༧གོང་ས་རྒྱལ་བ་རིན་པོ་ཆེ་མཆོག་ནས་ཧྥི་ལི་པིན་གྱི་རོ་མན་མོན་མཱག་སི་སི་ཐེབས་རྩ་ཁང་དབུ་བརྙེས་ནས་ལོ་ངོ་ ༦༥ འཁོར་བའི་དུས་དྲན་དང་བསྟུན་ཐེབས་རྩ་ཁང་དེའི་འགན་འཛིན་ལྷན་ཚོགས་ལ་མཇལ་ཁ་དང་བཀའ་སློབ་བསྩལ།
ཕྱི་ལོ་ ༡༩༥༩ ལོར་ཧྥི་ལི་པིན་གྱི་རོ་མན་མོན་མཱག་སི་སི་ཐེབས་རྩ་ཁང་གིས་འཛམ་གླིང་ནང་རླབས་ཆེན་གྱི་མཛད་རྗེས་འཇོག་མཁན་རྣམས་ལ་ཕུལ་སྲོལ་ཡོད་པའི་རོ་མན་མོན་མཱག་སི་སི་གཟེངས་རྟགས་དེ་༧གོང་ས་མཆོག་ལ་ཕུལ་ཡོད་པ་ལྟར། དེ་རིང་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག ཧྥི་ལི་པིན་གྱི་རོ་མན་མོན་མཱག་སི་སི་གཟེངས་རྟགས་ (Ramon Magsaysay Award) ཀྱི་ཐེབས་རྩ་ཁང་གི་འགན་འཛིན་ལྷན་ཚོགས་དང་། གཟེངས་རྟགས་དེ་བཞེས་མྱོང་མཁན་སོགས་ཀྱིས་ཐེབས་རྩ་ཁང་དེ་བཙུགས་ནས་ལོ་ངོ་ ༦༥ འཁོར་བའི་དུས་དྲན་སྲུང་གཙི་དང་སྦྲགས། གླེགས་བམ་བདུན་ཅན་གྱི་དཔེ་དེབ་དབུ་འབྱེད་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་འདུག་ལ། སྐབས་དེར་༧མགོན་པོ་གང་ཉིད་ཀྱིས་འཛམ་གླིང་ཞི་བདེ་བསྐྲུན་རྒྱུར་འཚེ་བ་མེད་པའི་ལྟ་གྲུབ་དེ་ཧ་ཅང་གལ་ཆེན་པོ་ཡིན་སྐོར་གསུངས་འདུག
༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་མདོ་སྨད་ཀྱི་ས་ཁུལ་དུ་སྐྱེས། དེ་ནས་ལྷ་སར་བསླེབས་ནས་དཔེ་ཆ་ཡག་པོ་ཞིག་བལྟས། སྐབས་དེར་དགེ་བའི་བཤེས་གཉེན་བསམ་གྱིས་མི་ཁྱབ་པ་རེད། ཁོང་ཅག་གི་ཐུགས་རྗེ་བཀའ་དྲིན་ལ་བརྟེན་ནས་ངོས་རང་གིས་དཔེ་ཆ་གང་ཙམ་བལྟས་པ་རེད། དེ་ནས་དུས་ཀྱི་འགྱུར་བ་བྱུང་ནས་ངོས་རང་རྒྱ་གར་དུ་བསླེབས་པ་རེད། རྒྱ་གར་དུ་བསླེབས་རྗེས་དེ་སྔ་བོད་དུ་དཔེ་ཆ་བལྟས་པ་དེས་ཕན་ཐོགས་ཞེ་དྲགས་བྱུང་། རྒྱ་གར་ནང་དུ་ནང་པ་ཙམ་མིན་པ་མུ་སྟེགས་པ་དང་། ལྟ་གྲུབ་འདྲ་མི་འདྲ་ཡོད་མཁན་མང་པོ་ཞིག་ལ་གོ་བསྡུར་དང་སྐད་ཆ་བཤད་རྒྱུའི་ནུས་པ་ཞིག་ཐོབ་ནས་ཞེ་དྲགས་ཡག་པོ་བྱུང་། རྒྱ་གར་དུ་མུ་སྟེགས་པ་དང་ལྷན་དུ་མི་དང་མི་ཐུག་ནས་གོ་བསྔུར་བྱ་རྒྱུའི་གོ་སྐབས་ཡོད་དུས། བོད་ལ་དཔེ་ཆ་རྐྱང་རྐྱང་བལྟས་པ་དེ་དང་མི་འདྲ་ས་ཞིག་ནི། མུ་སྟེགས་པའི་ཆོས་གྲོགས་ལྷན་དུ་གོ་བསྡུར་བྱས་པ་དེས་ཕན་ཐོགས་ཞེ་དྲགས་བྱུང་། དེ་དང་ཆབས་ཅིག་ཚན་རིག་པ་མང་པོ་ཞེ་དྲགས་ཐུག་གི་ཡོད། ངོས་རང་ལ་ཆུང་དུས་ནས་ནང་པའི་གཞུང་ནས་བསླབས་བཞག་པའི་རིགས་ལམ་དེའི་ཐོག་ནས། རྩོད་པ་རྩོད་སའི་ཡུལ་དེ་ནང་པ་གཅིག་པུ་མ་ཡིན་པར། མུ་སྟེགས་པ་དང་ཚན་རིག་པ་མང་པོ་ཞིག་ཏུ་གོ་བསྡུར་བྱ་རྒྱུའི་གོ་སྐབས་བྱུང་། གཞུང་ལུགས་དེ་དག་སྦྱངས་ནས། ངོས་རང་སྤྱིར་ནང་པ་དང་ནང་པའི་ནང་ནས་ཐལ་འགྱུར་བ་སྟེ། ཤེས་ནས་དད་པ་འཐོབ་མཁན་གྱི་ཐལ་འགྱུར་བའི་གྲུབ་མཐའ་འཛིན་མཁན་ཞིག་ཆགས་བསྡད་ཡོད། དབུ་མ་རང་རྒྱུད་པའི་ཆོས་གྲོགས་ཤིག་དང་ཐུག་པ་ཡིན་ན། ཐལ་བ་དང་གཏན་ཚིགས་ཀྱི་སོན་འདེབས་ཐུབ་ཀྱི་རེད། རིག་པ་གཏོང་བར་ཐལ་འགྱུར་བའི་རིག་པ་དེ་ཡག་ཤོས་རེད་འདུག ངོས་རང་གིས་ཉིན་ལྟར་སྒོམ་རྒྱག་པའི་སྐབས་སུ་ཐལ་འགྱུར་བའི་བསམ་བློ་དེ་ཉིན་ལྟར་གཏོང་གི་ཡོད། ཅེས་གསུངས་འདུག
༧མགོན་པོ་གང་ཉིད་ཀྱིས། ངོས་རང་གིས་ཞོགས་པར་ལངས་མ་ཐག་བྱང་ཆུབ་ཀྱི་སེམས་དང་ཤེས་རབ་ཀྱི་ཐད་ནས་སྟོང་ཉིད་ཀྱི་ལྟ་བ་གཉིས་པོ་ཟུང་དུ་འབྲེལ་ནས་བསམ་བློ་གཏོང་གི་ཡོད། སྟོང་ཉིད་ཀྱི་ལྟ་བའི་སྐོར་ལ་༧མགོན་པོ་ཀླུ་སྒྲུབ་ཀྱི་དགེ་ཕྲུག་ཅིག་གི་གཞོལ་ནས་ཕལ་ཆེར་ངོས་རང་བསྡད་ཆོག་པ་ཡིན། དེ་བཞིན་རྒྱ་གར་གྱི་ལྟ་གྲུབ་གཙོ་བོ་དེ་འཚེ་བ་མེད་པ་ཞེས་པ་དེ་ཞེ་དྲགས་གལ་ཆེན་པོ་རེད་འདུག ལྟ་གྲུབ་ཀྱི་ཐོག་ནས་ནང་པ་དང་རིགས་འདྲ་མི་འདྲ་ཡོང་གི་ཡོད་རེད་དེ། འཚེ་བ་མེད་པ་དེ་ཚང་མས་གཅིག་གྱུར་གྱི་ལག་ལེན་བསྟར་རྒྱུ་དེ་རེད། ངོས་རང་ལ་མཚོན་ནའང་ཆུང་དུས་ནས་འཚེ་བ་མེད་པ་ལ་ཞེ་དྲགས་གོམས་འདྲིས་ཡོད། ངོས་རང་གིས་འཚེ་བ་མེད་པའི་ལམ་དེ་ཉམས་ལེན་བྱས་པ་མ་ཟད། རང་གི་གྲོགས་པོ་རྣམས་ལའང་བགྲོ་གླེང་དང་གོ་བསྡུར་བྱེད་ཀྱི་ཡོད། དངོས་གནས་འཛམ་བུ་གླིང་འདིར་འཚེ་བ་མེད་པ་དེ་ཞེ་དྲགས་གལ་ཆེན་པོ་རེད་འདུག འཛམ་གླིང་འདིར་ཞི་བདེ་དང་འཚེ་བ་མེད་པ་ཡོང་རྒྱུར་ཚང་མས་དོ་སྣང་བྱེད་ཀྱི་ཡོད། དེ་ལ་ངོས་རང་གིས་འཚེ་བ་མེད་པའི་ལྟ་གྲུབ་དེ་ཞེ་དྲགས་གལ་ཆེན་པོ་མཐོང་གི་འདུག ཅེས་གསུངས་འདུག
དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་མཛད་འཆར་ལྟར་ན། ཟླ་འདིའི་ཕྱི་ཚེས་ ༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐྱབས་རྗེ་ཟམ་གདོང་རིན་པོ་ཆེ་མཆོག་ནས་མོན་གྱི་དད་ལྡན་མི་མང་ལ་སྤྱན་རས་གཟིགས་ཀྱི་བཀའ་དབང་གནང་རྒྱུ་དང་། ཚེས་ ༧ ཉིན་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་ཡིན་པ་བཅས་ཀྱི་མཛད་འཆར་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
