དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་བྱང་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ཏུ་གཞུང་འབྲེལ་ཕྱོགས་ཕེབས་གནང་མུས་ཡིན་འདུག
སྲིད་སྐྱོང་མཆོག་གིས་རྒྱ་གར་བྱང་ཕྱོགས་ཁུལ་དུ་གཞུང་འབྲེལ་ཕྱོགས་ཕེབས་གནང་མུས། བོད་མིའི་སྒྲིག་འཛུགས་ཀྱི་པར།
ཕྱི་ཟླ་ ༩ ཚེས་ ༢༤ ནས་ཕྱི་ཟླ་ ༡༠ ཚེས་ ༥ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ཨུཏྟརཱ་ཁནྜ་ཁུལ་བོད་མིའི་ས་ཁུལ་ཁག་དང་། ཧི་མ་ཅལ་མངའ་སྡེའི་སིར་མོར་རྫོང་ཁོངས་བོད་མིའི་གཞིས་ཆགས་ཁག་ལ་གཞུང་འབྲེལ་འཚམས་གཟིགས་དང་། ༸སྐྱབས་མགོན་ས་སྐྱ་༧གོང་མ་ཁྲི་ཆེན་རྡོ་རྗེ་འཆང་མཆོག་གི་༧སྐུའི་གྱ་སྟོན་བརྟན་བཞུགས་མཛད་སྒོར་ཕེབས་བཞུགས་གནང་རྒྱུ་ཡིན་པ་ལྟར། ཕྱི་ཟླ་ ༩ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་གཞུང་འབྲེལ་འཚམས་གཟིགས་ཉིན་བདུན་པར་འབྲི་གུང་བྱང་ཆུབ་གླིང་དགོན་པར་མཆོད་མཇལ་དང་། བྱེས་ཀྱི་གདན་ས་བླ་བྲང་བཀྲ་ཤིས་འཁྱིལ་དགོན་དུ་གནས་གཟིགས་སུ་ཕེབས་སྐབས་ཨ་ལགས་རིགས་སྒྲ་རིན་པོ་ཆེ་མཆོག་དང་མཇལ་འཕྲད། མངོན་དགའ་དམིགས་བསལ་དགོས་མཁོ་ཅན་གྱི་སློབ་གྲྭར་གཟིགས་ཞིབ། དེ་བཞིན་ཕྱི་ཟླ་ ༩ ཚེས་ ༢༩ ཉིན་དཔལ་ས་སྐྱ་གོང་མ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་དང་། དཔལ་ས་སྐྱ་གོང་མ་ཁྲི་འཛིན་ཞེ་གསུམ་པ་ཛྙན་བཛྲ་རིན་པོ་ཆེ་མཆོག་གཉིས་ལ་མཇལ་ཁ་ཞུས་ཡོད་འདུག
ཁ་སང་ཕྱི་ཚེས་ ༣༠ ཉིན་སྲིད་སྐྱོང་སྤེན་པ་ཚེ་རིང་མཆོག་ཚེ་རིང་དོན་ལྡན་བོད་མིའི་གཞིས་ཆགས་སུ་ཕེབས་ནས་ཁུལ་དེར་གཟིགས་ཞིབ་གནང་རྗེས། ཁུལ་དེའི་བོད་མི་རྣམས་ལ་མི་མང་གིས་ཡིད་ཆེས་ཀྱི་ཐོག་ནས་སྲིད་སྐྱོང་དུ་འོས་འདེམས་བྱུང་རྗེས། འོས་བསྡུ་དྲིལ་བསྒྲགས་སྐབས་སུ་ཁས་ལེན་བྱས་པ་བཞིན་བཀའ་ཤག་སྐབས་བཅུ་དྲུག་པས་བོད་ཀྱི་མ་འོངས་པའི་འགན་སྲུང་ཞེས་པའི་ཕུགས་དམིགས་ཀྱི་ཡིག་ཆ་ཞིག་འདོན་སྤེལ་བྱས་ཏེ། བོད་དོན་ཆབ་སྲིད་དང་། སྤྱི་ཚོགས་ཀྱི་བདེ་དོན་ལ་ཕན་པའི་ལས་དོན་མི་ཉུང་བ་ཞིག་རྩོམ་མུས་ཡིན་པ་མ་ཟད། དབུས་བོད་མིའི་སྒྲིག་འཛུགས་ཀྱི་ལས་དོན་ཚགས་ཚུད་ཡོང་སླད་སྒྲིག་འཛུགས་ཀྱི་སྒྲོམ་གཞི་ཁག་ལ་ལེགས་བཅོས་བྱེད་མུས་ཡིན་སྐོར་དང་། དེ་རྗེས་རྡེ་ར་ལྡུན་དོན་གྲུབ་གླིང་གཞིས་ཆགས་སུ་ཕེབས་ནས་ཁུལ་དེའི་བོད་མི་རྣམས་ལ་གསུང་བཤད་གནང་བའི་ནང་། ཕྱི་ལོ་ ༡༩༥༡ ལོར་རྒྱ་ནག་གཞུང་གིས་བཙན་ཤེད་ཀྱི་ཐོག་ནས་ཆིངས་ཡིག་དོན་ཚན་བཅུ་བདུན་ཟེར་བ་ཞིག་བཞག་བཅུག་སྟེ། བོད་ཀྱི་བདག་དབང་བཙན་འཕྲོག་བྱས་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་གིས་ལོ་ཤས་རིང་ཆིངས་ཡིག་གི་དགོངས་དོན་བཞིན་ཞི་འགྲིག་ཡོང་ཐབས་མཛད་ཀྱང་། རྒྱ་གཞུང་གིས་ཆིངས་ཡིག་གི་དོན་ཚན་ཁག་ལ་རྡོག་རོལ་བཏང་རྐྱེན་མཐར་རྒྱ་གར་ནང་བཙན་བྱོལ་དུ་ཕེབས་དགོས་བྱུང་བའི་ལོ་རྒྱུས་འཕེལ་རིམ་ངོ་སྤྲོད་སོགས་གནང་བ་དང་སྦྲགས། འདི་ལོར་ཨ་རིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པའི་ཁར། རྒྱལ་སྤྱིའི་སྟེང་བོད་དོན་ཞུ་གཏུག་དང་གོ་རྟོགས་སྤེལ་ཐབས་སོགས་བྱེད་ཀྱི་ཡོད་སྐོར་སོགས་གསུངས་འདུག
ཟླ་སྔ་མའི་ཕྱི་ཚེས་ ༢༩ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་རཱཇ་པུར་བོད་ཀྱི་བུད་མེད་མཉམ་ལས་བཟོ་གྲྭ་སོགས་ལ་གཟིགས་ཞིབ་གནང་རྗེས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བཙན་བྱོལ་བོད་ཀྱི་སྤྱི་ཚོགས་ནི་འཛམ་གླིང་གི་སྐྱབས་བཅོལ་བའི་སྤྱི་ཚོགས་མི་འདྲ་བ་ཡིན་སྟབས། བོད་མི་ཚོས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དྲན་དགོས་པ་མ་ཟད། བོད་ཀྱི་མི་རབས་གཞོན་པ་ཚོས་ཀྱང་བོད་ཀྱི་འཐབ་རྩོད་གསོན་གནས་ཀྱི་ཐད་ལ་སྐུ་ལས་ཚད་མེད་སྐྱོན་མཁན་གྱི་བོད་ཀྱི་མི་རབས་རྒན་པ་ཚོའི་བཀའ་དྲིན་དྲན་རྒྱུ་དེ་གལ་འགངས་ཧ་ཅང་ཆེན་པོ་ཡིན་སྐོར་དང་། རྒྱ་ནག་གཞུང་གིས་འདས་པའི་ལོ་ཤས་གོང་ནས་བོད་ནང་དུ་བོད་ཀྱི་སྐད་ཡིག་སྦྱོང་སྤྱོད་བྱ་སའི་སློབ་གྲྭ་མང་དག་ཅིག་སྒོ་བརྒྱབ་ནས། བོད་མིའི་ངོ་བོ་དང་བོད་ཀྱི་རིག་གཞུང་རྩ་མེད་གཏོང་ཐབས་ཀྱི་སྲིད་ཇུས་ཤིག་འདིང་མུས་ཡིན་པས། བཙན་བྱོལ་བོད་མི་ཚོས་བོད་ཀྱི་སྐད་ཡིག་དང་ཆོས་རིག་གི་གལ་གནད་དང་། རིན་ཐང་། རྒྱུན་འཛིན་བྱ་རྒྱུ་དེ་ཧ་ཅང་གལ་ཆེན་ཡིན་སྟབས། བཀའ་ཤག་སྐབས་བཅུ་དྲུག་པས་ཀྱང་བོད་ཀྱི་ཆོས་རིག་དང་ཡུལ་སྲོལ་གོམས་གཤིས་རྒྱུན་འཛིན་སླད། གཞིས་ཆགས་སྲ་བརྟན་དང་འབྲེལ་བའི་ལས་གཞི་མང་དག་ཅིག་སྤེལ་མུས་ཡིན་སྐོར་སོགས་གསུངས་འདུག
དེ་བཞིན་སྲིད་སྐྱོང་སྤེན་པ་ཚེ་རིང་མཆོག་གི་གཞུང་འབྲེལ་མཛད་འཆར་ལྟར་ན། ཟླ་འདིའི་ཕྱི་ཚེས་ ༣ ཉིན་དཔལ་ས་སྐྱ་ཆོས་སྒར་ནས་མགྲོན་འབོད་ལྟར་༸ས་སྐྱ་གོང་མ་བདག་ཁྲི་རིན་པོ་ཆེ་མཆོག་གི་༸སྐུའི་གྱ་སྟོན་བརྟན་བཞུགས་མཛད་སྒོར་ཕེབས་རྒྱུ་དང་། ཕྱི་ཚེས་ ༦ ནས་ ༡༥ བར་ཡུ་རོབ་རྒྱལ་ཁབ་ཁག་ཅིག་ཏུ་གཞུང་འབྲེལ་ཕྱོགས་ཕེབས་གནང་རྒྱུ་དང་ཛུ་རིག་གློག་བརྙན་དུས་སྟོན་དང་ (Zurich Film Festival) དང་། ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པཱ་རཱག་ཏུ་བསྡུ་བའི་གླེང་སྟེགས་༢༠༢༠ (Forum 2020) བཅས་སུ་མཉམ་ཞུགས་གནང་རྒྱུ། དེ་བཞིན་ཟླ་འདིའི་ཕྱི་ཚེས་ ༡༦ ནས་ ༢༢ བར་རྒྱ་གར་བྱང་ཤར་འབྲས་ལྗོངས་ཁུལ་དུ་ཕེབས་རྒྱུ་ཡིན་འདུག
གསར་འགོད་པ། དཔལ་ལྡན།
