ཨུ་རུ་སུས་ཡུ་ཀེ་རིན་ལ་བཙན་འཛུལ་བྱས་ཏེ་ལོ་ངོ་ ༢ ལྷག་འགྲོ་བཞིན་ཡོད་པའི་མཚམས་འདིར་སུད་སི་གཞུང་གིས་ཡུ་ཀེ་རིན་གྱི་ཞི་བདེའི་ལྷན་ཚོགས་ཞེས་པའི་རྒྱལ་སྤྱིའི་རང་བཞིན་གྱི་ལྷན་ཚོགས་ཤིག་བསྡུ་ཡི་ཡོད་ཀྱང་ཨུ་རུ་སུ་དང་རྒྱ་ནག་གིས་མཉམ་ཞུགས་བྱ་རྒྱུ་མིན་སྐོར་བསྒྲགས།
ཟླ་འདིའི་ཕྱི་ཚེས་ ༡༥ དང་ ༡༦ ཉིན་སུད་སིའི་སྲིད་འཛིན་ཝའོ་ལཱ་ཨེམ་ཧེར་(Viola Amherd)ལགས་ཀྱི་གོ་སྒྲིག་འོག ཡུལ་དེའི་གྲོང་ཁྱེར་ལུ་སར་ནི་ (Lucerne) རུ་རྟེན་གཞི་བྱས་པའི་ (Burgenstock Resort)གསོལ་མགྲོན་ཁང་དུ། ཡུ་ཀེ་རིན་གྱི་ཞི་བདེའི་ལྷན་ཚོགས་ཞེས་པ་ཞིག་བསྡུ་འཆར་ཡོད་པ་དང་། ཞི་བདེ་བསྐྲུན་ཐབས་ཀྱི་ལྷན་ཚོགས་དེའི་ཐོག་ཨ་རི་གཙོ་བོར་གྱུར་བའི་རྒྱ་གར་དང་། ཇར་མ་ནི། ཁེ་ན་ཊ་སོགས་འཛམ་གླིང་རྒྱལ་ཁབ་ ༡༠༧ ཙམ་གྱི་ཆེས་མཐོའི་སྐུ་ཚབ་མཉམ་ཞུགས་གནང་འཆར་ཡོད་འདུག ཡིན་ནའང་། ཨུ་རུ་སུ་གཞུང་ནས་ཞི་བདེའི་ལྷན་ཚོགས་ཀྱི་གྲོས་གཞི་ཁག་ལ་མོས་མཐུན་བྱེད་ཀྱི་མེད་པ་དང་། རྒྱ་ནག་གཞུང་གིས་ཨུ་རུ་སུའི་ཕྱོགས་ནས་ངོས་ལེན་མེད་པ་རྒྱུ་མཚན་དུ་བྱས་ནས་འདྲ་མཉམ་གྱི་སྡིངས་ཆ་ཞིག་ཆགས་མེད་སྐོར་བརྗོད་དེ་མཉམ་ཞུགས་བྱ་རྒྱུ་མིན་སྐོར་བསྒྲགས་འདུག
སུད་སིའི་སྲིད་འཛིན་ཝའོ་ལཱ་ཨེམ་ཧེར་ལགས་ཀྱིས་ཞི་བདེའི་ལྷན་ཚོགས་དེ་ནི་ཞི་བདེ་རྒྱུན་འཁྱོངས་ཡོང་ཐབས་ཀྱི་གོམ་པ་དང་པོ་ཡིན་སྐོར་གསུངས་འདུག་ལ། སུད་སིའི་སྲིད་འཛིན་གྱིས། ཞི་བདེའི་དོན་དུ་ལྷན་ཚོགས་དེ་འདྲ་བསྡུས་པ་ཐེངས་དང་པོ་ཆགས་ཀྱི་ཡོད་སྐོར་གསུངས་འདུག དེ་བཞིན་སུད་སི་གཞུང་གིས། ད་ལན་གྱི་ལྷན་ཚོགས་ཀྱི་དམིགས་ཡུལ་གཙོ་བོ་ནི་རྒྱལ་སྤྱིའི་ཁྲིམས་དང་འཛམ་གླིང་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་གཞིར་གཞུང་གྲོས་མོལ་གྱི་ལམ་ནས་ཡུ་ཀེ་རེན་ལ་དྲང་བདེན་དང་ཞི་བདེ་བསྐྲུན་རྒྱུར་དམིགས་པ་ཞིག་ཡིན་སྐོར་འགྲེལ་བརྗོད་གནང་འདུག་ལ། ཡུ་ཀེ་རིན་གྱི་སྲིད་འཛིན་ཛེ་ལིན་སི་ཀེ་ལགས་ནས་རེ་སྐུ་གནང་བ་ལྟར། ཡུ་ཀེ་རིན་ནང་ཞི་བདེ་ཡོང་བར་ལྷན་ཚོགས་ཤིག་བསྐོང་བར་ཚད་མཐོའི་རྒྱབ་སྐྱོར་ཐོབ་སྟེ་ཐག་གཅོད་བྱུང་ཡོད་ཅིང་། ཞི་བདེ་དར་སྤེལ་དུ་གཏོང་བའི་ལྷན་ཚོགས་དེ་འཚོག་པར་རྒྱལ་སྤྱིའི་ཁྱོན་ཡོངས་ནས་རྒྱབ་སྐྱོར་ཤུགས་ཆེན་ཐོབ་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༢ ཉིན་སིངྒ་པུར་དུ་བསྡུས་པའི་སེམས་ཀྱི་ཉི་ཟླའི་གྲོས་མོལ་སྐབས་ཡུ་ཀེ་རིན་གྱི་སྲིད་འཛིན་ཛེ་ལིན་སི་ཀེ་ལགས་ཀྱིས་ཨུ་རུ་སུས་པེ་ཅིན་གཞུང་གི་ཤུགས་རྐྱེན་བེད་སྤྱད་དེ་ཕྱི་ཟླ་ ༦ པའི་ནང་གི་ཞི་བདེའི་གྲོས་མོལ་ལ་རྙོག་དྲ་བཟོ་ཡི་ཡོད་སྐོར་བརྗོད་ཡོད་པ་དང་། ཕྱི་ཚེས་ ༣ ཉིན་གྱི་རྒྱ་ནག་ཕྱི་དྲིལ་ལས་ཁུངས་ཀྱི་རྒྱུན་ལྡན་གསར་འགོད་ལྷན་ཚོགས་ཐོག ཕྱི་འབྲེལ་མགྲིན་ཚབ་མ་མའོ་ནིན་( Mao Ning)ཟེར་བ་དེས་བཙན་དབང་རིང་ལུགས་དང་སྟོབས་ཤུགས་ཀྱི་སྲིད་ཇུས་ནི་རྒྱ་ནག་གི་ཕྱི་འབྲེལ་ཐབས་ཇུས་མིན་ཚུལ་བརྗོད་དེ་སྲིད་འཛིན་ཛེ་ལིན་སི་ཀེ་ལ་རྒོལ་ལན་སློག་འདུག
ཡང་མའོ་ནིན་གྱིས། རྒྱ་ནག་ཕྱོགས་ནས་རྒྱལ་ཁབ་ཕན་ཚུན་དབར་གྱི་ཞི་བདེའི་ལྷན་ཚོགས་དེར་ཆ་རྐྱེན་གལ་ཆེན་གསུམ་ཚང་དགོས་པའི་ནན་སྐུལ་ཡང་ཡང་བྱས་ཡོད་ལ། དེ་ནི་ཨུ་རུ་སུ་དང་ཡུ་ཀེ་རིན་གཉིས་ཀས་ངོས་འཛིན་ཡོད་པ། ཕྱོགས་ཚང་མ་འདྲ་མཉམ་གྱི་ཐོག་ནས་མཉམ་ཞུགས་བྱེད་དགོས་པ། ཞི་བདེའི་འཆར་གཞི་ཚང་མའི་ཐོག་དྲང་བདེན་ལྡན་པའི་གྲོས་མོལ་བྱེད་དགོས་པ་སོགས་བརྗོད་ཡོད་སྐོར་དང་། རྒྱ་ནག་གཞུང་ནས་ཞི་བདེའི་ལྷན་ཚོགས་དེར་ཆ་རྐྱེན་དེ་གསུམ་ད་དུང་ཚང་མེད་པ་ཞིག་ཏུ་མཐོང་གི་ཡོད་སྟབས། རྒྱ་ནག་ལྷན་ཚོགས་དེའི་ནང་མཉམ་ཞུགས་བྱ་རྒྱུ་མིན་སྐོར་བརྗོད་འདུག
དེ་འབྲེལ་རྒྱ་གར་གཞུང་གིས་གསར་འགོད་གསལ་བསྒྲགས་ཤིག་སྤེལ་བའི་ནང་། ཨུ་རུ་སུ་དང་ཡུ་ཀེ་རེན་གྱི་དམག་འཁྲུག་མཚམས་འཇོག་སླད། སུད་སི་གཞུང་གིས་ཟླ་འདིའི་ནང་ཞི་བའི་ལྷན་ཚོགས་ཤིག་འཚོག་འཆར་ཡོད་པའི་གསལ་བསྒྲགས་སྤེལ་ཡོད་པ་ལྟར། ལྷན་ཚོགས་དེའི་ནང་ཨུ་རུ་སུའི་སྐུ་ཚབ་བསླེབ་ཐུབ་རྒྱུའི་རེ་བ་ཡོད་པ་དང་། རྒྱ་གར་གཞུང་གི་ངོས་ནས་ཞི་བའི་དོན་དུ་དེ་ལྟ་བུའི་ལས་འགུལ་དང་གླེང་སློང་བྱེད་པར་དགའ་བསུ་ཡོད་སྐོར་སོགས་བརྗོད་འདུག དེ་བཞིན་རྒྱ་གར་གྱི་ཕྱི་སྲིད་ལྷན་ཁང་གི་མགྲིན་ཚབ་པ་རན་དྷིར་ (Randhir Jaiswal) ལགས་ཀྱིས། ང་ཚོས་དུས་རྟག་ཏུ་གྲོས་མོལ་བྱ་དགོས་སྐོར་རྗོད་ཀྱིན་ཡོད་པ་དང་། དེ་སྔ་ཁོ་བྷན་ཧཱ་གྷན་ (Copenhagen) ཚོགས་འདུ་འཚོགས་སྐབས་མཉམ་ཞུགས་བྱས་ཡོད་པ་མ་ཟད། ཞི་བདེ་བསྐྲུན་པར་ལས་འགུལ་གང་འདྲ་སྤེལ་རུང་མཉམ་ཞུགས་བྱ་འདོད་ཡོད། ཅེས་བརྗོད་འདུག
ཕྱི་ལོ་ ༢༠༢༢ ཟླ་ ༡༢ ནང་། ཡུ་ཀེ་རིན་གྱི་སྲིད་འཛིན་ཛེ་ལན་སི་ཀེ་ལགས་ཀྱིས་དོན་ཚན་བཅུ་ཅན་གྱི་ཞི་བདེའི་གྲོས་འཆར་ཞིག་ཡོངས་བསྒྲགས་གནང་བའི་ནང་། རྡུལ་ཕྲན་མཚོན་ཆའི་བདེ་འཇགས་དང་། ཨེ་ཤ་ཡ་དང་ཨ་ཧྥེ་རི་ཁའི་རྒྱལ་ཁབ་ཚོའི་ཟས་རིགས་བདེ་འཇགས། ཡུ་ཀེ་རིན་གྱི་ནུས་ཤུགས་ཀྱི་རྨང་གཞི་འཛུགས་སྐྲུན། ཨུ་རུ་སུའི་བཙོན་འཇུག་འོག་ཡོད་པའི་ཡུ་ཀེ་རེན་གྱི་བཙོན་མ་དང་བྱིས་པ་རྣམས་ཀློད་གྲོལ་གཏོང་དགོས་པ། ཕྱི་ལོ་ ༡༩༩༡ ལོའི་ཨུ་རུ་སུ་དང་ཡུ་ཀེ་རིན་དབར་གྱི་ས་མཚམས་བསྐྱར་གསོ། ཨུ་རུ་སུའི་དམག་དཔུང་ཡུ་ཀེ་རིན་ནས་ཕྱིར་འཐེན་བྱ་རྒྱུ། ཨུ་རུ་སུས་ཡུ་ཁེ་རན་ལ་བཙན་འཛུལ་བྱས་པའི་དམག་འཁྲུག་གི་ནག་ཉེས་ལ་ཁྲིམས་ཆད་གཅོད་རྒྱུ། སྐྱེ་ཁམས་ཁོར་ཡུག་ལ་གནོད་སྐྱོན་ཕོག་པ་ཐག་གཅོད་བྱ་རྒྱུ། མ་འོངས་པར་ཨུ་རུ་སུའི་བཙན་འཛུལ་འགོག་ཐབས་ཀྱི་འགན་ལེན། ཞི་བདེའི་ལྷན་ཚོགས་བསྡུས་ཏེ་རྒྱལ་སྤྱིའི་ཆིངས་ཡིག་ཅིག་འཇོག་དགོས་པ་བཅས་བརྗོད་ཡོད་པ་དང་། ད་ལན་གྱི་ཞི་བདེའི་ལྷན་ཚོགས་ཐོག་བརྗོད་གཞི་དེ་དག་གཞི་རྩར་འཛིན་དགོས་པ་ཞིག་ཆགས་ཀྱི་ཡོད་འདུག
ཚེ་རིང་རྣམ་རྒྱལ་གྱིས་གནས་ཚུལ་ཕྱོགས་བསྡུས་བྱས།
རྩོམ་སྒྲིག་བྱེད་མཁན། པདྨ་མཚོ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
