༧གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་དྷ་སར་ཞབས་སོར་བདེ་བར་འཁོད།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་ཨ་རིའི་ནང་གི་སྨན་བཅོས་དང་ཡུ་རོབ་ནང་གི་མཛད་འཕྲིན་ཁག་ལེགས་པར་གྲུབ་སྟེ་ཕྱིར་བཞུགས་སྒར་དུ་ཕེབས་པར་བོད་གཞུང་མང་གཉིས་ཀྱིས་དགའ་དད་སྤྲོ་གསུམ་གྱི་ངང་ནས་ཕེབས་བསུ་ཞུས་སོང་།

དེ་རིང་ཕྱི་ཚེས་ ༢༨ ཉིན་གྱི་སྔ་དྲོའི་ཆུ་ཚོད་ ༨ པ་ཙམ་གྱི་ཐོག་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ཀང་ར་གྷ་གྷལ་གནམ་ཐང་དུ་ཞབས་སོར་བདེ་བར་འཁོད་བྱུང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས། དྷ་སའི་ཉེ་འགྲམ་དང་ཕྱོགས་མཐའ་ཁག་ནས་ཡོང་བའི་སེར་སྐྱ་མི་མང་བཅས་ཀྱིས་ཕེབས་བསུ་རྒྱ་ཆེར་ཞུས་སོང་།

འདི་གའི་གསར་འགོད་པས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་སུ་ཡུན་རིང་རྗེས་ནས་༧གོང་ས་མཆོག་ཞལ་མཇལ་བྱུང་བར་ཚོར་སྣང་ག་རེ་བྱུང་སྐོར་དྲིས་པར་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཕེབས་པའི་ཟླ་བ་གཉིས་ཙམ་གྱི་རིང་དྷ་རམ་ས་ལ་སྟོང་ལྷང་ལྷང་རེད། དེ་རིང་༧གོང་ས་མཆོག་དྷ་སར་ཞབས་སོར་འཁོད་དེ་ཞལ་མཇལ་བྱུང་སྐབས། བོད་མི་ཡོངས་ཀྱི་སེམས་ནང་དུ་ཞི་བདེ་དང་བདེ་སྐྱིད་བག་ལྷོད་འབྱུང་གི་འདུག ང་ལའང་ཚོར་བ་དེ་འདྲ་བྱུང་། ཅེས་འགྲེལ་བརྗོད་གནང་བྱུང་།

ཨ་རུ་ན་ཅལ་ནས་ཕེབས་བསུ་བཅར་བའི་བླ་མ་ངག་དབང་ནོར་བུ་ལགས་སུ་བཀའ་འདྲི་བྱས་པར་ཁོང་གིས། དེ་རིང་ཧ་ཅང་དགའ་བོ་བྱུང་། ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་འདི་འདྲ་ཕེབས་ཏེ་ཨ་རིར་རྒྱུན་རིང་ཞབས་པུས་སྨན་བཅོས་བྱེད་དགོས་བྱུང་བ་རེད། བོད་ཕྱི་ནང་གཉིས་དང་། ཨ་རུ་ན་ཅལ། ཧི་མ་ལ་ཡའི་རི་རྒྱུད། ནང་པ་སངས་རྒྱས་པའི་དད་ལྡན་མི་མང་གི་བསོད་ནམས་ཀྱི་ཐུགས་རྗེ་ལ་བརྟེན་ནས་༧སྐུའི་ཞབས་པུས་སྨན་བཅོས་ཧ་ཅང་ཡག་པོ་བྱུང་། དེ་བཞིན་ཨ་རི་ནས་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལ་ཞབས་སོར་འཁོད་པ་དང་བསྟུན། ཨ་རུ་ན་ཅལ་མི་མང་ཡོངས་ཀྱིས་ཕྱི་ཟླ་ ༩ ཚེས་ ༦ ཉིན་ཐུགས་རྗེ་ཆེན་པོའི་བཀའ་དབང་དང་། ཕྱི་ཚེས་ ༧ ཉིན་བརྟན་བཞུགས་བསྟར་འབུལ་གྱི་སྐལ་བཟང་གོ་སྐབས་ཐོབ་པར་ཧ་ཅང་རྩ་ཆེན་པོ་དང་བཀའ་དྲིན་ཆེན་པོ་རེད་བསམ་གྱི་ཡོད། སྤྱིར་ང་ཚོའི་མོན་ཡུལ་ནི་༧རྒྱལ་བ་སྐུ་ཕྲེང་གོང་མ་རིམ་བྱོན་དང་དམིགས་བསལ་འབྲེལ་བ་ཡོད་པ་མ་ཟད། བླ་སློབ་ཀྱི་ཐོག་ནས་ཧ་ཅང་བཀའ་དྲིན་ཆེན་པོ་ཆགས་བསྡད་ཡོད། དེར་བརྟེན་སྐྱེ་བ་ཚེ་རབས་མང་པོའི་རྟེན་འབྲེལ་ཞིག་ཆགས་སོང་བསམ་པའི་དགའ་ཚོར་བྱུང་། དེ་རིང་འདིར་ཡོད་པའི་བརྟན་བཞུགས་དང་བཀའ་དབང་གོ་སྒྲིག་ཚོགས་ཆུང་ཚོགས་མི་རྣམས་ཨ་རུ་ན་ཅལ་གྱི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་གཙོས་ཨ་རུ་ན་ཅལ་མི་མང་གི་ཚབ་བྱས་ཏེ་ཕེབས་བསུ་དང་འཚམས་འདྲིར་བཅར་བ་ཡིན། ཞེས་འགྲེལ་བརྗོད་གནང་བྱུང་།

དེ་བཞིན་ལ་དྭགས་ནས་ཡོང་བའི་བཀྲ་ཤིས་དོན་འགྲུབ་ལགས་ཀྱིས། ད་ལན་འདིར་ལ་དྭགས་ས་གནས་མགོ་འཛིན་གྱི་ཚབ་བྱས་ཏེ་ཚོགས་འདུ་བཅར་ཡོད། དེ་རིང་གི་གནམ་གཤིས་ཧང་སང་བའི་ཡག་པོ་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་དྷ་རམ་ས་ལ་ཆིབས་བསྒྱུར་གནང་སྟེ་ཞལ་མཇལ་བྱུང་བར་སེམས་སུ་དགའ་ཚོར་ཆེན་པོ་སྐྱེས་བྱུང་། ཉེ་ཆར་ཨ་རི་དང་སུད་སི་རུ་བརྟན་བཞུགས་ཧ་ཅང་ཡག་པོ་ཕུལ་འདུག ༧གོང་ས་མཆོག་སྐུ་ཚེ་ཁྲི་ལོ་བརྟན་པའི་སྨོན་འདུན་ཞུས་ཡོད། ཅེས་འགྲེལ་བརྗོད་གནང་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།