སྤྱི་འཐུས་ཚོགས་གཙོ་མཆོག་གིས་དབྱིན་ཡུལ་གྲོས་ཚོགས་ནང་བོད་དོན་གླེང་སློང་གནང་།

སྤྱི་འཐུས་ཚོགས་གཙོ་མཆོག་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་པའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་དབྱིན་ཡུལ་གྲོས་ཚོགས་སུ་ཕེབས་ཏེ་གནད་ཡོད་མི་སྣ་སོགས་དང་མཇལ་འཕྲད་ཀྱིས་བོད་དོན་གླེང་སློང་གནང་ཡོད་འདུག

དེ་འབྲེལ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྒེར་གྱི་ཨེག་དྲ་རྒྱའི་སྟེང་། དེ་རིང་དབྱིན་ཇིའི་གྲོས་ཚོགས་འོག་མའི་ཚོགས་གཙོ་ལིན་སེ་ཧའོ་ལེ་ལགས་སུ་མཇལ་འཕྲད་ཀྱིས་བོད་ནང་གི་ཛ་དྲག་གི་གནས་སྟངས་ཐོག་གླེང་སློང་ཡག་པོ་བྱེད་ཐུབ་བྱུང་ལ། ཁོང་གིས་མཁྱེན་ཡངས་ཐོག་བསམ་ཤེས་དང་འབྲེལ་ལམ་དམ་ཟབ་ཏུ་བཏང་བར་ཡི་རངས་ཞུ་རྒྱུ་ཡིན་ཞེས་གསུངས་འདུག

ཕྱི་ཚེས་ ༡༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་དབྱིན་ཡུལ་གྲོས་ཚོགས་འོག་མའི་ཚོགས་གཙོ་སྐུ་ཞབས་ལེན་ཌི་སི་ཧོ་ཡེལ་ (Sir Lindsay Hoyle) མཆོག་དང་། དབྱིན་ཡུལ་གྲོས་ཚོགས་འོག་མའི་འཐུས་མི་དང་། གུ་ཡངས་མང་གཙོ་སྲིད་དོན་ཚོགས་པའི་མགྲིན་ཚབ་པ་ལྕམ་སྐུ་ཇུ་ལེ་ སི་མིཏ་ (Baroness Julie Smith) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཌེ་ཝི་ཌི་ ཨལ་ཊོན་ (David Alton) མཆོག གུ་ཡངས་མང་གཙོ་སྲིད་དོན་ཚོགས་པ་ནས་ཡིན་པ་གྲོས་ཚོགས་འོག་མའི་འཐུས་མི་སྐུ་ཞབས་བྷོ་བྷེ་ ཌིན་ (Sir Bobby Dean) མཆོག་བཅས་དང་ལྷན་རིམ་པས་མཇལ་འཕྲད་གནང་ཡོད་འདུག

སྐབས་དེར་སྤྱི་འཐུས་སྐུ་ཚབ་དེས་དབྱིན་ཡུལ་གྲོས་ཚོགས་ནང་ཁྲིམས་བཟོའི་ལས་དོན་གྱི་བརྒྱུད་རིམ་སྟེ། ཐོག་མར་སྲིད་དོན་ཚོགས་པའི་སྲིད་བྱུས་གཏན་འབེབས་དང་། དེ་ནས་གྲོས་ཚོགས་གོང་མའི་ནང་སྲིད་བྱུས་བསྐྱར་ཞིབ། མཐའ་མ་གྲོས་ཚོགས་གོང་འོག་གཉིས་ཀྱི་ནང་གྲོས་ཆོད་སྙན་སྒྲོན་དང་། བགྲོ་གླེང་། གཏན་འབེབས་གནང་ཕྱོགས་བཅས་ཀྱི་བརྒྱུད་རིམ་ཐོག་ངོ་སྤྲོད་གནང་བ་དང་། དེ་བཞིན་དབྱིན་ཡུལ་གྲོས་ཚོགས་འོག་མའི་ཚོགས་གཙོའི་འགན་དབང་བཅས་ཀྱི་ཐོག་རྒྱུས་ལོན་གནང་བ་དང་སྦྲགས། ཚོགས་གཙོ་མཆོག་གིས། ད་ལྟའི་རྒྱ་ནག་དམར་གཞུང་འོག་བོད་ནང་གི་འགྲོ་བ་མིའི་ཐོབ་ཐང་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་གནས་སྟངས་དང་འབྲེལ་ཏེ། བོད་པའི་སློབ་གྲྭ་ཁག་བཙན་ཤེད་ཐོག་སྒོ་བརྒྱབ་བཅུག་པ་དང་། བོད་ཕྲུག་རྣམས་རྒྱའི་གཏན་འཇགས་སློབ་གྲྭའི་ནང་སློབ་འཇུག་བྱེད་བཅུག་པ། བོད་མི་རྣམས་ཀྱི་རིགས་རྫས་བསྡུ་ལེན་སོགས་ཀྱི་གནས་སྟངས་གསལ་སྟོན་གྱིས་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས་ཀྱི་ངོ་བོ་དང་བཅས་པ་ཉམས་དམས་རྩ་བརླག་ཏུ་གཏོང་རྒྱུའི་གདུག་རྩུབ་ཅན་གྱི་སྲིད་བྱུས་ལག་བསྟར་གྱིས་བོད་རིགས་རྣམས་རྒྱ་རིགས་ནང་མཉམ་བསྲེས་གཏོང་བཞིན་ཡོད་པའི་སྐོར་སོགས་ད་ལྟའི་བོད་ནང་གི་ཛ་དྲག་གནས་སྟངས་སྐོར་ཞིབ་ཕྲ་ངོ་སྤྲོད་དང་། བོད་རྒྱའི་དཀའ་རྙོག་སེལ་ཐབས་སུ་ཕྱོགས་གཉིས་ཕན་ཚུན་འབྲེལ་མོལ་གནང་རྒྱུ་གལ་ཆེན་པོ་ཡིན་པ། ཨ་རིའི་གཞུང་ནས་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་གཏན་འབེབས་གནང་བ་ལྟར་ཨིན་ཡུལ་གྲོས་ཚོགས་ནས་ཀྱང་དེ་ལྟར་ཁྲིམས་ཡིག་གཏན་འབེབས་གནང་སྐྱོང་ཡོང་བའི་སྐོར་སོགས་ཞུས་གནང་འདུག

ཕྱི་ཟླ་ ༡༡ ཚེས་ ༡༨ ཉིན་སྐ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་པའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་དབྱིན་ཡུལ་གྲོས་ཚོགས་ནང་ཕེབས་ཏེ།  དབྱིན་ཡུལ་གྲོས་ཚོགས་འོག་མའི་མང་ཚོགས་རྩིས་ཁྲའི་ཚོགས་ཆུང་གི་ཚོགས་གཙོ་དང་། རྙིང་ཞེན་སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེ་ཕི་རི་ ཁི་ལིབ་ཊོན་ བྷ་རོན་ (Sir Geoffrey Clifton Browne) མཆོག་དང་ལྷན་མཇལ་འཕྲད་གནང་ཞིང་། དབྱིན་ཡུལ་གྲོས་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་དབར་ཕན་ཚུན་སོ་སོའི་སྒྲིག་འཛུགས་ཀྱི་སྒྲོམ་གཞི་དང་། སྒྲིག་གཞི་དང་བརྒྱུད་རིམ། ལས་དོན་གནང་ཕྱོགས་བཅས་ཀྱི་ཐོག་ཕན་ཚུན་གོ་རྟོགས་སྤེལ་རེས་དང་། དེ་བཞིན་སྤྱི་ལྷན་སྐུ་ཚབ་ཚོགས་ཆུང་ལ་དེ་གའི་མང་ཚོགས་རྩིས་ཁྲའི་ཚོགས་ཆུང་འཚོགས་བཞིན་པ་ཡུལ་དངོས་སུ་གཟིགས་ཞིབ་གནང་རྒྱུའི་གོ་སྐབས་སོགས་བྱུང་ཡོད་འདུག

གཞན་ཡང་། ཉིན་དེར་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་གོ་སྐབས་དེ་བརྒྱུད། ད་ལྟའི་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་ཏེ། བོད་ནང་རྒྱ་ནག་དམར་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས་ཀྱི་ངོ་བོ་དང་བཅས་པ་རྩ་མེད་བཟོ་རྒྱུའི་སྲིད་བྱུས་ལག་བསྟར་གྱིས་གཞིས་ལུས་བོད་མི་རྣམས་སྡུག་སྦྱོང་མནར་གཅོད་མྱོང་བཞིན་པ་སོགས་ད་ལྟ་མུ་མཐུད་འཕྲད་བཞིན་པའི་དཀའ་ངལ་ཁག་གསལ་སྟོན་གྱིས་རྒྱལ་སྤྱིའི་སྟེང་བོད་ནང་གི་ད་ལྟའི་ཛ་དྲག་གནས་སྟངས་ཐོག་སྔར་ལྷག་དོ་སྣང་དང་རྒྱབ་སྐྱོར་དགོས་སྐོར་སོགས་གསུངས་གནང་འདུག

གསར་འགོད་པ་སྐལ་བཟང་སྦྱིན་པས་བོད་མི་མང་སྤྱི་འཐུས་ལྷན་ཚོགས་ཀྱི་དྲ་ངོས་ནས་བསྡུ་སྒྲིག་བྱས།