རྒྱ་ནག་དམར་གཞུང་གིས་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་བཙན་གྱིས་སྒོ་བརྒྱབ།

རྒྱ་ནག་དམར་གཞུང་གིས་བོད་ཁུལ་དུ་སྙན་གྲགས་རྒྱས་པའི་སྒེར་གཉེར་སློབ་གྲྭ་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་དེ་རིང་ནས་བཙན་གྱིས་སྒོ་བརྒྱབ་འདུག

དེ་རིང་ཞོགས་པར་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་སྒོ་བརྒྱབ་པའི་མཇུག་བསྡོམས་ཚོགས་འདུ་བསྡུས་ཡོད་པ་དང་། སྐབས་དེར་མཚོ་སྔོན་ཞིང་ཆེན་དང་མགོ་ལོག་ཁུལ། རྨ་ཆེན་རྫོང་བཅས་ནས་ལས་ཁུངས་ཁག་ ༡༨ ཀྱི་འཐུས་ཚབ་ཡོང་ཡོད་འདུག་ལ། དེ་རིང་ཁ་སང་སློབ་གྲྭའི་ནང་སྔོག་བཤེར་དང་འདྲི་བརྩད་ནན་པོ་བྱེད་བཞིན་ཡོད་འདུག་ལ། འབྲེལ་ཡོད་ནས་སྔོག་བཤེར་འདྲི་བརྩད་ཀྱི་དམིགས་ཡུལ་ནི་ལོ་ན་ ༡༨ མ་ཟིན་པའི་གྲྭ་བཙུན་ཡོད་མེད་སོགས་ཞིབ་བཤེར་བྱེད་ཀྱི་ཡོད་པ་དང་། གལ་སྲིད་ཡོད་ན་ཆད་པ་ནན་པོ་གཅོད་རྒྱུ་ཡིན་པའི་འཇིགས་སྐུལ་བྱེད་བཞིན་ཡོད་སྐོར་འགྲེལ་བརྗོད་གནང་བྱུང་།

རྒྱ་ནག་དམར་གཞུང་གིས་བོད་ནང་གི་སྒེར་གཉེར་སློབ་གྲྭ་དང་དགོན་སྡེ་སོགས་བོད་ཆོས་དང་རིག་གཞུང་སྐད་ཡིག་བཅས་སྲུང་སྐྱོབ་བྱེད་སའི་ལྟེ་གནས་མང་པོ་གཅིག་རྗེས་གཉིས་མཐུད་དུ་བཙན་གྱིས་སྒོ་རྒྱག་གི་ཡོད་པ་ལྟར། ཟླ་འདིའི་ཕྱི་ཚེས་ ༡༢ ཉིན་སློབ་གྲྭ་འདི་འཕྲལ་དུ་སྒོ་རྒྱག་དགོས་པའི་བཙན་བཀའ་འབྱོར་ཡོད་འདུག་ལ། ལོ་མང་རིང་ནས་མགོ་ལོག་ཁུལ་གྱི་དམར་ཤོག་དྲུང་ཆེ་ལས་ཐོག་སོགས་ཀྱིས་སློབ་གྲྭ་འདི་སྒོ་རྒྱག་ཐབས་སུ་ངན་ཇུས་ཡོད་རྒུ་བཏོན་ཏེ་ཁྲིམས་གཏུགས་རབ་དང་རིམ་པར་རྒྱབ་གནོན་དང་སྐུལ་འདེད་བཏང་མཐར་ལག་བསྟར་བྱུང་བ་ཞིག་ཡིན་འདུག

རྭ་རྒྱ་གངས་ལྗོངས་ཤེས་རིག་ནོར་གླིང་ཐོག་མར་འཛུགས་མཁན་རྒན་རྭ་རྒྱ་འཇིགས་མེད་རྒྱལ་མཚན་ལགས་ནས་སྒེར་གྱི་སྐད་འཕྲིན་དུ་དེ་འབྲེལ་ཡོངས་བསྒྲགས་ཤིག་སྤེལ་བའི་ནང་། མགོ་ལོག་ཁུལ་འཇིགས་མེད་རྒྱལ་མཚན་མི་རིགས་ལས་རིགས་སློབ་གྲྭ་ལགས། ཁྱེད་རང་དགུང་གྲངས་སུམ་ཅུ་ཏག་ཏག་ལས་མ་བཞུགས་ན། ལོ་ན་གཞོན་ལ་སྐུ་ལུས་བཟང་སྒང་ཡིན་པས་ཅི་འདྲའི་ཡིད་སེམས་ཕངས་པ་ཞིག་ཡིན་མོད། མི་རྟག་པ་ནི་ནམ་ཡང་མི་རྟག་པ་ཡིན་པས། སྐད་ཅིག་སྐད་ཅིག་གིས་འཇིག་ཅིང་མི་གནས་པར་འགྱུར་བ་ནི་བཟློག་ཏུ་མེད་པའི་མི་རྟག་པའི་ཆོས་ཉིད་དོ།། ང་ཚོས་སྐྱེ་བ་སྔ་ཕྱི་ཁས་ལེན་ཞིང་ཚེ་རབས་ཕྲེང་རྒྱུད་ཀྱི་སློབ་གསོ་གཙུག་ཏུ་བཀུར་བས། སྐྱེ་བ་ཕྱི་མའི་སློབ་གསོ་ལ་སྨོན་ལམ་བརྒྱབ་ན་ཅིས་མི་ཆོག ཤི་བ་སླར་ཡང་གསོ་རྒྱུ་མེད་ན་འོ་དོད་འབོད་པས་ཅི་ཕན། དེ་བས་སྐྱེ་བ་ཕྱི་མར་ལུས་རྟེན་ཕུན་སུམ་ཚོགས་པ་ལོན་པར་སྨོན་ལམ་རྒྱག་རྒྱུ་ནི་ཆེས་ལེགས་ཤོས་ཡིན་པས། ཚང་མས་སྐྱོ་སྐྱོ་མ་གནང་བར་རང་གི་འོས་བབ་ཕྲག་ཏུ་ཁུར་བར་ཞུ། ཞེས་བརྗོད་འདུག

འབྲེལ་ཡོད་ནས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ལོ་མང་གི་གོང་ནས་བཟུང་ཤེས་རིག་ནོར་བུའི་གླིང་གི་སློབ་མ་ཚོས་བཙུགས་པའི་ཕ་སྐད་གཙང་མའི་ཚོགས་པ་ཡི་རྟགས་ཀྱི་ནོར་བུ་དང་སེངྒེ་ནི་བོད་ཀྱི་རྒྱལ་དར་གྱི་མཚོན་རྟགས་ཤིག་ཡིན་པའི་བསྙོན་འཛུགས་བྱས་ཏེ་ཁྲིམས་ལ་གཏུགས་ཡོད་པ་དང་། དེ་བཞིན་རྒན་འཇིགས་མེད་རྒྱལ་མཚན་ལགས་གངས་ལྗོངས་འབྲོག་ལས་མཐུན་གཉེར་ཁང་དང་།  མཚོ་སྔོན་ཞིང་ཆེན་བོད་ཀྱི་ཚོང་ལས་ཚོགས་པའི་དབུ་འཛིན་ཡིན་པར་ཁ་གཡར་ཏེ་དངུལ་ལྐོག་ཟ་བྱས་ཡོད་ཚུལ་གྱི་གཞི་མེད་སྐྱོན་འཛུགས་བྱས་ཡོད་ཀྱང་། ཁྲིམས་ཐོག་ནས་ནག་ཉེས་གང་ཡང་མེད་པ་གསལ་པོ་ཆགས་ཟིན་ཡོད་འདུག ཡིན་ནའང་སློབ་གྲྭ་སྒོ་རྒྱག་ཐབས་ཀྱི་བསྙོན་འཛུགས་རབ་དང་རིམ་པར་བྱས་རྗེས།  འདི་ལོའི་ཕྱི་ཟླ་ ༦ ཚེས་ ༢༨ ཉིན་རྒན་འཇིགས་མེད་རྒྱལ་མཚན་ལགས་ནས་ཁྲིམས་ཐོག་ནས་སློབ་གྲྭར་རྒྱལ་ཁ་ཐོབ་ཡོད་པའི་རྩོམ་ཡིག་ཅིག་སྤེལ་གནང་འདུག

ཟླ་གཉིས་གོང་དུ་འདི་གའི་གསར་འགོད་པས་དེ་སྔོན་རྒྱ་ནག་གཞུང་གིས་རྭ་རྒྱ་མར་སྟེང་ཆུ་མཛོད་གསར་རྒྱག་ཟིན་པའི་སྐོར་གྱི་གནས་ཚུལ་ལ་རྒྱུས་ལོན་བྱེད་སྐབས། རྒྱ་ནག་གཞུང་གིས་རྭ་རྒྱ་ཤེས་རིག་སློབ་གླིང་ལ་དམ་དྲག་ཤུགས་ཆེན་བྱེད་མུས་ཡིན་པ་མ་ཟད། རྒན་འཇིགས་མེད་རྒྱལ་མཚན་ལགས་སུ་སློབ་གྲྭ་དེ་སྒོ་རྒྱག་དགོས་པའི་ཉེན་བརྡ་ལན་འགར་བཏང་ཡོད་པ་ཤེས་རྟོགས་བྱུང་སོང་ལ། སྐབས་དེར་སློབ་གྲྭ་དེའི་དགེ་རྒན་ཆེན་མོ་གྱི་ལིང་འཇིགས་མེད་ལགས་ཀྱིས་བྲིས་པའི་གསལ་བཤད་འཕྲིན་ཡིག་ཅིག་ཏུ། ངེད་གངས་ལྗོངས་ཤེས་རིག་ནོར་བུའི་སློབ་གླིང་གིས་སྒྲུབ་བཞིན་པའི་མགོ་ལོག་ཁུལ་འཇིགས་མེད་རྒྱལ་མཚན་མི་རིགས་ལས་རིགས་སློབ་གྲྭ་འདི་མཚོ་སྔོན་ཞིང་ཆེན་དམར་ཤོག་གཞུང་གི་ཡིག་ཆའི་དགོངས་པ་ལྟར་ད་ནས་བཟུང་སྒྲུབ་མཚམས་བཞག་པ་རེད། ཅེས་བཙན་བཀའ་ནན་པོ་བཏང་ཡོད་སྐོར་བྲིས་འདུག

སློབ་གྲྭ་འདིར་དབུ་འཛིན་རྭ་རྒྱ་འཇིགས་མེད་རྒྱལ་མཚན་ལགས་ཀྱི་དབུས་སློབ་དཔོན་དམ་པ་བཛྲ་ཚུལ་ཁྲིམས་རྒྱ་མཚོ་ལགས་དང་།    སློབ་དཔོན་ཆེན་མོ་ཤེས་རབ་བསྟན་དར་ལགས། སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་ལགས་སོགས་དགེ་རྒན་དང་ལས་བཟོ་བ་བཅས་ ༥༨ དང་།  ཁྱོན་སློབ་མ་ ༡༤༠༠ མ་ཟིན་ཙམ་ཡོད་འདུག  སློབ་གླིང་འདི་ཆེད་ལས་ལས་རིགས་སློབ་གྲྭ་ཡིན་པའི་རྒྱུ་མཚན་གྱིས་བོད་ཡིག་ཆེད་སྦྱོང་འཛིན་གྲྭ་དང་།  དབྱིན་ཡིག་ཆེད་སྦྱོང་འཛིན་གྲྭ།  གློག་ཀླད་ཆེད་སྦྱོང་འཛིན་གྲྭ། བཟོ་རིག་ཆེད་སྦྱོང་འཛིན་གྲྭ།  གསོ་རིག་ཆེད་སྦྱོང་འཛིན་གྲྭ།  བརྙན་ལེན་ཆེད་སྦྱོང་འཛིན་གྲྭ། ལུས་རྩལ་ཆེད་སྦྱོང་འཛིན་གྲྭ་བཅས་ཆེད་སྦྱོང་འཛིན་གྲྭ་ ༧ དུ་ཕྱེས་ཡོད་འདུག ༡༩༩༤ ནས་ད་ལྟ་བར་དུ་ཉུང་མཐར་མཐར་ཕྱིན་སློབ་མ ༢༣༠༠ ལྷག་གི་བསླབ་པ་མཐར་སོན་ཏེ། ཉུང་མཐར་སློབ་ཆེན་སློབ་མ། ༨༠༠་དང་།  ཉུང་མཐར་ཞིབ་འཇུག་སློབ་མ་ ༥༠ ལྷག ཉུང་མཐར་སྨན་པ་ ༩༠ ཙམ། ཉུང་མཐར་གཞུང་ཞབས་པ་ ༡༡༠ ལྷག ཉུང་མཐར་སློབ་ཆེན་གྱི་དགེ་རྒན་ཚུད་པའི་དགེ་རྒན་གྲངས་ ༢༥༠ཙམ། སློབ་གཙོ་ ༡༣ ལྷག དགོན་པའི་ལས་གཉེར་བ་ ༡༡༠ ལྷག ཉུང་མཐར་ཁེ་ལས་གཉེར་མཁན་ ༢༦༠ ལྷག་གསོ་སྐྱོང་གནང་ཡོད་འདུག

ཕྱི་ལོ་ ༢༠༠༢ ཟླ་ ༦ ཚེས་ ༢༥ ཉིན་གངས་ལྗོངས་འཇིགས་མེད་རྒྱལ་མཚན་རྩྭ་ཐང་བུ་མོའི་སློབ་གྲྭ་ཞེས་པ་འདི་ཡང་གསར་འཛུགས་གནང་ཡོད་ཅིང་།  འཇིགས་མེད་རྒྱལ་མཚན་ལགས་ཀྱི་སློབ་གྲྭ་ཆེད་འཛུགས་གནང་བའི་དགོས་དམིགས་ནི་བུ་མོའི་སློབ་གསོ་ནི་ཨ་མའི་སློབ་གསོ་ཡིན་ལ།  ཨ་མའི་སློབ་གསོ་ནི་མིའི་རིགས་ཀྱི་ཆེས་ཐོག་མའི་སློབ་གསོ་ཡིན་པར་བརྟེབ། ཞིང་ཆེན་དང་ཁུལ་སོགས་ལ་ཞུ་སྐུལ་ཡུན་རིང་གནང་སྟེ་ཕྱི་ལོ་ ༢༠༠༣ ཟླ་ ༨ པར་དངོས་སུ་སློབ་མགོ་བཙུགས་ཡོད་པ་དང་། འཁྲིད་བྱ་ནི་བོད་རྒྱ་དབྱིན་གསུམ་དང་རྩིས་དངོས་རྫས་གསུམ།  ས་ཁམས་དང་ལོ་རྒྱུས།     ཆབ་སྲིད་སོགས་ལོ་དགུའི་འོས་འགན་སློབ་དེབ་ཆ་ཚང་དང་།   གཞན་སློབ་ཕྱིའི་སློབ་དེབ་སུམ་རྟགས་དག་གསུམ་དང་སྙན་ངག་ཚད་མ་སོགས་དང་།  ལྷག་པར་དུ་དེང་རབས་དང་སྲོལ་རྒྱུན་གྱི་ཁྲིད་ཐབས་ཟུང་འབྲེལ་སྒོས་སུམ་རྟགས་དག་གསུམ་དང་སྙན་ངག་ལོ་རྒྱུས་སོགས་ལ་ཚད་མ་རིག་པའི་སྒྲོས་ཀྱིས་བརྒྱན་བསླབ་ཡོད་འདུག དང་ཐོག་སློབ་གྲྭ་དེ་ཡ་གླིང་མཐུན་སྒྲིལ་ཚོགས་པས་(Associazione per la Solidarietà Internazionale in Asia)གཙོ་འགན་བཞེས་ཏེ་ཨ་རིའི་ཀུན་ཕན་ཐེབས་རྩ་ཚོགས་པ་(Trace Foundation)དང་ཧྥིན་ལན་གཞུང་ཚབ་ཁང་།   ཧྥིན་ལན་གཞུང་ཚབ་ཁང་ཆེན་མོ་བཅས་ཀྱིས་མཐུན་འགྱུར་རོགས་རམ་གནང་ཡོད་ཀྱང་། ཕྱིས་སུ་རྒྱ་ནག་དམར་གཞུང་གིས་ཕྱིའི་རོགས་དངུལ་རྣམས་བཀག་སྡོམ་བྱས་ཏེ་རྨ་ཆེན་རྫོང་སློབ་གསོ་ཁང་གིས་སློབ་གྲྭ་དེ་གཞུང་བཞེས་བཏང་ཡོད་འདུག

རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་ནི་ཕྱི་ལོ་ ༡༩༩༤ ཟླ་༨ པར་མགོ་ལོག་ཁུལ་མི་དམངས་སྲིད་གཞུང་ཟེར་བས་ཆོག་མཆན་སྤྲད་དེ་དངོས་སུ་བཙུགས་ཤིང་། མཚོ་སྔོ་་ཞིང་ཆེན་ཡོངས་ཀྱི་ཆེས་ཐོག་མའི་སྒེར་བཙུགས་སློབ་གྲྭ་དེ་ཡིན་འདུག ཕྱི་ལོ ༢༠༠༡ ལོའི་ཟླ་ ༤ཚེས་ ༡༤ཉིན་ཁུལ་མི་དམངས་སྲིད་གཞུང་གིས་ཆོག་མཆན་སྤྲད་དེ་ཆེད་ལས་མཐོ་འབྲིང་དུ་བསྒྱུ་ར། ཕྱི་ལོ་ ༢༠༠༢ ལོར་འཇིགས་མེད་རྒྱལ་མཚན་སྒེར་བཙུགས་སློབ་གྲྭ་ཞེས་པའི་མིང་ཡང་འཇིགས་མེད་རྒྱལ་མཚན་ཕན་བདེ་སློབ་གྲྭ་ཞེས་པར་བཅོས། ༢༠༠༣ལོར་མཚོ་སྔོན་ཞིང་ཆེན་དམངས་སྲིད་ཐིང་ཟེར་བས་དམངས་ཁྲོད་དོ་དམ་རྩ་འཛུགས་ཀྱི་དམངས་ཕན་ལས་ཁུངས་སུ་བདམས། ༢༠༠༦ ལོའི་ཟླ་༣ཚེས་༧ཉིན་ཀྲུང་ཧྭ་ཆེད་ལས་སློབ་གསོ་སྡེ་ཁག་གིས་ཀྲུང་ཧྭ་ཆེད་ལས་སློབ་གསོའི་མཚོ་སྔོན་ཚོད་ལྟའི་སློབ་གྲྭ་རུ་བསྒྱུར། སློབ་གླིང་དེ་ནི་བོད་ཡུལ་་ན་ཆེས་མིང་དུ་གྲགས་པའི་བོད་ཡིག་ཆེད་སྦྱོང་གི་སློབ་གྲྭ་ཡག་ཤོས་ཤིག་ཏུ་ངོས་འཛིན་བྱེད་ཀྱི་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།