བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་སླར་ཡང་ཁེ་ན་ཌ་རྒྱལ་ཡོངས་སུ་རྐང་འཁོར་སྐོར་སྐྱོད་ཀྱི་ལས་འགུལ་ཞིག་སྤེལ་བཞིན་འདུག
ཟླ་འདིའི་ཕྱི་ཚེས་ ༢༣ ཉིན་ལས་འགུལ་བ་སངས་རྒྱས་སྐྱབས་ལགས་ནས་ཁེ་ན་ཌའི་གྲོང་ཁྱེར་ཝིག་ཊོ་རི་ཡ་ (Victoria) ནས་མགོ་བཙུགས་ཏེ། ཁེ་ན་ཌ་རྒྱལ་ཡོངས་སུ་བོད་རང་དབང་གི་ཆེད་དུ་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བཞིན་འདུག་ལ། ཉིན་དེའི་ཕྱི་དྲོར་སངས་རྒྱས་སྐྱབས་ལགས་ཁེ་ན་ཌའི་གྲོང་ཁྱེར་ཝན་ཁོ་ཝར་ (Vancouver) དུ་འབྱོར་ཏེ། རྒྱ་ནག་གི་གཞུང་ཚབ་ཁང་གི་མདུན་དུ་ངོ་རྒོལ་གྱི་ལས་འགུལ་སྤེལ་ཡོད་འདུག
འདི་གའི་གསར་འགོད་པར་སངས་རྒྱས་སྐྱབས་ལགས་ཀྱིས། ད་ལན་གྱི་རྐང་འཁོར་སྐོར་སྐྱོད་ཀྱི་ལས་འགུལ་དེ་བོད་དོན་དྲིལ་བསྒྲགས་དང་། བོད་རང་དབང་གི་ཆེད་དུ་དགོས་འདུན་དོན་ཚན་དྲུག་གི་ཐོག་ནས་ལས་འགུལ་སྤེལ་བཞིན་ཡོད། དོན་ཚན་དང་པོ། ༧གོང་ས་རྒྱལ་བ་རིན་པོ་ཆེ་མཆོག་ཕ་ཡུལ་དུ་ཕེབས་དགོས་ཀྱི་ཡོད་པ། དོན་ཚན་གཉིས་པ། དུས་རབས་ ༢༡ པའི་ནང་བོད་རྒྱའི་དཀའ་རྙོག་དྲང་བདེན་དང་གྲོས་མོལ་གྱི་ལམ་ནས་སེལ་དགོས་ཀྱི་ཡོད། དོན་ཚན་གསུམ་པ། ༧པཎ་ཆེན་རིན་པོ་ཆེ་མཆོག་གཙོས་པའི་སྒོ་ཤེས་རབ་རྒྱ་མཚོ་ལགས་དང་བོད་ཀྱི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས། དོན་ཚན་བཞི་པ། བོད་ཕྲུག་ས་ཡ་ ༡ ཙམ་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་པ་རྣམས་མཚམས་འཇོག་དགོས་པ། དོན་ཚན་ལྔ་པ། ཕྱི་ལོ་ ༢༠༢༤ ཟླ་ ༢ ཚེས་ ༡༤ ཉིན་ནས་བཟུང་བོད་སྡེ་དགེ་རྫོང་དུ་ཆུ་མཛོད་གསར་རྒྱག་དང་ཁུལ་དེའི་མི་མང་རྣམས་བཙན་གྱིས་གནས་སྤོར་ལས་གཞི་སྤེལ་བ་མཚམས་འཇོག་དགོས་པ། དོན་ཚན་དྲུག་པ། བོད་ནང་དུ་འགྲོ་བ་མིའི་ཐོབ་ཐང་དང་ཆོས་དད་རང་མོས་དགོས་པ་བཅས་ཡིན། ཞེས་བརྗོད་བྱུང་།
ཕྱི་ལོ་ ༢༠༢༢ ཟླ་ ༨ ཚེས་ ༡༦ ཉིན་ཟླ་གསུམ་ཙམ་རིང་སངས་རྒྱས་སྐྱབས་ལགས་ཀྱིས་དོན་ཚན་ལྔའི་འོག་ནས་ཁེ་ན་ཌའི་ཝན་ཁོ་ཝར་གྲོང་ཁྱེར་ནས་མགོ་བཙུགས་ཀྱིས་ཁེ་ན་ཌ་རྒྱལ་ཡོངས་སུ་བོད་ནང་གི་གནས་སྟངས་དྲིལ་བསྒྲགས་དང་། རྒྱལ་སྤྱིའི་ཚོགས་སྡེ་ཁག་ཏུ་བོད་དོན་འབོད་སྐུལ་ཞུ་རྒྱུའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་ཡོད་འདུག
སངས་རྒྱས་སྐྱབས་ལགས་ཀྱིས་ཕྱི་ལོ་ ༢༠༡༨ ནས་བཟུང་རེས་གཟའ་ལྷག་པ་རྟག་པར་ཁེ་ན་ཌའི་ཊོ་རོན་ཊོའི་རྒྱ་ནག་གཞུང་ཚབ་ཁང་གི་མདུན་ཐང་དུ་ངོ་རྒོལ་ལས་འགུལ་སྤེལ་ཡོད་ཅིང་། ཁོང་གིས་ཕྱི་ལོ་ ༢༠༢༠ ནས་འདི་ལོའི་ཕྱི་ཟླ་༨ བར་དུ་ཞི་བའི་གོམ་བགྲོད་ཐེངས་གསུམ་བྱས་ཏེ་རྒྱལ་སྤྱིའི་ཚོགས་སྡེ་ཁག་ཏུ་བོད་དོན་འབོད་སྐུལ་བྱས་ཡོད་འདུག་ལ། ཁོང་གིས་མུ་མཐུད་དུ་བོད་དོན་ལས་འགུལ་སྤེལ་འཆར་ཡོད་འདུག
