བོད་ཉག་ཆུ་རྫོང་ཁོངས་སུ་ས་རུད་ཆུ་ལོག་བྱུང་སྟེ་སྡོད་གནས་དང་གཞུང་ལམ་སོགས་ལ་གནོད་སྐྱོན་བཟོས་ཡོད་པ་མ་ཟད་མི་གཉིས་གར་སོང་ཆ་མེད་དུ་གྱུར་ཡོད་འདུག
རྒྱ་ནག་གཞུང་ཕྱོགས་ནས་གནས་ཚུལ་ཐོན་པ་ལྟར་ན། ཆར་པ་ཤུགས་ཆེན་བབས་པའི་རྐྱེན་གྱིས་དེ་རིང་སྔ་དྲོར་བོད་ཉག་ཆུ་རྫོང་ཁོངས་སུ་ས་རུད་ཆུ་ལོག་གི་གནོད་སྐྱོན་བྱུང་སྟེ། ས་གནས་མང་ཚོགས་ཀྱི་སྡོད་གནས་ཁག་ཅིག་གནོད་སྐྱོན་བཟོས་ཡོད་པ་མ་ཟད། མི་གཉིས་གར་སོང་ཆ་མེད་དུ་གྱུར་ཡོད་འདུག
སྤྱི་ཚོགས་དྲ་ལམ་དུ་ཐོན་པའི་བརྙན་ཐུང་ཁག་གི་ནང་དུ། གཞུང་ལམ་གྱི་རླངས་འཁོར་འགའ་འདམ་རུད་ཆུ་ལོག་གིས་འཁུར་ཕྱིན་པ་དང་། རྒྱལ་ལམ་ཨང་ ༣༡༨ ཟེར་བར་གཏོར་སྐྱོན་བཏང་ཡོད་འདུག་ལ། རྒྱ་ནག་གཞུང་གིས་ད་ལྟའི་ཆར་ཡུལ་དངོས་སུ་ཞིབ་འཇུག་བྱེད་མུས་ཡིན་སྐོར་བསྒྲགས་འདུག
རྒྱ་ནག་གཞུང་གིས་བོད་ཀྱི་འབྲི་ཆུ་དང་རྨ་ཆུ། རྫ་ཆུ། རྒྱལ་མོའི་རྔུལ་ཆུ་སོགས་སུ་ཆུ་གློག་ཁང་མང་པོ་གསར་རྒྱག་བྱེད་བཞིན་ཡོད་པ་དང་། བོད་མཐོ་སྒང་དུ་འཛུགས་སྐྲུན་ཤུགས་ཆེན་བྱེད་བཞིན་ཡོད་པ་སོགས་ཀྱིས། ལོ་ལྟར་དབྱར་དུས་སུ་བོད་ཁུལ་གྱི་རྒྱུག་ཆུ་ཆེན་པོ་རྣམས་རྒྱས་ཏེ་འགྲམ་རྒྱུད་ཀྱི་གནས་སྡོད་ཞིང་འབྲོག་མང་ཚོགས་ལ་གནོད་སྐྱོན་མང་པོ་ཐེབས་ཀྱི་ཡོད་པ་རེད།
