ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་འོས་བསྡུ་ནི་འཛམ་གླིང་གི་རྒྱལ་ཁབ་མང་པོ་ཞིག་གི་སྲིད་འབྱོར་གཉིས་ལ་འབྲེལ་བ་ཆེན་པོ་ཆགས་ཡོད་འདུག
2024 United States presidential election. Photo :NEWSNATION
གསར་འགོད་པ་དཔལ་ལྡན་གྱིས་ཕྱོགས་སྒྲིག་བྱས།
ཨ་རིའི་ལས་ཐོག་སྲིད་འཛིན་རྗོ་བྷའེ་ཌིན་མཆོག་གིས་ཕྱི་ལོ་ ༢༠༢༤ ཟླ་ ༡༡ ཚེས་ ༥ ཉིན་ཨ་རིའི་སྲིད་འཛིན་སྐབས་ ༤༧ པའི་འོས་འགྲན་ལས་ཕྱིར་འཐེན་བྱས་ཏེ། དམངས་གཙོ་ཚོགས་པའི་ལས་ཐོག་སྲིད་འཛིན་གཞོན་པ་ཀ་མ་ལ་ཧེ་རི་སི་ (Kamala Harris) མཆོག་དམངས་གཙོ་ཚོགས་པའི་སྲིད་འཛིན་འོས་མིར་བདམས་ཏེ། ཕྱི་ལོ་ ༢༠༢༤ ལོའི་བྷའེ་ཌིན་དང་ཊོམ་ཕུ་གཉིས་ཀྱི་འོས་བསྡུའི་རྒྱལ་ཕམ་རྩོད་པའི་འགྲན་སྐོར་གཉིས་པ་དེ་མཇུག་རྫོགས་ནའང་། འདི་ལོའི་ཨ་རིའི་སྲིད་འཛིན་གྱི་འོས་བསྡུ་དེ་ཕྱི་ཟླ་ ༡༡ ཚེས་ ༥ བྱ་རྒྱུ་ཡིན་ཞིང་། འོས་བསྡུ་དེ་འཛམ་གླིང་གི་སྲིད་འབྱོར་རིག་གསུམ་གྱི་འཕེལ་འགྲིབ་ལ་འབྲེལ་བ་དམ་ཟབ་དང་། རྒྱལ་སྤྱི་ཡོངས་ནས་དོ་སྣང་ཆེན་པོས་ལྟ་ཉན་བྱ་སའི་ལོ་རྒྱུས་རང་བཞིན་ལྡན་པའི་འོས་བསྡུ་ཞིག་ཏུ་ངོས་འཛིན་བྱེད་ཀྱི་ཡོད་པ་རེད།
ཨ་རིའི་སྲིད་འཛིན་ཟུར་བ་སྐུ་ཞབས་ཊོམ་ཕུ་མཆོག་གིས། འདི་ལོའི་འོས་བསྡུ་དྲིལ་བསྒྲགས་སྐབས་དོན་ཚན་ཉེར་བཞི་ཁས་ལེན་བྱས་ནས། ཨ་རིའི་སྲིད་འབྱོར་སོགས་ཀྱི་ཐད་ལ་སྔར་ལས་ལྷག་པའི་འོས་འགན་གཉེར་རྒྱུ་ཡིན་སྐོར་བརྗོད་འདུག་ལ། ཁས་ལེན་དམ་བཅའ་དེ་དག་གི་ཁྲོད། ནག་ཉེས་ཅན་དང་ཁྲིམས་འགལ་གྱི་ཐོག་ནས་ཨ་རིར་གནས་སྡོད་བྱེད་མུས་ཡིན་པའི་མི་རྣམས་འཛིན་བཟུང་དང་ཕྱོགས་ཡོངས་ནས་ས་གནས་རེ་རེའི་ཐོན་ཁུངས་དང་ཡོང་བབ་ཐོག་ལ་ཤུགས་སྣོན། ཨ་རིའི་རྒྱལ་སྲུང་དང་བདེ་འཇགས་ཀྱི་སྲིད་ཇུས། དེ་བཞིན་དྲག་སྤྱོད་པ་འགོག་སྲུང་སླད་མཐའ་མཚམས་བརྟན་སྲུང་བགྱིས་ཏེ། རྒྱལ་ཁབ་གཞན་གྱི་གནས་སྤོར་བ་རྣམས་འགོག་ཐབས། ཁྲལ་བསྡུ་ཇེ་ཉུང་དང་ལས་ཀའི་ཁྲིམས་ལུགས་ཀྱི་དུས་ཡུན་རྒྱ་སྐྱེད་དེ་ཨ་རིའི་སྤྱི་དམངས་ཀྱི་འཚོ་བ་ཡར་སྐྱེད་གཏོང་ཐབས། རྒྱ་ནག་ལ་ཚོང་འབྲེལ་གྱི་མ་འཇོག་ཆེ་ཤོས་འཇོག་མུས་ཡིན་པ་ལས་ཕྱིར་འཐེན། དེ་བཞིན་ཨུ་ཡུ་གཉིས་ཀྱི་གནད་དོན་ལ་ཚོད་འཛིན་བྱེད་ཐབས། ཨ་རིའི་མི་དམངས་ཕལ་བའི་བདེ་སྡུག་དང་འཚོ་གནས་ཡར་སྐྱེད་བྱ་རྒྱུ་སོགས་ཡིན་འདུག
ཆབ་སྲིད་དབྱེ་ཞིབ་མང་པོ་ཞིག་གིས། འདི་ལོར་ཊོམ་ཕུ་ཡིས་ཕྱི་སྲིད་དང་། གནས་སྤོར། ཤེས་འཕྲོད། ཚོང་དོན། སྤྱི་དམངས་བདེ་འཇགས་སོགས་ཚུད་པའི་ཁས་ལེན་དམ་བཅའ་མང་དག་ཅིག་ནི། ཕྱི་ལོ་ ༢༠༡༦ ལོར་སྲིད་འཛིན་འོས་བསྡུ་སྐབས་ཀྱི་དམ་བཅའ་དེ་ལས་ལྷག་པའི་གསར་པ་དང་དམིགས་གསལ་ཞིག་མེད་པའི་སྐྱོན་བརྗོད་བྱེད་ཀྱིན་ཡོད་འདུག་ལ། འདས་ལོའི་འོས་བསྡུ་དྲིལ་བསྒྲགས་སྐབས་ཀྱང་། ཊོམ་ཕུ་ཨ་རིའི་སྤྱི་མཐུན་ཚོགས་པའི་སྲིད་འཛིན་གྱི་འོས་མིར་ལངས་བ་དེ་ཨ་རི་ཉམས་རྒུད་དུ་གཏོང་འདོད་པ་ཡིན་པས། ཕྱི་ལོ་ ༢༠༢༠ ལོ་བཞིན་ཨ་རི་བ་ཡོངས་སྔོན་ཐོན་དང་འཕེལ་རྒྱས་གཏོང་བར་རྒྱུན་མཐུད་ནས་མཉམ་རུབ་ཀྱི་ཐོག་འཐབ་རྩོད་བྱ་དགོས་ཤིང་། དམངས་གཙོ་ཚོགས་པའི་ལས་དོན་མཇུག་སྐྱོང་བྱ་བཅུག་དགོས་སྐོར་སོགས་འཆད་མཁན་མང་དག་ཅིག་བྱུང་ཡོད།
ཨ་རིའི་ལས་ཐོག་སྲིད་འཛིན་གཞོན་པ་དང་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཀ་མ་ལ་ཧེ་རི་སི་ལགས་ཀྱིས། ཁོས་མོས་ཨ་རིའི་ཕྱོགས་ཡོངས་ཀྱི་བདེ་དོན་དང་བདེ་འཇགས་སླད། མཐའ་མཚམས་བརྟན་སྲུང་དང་ལྷག་པར་ཨ་རིའི་ལྷོ་རྒྱུད་ཀྱི་ས་མཚམས་བརྟན་སྲུང་གིས། ནག་ཚོང་དང་དྲག་སྤྱོད་པ། བུད་མེད་དང་གཡོག་པོ་ཚོང་འགྲེམས་རིགས་བཀག་སྡོམ་ནན་མོ། བུད་མེད་ཀྱི་མངལ་སྦྲུམ་ཐོབ་ཐང་། ཡུ་ཁེ་རིན་དང་ཨི་སི་རིལ་གཉིས་ཀྱི་བདེ་འཇགས་དང་མི་དམངས་ཕལ་བའི་ཆེད་ཕྱི་སྲིད་ལས་དོན་གྱི་ཐོག་ནས་དམག་འཁྲུག་ཇེ་ཆུང་དུ་གཏོང་ཐབས་ཚུད་པའི་ཨ་རིའི་ཚོང་དོན་དང་། དམག་དོན། བདེ་སྲུང་། ཤེས་ཡོན་དང་སློབ་གྲྭའི་འཛུགས་སྐྲུན་སོགས་ཀྱི་ཐད་སྔར་ལས་ལྷག་པའི་ནུས་པ་གདོན་རྒྱུ་ཡིན་པའི་དམ་བཅའ་བཞག་འདུག
དེ་སྔ་གནད་དོན་དབྱེ་ཞིབ་པ་མང་པོ་ཞིག་གིས་དམངས་གཙོ་ཚོགས་པའི་འོས་མི་སྐུ་ཞབས་བྷའེ་ཌིན་མཆོག་ལ་སྲིད་འཛིན་གྱི་རྒྱལ་ཁ་འཐོབ་རྒྱུའི་རེ་བ་བྱེད་ཀྱི་ཡོད་ཀྱང་། ད་ལྟ་ལྕམ་ཧེ་རི་སི་སྲིད་འཛིན་འོས་མིར་ལངས་ཡོད་པའི་ཁར། ཊོམ་ཕུ་ལ་མེ་མདའ་འཕངས་པའི་དོན་རྐྱེན་གྱི་འབྲས་བུ་དྲང་ཕྱོགས་ནས་ཐོན་ཏེ། ཁོ་ལ་རྒྱབ་སྐྱོར་བྱེད་མཁན་ཇེ་མང་དུ་ཕྱིན་ཡོད་པས། འདི་ལོའི་ཨ་རིའི་སྲིད་འཛིན་གྱི་འོས་བསྡུ་དེ་ཚོད་དཔག་དཀའ་བ་ཞིག་ཡིན་པའི་ཚོད་དཔག་བྱེད་ཀྱི་ཡོད་ཀྱང་། སྲིད་ཟུར་ཊོམ་ཕུའི་དེ་སྔ་སྲིད་འཛིན་སྐབས་ཀྱི་ལས་དོན་གྲུབ་སྐབས། ཡུལ་མི་མང་པོ་ཞིག་ལ་ཕོག་ཐུབ་བཏང་ཡོད་པའི་སྐྱོན་བརྗོད་ཀྱི་འོག་ནས། འདི་ལོར་སླར་ཡང་དམངས་གཙོ་ཚོགས་པར་རྒྱལ་ཁ་འཐོབ་རྒྱུའི་རེ་བ་བཅང་གི་འདུག
འཛམ་གླིང་རྒྱལ་ཁབ་མང་པོ་ཞིག་གི་སེམས་འཚབ་བྱེད་ས་ཆེ་ཤོས་ཤིག་ནི། ཨ་རིའི་སྲིད་འཛིན་ཟུར་པ་སྐུ་ཞབས་ཊོམ་ལགས་ཀྱིས་དེ་སྔ་སྲིད་འཛིན་གྱི་ལས་གནས་འཛིན་སྐབས། ནུབ་ཆིངས་སྒྲིག་འཛུགས་དང་འབྲེལ་ལམ་སྲ་བརྟན་བཟུང་མེད་པའི་ཁར། སྐབས་དེར་ནུབ་ཆིངས་སྒྲིག་འཛུགས་ཀྱི་ཚོགས་ཁོངས་རྒྱལ་ཁབ་དག་གིས་ཨ་རི་དང་ནུབ་ཆིངས་མཉམ་འབྲེལ་གྱིས་རྒྱལ་ཁབ་དེ་དག་གི་བདེ་འཇགས་ལ་སྲུང་སྐྱོབ་བྱེད་ཐུབ་པའི་བསམ་བློ་དེ་དོར་ཡོད་པས། གནད་དོན་དབྱེ་ཞིབ་པ་ཁག་གིས་འདི་ལོའི་ཨ་རིའི་འོས་བསྡུའི་ཁྲོད། སྐུ་ཞབས་ཊོམ་ལགས་སུ་སྲིད་འཛིན་གྱི་རྒྱལ་ཁ་ཐོབ་ན། དེ་ནི་ནུབ་ཆིངས་སྒྲིག་འཛུགས་དང་ཨ་རི་བར་འབྲེལ་ལམ་བརྟན་པོ་ཚུགས་ཐབས་ལ་འབད་དགོས་པའི་གནད་དོན་གལ་ཆེན་ཞིག་ཏུ་འགྱུར་སྲིད་ཡོད་པའི་གླེང་སློང་བྱེད་ཀྱི་འདུག
ཨ་རིའི་སྲིད་འཛིན་ཟུར་པ་ཊོམ་ཕུ་མཆོག་གིས་ཕྱི་ལོ་ ༢༠༠༠ དང་ ༢༠༡༡ ལོར་ཨ་རིའི་སྲིད་འཛིན་གྱི་འོས་མིར་ལངས་ཡོད་ཀྱང་ཕྱིས་སུ་ཕྱིར་འཐེན་བྱས་ཡོད་འདུག་ལ། ཕྱི་ལོ་ ༢༠༡༦ ལོར་ཨ་རིའི་སྲིད་འཛིན་གྱི་འོས་མིར་ལངས་ཏེ་འོས་བསྡུའི་རྒྱལ་ཁ་ཐོབ་ནས་ཨ་རིའི་སྲིད་འཛིན་དུ་འདེམས་ཐོན་བྱུང་། ༢༠༢༠ ལོར་བསྐྱར་དུ་སྲིད་འཛིན་འོས་མིར་ལངས་ཡོད་ཀྱང་འོས་བསྡུར་ཕམ། ད་ལན་བསྐྱར་དུ་སྲིད་འཛིན་གྱི་འོས་མིར་ལངས་ཏེ་འོས་བསྡུའི་དྲིལ་བསྒྲགས་བྱེད་མུས་ཡིན་པ་རེད།
ལྕམ་ཀ་མ་ལ་ཧེ་རི་སི་ནི་ཨ་རིའི་ཁ་ལི་ཧྥོར་ནེ་ཡ་མངའ་སྡེའི་ཨོག་ལན་ཌི་གྲོང་ཁྱེར་དུ་རྒྱ་གར་གྱི་ཨ་མ་ཞིག་དང་ཇ་མེ་ཁའི་སྐྱབས་བཅོལ་བའི་ཕ་ཞིག་གི་བུ་མོར་སྐྱེས། ཁོང་གིས་ཨ་རིའི་སྲིད་འཛིན་གཞོན་པ་ཐེངས་བཞི་བཅུ་ཞེ་དགུ་བ་དང་། ཨ་རིའི་ལོ་རྒྱུས་ཁྲོད་ཀྱི་ཆེས་མཐོའི་བུད་མེད་སྲིད་འཛིན་དང་ཨ་རིའི་ཨ་ཧྥེ་རི་ཁ་དང་ཨེ་ཤ་ཡའི་མི་རིགས་ཀྱི་སྲིད་འཛིན་གཞོན་པ་ཐེངས་དང་པོ་ཡིན། ཁོ་མོ་ནི་མང་གཙོ་ཚོགས་པའི་ཚོགས་མི་དང་། ༢༠༡༧ ནས ༢༠༢༡ བར་ཨ་རིའི་ལྷོ་ཕྱོགས་མངའ་སྡེ་ཁ་ལི་ཧྥོར་ནེ་ཡའི་གྲོས་ཚོགས་འཐུས་མི། དེ་བཞིན་ཁེ་ལི་ཧྥི་ནི་ཡའི་སྤྱི་ཁྱབ་ཁྲིམས་རྩོད་པ་གནང་ཡོད་པ་མ་ཟད། འདི་ལོར་ཨ་རིའི་དམངས་གཙོ་ཚོགས་པའི་སྲིད་འཛིན་གྱི་འོས་མིར་གྱུར།
