ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གིས་༧གོང་ས་མཆོག་ལ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སྤྱན་འབུལ་ཞུས།

ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གིས་རྒྱ་ནག་ནས་རྒོལ་གཏམ་བསྒྲགས་མིན་ལ་མ་ལྟོས་པར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སྤྱན་འབུལ་ཞུས་ཡོད་པ་རེད།

ཁ་སང་རྒྱ་ནག་གཞུང་གིས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་མི་ཞུ་བ་དང་ཨ་རིའི་སྲིད་འཛིན་བྷའེ་ཌན་མཆོག་ནས་ཀྱང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་མི་བསྐྱོན་པའི་རྒོལ་གཏམ་བཏང་འདུག་ནའང་། དེ་རིང་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ནས་༧གོང་ས་མཆོག་ལ་མཇལ་ཁ་ཞུས་པ་མ་ཟད། ༧གོང་ས་མཆོག་ལ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གྱི་ངོ་བཤུ་ཞིག་སྤྱན་འབུལ་ཞུས་ནས་ལྷན་དུ་བཀའ་མོལ་ཡང་གནང་བ་དང་། དེ་རྗེས་བོད་མིའི་སྒྲིག་འཛུགས་ཀྱི་གཞུང་འབྲེལ་ཕེབས་བསུའི་མཛད་སྒོའི་སྟེང་སྐུ་ཚབ་ཚོགས་ཆུང་གི་ཚོགས་མི་ཚང་མས་བོད་དོན་ལ་རྒྱབ་སྐྱོར་སྔར་ལྷག་བྱ་རྒྱུ་མཚོན་པའི་རྒྱ་ནག་གཞུང་གིས་ཞི་བའི་ལམ་ནས་བོད་ཀྱི་བདེན་མཐའ་གསལ་དགོས་པའི་སྐུལ་འདེད་ཀྱང་གནང་སོང་།

རྒྱ་ནག་གི་སྐྱོན་བརྗོད་དེའི་ཐད་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ནི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། བོད་དེ་རྒྱ་ནག་གི་ཆ་ཤས་མིན་པ་བོད་མི་ཚོ་ཁོ་ན་ཙམ་མིན་པར། རྒྱ་རིགས་མཁས་པ་ (LAU Hon-Shiang) སོགས་ཀྱིས་ཀྱང་རྒྱའི་རྒྱལ་རབས་གང་གི་སྐབས་སུའང་བོད་དེ་རྒྱ་ནག་གི་ཆ་ཤས་མིན་པའི་ལོ་རྒྱུས་ཀྱི་བདེན་པ་ཁུངས་སྐྱེལ་ར་སྤྲོད་བྱས་ཡོད། རྒྱ་ནག་གིས་བོད་ལ་བཙན་འཛུལ་བྱས་ཏེ་བོད་མི་རྣམས་ལ་དྲག་གནོན་བྱས་དང་བྱེད་བཞིན་ཡོད་པས། རྒྱ་ནག་གཞུང་གིས་དོན་དངོས་ལ་ཁས་ལེན་དང་ཐུན་མོང་གི་གཞི་རྟེན་འཚོལ་བཞིན་ཞི་བའི་ལམ་ནས་བོད་རྒྱའི་དཀའ་རྙོག་སེལ་དགོས་པ་ནན་སྐུལ་ཞུས་སོང་།

༧གོང་ས་མཆོག་ནས་ཨ་རིའི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་མི་རྣམས་ལ་མཇལ་ཁ་སྩལ་སྐབས། ངོས་ཞོགས་པར་ཡར་ལངས་པ་ནས་སངས་རྒྱས་ཀྱི་ཆོས་ལ་ཉམས་ལེན་བྱས་ཏེ་ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་དང་ཐོབ་ཐང་གཅིག་མཚུངས་ཡོད་པའི་བསམ་བློ་གཏོང་གི་ཡོད།  འཛམ་གླིང་འདི་འགྲོ་བ་མིའི་རིགས་ལ་བདག་གིན་ཡོད་པས། ང་ཚོས་འཛམ་གླིང་འདི་ལ་གཅེས་སྤྲས་བྱེད་དགོས། ཆོས་ལུགས་དང་མི་རིགས་གང་ཡིན་ལ་མ་ལྟོས་པར་འཛམ་གླིང་གི་མི་ཚང་མ་ཞི་བདེ་མཉམ་གནས་དང་བདེ་སྐྱིད་ལྡན་རྒྱུ་ནི་ང་ཚོའི་དམིགས་ཡུལ་ཡིན། ཞེས་གསུངས། དེ་རྗེས་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་དང་ཐེངས་འདིའི་སྐུ་ཚབ་ཚོགས་ཆུང་གི་སྣེ་ཁྲིད་པ་སྐུ་ཞབས་མའེ་ཁེལ་ (Michael McCaul) ལགས་ཀྱིས། ངས་སྐུ་ཚབ་ཚོགས་ཆུང་གི་ཚོགས་མི་ཡོངས་ཀྱི་ཚབ་བྱས་ནས་ཞུ་རྒྱུར། ང་ཚོ་སྐུ་ཉིད་ལྟ་བུའི་དབུ་ཁྲིད་ཀྱི་སྐུ་མདུན་དུ་བཅར་རྒྱུ་བྱུང་བ་ནི་ཧ་ཅང་སྐལ་བ་བཟང་པོར་བརྩི་བཞིན་ཡོད། སྐུ་ཉིད་ལ་དཀའ་ངལ་མང་དག་ཅིག་འཕྲད་ཡོད་ཀྱང་། སྐུ་ཚེ་ཧྲིལ་པོར་ཞི་བདེ་དང་བྱམས་སྙིང་རྗེ། དགྲ་ཡིན་ཕྱིན་བཟོད་པ་སྒོམ་ནས་ཕེབས་དང་ཕེབས་བཞིན་པ་རེད། ངས་ནང་པའི་དགེ་འདུན་པ་དག་གི་ཀླད་པར་བརྟག་དཔྱད་བཏང་བ་མཐོང་མྱོང་། ཚན་རིག་ཐོག་ནས་སྒོམ་སྒྲུབ་ཉམས་ལེན་བྱས་པ་ཡིན་ན་སེམས་ལ་ཞི་བདེ་བསྐྲུན་ཐུབ་ཀྱི་ཡོད་པའི་སྐོར་ཀློག་མྱོང་། དེར་བརྟེན། ང་སྒོམ་སྒྲུབ་ཉམས་ལེན་དང་འབྲེལ་བའི་འཛིན་གྲྭར་ཞུགས་དགོས་བསམ་ཡོད། ཅེས་ཆོབ་གླེང་བ་དང་མུ་མཐུད། ང་ཚོ་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གིས་ཁྱེད་ཀྱི་དགོངས་བཞེད་ནང་ལྟར་ཞི་བདེ་དང་བྱམས་སྙིང་རྗེ་བརྒྱུད་འཛམ་གླིང་གི་དཀའ་ངལ་སེལ་ཐབས་བྱེད་ཀྱིན་ཡོད། ཅེས་གསུངས་སོང་། དེ་བཞིན། ལྕམ་ནན་སི་པོ་ལི་སི་དང་མེ་ཁུ་སི་(Gregory Meeks)། ཇེམ་མེག་གྷོར་ཝན་(Jim McGovern) ལགས་བཅས་ནས་བཀའ་མོལ་གནང་སོང་།

ཐེངས་འདིར་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་བཞུགས་སྒར་དྷ་སར་ཕེབས་པའི་ཐད་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཇེན་ཟེར་བས། རྒྱ་ནག་གིས་ཁྲིམས་འཆར་དེའི་ཐད་བློ་འཚབ་ཤུགས་ཆེན་སྟོན་གྱིན་ཡོད་པས། ཨ་རིས་ཤི་ཙང་ཟེར་བ་དང་འབྲེལ་ནས་རྒྱ་ནག་ལ་ཁས་ལེན་བྱས་པ་ནང་ལྟར། ༧གོང་ས་མཆོག་དང་བོད་མིའི་སྒྲིག་འཛུགས་ལ་འབྲེལ་བ་མི་བྱེད་པ་དང་། འཛམ་གླིང་ལ་ནོར་འཁྲུལ་ཅན་གྱི་བརྡ་སྟོན་མཚམས་བཞག་སྟེ། ༧གོང་ས་མཆོག་གིས་དབུ་འཁྲིད་པའི་བོད་མིའི་སྒྲིག་འཛུགས་སོགས་ནི་ཁ་བྲལ་རིང་ལུགས་པར་ངོས་འཛིན་དགོས་པ་ནན་སྐུལ་བྱེད་བཞིན་ཡོད་སྐོར་དང་། ༧གོང་ས་མཆོག་ནི་ཆོས་ལུགས་ཀྱི་དབུ་ཁྲིད་ཅིག་མ་ཡིན་པར་ཆོས་ལུགས་ཀྱི་མིང་འོག་ནས་རྒྱ་ནག་ལ་ཁ་གཏད་གཅོག་མཁན་ཞིག་ཡིན་སྐོར་སོགས་བརྗོད་འདུག་པ་མ་ཟད། ཨ་རིའི་སྲིད་འཛིན་བྷའེ་ཌན་མཆོག་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་མི་བསྐྱོན་པ་དང་། བོད་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཤིག་ཡིན་པས། སུ་གང་གིས་ཀྱང་རྒྱ་ནག་ལ་གནོད་ཤུགས་སྤྲད་ནས་བོད་དེ་རྒྱལ་ཁབ་ཅིག་ཏུ་བསྒྱུར་ཐབས་ཀྱི་ལས་དོན་རྩ་བ་ཉིད་ནས་ལམ་ལྷོང་མི་ཡོང་། ཞེས་བརྗོད་འདུག

ཟླ་འདིའི་ཕྱི་ཚེས་ ༡༢ ཉིན་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ (The Promoting a Resolution to the Tibet-China Dispute Act) གྱི་བསྐྱར་བཅོས་ཚིག་བརྗོད་ལ་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་ ༣༩༡ གིས་རྒྱབ་སྐྱོར་གནང་སྟེ་གྲོས་ཚོགས་གོང་འོག་གཉིས་ནས་གཏན་འབེབ་ཟིན་ཏེ། ཨ་རིའི་སྲིད་འཛིན་སྐུ་ཞབས་བྷའེ་ཌན་མཆོག་ནས་མཚན་རྟགས་བསྐྱོན་རྗེས་དངོས་སུ་ཨ་རིའི་ཁྲིམས་སུ་འགྱུར་གྱི་ཡོད་པ་རེད།

ཟླ་འདིའི་ཕྱི་ཚེས་ ༡༨ ཉིན་ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁེལ་ (Michael McCaul) ལགས་ཀྱིས་སྣེ་འཁྲིད་ཅིང་། གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) ལགས་དབུས་པའི་སྐུ་ཚབ་ཚོགས་ཆུང་དེ་བཞུགས་སྒར་དྷ་སར་ཕེབས་འབྱོར་བྱུང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་བོད་མིའི་སྒྲིག་འཛུགས་ཀྱི་ལས་བྱེད་རྣམ་པ་དང་། གཞུང་དང་གཞུང་ཁོངས་མིན་པའི་ཚོགས་སྡེ་ཁག དེ་བཞིན་མི་མང་དང་སློབ་ཕྲུག་བཅས་ཀྱིས་དགའ་དགའ་སྤྲོ་སྤྲོའི་ངང་ནས་ཕེབས་བསུ་ཞུས། ཉིན་རྒྱབ་ཏུ་ཚོགས་ཆུང་གིས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་བོད་མི་མང་སྤྱི་འཐུས་ལྷན་ཁང་དང་བོད་ཀྱི་འགྲེམས་སྟོན་ཁང་སོགས་སུ་འཚམས་གཟིགས་གནང་ཡོད།

གསར་འགོད་པ། སྐལ་བཟང་སྦྱིན་པ།