སཾ་བྷོ་ཊ་བོད་སློབ་འཛིན་ཚོགས་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་གཙིའི་མཛད་སྒོའི་ཐོག་སཾ་བྷོ་ཊའི་ཁྱབ་ཁོངས་སློབ་ཁག་ནང་ཞབས་ཕྱི་ཞུས་ཏེ་ལོ་ངོ་ ༢༥ འཁོར་བའི་དགེ་ལས་ཟུར་པ་དང་ལས་ཐོག་གྲངས་ ༡༤ ལ་ལེགས་གསོལ་གཟེངས་རྟགས་ཕུལ་སོང་།
ཟླ་འདིའི་ཕྱི་ཚེས་ ༡༦ ཉིན་གྱི་སྔ་དྲོའི་ཆུ་ཚོད་ ༩།༣༠ ཐོག མེས་དབོན་དཔེ་སྟོན་གཙུག་ལག་སློབ་གྲྭའི་ཚོགས་ཁང་དུ། སཾ་བྷོ་ཊ་བོད་སློབ་འཛིན་ཚོགས་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་གཙིའི་མཛད་སྒོ་འཚོགས་སོང་བ་དང་། ཚོགས་སྒོའི་ཐོག་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས། སམ་བྷོ་ཊའི་སྤྱི་ཁྱབ་འགན་འཛིན་ཟུར་པ་ཀརྨ་ཆུང་བདག་ལགས། བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲི་ཆོས་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། གཞུང་དང་གཞུང་ཁཽངས་མ་ཡིན་པའི་ཚོགས་སྡེ་ཁག་གི་སྐུ་ཚབ་རྣམས་བཅས་འཛོམས་འདུག
མཛད་སྒོའི་ཐོག་སམ་བྷོ་ཊའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་ཀྱིས། རྒྱ་གར་དབུས་གཞུང་ནས་བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཡོངས་རྫོགས་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་བརྒྱུད། ཕྱི་ལོ་ ༢༠༡༣ ནས་ ༢༠༢༡་བར་རིམ་བཞིན་རྩིས་སྤྲོད་ཟིན་པ་ལྟར་དེ་དག་གི་འཛིན་སྐྱོང་སཾ་བྷོ་ཊ་བོད་སློབ་འཛིན་ཚོགས་ནས་གནང་བཞིན་ཡོད་པ་མ་ཟད། ཕྱི་ལོ་ ༢༠༡༡ ཟླ་ ༡ ཚེས་ ༤ ནས་བཟུང་བོད་ནས་གསར་དུ་ཕེབས་མཁན་ཚོའི་ཆེད་དུ་བཙུགས་པའི་ཤེས་རབ་དགའ་ཚལ་སློབ་གླིང་གི་འཛིན་སྐྱོང་ཡང་སཾ་བྷོ་ཊ་བོད་སློབ་འཛིན་ཚོགས་ནས་གནང་བཞིན་ཡོད། ད་ལྟའི་ཆར་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སུ་ཁྱོན་སློབ་གྲྭ་གྲངས་ ༣༣ འཛིན་སྐྱོང་གནང་མུས་ཡིན། ཞེས་བརྗོད་སོང་།
ཡང་ཁོང་གིས། ཕྱི་ལོ་ ༢༠༠༥ ནས་བཟུང་ཁྱབ་ཁོངས་སློབ་ཁག་ཚང་མའི་ནང་བཙན་བྱོལ་བོད་མིའི་ཤེས་ཡོན་སྲིད་བྱུས་ལག་བསྟར་གནང་མུས་ཐོག བོད་སློབ་འཛིན་ཚོགས་ནས་རྩིས་སྤྲོད་ཟིན་པའི་སློབ་ཁག་ནང་དུའང་རིམ་བཞིན་ཤེས་ཡོན་སྲིད་བྱུས་ལག་བསྟར་གནང་ཡོད། ཁྱབ་ཁོངས་སློབ་ཁག་ནང་ཉིན་རེའི་སློབ་ཁྲིད་དང༌། བྱེད་སྒོ། ལས་རིམ་སོགས་སློབ་མ་རང་ཉིད་ཀྱི་འཇོན་ནུས་གཙོ་བོར་འཛིན་པ་ལས་འགྲན་བསྡུར་དང་མཚུངས་བསྡུར་གྱི་རྣམ་པ་མིན་པའི་སྒོ་ནས་སྤེལ་བཞིན་ཡོད། སཾ་བྷོ་ཊ་བོད་སློབ་ཚོགས་པའི་དབུས་ས་གཉིས་ཀྱིས་སློབ་མ་རྣམས་ལ་ཤེས་ཡོན་ཚད་ལྡན་སྤྲོད་རྒྱུ་དང་། ཤེས་ཡོན་སྲིད་བྱུས་དགོངས་དོན་ལྟར་དགེ་ལས་ཚད་ལྡན་བསྐོ་གཞག་གནང་བཞིན་ཡོད། དེ་བཞིན་མ་འོངས་བོད་ཀྱི་མི་རབས་གསར་པའི་ན་ཆུང་སློབ་མ་རྣམས་ལ་རྒྱུ་མཚན་ལྡན་པའི་མི་རིགས་ཀྱི་སྤོབས་པ་དང༌། ལར་ཞེན། ལྟ་གྲུབ། ལས་འགན་སོགས་ཀྱི་ས་བོན་ཟབ་མོ་ཡིད་ལ་ངེས་པར་འཇོག་ཐུབ་པ་བྱ་རྒྱུ་ལས་འགན་གཙོ་བོ་ཆགས་ཡོད། ཅེས་བརྗོད་སོང་།
བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བཙན་བྱོལ་བོད་མིའི་སྤྱི་ཚོགས་ཁྲོད་དུ་ཤེས་ཡོན་སློབ་གསོའི་གྲུབ་འབྲས་བཟང་པོ་ཐོབ་ཡོད་ཅིང་། སཾ་བྷོ་ཊ་བོད་སློབ་འཛིན་ཚོགས་དབུ་བརྙེས་ནས་ལོ་ངོ་ ༢༥ འཁོར་བའི་ལོ་རྒྱུས་ཁྲོད་ཀྱི་གྲུབ་འབྲས་དང་ནོར་འཁྲུལ་གཉིས་ཀར་བསྐྱར་ཞིབ་བྱ་ཐུབ་ཚེ། མ་འོངས་པའི་ཤེས་ཡོན་སློབ་གསོ་ལ་ཡར་རྒྱས་གོང་འཕེལ་འགྲོ་བར་ཕུན་སུམ་ཚོགས་པའི་ལས་དོན་ཞིག་ཆགས་ཀྱི་ཡོད་ལ། དེ་ནི་དོན་དངོས་ཐོག་ནས་དུས་དྲན་སྲུང་གཙི་ཞུ་སྟངས་ཡག་ཤོས་ཆགས་ཀྱི་ཡོད་སྐོར་དང་། བཙན་བྱོལ་ནང་དུ་ཤེས་ཡོན་སློབ་གསོའི་ཐོག་མི་རྒྱུ་གཉིས་ཀྱི་འགྲོ་གྲོན་གཏང་སྟེ་མ་འོངས་བའི་ཤེས་ཡོན་གྱི་སྤུས་ཚད་གོང་མཐོར་གཏོང་རྒྱུ་གལ་ཆེན་ཡིན་སྐོར་བརྗོད་སོང་།
དེ་བཞིན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། སཾ་བྷོ་ཊ་བོད་སློབ་ཚོགས་པས་ལོ་མང་པོའི་རིང་ཤེས་ཡོན་སློབ་གསོའི་ཐོག་དཀའ་ལས་མང་པོ་བརྒྱབ་ཡོད་པ་བཞིན། བཙན་བྱོལ་གྱི་བོད་སློབ་ཁག་ཚང་མས་མུ་མཐུད་ཤེས་ཡོན་སློབ་གསོའི་ཆེད་ཤུགས་རྒྱག་དགོས་ཀྱི་ཡོད་པ་མ་ཟད། བོད་ཀྱི་གཞོན་སྐྱེས་ཀྱི་མདུན་ལམ་ཆེད་སློབ་གྲྭ་གསར་རྒྱག་གི་དམིགས་ཡུལ་ཡང་ངེས་པར་དུ་དགོས་པ་ཞིག་རེད། དེང་རབས་དང་མཐུན་པའི་ཤེས་ཡོན་གྱི་སློབ་གསོ་དགོས་ཡོད་པ་དང་བསྟུན་བོད་པའི་ཆོས་དང་རིག་གཞུང་གི་གལ་ཆེན་རང་བཞིན་དེ་གཞོན་སྐྱེས་རྣམས་ཀྱི་འཚོ་བའི་ཁྲོད་སྤྱི་ཚོགས་ཡོངས་སུ་བཟང་སྤྱོད་འཇགས་ཐབས་དགོས་པ་གལ་ཆེན་ཡིན་སྐོར་གསུངས་སོང་།
སཾ་བྷོ་ཊ་བོད་སློབ་འཛིན་ཚོགས་ནི་ཕྱི་ལོ་ ༡༩༩༩ ཟླ་ ༦ ཚེས་ ༡༦ ཉིན་བཙུགས་པའི་བཙན་བྱོལ་གྱི་སློབ་སྡེ་གསར་ཤོས་ཤིག་ཡིན་ཞིང་། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གཟིགས་སྐྱོང་འོག་དེབ་སྐྱེལ་བྱས་ཡོད་པའི་གཞུང་འབྲེལ་གྱི་ཤེས་ཡོན་ཚོགས་སྡེ་ཆེ་ཤོས་དེ་ཡིན་འདུག སཾ་བྷོ་ཊ་བོད་སློབ་ཚོགས་པ་དབུ་བརྙེས་རྗེས་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་སློབ་གྲྭ་ཁག་ ༡༩ རྩིས་སྤྲོད་ཀྱིས་སཾ་བྷོ་ཊ་ནས་འཛིན་སྐྱོང་གནང་བཞིན་ཡོད་པ་དང། བར་ལམ་སློབ་མའི་གྲངས་འབོར་ཉུང་དུ་ཕྱིན་ཏེ་འཛིན་སྐྱོང་གི་དགོས་མཁོ་སོགས་ཀྱི་གནས་སྟངས་ལ་འགྱུར་བ་ཕྱིན་པ་དང་བསྟུན། ད་ལྟའི་ཆར་སཾ་བྷོ་ཊ་བོད་སློབ་འཛིན་ཚོགས་ཀྱི་ཁྱབ་ཁོངས་སུ་ཁྱོན་སློབ་གྲྭ་གྲངས་༣༣ ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
