ཉེ་ལམ་བཞུགས་སྒར་དུ་ཕེབས་པའི་ཨ་རིའི་གྲོས་ཚོགས་འཐུས་མི་ལྔ་ཡིས་རྒྱ་ནག་གཞུང་ལ་བརྡ་བསློགས་ཏེ། བོད་དང་འཛམ་གླིང་ས་ཕྱོགས་གང་སར་ལག་བསྟར་བྱེད་བཞིན་པའི་རྒྱ་ནག་གི་ཁྲིམས་འགལ་སྒྲིག་འགལ་གྱི་བྱ་སྤྱོད་རིགས་ལ་གདོང་ལེན་དང་ཁ་གཏད་གཅོག་རྒྱུ་ཡིན་སྐོར་བརྗོད་འདུག
དེ་རིང་ཨ་རིའི་གྲོས་ཚོགས་འཐུས་མི་དང་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁེལ་ (Michael McCaul) ལགས་ཀྱིས་སྒེར་གྱི་ཨེག་སི་དྲ་ལམ་དུ། ཉེ་ལམ་སྐུ་ཞབས་མའེ་ཁེལ་རང་ཉིད་ལགས་ཀྱི་སྣེ་ཁྲིད་འོག ཨ་རིའི་གྲོས་ཚོགས་གོང་འོག་གཉིས་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཕེབས་ཏེ་༧གོང་ས་མཆོག་ལ་མཇལ་བཅར་ཞུས་པ་དེས་རྒྱ་ནག་གཞུང་ལ་ཁོ་ཁྲོང་བསླངས་ཡོད་ཀྱང་། ཨ་རིའི་གྲོས་ཚོགས་འཐུས་མི་ཁོང་གིས་བོད་དང་འཛམ་གླིང་གང་སར་རྒྱ་ནག་གི་གདུག་རྩུབ་ཆེ་ཞིང་ཁྲིམས་འགལ་སྒྲིག་འགལ་གྱི་བྱ་སྤྱོད་ལ་ཁ་གཏད་གཅོག་རྒྱུ་ཡིན་པ་ཡོངས་བསྒྲགས་བྱས་འདུག
དེ་འབྲེལ་སྐུ་ཞབས་མའེ་ཁེལ་ལགས་སྒེར་གྱི་ཨེག་སི་དྲ་ལམ་དུ། གཟའ་འཁོར་སྔོན་མའི་ནང་ངས་༧གོང་ས་ཏཱ་ལའི་བླ་མར་མཇལ་འཕྲད་གནང་བ་དེས་ཞི་ཅིན་ཕིན་ལ་ཁོ་ཁྲོང་བསླངས་ཡོད་པ་གསལ་བོ་རེད་འདུག ཁོ་དེ་མ་ཐག་ཏུ་བོད་ནང་དུ་བསྐྱོད་དེ་ང་ཚོས་བཤད་པའི་སྐད་ཆ་ལ་བརྡ་ལན་བསློགས་ཡོད། འོན་ཀྱང་། ཆོས་དད་རང་དབང་དང་དམངས་གཙོ་ག་དུས་ཡིན་ཡང་སྲིད་དབང་སྒེར་གཅོད་དང་དྲག་གནོན་ལས་རྣམ་པར་རྒྱལ་གྱི་རེད། ངས་དུས་ནམ་ཡང་བོད་ནང་དང་འཛམ་གླིང་ས་ཕྱོགས་གང་སར་རྒྱ་ནག་གི་གདུག་རྩུབ་ཆེ་ཞིང་ཁྲིམས་འགལ་སྒྲིག་འགལ་གྱི་བྱ་སྤྱོད་ཁག་ལ་གདོང་ལེན་བྱ་རྒྱུ་ཡིན། ཞེས་བརྗོད་འདུག
ཟླ་འདིའི་ཕྱི་ཚེས་ ༡༨ དང་ ༡༩ ཉིན་གཉིས་རིང་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཕེབས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་དང་བོད་མིའི་སྒྲིག་འཛུགས་སོགས་སུ་འཚམས་གཟིགས་གནང་གྲུབ་མཚམས་ཏག་ཏག་སྟེ། ཟླ་འདིའི་ཕྱི་ཚེས་ ༢༠ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་བོད་མཚོ་སྔོན་ཞིང་ཆེན་ནང་སོང་ནས། བོད་ཀྱི་དགོན་པ་དང་སློབ་གྲྭ་ཁག་ཏུ་ལག་བསྟར་བྱེད་བཞིན་པའི་ནང་བསྟན་ཆོས་ལུགས་རྒྱ་སྒྱུར་དང་། ཀྲུང་ཧཱ་མི་རིགས་གཅིག་གྱུར་གྱི་སློབ་གསོའི་ནུས་པ་སོགས་ཀྱི་སྐོར་ལ་བརྟག་ཞིབ་བྱས་ཡོད་པ་དང་། ཉམས་ཞིབ་ཁག་ཅིག་གིས་ཞི་ཡི་ལྟ་སྐོར་དེ་ནི་རྒྱལ་སྤྱིའི་སྟེང་བོད་དོན་གླེང་སློང་གིས་བོད་ལ་རྒྱབ་སྐྱོར་བྱེད་མཁན་མང་པོ་ཡོང་གི་ཡོད་པར་བརྡ་ལན་སློག་ཆེད་ཡིན་པའི་འགྲེལ་བརྗོད་བྱས་ཡོད།
ཟླ་འདིའི་ཕྱི་ཚེས་ ༡༩ ཉིན་རྒྱ་ནག་གཞུང་གིས་ཨ་རིའི་སྲིད་འཛིན་བྷའེ་ཌན་གྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་མི་བསྐྱོན་པ་དང་། ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་རྒྱ་གར་དྷ་རམ་ས་ལར་བསྐྱོད་དེ་༧གོང་ས་མཆོག་ལ་མཇལ་བཅར་མི་ཞུ་བ་སོགས་ཉེན་བརྡ་བཏང་ཡོད་ཀྱང་། སྐབས་དེར་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་དེས་༧གོང་ས་མཆོག་ལ་མཇལ་བཅར་ཞུས་པ་མ་ཟད། སྐབས་དེའི་སྐུ་ཚབ་ཚོགས་ཆུང་ནང་ཡོད་པའི་ཨ་རིའི་གྲོས་ཚོགས་འཐུས་མི་ལྔ་ཡིས་ཉེ་བའི་ཉིན་ཤས་རིང་གཅིག་རྗེས་གཉིས་མཐུད་ངང་ནས། རྒྱ་ནག་གཞུང་གིས་བོད་ནང་དྲག་གནོན་བྱས་དང་བྱེད་བཞིན་པ་དང་། རྒྱ་གར་ནང་ཡོད་པའི་བོད་མི་རྣམས་ལ་ཐུག་འཕྲད་བྱས་པར་ཉེན་བརྡ་གཏོང་གི་ཡོད་པ་སོགས་ནི་གནས་ལུགས་རྒྱུ་མཚན་དང་འགལ་ཡོད་སྟབས། ཨ་རི་དང་རྒྱལ་སྤྱིའི་སྤྱི་ཚོགས་ཀྱིས་བོད་མིའི་རྒྱབ་ཏུ་ལངས་ཏེ། རྒྱ་ནག་གཞུང་གིས་བོད་ཀྱི་ལོ་རྒྱུས་དང་བོད་མིའི་རང་ཐག་རང་གཅོད་དང་འགྲོ་བ་མིའི་ཐོབ་ཐང་སོགས་རྡོག་རོལ་གཏོང་བཞིན་པ་མཚམས་འཇོག་བྱེད་ཐབས་གནང་དགོས་སྐོར་སོགས་བརྗོད་འདུག
ཟླ་འདིའི་ཕྱི་ཚེས་ ༡༢ ཉིན་ཨ་རིའི་གྲོས་ཚོགས་གོང་མའི་ནང་གཏན་འབེབ་ཟིན་ཏེ། ད་ལྟའི་ཆར་སྲིད་འཛིན་བྷའེ་ཌན་ནས་མཚན་རྟགས་བསྐྱོན་རྗེས་དངོས་སུ་ཨ་རིའི་ཁྲིམས་སུ་འགྱུར་གྱི་ཡོད་པའི་ཁྲིམས་འཆར་དེའི་ནང་། ཨ་རིའི་གཞུང་འབྲེལ་གྱི་སྲིད་ཇུས་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གམ་ཁོང་གི་དམིགས་བསལ་སྐུ་ཚབ། དེ་བཞིན་དམངས་གཙོའི་ལམ་ནས་འོས་འདེམས་བྱུང་བའི་བོད་པའི་མགོ་ཁྲིད་དང་། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཔོན་རིགས་དབར་སྔོན་འགྲོའི་ཆ་རྐྱེན་གང་ཡང་མེད་པར་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་བར་རྒྱབ་སྐྱོར་གནང་རྒྱུ་དང་། འཛམ་གླིང་རྒྱལ་ཁབ་གཞན་དང་མཉམ་འབྲེལ་གྱི་ཐོག་ནས་བོད་རྒྱའི་དཀའ་རྙོག་སེལ་བར་རམ་འདེགས་གནང་རྒྱུ། རྒྱ་ནག་གཞུང་གིས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ལོ་རྒྱུས་སོགས་བོད་མི་མང་གི་མངོན་འདོད་བཞིན་སྦྱང་སྤྱོད་སྤེལ་གསུམ་བྱེད་དུ་འཇུག་དགོས་པ་དང་། རྒྱ་ནག་གིས་གནའ་ནས་ད་བར་བོད་དེ་རྒྱ་ནག་གི་ཆ་ཤས་ཡིན་ཚུལ་བཤད་པ་དེ་དག་ལོ་རྒྱུས་ཀྱི་ཐོག་ནས་དྲང་བདེན་མིན་པ་གསལ་འདོན་གནང་རྒྱུ་མ་ཟད། ཨ་རིས་བོད་དེ་གནའ་ནས་རྒྱ་ནག་གི་ཆ་ཤས་ཤིག་ཡིན་པར་རྩ་བ་ནས་ངོས་ལེན་མེད་ཅེས་དང་། རྒྱ་ནག་གིས་བོད་ཀྱི་ལོ་རྒྱུས་དང་རིག་གཞུང་། དགའ་ལྡན་ཕོ་བྲང་ཚུད་པའི་བོད་ཀྱི་སྒྲིག་འཛུགས་ཁག་གི་སྐོར་ལ་འཁྱོག་བརྗོད་དང་ལོག་འགྲེལ་བྱེད་མཚམས་འཇོག་དགོས་པའི་སྐོར། དེ་བཞིན་བོད་རང་སྐྱོང་ལྗོངས་ཟེར་བ་དང་བོད་རིགས་རང་སྐྱོང་ཁུལ་ཟེར་བ་ཚང་མ་བོད་ཀྱི་མངའ་ཁོངས་ཡིན་པ་སོགས་གསལ་སྟོན་གནང་ཡོད་འདུག
གསར་འགོད་པ། སྐལ་བཟང་སྦྱིན་པ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
