བོད་ཀྱི་སྐད་ཡིག་སློབ་གསོའི་ཐོབ་ཐང་འཐབ་རྩོད་པ་བཀྲ་ཤིས་དབང་ཕྱུག་ལགས་རྒྱ་ནག་ཉེན་རྟོག་པས་ཡང་བསྐྱར་འཛིན་བཟུང་བྱས་ཏེ་ཉིན་གྲངས་ ༡༥ རིང་འདྲི་རྩད་བཀག་ཉར་བྱས་འདུག
བོད་སྐད་ཡིག་གི་རང་དབང་འཐབ་རྩོད་པ་བཀྲ་ཤིས་དབང་ཕྱུག་ལགས།
བོད་ཀྱི་སྐད་ཡིག་སློབ་གསོའི་ཐོབ་ཐང་འཐབ་རྩོད་པ་བཀྲ་ཤིས་དབང་ཕྱུག་ལགས་ཀྱིས་སྒེར་གྱི་དྲ་ལམ་དུ་ཉེ་སྔོན་ཁོང་བསྐྱར་དུ་འཛིན་བཟུང་བཀག་ཉར་བྱས་པའི་འབྲེལ་ཡོད་ཡིག་ཆ་གསུམ་སྤེལ་འདུག་ལ། ཡིག་ཆའི་ནང་དུ་གསལ་བ་ལྟར་ན། ཕྱི་ལོ་ ༢༠༢༤ ཟླ་ ༦ ནས་བཟུང་ཁོང་གིས་མགྱོགས་འཕྲིན་དང་འཁྱུག་དབྱིངས་སོགས་ཀྱི་ནང་ཐེངས་མང་སྲིད་གཞུང་ལ་བསྙད་འདོགས་དང་འཁྱོག་བརྗོད། སྲིད་གཞུང་གི་ཐག་གཅོད་ལ་ངེས་བཟུང་མེད་པའི་གཏམ་བརྗོད་སྤེལ་ཏེ། དྲ་ལམ་དང་སྤྱི་ཚོགས་ཀྱི་སྒྲིག་གཞིར་རྙོག་ཟིང་ཚབས་ཆེན་བསླངས་ཡོད་པར་བརྟེན། སྐྱེ་རྒུ་མདོ་གྲོང་ཁྱེར་སྲིད་འཛིན་བཀག་ཉར་ཁང་དུ་ཕྱི་ཟླ་ ༡༠ ཚེས་ ༢༠ ནས་ཕྱི་ཟླ་ ༡༡ ཚེས་ ༤ བར་བཀག་ཉར་བྱ་རྒྱུ་ཡིན་ཞེས་བྲིས་འདུག
ཟླ་འདིའི་ཕྱི་ཚེས་ ༡༠ ཉིན་གྱི་དགོང་མོར་འདི་གའི་གསར་འགོད་པར་གནས་ཚུལ་མཁོ་སྤྲོད་པ་ཞིག་གིས། རྒྱ་ནག་ཉེན་རྟོག་པས་བཀྲ་ཤིས་དབང་ཕྱུག་ལགས་སྒ་སྐྱེ་རྒུ་མདོའི་རང་ཁྱིམ་ནས་འཛིན་བཟུང་བྱས་ཡོད་པ་དང་། འཛིན་བཟུང་བཙན་འཁྲིད་བྱས་རྗེས་གོ་ཐོས་མེད་པར་གྱུར་ཡོད་པ་དང་། ཁོང་ལ་སྲིད་འཛིན་བཀག་ཉར་གྱི་ཉེས་ཆད་བཅད་ཡོད་སྐོར་བརྗོད་བྱུང་། ད་དུང་རྒྱ་ནག་གི་འབྲེལ་ཡོད་ལས་ཁུངས་ནས་བཀྲ་ཤིས་དབང་ཕྱུག་ལགས་ལ་སྲིད་གཞུང་གི་བོད་སྐད་ཡིག་དང་འབྲེལ་བའི་ལས་དོན་ལ་ཇུས་གཏོགས་བྱེད་མི་ཆོག་པའི་ཉེན་བརྡ་ཡང་བཏང་ཡོད་སྐོར་འགྲེལ་བརྗོད་གནང་བྱུང་།
བོད་ཀྱི་སྐད་ཡིག་སློབ་གསོའི་ཐོབ་ཐང་འཐབ་རྩོད་པ་བཀྲ་ཤིས་དབང་ཕྱུག་ལགས་ཀྱིས། ཕྱི་ལོ་ ༢༠༡༥ ལོར་རྒྱ་ནག་གཞུང་གི་སྲིད་བྱུས་འོག་བོད་ཁུལ་གྱི་སློབ་གྲྭ་ཁག་ཏུ་བོད་སྐད་ཡིག་སློབ་གསོ་རྩ་མེད་བཟོ་ཐབས་བྱེད་ཀྱི་ཡོད་པ་དང་། བོད་ཕྲུག་བྱིས་པའི་བོད་སྐད་ཡིག་གི་གནས་ཚད་ཉེན་ཚབས་ཅན་དུ་གྱུར་ཡོད་སྟབས། ངེས་པར་དུ་རྒྱ་ནག་གཞུང་གི་མི་རིགས་རང་སྐྱོང་ཁུལ་གྱི་བཅའ་ཁྲིམས་ནང་གསལ་ལྟར་བོད་སྐད་ཡིག་སྲུང་སྐྱོབ་དགོས་པའི་འབོད་སྐུལ་ཞུ་གཏུག་གནང་ཡོད་པ་མ་ཟད། པེ་ཅིན་དུ་གནས་སྡོད་ནེའུ་ཡོག་དུས་བབ་ཡན་ལག་གི་གསར་འགོད་པར་བོད་ཁུལ་གྱི་སློབ་གསོའི་དཀའ་ངལ་འགྲེལ་བརྗོད་བྱས་ཏེ་ཕྱིར་བསྒྲགས་བྱས་པར་བརྟེན། ཕྱི་ལོ་ ༢༠༡༦ ཟླ་ ༡ ཚེས་ ༢༧ ཉིན་ཡུལ་ཤུལ་ཉེན་རྟོག་པས་གསང་བའི་ཐོག་ནས་ཁོང་འཛིན་བཟུང་བྱས་ཏེ། ལོ་དེའི་ཕྱི་ཟླ་ ༣ ཚེས་ ༢༤ བར་ནང་མིར་ཤེས་རྟོགས་བྱུང་བཅུག་མེད་པ་མ་ཟད། ནང་མི་སྤུན་མཆེད་སོགས་ལ་ཐུག་ཏུ་མ་བཅུག་པར་བཀག་ཉར་བྱས་ཏེ་ལོ་ ༢ ལྷག་བཞག་ཡོད་པ་རེད། ཕྱི་ལོ་ ༢༠༡༨ ཟླ་ ༥ ཚེས་ ༢༢ ཉིན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་ཟེར་བ་དེས། རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་འོག བཀྲ་ཤིས་དབང་ཕྱུག་ལགས་སུ་ལོ་ ༥ བཙོན་འཇུག་ཁྲིམས་བཅད་དེ་ཕྱི་ལོ་ ༢༠༢༡ ལོའི་ཟླ་ ༡ ཚེས་ ༡༤ ཉིན་ཀློད་གྲོལ་བཏང་ཡོད་ཀྱང་། ཁོང་གི་འགྲོ་འདུག་ལ་རང་དབང་མེད་པ་མ་ཟད། ཡང་ནས་བསྐྱར་དུ་བཀག་སྐྱིལ་དང་འདྲི་རྩད་གཅར་རྡུང་བཏང་ཡོད་པ་རེད།
རྩོམ་སྒྲིག་བྱེད་མཁན། པདྨ་མཚོ།
