དེ་རིང་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གི་མཐུན་འགྱུར་འོག་དཀོན་མཆོག་བསྟན་འཛིན་ལགས་ཀྱིས་ཉམས་ཞིབ་དང་བསྡུ་སྒྲིག་བྱས་པའི་ཐུགས་བསྐྱེད་དམ་བཅའ་བཞིའི་སྐོར་གྱི་དཔེ་དེབ་བཞི་དབུ་འབྱེད་གནང་སྟེ་རིན་མེད་འགྲེམས་སྤེལ་བྱེད་མགོ་བརྩམས་སོང་།
དེ་རིང་ཉིན་རྒྱབ་ཆུ་ཚོད་ ༡།༣༠ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་དུ། སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གི་མཐུན་འགྱུར་འོག གཞོན་སྐྱེས་ཉམས་ཞིབ་པ་དཀོན་མཆོག་བསྟན་འཛིན་ལགས་ཀྱིས་ཉམས་ཞིབ་དང་བསྡུ་སྒྲིག་བྱས་པའི་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གྱི་དཔེ་ཕྲེང་བཞིའི་བདག་ཉིད་ཅན་ཞིག་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག་བཅས་ནས་དབུ་འབྱེད་གནང་སོང་བ་དང་། སྐབས་དེར་བོད་མི་མང་སྤྱི་འཐུས་ཁག་ཅིག་གི་དབུས་པའི་བོད་ཀྱི་ལོ་རྒྱུས་མཁས་དབང་དང་ཉམས་ཞིབ་པ། གཞུང་ཁོངས་མིན་པའི་ཚོགས་སྐྱིད་ཁག་གི་ཚོགས་མི་འགན་འཛིན་དང་མི་མང་བཅས་འཛོམས་འདུག
ཉམས་ཞིབ་པ་དཀོན་མཆོག་བསྟན་འཛིན་ལགས་ཀྱིས། ཐུགས་བསྐྱེད་དམ་བཅའ་བཞིའི་སྐོར་ལ་ཉམས་ཞིབ་བྱས་ཏེ་བསྡུ་སྒྲིག་བྱས་པའི་དཔེ་དེབ་བཞིའི་བརྒྱུད་རིམ་སོགས་ངོ་སྤྲོད་གནང་སྐབས། ཐུགས་བསྐྱེད་དམ་བཅའ་བཞི་ནི། གཅིག་༧མགོན་པོ་གང་ཉིད་མཆོག་འགྲོ་བ་མི་ཞིག་ཡིན་པའི་ཆ་ནས། འགྲོ་བ་མིའི་བདེ་དོན་ཆེད་བསྐྱངས་པའི་མཛད་པ་དང་། གཉིས་པ་ཆོས་པ་ཞིག་ཡིན་པའི་ངོས་ནས་འཛམ་གླིང་གི་ཆོས་ལུགས་མཐུན་སྒྲིལ་ཐད་བསྐྱངས་པའི་མཛད་པ། གསུམ་པ་བོད་མི་ཞིག་ཡིན་པའི་ཆ་ནས་བོད་དོན་འཐབ་རྩོད་ཐོག་བསྐྱངས་པའི་མཛད་པ། དེ་བཞིན། རྒྱ་གར་གྱི་གནའ་བོའི་ལེགས་བྱང་བསྐྱར་གསོའི་མཛད་པ་བཅས་ཡིན་པ་ལས། ཐུགས་བསྐྱེད་དང་པོ་འཇིག་རྟེན་ཀུན་ཁྱབ་ཀྱི་དགོངས་པ་ག་དུས་ནས་བཞེས་ཡོད་མེད་དང་། རྒྱལ་སྤྱིའི་སྡིངས་ཆའི་སྟེང་ཕེབས་ཏེ་མིའི་བཟང་པོའི་ཡོན་ཏན་ཡར་རྒྱས་གཏོང་ཐབས་དང་མི་གཅིག་གྱུར་གྱི་འདུ་ཤེས་དང་འཛམ་གླིང་ཞི་བདེ་ཡོང་ཐབས་ཀྱི་དགོངས་པ་སོགས་ཀྱི་བྱུང་རིམ། དེ་བཞིན་ཆོས་ལུགས་མཐུན་སྒྲིལ་ཡོང་བར་འཇིག་རྟེན་མི་ཆོས་སུ་གྲུབ་པའི་ཡ་རབས་བཟང་སྤྱོད་སོགས་གཞི་རྩར་བཞག་སྟེ་མཛད་འཕྲིན་བསྐྱངས་ཡོད་པ། དམ་བཅའ་གསུམ་པའི་སྐོར་ལ་ལོ་རྒྱུས་ཀྱི་འགྱུར་མཚམས་དང་འབྲེལ་ནས་སྔ་དུམ་དང་ཕྱི་དུམ་གཉིས་སུ་དབྱེ་ཡོད་པ་སོགས་མདོར་ན། ད་རེས་དཔེ་དེབ་འདི་དག་བརྒྱུད་མ་འོངས་པར་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ལ་ཞིབ་འཇུག་གནང་མཁན་ཚོར་ས་ཁྲ་ལྟ་བུ་ཆགས་ཐུབ་པའི་རེ་བ་ཡོད་སྐོར་བརྗོད་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། གནའ་སྔ་མོ་ཡིན་ན་ཞིབ་འཇུག་བྱེད་པར་རྒྱུ་ཆ་མི་རག་པའི་དཀའ་ངལ་ཆེ་ནའང་། དེང་སྐབས་༧གོང་ས་མཆོག་གི་མཛད་འཕྲིན་སྐོར་ལ་ཞིབ་འཇུག་བྱེད་པར་རྒྱུ་ཆ་བཀོལ་སྤྱོད་བྱེད་ཆོག་ཆོག་ཡོད་པས་ཞིབ་འཇུག་གནང་རྒྱུ་གལ་ཆེན་ཡིན་པ་དང་། ༧གོང་ས་མཆོག་གིས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་པ་ནས་བོད་དུ་སྤྱི་ཚོགས་ལམ་ལུགས་དུས་བསྟུན་གོམ་པ་རིམ་བགྲོད་ལེགས་བཅོས་བྱ་ཕྱོགས་ཀྱི་མཛད་པ་དང་། བཙན་བྱོལ་དུ་མ་འོངས་བོད་ཀྱི་རྩ་ཁྲིམས་དང་བཅའ་ཁྲིམས། ཕྱི་ལོ་ ༢༠༠༢ ལོར་མི་མང་གིས་ཐད་ཀར་བཀའ་བློན་ཁྲི་བར་འདེམས་ཆོག་པ་དང་། ཕྱི་ལོ་ ༢༠༡༡ ལོར་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་བདམས་པའི་མགོ་ཁྲིད་ལ་ཕུལ་བ་སོགས་ཀྱི་མཛད་འཕྲིན་གླེང་སློང་དང་འབྲེལ། ཕྱི་ལོ་ ༢༠༢༢ ལོའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་སྟེང་༧གོང་ས་མཆོག་གིས་བཀའ་ཡིག་ཕེབས་པའི་ནང་། གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་དག་གིས་བོད་དོན་ལ་རྒྱབ་སྐྱོར་བྱེད་པ་ནི་དོན་དངོས་ཐོག་བདེན་པ་ལ་རྒྱབ་སྐྱོར་བྱེད་པ་ཆགས་ཡོད་སྐོར་གྱི་བཀའ་སློབ་སྩལ་གནང་ཡོད་པ་སོགས་འགྲེལ་བརྗོད་གནང་སོང་ལ། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག་གིས། དེང་སང་མི་རྣམས་ཕྱིའི་དངོས་པོའི་ཡར་རྒྱས་ཐོག་དོ་སྣང་བྱས་ཏེ། སྤྱི་ཚོགས་འཆམ་མཐུན་མེད་པ་དང་ཁོར་ཡུག་ལ་འབག་རྩོག་ཤོར་བ་སོགས་ཀྱི་དཀའ་ངལ་མང་དག་ཅིག་འཕྲད་ཀྱིན་ཡོད་སྟབས། ཛ་དྲག་གི་དཀའ་ངལ་དེ་དག་སེལ་བར་ལོ་མང་པོའི་གོང་ནས་༧གོང་ས་མཆོག་གིས་ཕྱི་རྒྱལ་གྱི་ཚན་རིག་པ་དང་གནད་ཡོད་མི་སྣར་བགྲོ་གླེང་མཛད་ཡོད་ཅིང་། དགེ་བཤེས་ལགས་དང་ཕྱག་རོགས་དམ་པ་དགེ་བཤེས་དགྲ་འདུལ་རྣམ་རྒྱལ་ལགས། དགེ་བཤེས་བློ་བཟང་བསྟན་འཛིན་ལགས་བཅས་ནས་༧གོང་ས་མཆོག་གི་བཀའ་དགོངས་བཞིན་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གྱི་སློབ་ཚན་གསར་རྩོམ་གནང་བ་སོགས་གསུངས་སོང་།
