བོད་མིའི་སློབ་གྲྭ་ཁག་གི་ཤེས་ཡོན་ཡར་རྒྱས་གཏོང་ཐབས་ཀྱི་ཆེད་དོན་བགྲོ་གླེང་སྟེང་རྒྱ་གར་དང་བོད་མིའི་ཤེས་ཡོན་ཆེད་ལས་བ་རྣམས་ཀྱིས་གྲོས་གཞི་དོན་ཚན་ལྔའི་ཐོག་བགྲོ་གླེང་གནང་འདུག
ཁ་སང་དང་དེ་རིང་ཉིན་གྲངས་གཉིས་རིང་དྷ་ས་ནོར་བུ་གསོལ་མགྲོན་ཁང་གི་ཞི་བདེའི་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག བོད་མིའི་སློབ་གྲྭ་ཁག་གི་ཤེས་ཡོན་ཡར་རྒྱས་གཏོང་ཐབས་ཀྱི་ཆེད་དོན་བགྲོ་གླེང་ཞེས་པ་ཞིག་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་།ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྒྱ་གར་རྒྱལ་ཡོངས་ཤེས་ཡོན་ཉམས་ཞིབ་དང་སྦྱོང་བརྡར་ལྷན་ཚོགས་ཀྱི་ངེས་སྟོན་པ་ཟུར་པ་སྐུ་ཞབས་ཁིར་ཤི་ན་ཀུ་མཱར་ལགས། (Centre for Learning) ཞེས་པའི་བསྟི་གནས་ཁང་གི་དགེ་རྒན་ཀ་མ་ལཱ་མུ་ཀུན་ད་ལགས། སཾ་བྷོ་ཊ་བོད་སློབ་ཚོགས་པའི་ངེས་སྟོན་པ་ཟུར་པ་ཀརྨ་ཆུང་བདག་ལགས། ལྡི་ལི་གཙུག་ལག་སློབ་གཉེར་ཁང་གི་ཉེ་བའི་གཙུག་ལག་སློབ་དཔོན་ལ་ཏི་ཀཱ་གུབ་ཏཱ་ལགས། (iTeach School) ཞེས་པའི་སློབ་གྲྭའི་འགན་འཛིན་ནེ་ཧཱ་བི་ད་ཡ་ལགས། (CETE) ཚོགས་པའི་ཚོགས་གཙོ་པད་མ་སང་པ་ནི་ལགས། དྷ་ས་བོད་ཕྲུག་ཁྱིམ་སྡེའི་ཤེས་ཡོན་འགན་འཛིན་ཟུར་པ་འབྲུག་ཚེ་རིང་ལགས། དྷ་ས་བོད་ཕྲུག་ཁྱིམ་སྡེའི་ཤེས་ཡོན་འགན་འཛིན་ངག་དབང་ལྷ་མོ་ལགས། དེ་བཞིན་ཤེས་རིག་ལས་ཁུངས་ཀྱི་སྡེ་ཚན་ཁག་གི་འགན་འཛིན་སོགས་མཉམ་ཞུགས་གནང་འདུག
འདི་གའི་གསར་འགོད་པས་ཐེངས་འདིའི་བགྲོ་གླེང་སྐོར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་སུ་བཀའ་འདྲི་ཞུས་པར་ཁོང་གིས། ཐེངས་འདིའི་ཆེད་དོན་བགྲོ་གླེང་ཐོག་རྒྱ་གར་གྱི་ཤེས་ཡོན་ཆེད་ལས་མཁས་པ་དང་། བོད་པའི་ཤེས་ཡོན་གྱི་ཆེད་ལས་པ་དང་ཉམས་མྱོང་ཅན་གྱི་མི་སྣ་གདན་འདྲེན་ཞུས་ཏེ། ཁོང་རྣམས་ཀྱིས་བཙན་བྱོལ་བོད་མིའི་ཤེས་ཡོན་གྱི་རྒྱབ་ལྗོངས་ཤེས་པའི་ཉམས་མྱོང་ཐོག་གྲོས་བསྡུར་སྦྱངས་བཤད་གནང་ཡོད་པ་མ་ཟད། ཐེངས་འདིར་ཆེད་ལས་བ་རྣམས་ཀྱིས་གྲོས་གཞི་དོན་ཚན་ལྔའི་ཐོག་བགྲོ་གླེང་བྱས་པའི་ཐོག་ནས་བོད་མིའི་སྒྲིག་འཛུགས་ཤེས་རིག་ལས་ཁུངས་སུ་བསམ་འཆར་གང་འཚམ་འབྱོར་གྱི་རེད། བསམ་འཆར་འདིའི་ཐོག་ནས་ཤེས་རིག་ལས་ཁུངས་ཀྱི་མ་འོངས་བའི་ལོ་ལྔ་དང་བཅུའི་འཆར་གཞི་ཡོང་གི་རེད། ཅེས་འགྲེལ་བརྗོད་གནང་བྱུང་།
བཙན་བྱོལ་བོད་མིའི་ཤེས་ཡོན་གྱི་གནད་དོན་གཙོ་བོ་གང་གི་སྐོར་ལ་མཁས་པའི་བགྲོ་གླེང་གནང་ཡོད་དྲིས་པར་ཁོང་གིས། ཐེངས་འདིར་བགྲོ་གླེང་གཙོ་བོ་ཤེས་ཡོན་གྱི་སྤུས་ཚད་ཆེད་དུ་རེད། ད་ལྟ་ང་ཚོས་གདོང་ལེན་བྱེད་དགོས་པའི་གནད་དོན་གཅིག་ནི་བཙན་བྱོལ་དུ་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་པ་དེ་རེད། སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་ཡོད་པས་ཤེས་ཡོན་གནས་ཚད་ཐོག་ཤུགས་རྒྱག་པ་དགོས་པ་རེད། ཡོན་ཤེས་སྤུས་ཚད་ཡར་རྒྱས་གཏོང་པར་དགེ་རྒན་གྱི་སློབ་ཁྲིད་ཡར་རྒྱས་དང་། འགན་སྐྱོང་ཚགས་ཚུད། ཕ་མ་མཉམ་ཞུགས་ཀྱི་གནད་དོན་སོགས་ལ་བགྲོ་གླེང་བྱས་ཡོད། ཅེས་འགྲེལ་བརྗོད་གནང་བྱུང་།
བགྲོ་གླེང་འདི་བརྒྱུད་ནས་བཙན་བྱོལ་བོད་མིའི་ཤེས་ཡོན་ཐོག་ལེགས་བཅོས་ག་རེ་གཏོང་འཆར་ཡོད་མེད་དྲིས་བར་ཁོང་གིས། ད་ལྟ་རང་ལེགས་བཅོས་གཏོང་བའི་འཆར་གཞི་གང་ཡོད་མེད་ཞུ་ཚོད་ཐིག་གི་མི་འདུག ཐེངས་འདིའི་བགྲོ་གླེང་གི་ཉིན་གྲངས་གཉིས་རིང་བསམ་འཆར་གང་འཚམ་འབྱོར་གྱི་རེད། བསམ་འཆར་འདི་དག་ཕྱོགས་སྒྲིག་བྱས་ཏེ་མ་འོངས་བར་ཆེད་ལས་མི་སྣ་དང་ཚོགས་པ་ཁག་ལ་འབྲེལ་བ་ཞུས་ནས་ལས་འཆར་དང་ལག་ལེན་གྱི་ངོ་བོ་ཡོང་གི་རེད། ཅེས་འགྲེལ་བརྗོད་གནང་བྱུང་།
འདི་གའི་གསར་འགོད་པས་བཙན་བྱོལ་བོད་མིའི་ཤེས་ཡོན་ལེགས་བཅོས་གཏོང་ཕྱོགས་སྐོར་བོད་ཁྱིམ་ཤེས་ཡོན་འགན་འཛིན་ཟུར་བ་འབྲུག་ཚེ་རིང་ལགས་སུ་དྲིས་པར་ཁོང་གིས། ང་རང་སྒེར་གྱི་ངོས་ནས་བསམ་བློ་བཏང་ཚེ་བོད་ཀྱི་སྐད་ཡིག་དང་རིག་གཞུང་ཡར་རྒྱས་གཏོང་རྒྱུ་བཤད་མ་དགོས་པ་ཞིག་རེད། ཕ་མ་དང་དགེ་རྒན་བར་གྱི་འབྲེལ་ལམ་བཟང་པོ་ཉར་སྟེ།དུས་དང་རྣམ་པ་ཀུན་དུ་བྱིས་པ་རྣམས་ལ་འཛིན་གྲྭ་དང་ཁྱིམ་ཚང་ནས་བོད་ཀྱི་སྐད་ཡིག་གི་དབྱིངས་བསླེབས་འཇུག་དགོས། གལ་ཆེ་ཤོས་ཤིག་ནི་དགེ་རྒན་གྱི་སློབ་ཁྲིད་ཀྱི་ཐབས་ལམ་རེད། བྱིས་པའི་སེམས་ཁམས་དང་བསྟུན་ནས་ཤེས་ཡོན་གྱི་གནས་ཚད་དེ་སྤྲོད་ཐུབ་དགོས་པ་རེད། དེ་བཞིན་དགེ་རྒན་རྣམས་སློབ་ཕྲུག་གསོ་སྐྱོང་བྱེད་པར་ཐང་མི་ཆད་པའི་སེམས་ཤུགས་ཤིག་དགོས་ཀྱི་འདུག དགེ་རྒན་གྱིས་སློབ་ཁྲིད་གནང་སྐབས་སློབ་ཕྲུག་རྣམས་ལ་སློབ་སྦྱོང་གི་སྤྲོ་བ་ཡོད་པ་བཟོ་ཐུབ་དགོས་ཀྱི་འདུག ངས་ཀྱང་དགེ་རྒན་བྱས་པའི་ཉམས་མྱོང་ནང་བྱིས་པའི་ནུས་པ་ཕྱི་རུ་འདོན་དུ་འཇུག་ཐུབ་དགོས།ཞེས་འགྲེལ་བརྗོད་གནང་བྱུང་།
དེ་བཞིན་དབུ་འབྱེད་མཛད་སྒོའི་སྐབས་ཁྲི་ཟུར་ཟམ་གདོང་རིན་པོ་ཆེ་མཆོག་གིས་དགེ་རྒན་རྣམས་ནས་སློབ་ཕྲུག་གི་རྒྱུད་ལ་ཤེས་ཡོན་གྱི་སྤྲོ་སྣང་སྤེལ་རྒྱུར་འབད་དགོས་པ་དང་། ལྷག་པར་སློབ་ཕྲུག་སོ་སོའི་ཁམས་དང་མོས་པ་གཞིར་བཟུང་སློབ་སྟོན་གནང་ཐབས་ལ་འབད་རྩོལ་གནང་དགོས་པ། འགྲོ་བ་མིའི་འཕྲལ་ཕུགས་ཀྱི་ཕན་བདེའི་གཞི་རྩར་གྱུར་བའི་བོད་བརྒྱུད་ནང་བསྟན་གྱི་ལུང་རྟོགས་ཀྱི་བསྟན་པ་བོད་ཕྲུག་རྣམས་ཀྱིས་རྒྱུན་འཛིན་དར་འཕེལ་གཏང་རྒྱུར་འགན་ཁུར་དགོས་སྐོར་གསུངས་འདུག
ཐེངས་འདིའི་བགྲོ་གླེང་ཐོག་གཞི་རྩའི་ཤེས་ཡོན་དང་གྲངས་རྩིས་རིག་པ་གོང་མཐོར་གཏོང་ཐབས་དང་། འཛིན་གྲྭའི་སློབ་ཁྲིད་དང་སློབ་གྲྭའི་མགོ་ཁྲིད་ནུས་རྩལ། བོད་སློབ་ཁག་ཏུ་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་པའི་གནས་སྟངས་ལ་དུས་བསྟུན་འགྱུར་བཅོས་ཇི་དགོས། བོད་སློབ་ཁག་ཏུ་བོད་ཀྱི་ཆོས་དང་རིག་གཞུང་། སྐད་ཡིག་གི་གནས་ཚད་གོང་མཐོར་གཏོང་ཐབས། བོད་སློབ་ཁག་གི་དམིགས་བསལ་དགོས་མཁོ་ཅན་ཚོའི་དཀའ་ངལ་ལ་གདོང་ལེན་བྱེད་ཐབས་བཅས་གྲོས་གཞི་དོན་ཚན་ལྔའི་ཐོག་བགྲོ་གླེང་གནང་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
