རྒྱ་གར་གྱིས་བོད་ཐོག་འཛིན་པའི་སྲིད་ཇུས་ལ་འགྱུར་བ་གཏོང་རན་པའི་བསམ་ཚུལ་འདོན་མཁན་མང་པོ་ཡོང་གི་འདུག

བོད་ནི་རྒྱ་གར་གྱི་བདེ་འཇགས་ལ་ཧ་ཅང་གལ་འགངས་ཆེ་བས་རྒྱ་གར་གྱིས་བོད་ཐོག་འཛིན་པའི་སྲིད་ཇུས་ལ་འགྱུར་བ་གཏོང་རན་པའི་བསམ་ཚུལ་འདོན་མཁན་མང་པོ་ཡོང་གི་འདུག

དེ་རིང་རྒྱ་གར་གྱི་རྩོམ་པ་པོ་ཁུ་ལོ་ཌི་ཨར་པེ་ (Claude Arpi) ལགས་ཀྱིས་རྒྱ་གར་གཞུང་༧གོང་ས་མཆོག་དང་ལྷན་དུ་འབྲེལ་བ་བྱེད་པར་ངོ་གནོང་མི་དགོས་ཞེས་པའི་རྩོམ་ཡིག་ཅིག་སྤེལ་ནས། ད་ལྟའི་ཆར་བོད་དོན་ཐོག་རྒྱ་གར་གཞུང་ཁུ་སིམ་སྡོད་ཀྱིན་པའི་གནས་བབ་ལ་འགྱུར་བ་གཏོང་དགོས་པ་དང་། བོད་དོན་ནི་རྒྱ་གར་གྱིས་གཡོལ་ཐབས་མེད་པའི་ཆབ་སྲིད་ཀྱི་མངོན་འདོད་ཅིག་ཏུ་འགྱུར་རྒྱུ་ཡིན་པ་སོགས་བརྗོད་འདུག

རྩོམ་པ་པོས་རྩོམ་ཡིག་དེའི་ནང་། ཉེ་ལམ་ཨ་རིའི་གྲོས་ཚོགས་གོང་འོག་གཉིས་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཕེབས་ནས་བོད་དོན་ལ་རྒྱབ་སྐྱོར་ཤུགས་ཆེན་བསྟན་པའི་ཞོར་དུ། རྒྱ་གར་གྱིས་བོད་ཐོག་བཟུང་བའི་སྲིད་ཇུས་ལ་ཉམས་ཚོད་ལངས་ཡོད་པ་མ་ཟད། ཨ་རིས་རྒྱ་གར་བོད་དོན་ཐོག་སློང་འདོད་ཡོད་པ་དང་། རྒྱ་གར་གྱིས་ཀྱང་ཨ་རིའི་སྐུ་ཚབ་ཚོགས་ཆུང་དེར་ཐུག་འཕྲད་བྱས་ཡོད་ཀྱང་། བོད་དོན་ཚིག་འབྲུ་ཙམ་ཡང་གླེང་སློང་བྱས་མེད་སྐོར་བརྗོད་འདུག

རྩོམ་པ་པོས་རྒྱ་གར་གྲོས་ཚོགས་ནང་ ཕྱི་ལོ་ ༢༠༠༦ ནས་ ༢༠༢༣ བར་བོད་རྒྱལ་ཁབ་ཀྱི་མིང་ཅི་ཙམ་གླེང་ཡོད་མེད་ལ་ཉམས་ཞིབ་བྱས་ཤིང་། ཕྱི་ལོ་ ༢༠༠༦ ནས་ ༢༠༡༢ བར་རྒྱ་གར་གྱི་གྲོས་ཚོགས་ནང་ས་མཚམས་དང་དཔལ་འབྱོར་སོགས་དང་འབྲེལ་ནས་བོད་མིང་གླེང་སློང་ཐེངས་ ༣༠ ནས་ ༤༠ བར་བྱས་ཡོད་པ་དང་། ཕྱི་ལོ་ ༢༠༡༤ དང་ ༢༠༡༥ ནང་བོད་མིང་ཁྱོན་གླེང་སློང་ཐེངས་ ༡༥ ནས་ ༡༩ བར་བྱས་པ། དེ་བཞིན། ཕྱི་ལོ་ ༢༠༢༣ ལོར་བོད་ཐེངས་ ༤ མ་གཏོགས་གླེང་མེད་པ་སོགས་གསལ་འདོན་བྱས་ཏེ། རྒྱ་གར་གྱི་བདེ་འཇགས་ལ་བོད་དོན་ཧ་ཅང་གལ་འགངས་ཆེ་བ་དང་། རྒྱ་གར་དང་བོད་བར་གྱི་ས་མཚམས་དང་འབྲེལ་ནས་ས་ཁམས་ཆབ་སྲིད་ཀྱི་ཐོག་ནས་གནད་འགག་ཅིག་ཏུ་གྱུར་ཡོད་སྟབས། རྒྱ་གར་གྱི་གཞུང་འཛིན་མགོ་ཁྲིད་དང་གྲོས་ཚོགས་འཐུས་མི་ཚོས་བོད་ཀྱི་སྐོར་ལ་གླེང་སློང་སྔར་ལྷག་བྱེད་རན་ཞིང་རིམ་བཞིན་མི་བྱེད་ཐབས་མེད་ཞིག་ཏུ་འགྱུར་རྒྱུ་ཡིན་སྐོར་བརྗོད་འདུག

ཡང་རྩོམ་དེའི་ནང་། རྒྱ་གར་རང་བཙན་ཐོབ་མ་ཙམ་ལ་བོད་གཞུང་བཀའ་ཤག་ལ་ཕྱི་འབྲེལ་གྱི་ཉམས་མྱོང་ཞན་པས། བཀའ་ཤག་གིས་མའོ་ཙེ་ཏུང་ལ་བོད་ཀྱི་ཤར་ཕྱོགས་སུ་བཙན་བཟུང་བྱས་པའི་བོད་ཀྱི་ས་ཆ་ཚུར་བོད་པར་རྩིས་སྤྲོད་མ་བྱས་ཚེ། མཇུག་འབྲས་ངན་པ་ཡོང་སྲིད་པའི་འཇིགས་སྐུལ་བྱས་པ་དང་། ཡུན་རིང་མ་འགོར་བར་ནུབ་ཕྱོགས་དང་རྒྱ་གར་སོགས་ཀྱིས་བོད་ལ་རྒྱ་ནག་གི་ཁ་རྩེད་མི་ཉན་པའི་སློབ་སྟོན་བྱས་ཡོད་སྐོར་དང་། ཕྱི་ལོ་ ༡༩༤༩ ཟླ་ ༡༡ ཚེས་ ༣ ཉིན་བོད་གཞུང་བཀའ་ཤག་གིས་ཨ་རིའི་ཕྱི་སྲིད་ལྷན་ཁང་ལ་ཡེ་གེ་བསྐུར་ནས། བོད་དང་རྒྱ་ནག་གཉིས་བར་ཆོས་དང་འཇིག་རྟེན་གང་གི་ཐད་ནས་འགལ་ཟླ་ཡིན་པ་དང་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་སྟབས། བོད་མཉམ་འབྲེལ་རྒྱལ་ཚོགས་ནང་འཇུག་པར་ཨ་རིའི་རྒྱབ་སྐྱོར་གནང་བའི་འབོད་སྐུལ་ཞུས་ཡོད་པ། དེ་བཞིན། ཕྱི་ལོ་ ༡༩༤༩ ལོར་དབྱིན་ཇིའི་གཞུང་གིས་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པ་བསྐྱར་དུ་བསྒྲགས་ཡོད་པ་སོགས་གསལ་འདུག

ཡང་ཉེ་ལམ་རྒྱ་གར་གྱི་མཉམ་འབྲེལ་རྒྱལ་ཚོགས་ཀྱི་གཞུང་ཚབ་པ་ (Dilip Sinha) ལགས་ཀྱིས། བཙན་རྒྱལ་རིང་ལུགས་ཀྱིས་བོད་ནང་དུ་རྩེད་བཞིན་པའི་རྩེད་མོ། རྒྱལ་ཁབ་ཀྱི་བདག་དབང་དང་རང་བཙན་འཐབ་རྩོད་ཅེས་པའི་དེབ་ཅིག་བརྩམས་ཏེ། བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། བོད་ཀྱི་རྟ་དམག་གིས་རྒྱ་ནག་གི་རྒྱལ་ས་ཁྲང་ཨན་བར་བཙན་འཛུལ་བྱེད་མྱོང་བ་སོགས་ཀྱི་སྐོར་གླེང་སློང་བྱས་འདུག་ལ། བོད་རྒྱ་ནག་གི་ཆ་ཤས་ཡིན་ཚུལ་བརྗོད་པ་ནི་རྒྱ་ནག་གཞུང་གིས་ཆེད་དུ་གསར་བཟོ་བྱས་པའི་སྒྲུང་ཞིག་ཡིན་པ་ལས། དོན་དངོས་ཐོག་བོད་ནི་རྒྱལ་རབས་ལོ་རྒྱུས་ལྡན་པའི་རྒྱལ་ཁབ་ཅིག་སྐོར་དང་། ཉེ་ལམ་ཨ་རིའི་གྲོས་ཚོགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་རྒྱབ་སྐྱོར་བྱས་པ་དེས་ད་སྔ་བར་འཛམ་གླིང་རྒྱལ་ཁབ་མང་པོས་བོད་དེ་རྒྱ་ནག་གི་ཆ་ཤས་ཡིན་ཚུལ་བརྗོད་པ་དེ་བདེན་པ་མིན་པའི་ཁུངས་སྐྱེལ་གསལ་སྟོན་བྱས་ཡོད་པར་བརྟེན། ད་ནི་རྒྱ་གར་ཡང་བོད་ཀྱི་གནས་བབ་ཐོག་རྒྱ་ནག་གཅིག་གི་སྲིད་ཇུས་ལ་ཁས་ལེན་བྱས་ཏེ་མི་འདུག་པར། བོད་དེ་རྒྱ་གར་གྱི་ས་ཁམས་ཆབ་སྲིད་དང་འབྲེལ་གནད་དོན་གལ་ཆེན་ཞིག་ཡིན་པའི་ངོས་འཛིན་བྱ་རྒྱུ་གལ་ཆེན་སྐོར་སོགས་བརྗོད་འདུག

གཞན་ཡང་ཉེ་ལམ་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་བཞུགས་སྒར་དུ་ཕེབས་རྗེས། རྒྱ་གར་ནང་རྩོམ་པ་པོ་དང་ཆབ་སྲིད་དཔྱད་བརྗོད་པ། གསར་འགོད་པ་སོགས་མི་མང་པོས་ད་ནི་རྒྱ་གར་གྱིས་བོད་དོན་གླེང་སློང་བྱེད་པའི་དུས་ལ་བབས་སྐོར་གྱི་བསམ་ཚུལ་དང་རྩོམ་ཡིག གསར་འགྱུར་སོགས་མི་ཉུང་བ་བཏོན་དང་འདོན་བཞིན་པ་རེད་འདུག

གསར་འགོད་པ། སྐལ་བཟང་སྦྱིན་པ།