྲིམས་འཆར་ལག་བསྟར་ལ་ངོ་རྒོལ། ཤོག་དཀར་གསར་བརྗེའི་ངོ་རྒོལ་ལས་འགུལ་བར་གྱི་མི་རབས་འདི་དག་ལ་ཕན་ཚུན་བར་རྒྱུན་མ་ཆད་པའི་ཤུགས་རྐྱེན་ཡོད་མེད་ཀྱི་སྐོར་ནས་གསུངས་དོན། དྲུག་བཞིའི་དོན་རྐྱེན་དང་། ཧོང་ཀོང་ནང་གི་ཉེས་ཅན་ཕྱིར་སློག་གི་ཁྲིམས་འཆར་ལག་བསྟར་ལ་ངོ་རྒོལ། ཤོག་དཀར་གསར་བརྗེ་ངོ་རྒོལ་ལས་འགུལ། ཐའེ་ཝན་གྱི་ཉི་མའི་མེ་ཏོག་ལས་འགུལ་གང་ཡིན་རུང་འགྲོ་བ་མིའི་རིགས་ལ་ཐུན་མོང་དུ་ཡོད་པའི་རང་དབང་ཡིན། རང་དབང་ལ་ཕྱོགས་པ་དང་། མང་གཙོ་འདོད་པ། དྲང་བདེན་དང་བདེན་པ་དོན་དུ་གཉེར་བ་བཅས་ནི་མིའི་རིགས་ཀྱི་གཞི་རྩའི་ཐོབ་ཐང་ཡིན། རྒྱ་རིགས་གཞོན་སྐྱེས་ཁྲོད་དུ་བྱུང་བའི་ཤོག་དཀར་གསར་བརྗེ་ལས་འགུལ་དང་། ཧོང་ཀོང་གི་སློབ་ཕྲུག་ཚོའི་བསམ་བློ་གཏོང་སྟངས་ནས་རྒྱ་ནག་དམར་ཤོག་གི་སྲིད་དབང་འོག་ཏུ་མི་མང་ཀྱི་འཚོ་བ་ཅི་ལྟར་སྐྱེལ་བཞིན་ཡོད་པ་ལེགས་པར་རྟོགས་ཐུབ།

སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་བརྗོད་རྒྱུར་རྒྱ་ནག་གི་ཤོག་དཀར་གསར་བརྗེ་ལས་འགུལ་ནི་མི་ཐོག་མང་པོ་ཞིག་གི་མཉམ་འདུས་ཀྱི་སྟོབས་ཤུགས་མཚོན། ཧྲང་ཧེ་གྲོང་ཁྱེར་ནས་ཡིན་པའི་སློབ་ཕྲུག་ཚོས་བཤད་རྒྱུར། ནད་ཡམས་སྐབས་སུ་ཉམས་མྱོང་མང་པོ་ཞིག་བསགས་ཡོད་པས། ང་ཚོས་ད་གཟོད་སྐབས་དེར་ཧོང་ཀོང་གི་སློབ་མ་ཚོར་ཅི་ཞིག་དགོས་ཀྱི་ཡོད་པ་ཤེས་སོང་། སྔོན་ཆད་ང་ཚོར་མང་གཙོ་མེད་ཀྱང་ཟ་རྒྱུ་ཡོད་ཅེས་རྒྱུན་དུ་བཤད་ཀྱི་ཡོད། འོན་ཀྱང་ཏོག་དབྱིབས་ནད་ཡམས་སྐབས་སུ་མང་གཙོ་མེད་དུས་ཟ་རྒྱུ་མེད་པའི་དུས་སུ་སླེབས་མྱོང་། གྲོང་ཁྱེར་གྱི་ཕྱོགས་ཡོངས་ནས་བཀག་སྡོམ་བྱས་པ་དང་། ཡོད་ཚད་སྒོ་བརྒྱབ་རྗེས་ཟ་རྒྱུ་འཐུང་རྒྱུ་མེད་པས་ཐ་ན་ཚེ་སྲོག་ཀྱང་ཤོར་ཡོད། སྔོན་ཆད་རྒྱ་ནག་ནང་གི་མི་མང་པོས་རྒྱུན་དུ་འགྲོ་བ་མིའི་ཐོབ་ཐང་ཟེར་བ་ཅི་ཞིག་རེད། འགྲོ་བ་མིའི་ཐོབ་ཐང་ནི་ཟས་རིགས་ལ་བེད་སྤྱོད་བྱེད་ཐུབ་བམ་ཞེས་འཆད་ཀྱིན་ཡོད། སྐད་ཆ་དེ་རིགས་ད་སྐབས་རྒྱ་ནང་དུ་མཚམས་ཆད་སོང་བ་རེད། ཏོག་དབྱིབས་ནད་དུག་སྐབས་སུ་དངོས་ཡོད་གནས་སྟངས་ཤེས་ཡོད་པ་རེད། སྨན་པ་ལེ་ཝེན་ལའེ་ཡིས་ཐོབ་ཐང་རྩོད་ལེན་བྱས་མཐར་རྒྱ་གཞུང་གིས་འཛམ་གླིང་ཧྲིལ་པོའི་ཐོག་གི་མི་ཚང་མའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་ར་སྤྲོད་བྱས། ང་ཚོས་དེ་ལྟ་བུའི་གནད་དོན་ཅིའི་ཕྱིར་འགྲེལ་བརྗོད་མི་བྱེད་དམ།

ང་ལ་གཤེ་གཤེ་གཏོང་མཁན་ཚོས་ “དྲུག་བཞི” ཞེས་པའི་ཡིག་འབྲི་གཉིས་ཀྱི་ནང་དོན་མི་རྟོགས།

སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་དྲུག་བཞིའི་དོན་རྐྱེན་སྐོར་ནས་སློབ་ཁྲིད་དང་གཏམ་བཤད་བྱས་རྗེས། ཁོང་མོ་ལ་གཤེ་གཤེ་དང་འཇིགས་སྐུལ་བྱེད་མཁན་མང་པོ་བྱུང་ཡོད། ཚགས་ཤོག་ཐོག་ཏུ་ཁོང་མོ་ནི་ནུབ་ཕྱོགས་ཀྱི་གསང་མྱུལ་མ་ཞིག་ཡིན་པ་དང་། རྒྱ་ནག་ལ་རྒོལ་བའི་གནས་ཚུལ་སྤེལ་ནས་ཧོང་ཀོང་གི་བརྟན་བརླིང་ལ་གཏོར་བརླག་བཏང་བར་མ་ཟད། ཧོང་ཀོང་གི་མི་རབས་རྗེས་མ་ཚོར་སློབ་གསོ་ངན་དུག་ཅན་སྤྲོད་ཀྱིན་ཡོད་སྐོར་བརྗོད་རྗེས། ཧོང་ཀོང་རྒྱ་རིགས་སློབ་ཆེན་གྱི་སློབ་དཔོན་ཆེན་མོའི་ལས་གནས་ནས་གནས་དབྱུང་བཏང་ཡོད།

སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་ཐ་ན་དྲུག་བཞི་ཞེས་པའི་ཚིག་གཅིག་ཀྱང་ཁ་ནས་བརྗོད་མ་ཕོད་སྔོན་ང་ལ་སྐྱོན་བརྗོད་བྱེད་སྐབས། ཁོ་ཚོ་ལ་སྙིང་རྗེ་སྐྱེས་བྱུང་། གཅིག་བྱས་ན་ཁོ་ཚོས་དངོས་གནས་ཤེས་ཀྱི་མེད་པ་འདྲ། ཤེས་གསལ་ལྟར། ཁོ་ཚོས་ཐ་ན་ལོ་རྒྱུས་ཀྱི་གཞི་རྩའི་བདེན་དོན་འདི་དག་ཀྱང་ཤེས་ཀྱི་མེད། དེ་འདྲ་ཡིན་ན་ཁོ་ཚོས་དངོས་བྱུང་ལོ་རྒྱུས་ཀྱི་གཞི་རྩ་མ་ཤེས་གོང་ང་ལ་སྐྱོན་བརྗོད་བྱས་པ་རེད། ལོ་རྒྱུས་ཀྱི་དོན་དངོས་མ་ཤེས་གོང་ནས་རྒྱལ་ཁབ་ལ་དགའ་ཞེན་བྱེད་མཁན་ཚོ་ལ་སྙིང་རྗེ་དང་། མང་གཙོ་ལོགས་འགྲེལ་བྱས་ནས་མི་མང་ལ་མགོ་སྐོར་གཏོང་བ། ཕྱི་ལོ ༡༩༨༩ ལོར་མང་གཙོ་དང་རང་དབང་རྩོད་ལེན་མཁན་སློབ་ཕྲུག་ཚོ་འཐབ་འཁོར་དང་མེ་མདའི་སོ་ཁ་ནས་ཚེ་སྲོག་ཤོར་སོང་བ་རྣམས་ཀྱི་ལོ་རྒྱུས་རྫུན་བཟོ་དང་སྦས་གསང་བྱས་ནས་གནད་དོན་དེ་ནི་སློབ་མ་དང་སྲིད་གཞུང་བར་གྱི་གནད་དོན་ཙམ་དུ་བརྩིས་པ་སོགས་ཀྱི་མི་རབས་གསར་པ་རྣམས་ལ་གནས་ཚུལ་ལོག་འགྲེལ་བྱེད་བཞིན་ཡོད། དོན་དངོས་ཐོག་གནད་དོན་དེ་ནི་རང་དབང་དང་ཐོབ་ཐང་ལ་ཐུག་ཡོད།

ལོ་མང་རིང་སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་ཉམས་ཞིབ་བྱས་པ་ལྟར་ན། རྒྱ་གཞུང་གིས་དྲུག་བཞིའི་དོན་རྐྱེན་ནི་གསར་བརྗེ་ངོ་ལོག་པར་ངོས་འཛིན་བྱས་པ་ནི་ཆེད་དམིགས་ཀྱིས་ལོ་རྒྱུས་རྫུན་བཟོ་བྱས་པ་ཞིག་རེད་འདུག ཧྥང་ཀྲིན་ལགས་ཀྱིས་རྐང་པ་འཐབ་འཁོར་གྱིས་མནན་པ་དང་སྐུ་ཞབས་ལོའུ་ཞོ་པོ་ལགས་ཀྱིས་མེ་མདའ་བཅག་པ། བྱ་སྤྱོད་དེ་དག་གིས་སློབ་ཕྲུག་ཚོས་དྲག་པོས་ལས་འགུལ་ཅི་ཡང་སྤེལ་མེད་པའི་བདེན་དཔང་ཡིན། ལོ་ངོ་ ༣༥ རིང་ལ་ང་ཚོས་མགོ་བོ་གྱེན་དུ་བཀྱགས་ནས་བཤད་ཐུབ་པ་ཞིག་ལ་ང་ཚོས་ཞི་བདེ་གཙིགས་བཟུང་བྱས་ཏེ་མང་གཙོ་དང་རང་དབང་གི་ལམ་ནས་རྒྱལ་ཁབ་ལ་དུང་ཞེན་ཡོད་པའི་ལས་འགུལ་ཞིག་ཡིན།

རྒྱལ་ཆེན་དར་རྒྱས་ཟེར་བའི་དོན་དངོས་ནི་རྒྱལ་ཁབ་དང་གནམ་འོག་འཇིག་པར་བྱེད་པ་དེ་ཡིན།

རྒྱ་གཞུང་གིས་རྒྱུན་དུ་ཕྱི་ལོ ༡༩༨༩ ལོའི་རྗེས་གནམ་བདེ་སྒོ་མོ་ཆེའི་ལས་འགུལ་ལ་དྲག་གནོན་བྱས་རྗེས་རྒྱ་ནག་ནང་ཁུལ་གྱི་ཆབ་སྲིད་ལ་བརྟན་བརླིང་དང་། ལེགས་བཅོས་གུ་ཡངས་བཏང་རྗེས་དཔལ་འབྱོར་འཕེལ་རྒྱས་མྱུར་བའི་སྐོར་ཡང་ཡང་འགྲེལ་བརྗོད་བྱས་ཡོད། ཁོ་ཚོས་སྟོབས་ཆེན་རྒྱལ་ཁབ་ཅིག་གི་འཕེལ་རྒྱས་ཞེས་པ་བེད་སྤྱད་ནས་སྔོན་ཆད་གནམ་བདེ་སྒོ་མོ་ཆེའི་མདུན་ཐང་གི་དོན་རྐྱེན་འགྲིག་པ་ཞིག་ཡིན་པའི་ཁུངས་སྐྱེལ་བྱེད་ཐབས་བྱེད་ཀྱི་ཡོད། སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་སྟོབས་ཆེན་རྒྱལ་ཁབ་ཅིག་གི་འཕེལ་རྒྱས་ཀྱི་རྒྱབ་ལྗོངས་ནི་བདེན་དོན་རྩིས་མེད་བཏང་བ། རྒྱལ་ཁབ་དབང་སྒྱུར་དང་། འཛམ་གླིང་དབང་བསྒྱུར་ཡིན་པར་སྐྱོན་བརྗོད་བྱས་ཡོད། སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་མོ་རང་གི་དགེ་རྒན་སྐུ་ཞབས་ཡིའུ་ཡན་ཧྲི(余英时) ལགས་ཀྱིས་གསུངས་པའི་སྐད་ཆ་ཞིག་ལ་འགྲེལ་བརྗོད་བྱས། ཕྱི་ལོ ༡༩༤༩ ལོ་ནས་བཟུང་ཉིན་རེ་ནས་ཉིན་རེར་འགྲོ་བ་མིའི་གཞི་རྩའི་ཐོབ་ཐང་ཉུང་དུ་འགྲོ་བ་དང་། ཕྱི་ལོ ༡༩༨༩ ནས་འགྲོ་བ་མིའི་གཞི་རྩའི་ཐོབ་ཐང་ཡང་མེད་པར་གྱུར། ང་ཚོ་རྒྱལ་ཁབ་འཇིག་པའི་གནམ་འོག་གི་སྐྱོ་གར་ནས་བུད་དེ་རྩ་ཆེན་རིག་གཞུང་། གནས་ལུགས་དང་རྒྱུ་མཚན་ལྡན་པའི་རང་དབང་གི་འཚོ་བ་ཞིག་ལ་རེ་སྨོན་བཏབ་ཡོད།

གལ་ཏེ་ཕྱི་ལོ ༡༩༨༩ ལོའི་དྲུག་བཞིའི་དོན་རྐྱེན་ལས་འགུལ་ལ་དྲག་གནོན་བྱས་པ་དེ་མི་མང་གི་ཁེ་ཕན་ཆེད་དུ་ཡིན་པ་དང་། གལ་སྲིད་དྲག་གནོན་བྱས་མེད་ན་རྒྱ་ནག་གི་དཔལ་འབྱོར་ཡར་རྒྱས་དེ་འདྲ་ཡག་པོ་ཡོང་ཐབས་མེད་པ་དང་། རྒྱ་ནག་རྒྱལ་ཁབ་འདི་དེ་འདྲའི་སྟོབས་འབྱོར་ལྡན་པ་ཞིག་ཆགས་ཐུབ་ཐབས་མེད་ཅེས་བཤད་པ་ཡིན་ན། རྒྱ་ནག་དམར་ཤོག་ཚོགས་པའི་སྲིད་དབང་བརྟན་པོ་དང་དཔལ་འབྱོར་ཡར་རྒྱས་ཀྱི་ཆེད་དུ་མི་གསོད་རྒྱུ་འཕྲོག་གི་ཀུན་སྤྱོད་སྤེལ་བ་སུ་ལ་བཤད། དེ་ལྟར་ལོག་འགྲེལ་བྱེད་སྟངས་ནས་ང་ཚོས་ཅི་ཞིག་ཤེས་ཐུབ། མིའི་ཚེ་སྲོག་དང་། ཆེ་མཐོང་། ཡོད་ཚད་དངུལ་དང་དབང་ཆའི་ཆེད་དུ་བློས་གཏོང་ཐུབ་ཅེས་བཤད་པ་དང་འདྲ།

ཁྱོད་ཀྱི་སྤོ་པོ་ལ་ཟ་རྒྱུ་མེད་པ་དང་། ཁྱོད་ཀྱི་ཨ་ཕ་སློབ་གྲྭར་འགྲོ་མི་འཇུག་མཁན་དེ་སུ་རེད།

སློབ་དཔོན་ཆེན་མོ་ཧོ་ཞའི་ཆིན་ལགས་ཀྱིས་བརྗོད་དོན། གཞི་རྩའི་རིན་ཐང་ལྟ་སྟངས་ལ་འགྱུར་བ་ཆེན་པོ་སོང་བས་རྒྱ་ནག་གི་སྲོལ་རྒྱུན་རིག་གཞུང་གི་ཀུན་སྤྱོད་ཀྱི་རིན་ཐང་མང་པོ་ཞིག་རྩ་མེད་དུ་གྱུར་ཡོད། དེར་བརྟེན་རྗེས་སུ་བྱིས་པ་ཚོར་སྲོལ་རྒྱུན་གྱི་རྒྱུན་ཤེས་མེད་པ་དང་། ལས་དོན་མང་པོ་ཞིག་རང་ཉིད་ལ་ཁེ་ཕན་ཡོད་མེད་རྩིས་རྒྱག་པ་ལས་སྲོལ་རྒྱུན་གྱི་ཀུན་སྤྱོད་ཚད་ལྡན་མེད། དབང་འཛིན་མི་སྣ་ཚོས་ལོ་རྒྱུས་ཀྱི་བདེན་པ་ལ་ལོག་འགྲེལ་དང་སྒྲིབ་གཡོག་བྱས་ཏེ། མི་རབས་རྗེས་མ་རྣམས་རང་འདོད་ཆེ་བའི་མི་རིགས་ཤིག་ཏུ་བསྒྱུར་ཡོད་པར་མ་ཟད། རྒྱ་ནག་གི་སྲོལ་རྒྱུན་རིག་གཞུང་གི་རིན་ཐང་རྣམས་ཀྱང་ཡོངས་སུ་རྩ་མེད་དུ་བཟོ་བཞིན་ཡོད། དེ་ནི་རྒྱ་ནག་སྤྱི་ཚོགས་སུ་དྲི་མ་ཅན་གྱི་མི་གཤིས་དར་བ་དང་ཀུན་སྤྱོད་ཀྱི་གཞི་རྩ་མེད་པའི་དོན་རྐྱེན་མང་པོ་ཞིག་རིམ་གྱིས་བྱུང་བ་དང་འབྲེལ་བ་ཡོད།

རྒྱ་གཞུང་གིས་སྲིད་གཞུང་ལ་གནོད་པའི་དོན་རྐྱེན་རྣམས་བཀག་འགོག་བྱས་རྗེས། རང་ཉིད་ཀྱི་སྲིད་དབང་རྒྱུན་འཛིན་ཆེད་དུ་མི་རིགས་རིང་ལུགས་ཀྱི་བསམ་བློ་མཐའ་མེད་དུ་སྤེལ་བ་རེད། ཉི་ཧོང་གིས་རྒྱ་ནག་ལ་བཙན་འཛུལ་བྱས་རྗེས་རྒྱ་ནག་ཇི་ལྟར་ཡར་ལངས་བྱས་པ་སོགས་ཀྱི་སྐོར་ནས་སྐད་ཆ་བཤད་པ་ལས་གཞན་གང་ཡང་མི་བཤད་པར་མི་རབས་རྗེས་མ་རྣམས་རྒྱལ་ཁབ་ལ་དགའ་ཞེན་འཕེལ་དུ་འཇུག་གི་ཡོད།

སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་བཅར་འདྲིའི་ནང་དངོས་བྱུང་གཏམ་གླེང་ཞིག་ལུང་འདྲེན་བྱས་དོན། ཐེངས་ཤིག་ང་ལ་པིང་ཆིའུ་ཆུང་ཆུང་ཞིག་གིས་དྲི་བ་འདི་ལྟར་དྲིས་བྱུང་། ངའི་སྤོ་པོའི་དུས་སྐབས་སུ་ཟ་མ་ཟ་རྒྱུ་མེད། ངའི་ཨ་ཕའི་དུས་སྐབས་སུ་སློབ་གྲྭར་འགྲོ་ས་མེད། ད་ལྟ་ང་སློབ་གྲྭར་འགྲོ་ས་ཡོད་པ་མ་ཟད་ཟ་མ་ཡང་ཟ་རྒྱུ་ཡོད། ང་རང་ཧ་ཅང་སྐྱིད་པོ་འདུག་ཅེས་བཤད་བྱུང་། ངས་ཁོ་ལ་ཡིན་ནའང་ཁྱོད་ཀྱིས་རང་གི་སྤོ་པོར་ཟ་མ་མེད་པའི་རྒྱུ་མཚན་དང་ཨ་ཕ་སློབ་གྲྭར་འགྲོ་ས་མེད་པའི་གནད་དོན་ལ་བསམ་བློ་བཏང་མྱོང་ངམ་ཞེས་དྲིས་པ་ཡིན། སྐབས་དེར་ཁོ་ཚོ་ལ་ཟ་མ་མེད་པ་དང་སློབ་གྲྭར་འགྲོ་ས་མེད་པའི་རྒྱུ་མཚན་ནི་མུ་གེ་ཆེན་པོ་དང་། མདུན་སྐྱོད་ཆེན་པོ། གཡས་ཕྱོགས་པར་ངོ་རྒོལ། རིག་གནས་གསར་བརྗེ་སོགས་ཀྱི་རྐྱེན་གྱིས་འགྲོ་སའི་སློབ་གྲྭ་དང་ཁ་ལ་ཟ་རྒྱུ་མེད་པ་ཡིན།  སྲིད་གཞུང་གིས་དེའི་རིགས་ཀྱི་ལོ་རྒྱུས་དང་། དྲུག་བཞིའི་དོན་རྐྱེན་ལྟ་བུའི་ལོ་རྒྱུས་སྦས་སྐུང་བྱས་སྟབས་ཁྱོད་ཀྱིས་ལོ་རྒྱུས་ཅི་ཡང་ཤེས་ཀྱི་མི་འདུག་ཅེས་བཤད་པ་ཡིན།

ཕྱིར་དྲན་སེམས་ལ་བརྐོས་ནས་དོན་དངོས་ཀྱི་ལོ་རྒྱུས་གླེང་རྒྱུ་ནི་ངོ་རྒོལ་གྱི་རྣམ་པ་ཆེ་ཤོས་ཡིན།

བཅར་འདྲིའི་སྐབས་སུ་སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་དམིགས་བསལ་གྱིས་རང་གི་མི་ཚེའི་ནང་གི་དགེ་རྒན་ལོ་རྒྱུས་སྨྲ་བ་སྐུ་ཞབས་ཡུའེ་ཧྲི་དང་། རིག་གནས་གསར་བརྗེ་དང་དྲུག་བཞིའི་དོན་རྐྱེན་གྱི་ལོ་རྒྱུས་ལ་སློབ་སྦྱོང་བྱེད་བཞིན་པའི་མཁས་པ་གཞན་དག། ད་དུང་ཧོང་ཀོང་གི་མི་མང་དཀྱུས་མ་འགའ་ཤས་ཀྱིས་སེམས་ཤུགས་སྤར་བ་དང་སེམས་བཟང་གིས་རྒྱབ་སྐྱོར་གནང་བ་བཅས་ལ་ཐུགས་རྗེ་ཆེ་ཞུས་སོང་། མོས་བཤད་པ་ལྟར་ན། མི་དེ་དག་གི་བཀའ་དྲིན་ལ་བརྟེན་ནས་མོ་རང་གི་རྩ་དོན་ལ་བརྟན་པོར་གནས་པ་དང་། ཐ་ན་ཆེས་དཀའ་སྡུག་གི་དུས་སྐབས་སུའང་སྙིང་རུས་བསྐྱེད་ནས་འབད་བརྩོན་བྱས་ཡོད།  ང་ཚོ་ལ་དབང་སྒྱུར་གྱི་སྟོབས་ཤུགས་མེད་ཀྱང་ལོ་རྒྱུས་དྲན་གསོ་བྱ་རྒྱུ་ཡོད་པ་དང་། དྲན་གསོ་དང་ལོ་རྒྱུས་ནི་འཐབ་རྩོད་ཁྲོད་ཀྱི་དཔུང་གཉེན་ཡག་ཤོས་ཡིན། རྒྱུ་མཚན་ནི་འཇིག་རྟེན་ཐོག་གི་དངོས་པོ་ཁ་ཤས་འཐབ་འཁོར་གྱིས་གནོན་པ་དང་། མེ་མདས་གསོད་པ། བཙོན་འཇུག་དང་འཕྲོག་བཅོམ་ཅི་ཡང་མི་ཐུབ། དེ་ནི་ང་ཚོས་རང་དབང་ལ་རེ་སྨོན་དང་བདེན་དོན་འཚོལ་སྙེག་བྱེད་པ་དེ་ཡིན། ཀྲུང་གོའི་ཤེས་ཡོན་པ་དག་མི་རབས་ནས་མི་རབས་གཞན་ཡུལ་དུ་སྐྱབས་བཅོལ་ལ་འགྲོ་བཞིན་འདུག ཡིན་ནའང་དྲུག་བཞིའི་དོན་རྐྱེན་སྐབས་ཀྱི་རྒྱ་ནག་གི་མི་རབས་ཡིན་ན་རེད། ཧོང་ཀོང་གི་མི་རབས་ཡིན་ན་རེད། ཤོག་དཀར་གསར་བརྗེ་ལས་འགུལ་ཁྲོད་ཀྱི་མི་རབས་ཡིན་ན་རེད། ང་ཚོས་ངེས་པར་དུ་དྲན་གསོ་དང་ལོ་རྒྱུས་སེམས་ལ་བཟུང་ནས་མདུན་སྐྱོད་བྱ་རྒྱུ་ནི་ངོ་རྒོལ་གྱི་རྣམ་པ་ཆེ་ཤོས་ཡིན།

བཅར་འདྲིའི་སྐབས་སུ་སློབ་དཔོན་ཆེན་མོ་ཧོ་ཞའོ་ཆིན་ལགས་ཀྱིས་མིག་ཟུང་མཆི་མས་བརླན་ནས་སྙན་ངག་པ་པེའུ་ཏོའོ་ལགས་ཀྱིས་བརྩམས་པའི་སྙན་རྩོམ་ཞིག་མགྲིན་པ་སྐྱོ་བས་བརྣངས་ཞོར་གྱེར་འདོན་བྱས་སོང།

ང་མི་ཞིག་ཡིན་པས་ཆ་ནས
ང་ལ་བརྩེ་འདང་དགོས
བརྩེ་འདང་ཟབ་པའི་མི་དེའི་མིག་མདུན་ནས
ལྷིང་འཇགས་ཀྱི་ས་སྲོད་རོལ་རྒྱུ་ནི་ངས་རེ་སྨོན་ཡིན
འགུལ་བཞིན་པའི་སླེ་བོའི་ནང་གི་གཅེས་ཕྲུག་གི
ངུ་ངག་གི་དབྱངས་རྟ་ལ་སྒུག་ན་འདོད

རྩྭ་ཐང་དང་ས་ངོར་ཟེགས་པའི་ལོ་འདབ
ལྷག་བསམ་དང་དུང་སེམས་ཀྱི་མིང་མདངས་རེ་རེ
ངའི་འཚོ་བའི་སྙན་ངག་ཡིན
ཆེས་རྒྱུན་ལྡན་ཡིན་པའི་རེ་སྨོན་འདི་དག
ད་ཚོད་མི་ཞིག་བྱེད་པའི་ཐོབ་ཐང་ལ་གྱུར་འདུག

ང་གནས་འདི་རུ་ལངས་ཡོད་པ་ནི
དམར་གསོད་བྱས་ཟིན་པའི་དཔའ་བོ་ཞིག་གི་སྐུ་ཚབ་ཡིན
ང་ལ་དེ་ལས་གདམ་ག་གཞན་མེད
ང་ས་རུ་འགྱེལ་སོང་བའི་ཉིན་མོ་ནས
མི་གཞན་ཞིག་ངས་ཚབ་ཏུ་འགྲེང་ཡོང་ངེས
ངའི་ཕྲག་སྟེང་དུ་གཡུག་པ་རླུང་བུ་ཡིན
རླུང་ནང་དུ་རྒྱུ་བ་འོད་ཆེམ་ཆེམ་གྱི་སྐར་མ་ཡིན

མ་ཡིག་གི་འབྲེལ་ཐག https://www.voachinese.com/a/7637887.html