བོད་ཀྱི་ལོ་རྒྱུས་སྨྲ་བ་གྲགས་ཅན་ནོར་བྲང་ཨོ་རྒྱན་ལགས་སྐུ་གཤེགས།

བོད་ཀྱི་ལོ་རྒྱུས་སྨྲ་བ་གྲགས་ཅན་ནོར་བྲང་ཨོ་རྒྱན་ལགས་དགུང་ལོ་ ༩༢ ཐོག་བོད་ཀྱི་རྒྱལ་ས་ལྷ་ས་རུ་སྐུ་གཤེགས་པའི་གནས་ཚུལ་ཐོན་འདུག

ཟླ་འདིའི་ཕྱི་ཚེས་ ༡༩ ཉིན་བོད་ཀྱི་ལོ་རྒྱུས་སྨྲ་བ་གྲགས་ཅན་ནོར་བྲང་ཨོ་རྒྱན་ལགས་དགུང་ལོ་ ༩༢ ཐོག་བོད་ཀྱི་རྒྱལ་ས་ལྷ་ས་ནས་སྐུ་གཤེགས་པའི་གནས་ཚུལ་ཐོན་ཡོད་ཅིང་། བོད་ནང་གི་སྙན་ངག་པ་དང་རྩོམ་པ་པོ། ཤེས་ཡོན་པ་སོགས་ཀྱི་ཁོང་གི་ཤུལ་ལུས་ནང་མི་ལ་སེམས་གསོ་དང་། ཁོང་ལ་མྱ་ངན་གྱི་སྨྲེ་ངག་འདོན་གྱི་འདུག

བོད་ནང་གི་བོད་མི་ཤེས་ཡོན་པ་ཞིག་གིས་རང་གི་སྐད་འཕྲིན་རྒྱབ་ལྗོངས་སུ་ཁོང་གི་སྐུ་པར་ཞིག་བཞག་ནས། ཕ་སྐད་གསེར་གྱི་ལྡེ་མིག་ཅན་ཚོ་རིམ་བཞིན་ནུབ་རིར་ཡིབ་ཀྱིན་འདུག གངས་ཐང་གི་གཅེས་ཕྲུག་ཚོ་ཉིན་བཞིན་འོས་འགན་སློབ་གསོའི་དབང་དུ་ཤོར། ད་ནི་དངོས་གནས་ངུ་སྙིང་འདོད་པ་ཞིག་རེད་ཨང་། ཞེས་དང་། ཡང་བོད་མི་གཞན་ཞིག་གིས། རང་གི་རིག་གཞུང་ལ་སྤྲོ་ཤུགས་ནུས་གསུམ་གྱི་དབལ་རྣོ་བའི་མཁས་པ་རྣམས་རེ་རེ་གཉིས་གཉིས་བྱས་ནས་བཞུད་འགྲོ་བ་འདི་འདྲ་སྙིང་མི་དགའ་བ་ཞིག་བཙལ་ཡང་མི་འདུག ཅེས་བྲིས་འདུག

དེ་བཞིན་བོད་མི་ཞིག་གིས། མི་འདི་ཚོ་གངས་རིའི་ཕྱི་ནང་སྲུང་བའི་ལྕགས་རི་ཡིན། ཁོ་ཚོའི་མི་ཚེ་གངས་རིའི་ཚེ་སྲོག་ལ་ཕུལ་ཡོད། གངས་རིའི་མིང་སྲིང་ཚོའི་སེམས་ནང་གི་ཕོ་རྒོད་དག་དག་ཡིན། ཕ་སྐད་ཀྱི་སྲོག་ཤིང་ཡིན་པའི་བགྲེས་པོ་ལགས། བདེ་བར་བཞུད། ཅེས་བྲིས་འདུག་ལ། བོད་ནང་གི་སྙན་ངག་པ་སྐྱབས་ཆེན་བདེ་གྲོལ་ལགས་དང་། རྩོམ་པ་པོ་དང་འགྲོ་བ་མིའི་ཐོབ་ཐང་དང་རང་དབང་འཐབ་རྩོད་པ་ཞོགས་ལྗང་ལགས་སོགས་ཀྱིས་འདས་པོ་ཁོང་ལ་མྱ་ངན་ཞུས་འདུག

བོད་ཀྱི་ལོ་རྒྱུས་སྨྲ་བ་གྲགས་ཅན་ནོར་བྲང་ཨོ་རྒྱན་ལགས་ནི་ཕྱི་ལོ་ ༡༩༣༣ ལོར་གཞིས་རྩེ་གྲོང་ཁྱེར་གདོང་དཀར་གྲོང་ཚོའི་ཞིང་པ་འབྲིང་བའི་ཁྱིམ་ཚང་ཟངས་ལུང་པའི་ཕ་དགྲ་ལྷ་ལགས་དང་མ་སྤེན་པ་སྒྲོལ་མ་ལགས་གཉིས་ཀྱི་བུར་སྐྱེས། ༧པཎ་ཆེན་རིན་པོ་ཆེ་སྐུ་ཕྲེང་བཅུ་པའི་མཚན་ཞབས་པ་རྡོ་གདན་པ་དཀའ་ཆེན་ངག་དབང་ལགས་དང་། དཀའ་ཆེན་བཟོད་པ་ལགས། དཀའ་ཆེན་པདྨ་ལགས་སོགས་མཁས་པའི་དབང་པོ་དུ་མ་བསྟེན་ནས་སུམ་རྟགས་དག་གསུམ་དང་སྙན་ངག་མེ་ལོང་མའི་གཞུང་ཁྲིད། མངོན་བརྗོད་བཅས་ཀྱི་སློབ་གཉེར་མཛད། ཕྱི་ལོ་ ༡༩༩༣ ལོར་ཁོང་དང་ཆབ་སྤེལ་ཚེ་བརྟན་ཕུན་ཚོགས་གཉིས་ཀྱིས་རྩོམ་སྒྲིག་བྱས་པའི་བོད་ཀྱི་ལོ་རྒྱུས་དེབ་ཐེར་《བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ》རྒྱལ་ཡོངས་གྲངས་ཉུང་མི་རིགས་ཀྱི་ཕུལ་བྱུང་དཔེ་དེབ་དཔྱད་འདེམས་ཁྲོད་རྒྱལ་ཁབ་རིམ་པའི་བྱ་དགའ་ཐོབ་ཅིང་། ཕྱི་ལོ ༢༠༠༦ ལོར་ཀྲུང་གོ་བོད་རིག་པའི་དཔེ་དེབ་ཀྱི་བྱ་དགའ་མཐོ་ཤོས་ཇོ་མོ་གླང་མའི་དམིགས་བསལ་གྱི་བྱ་དགའ་ཐོབ་ཡོད་པ་མ་ཟད། ཁོང་གི་བརྩམས་པའི《བོད་ཀྱི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ཀྱི་འགྲེལ་པ་ཡིད་ཀྱི་དགའ་སྟོན་》ལ་ཐེངས་གཉིས་པའི་ཀྲུང་གོ་མི་རིགས་དཔེ་དེབ་ཀྱི་རིམ་པ་གསུམ་པའི་བྱ་དགའ་ཐོབ་པ་སོགས་རྒྱལ་ཡོངས་ཀྱི་བྱ་དགའ་མང་དག་ཅིག་ཐོབ།

གསུང་རྩོམ་ལ་«དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ཀྱི་འགྲེལ་པ་ཡིད་ཀྱི་དགའ་སྟོན་»དང་། «ཆོས་རྣམ་ཀུན་བཏུས་»སྟོད་སྨད་གཉིས། «སྤྲིན་གྱི་ཕོ་ཉའི་འགྲེལ་པ་ངོ་མཚར་དགའ་སྟོན་» «དཔལ་གྲུབ་པའི་དབང་ཕྱུག་བརྩོན་འགྲུས་བཟང་པོའི་རྣམ་ཐར་» «རྟོགས་བརྗོད་དཔག་བསམ་འཁྲི་ཤིང་གི་འགྲེལ་པ་ཡིད་ཀྱི་སྙེ་མ་»པོད་གཉིས། «རྗེ་ཙོང་ཁ་པའི་གསུང་རྩོམ་སྙན་ངག་ཨའི་དབྱངས་ངེས་སོགས་ཁག་གསུམ་གྱི་འགྲེལ་པ་» «བོད་སིལ་བུའི་བྱུང་བ་བརྗོད་པ་ཤེལ་དཀར་ཕྲེང་བ་» «ཆོས་རྒྱལ་དྲི་མེད་ཀུན་ལྡན་གྱི་རྟོགས་བརྗོད་བསྔགས་འོས་བསྔགས་པའི་རྩ་འགྲེལ་པད་དཀར་ཆུན་པོ་» «བོད་ཀྱི་གནའ་རབས་དཔལ་འབྱོར་ཐང་བཞིའི་སྐོར་གྱི་དཔྱད་རྩོམ་ཕྱོགས་བསྒྲིགས་ངོ་མཚར་མིག་འབྱེད་» «རྗེ་བཙུན་མི་ལའི་རྟོགས་བརྗོད་སྙན་ཚིག་མའི་རྩ་འགྲེལ་» «ནོར་བྲང་ཨོ་རྒྱན་གྱི་གསུང་རྩོམ་ཕྱོགས་བསྒྲིགས་» «བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་»པོད་གསུམ་ཅན་སོགས་གསུང་འབུམ་པོད་གྲངས་ཉི་ཤུ་ལྷག་ཡོད་འདུག

གསར་འགོད་པ། དཔལ་ལྡན།