བལ་ཡུལ་གཞུང་གིས་རྒྱལ་མཚན་ནོར་བུ་བལ་ཡུལ་དུ་ཡོང་བར་ངོས་ལེན་མེད་ཟེར།

བལ་ཡུལ་གཞུང་གིས་རྒྱལ་མཚན་ནོར་བུ་བལ་ཡུལ་དུ་ཡོང་གི་ཡོད་པ་ཤེས་རྟོགས་མེད་ལ་ངོས་ལེན་ཀྱང་མེད་ཅེས་བརྗོད་ཡོད་ཟེར་ནས་བལ་ཡུལ་གྱི་གསར་ལམ་ཁག་གིས་བསྒྲགས་འདུག

ད་ལྟའི་ཆར་རྒྱ་ནག་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བལ་ཡུལ་དུ་ཡོང་གཏན་ཁེལ་ཡོད་མེད་ཀྱི་གནས་ཚུལ་མང་དག་ཅིག་བལ་ཡུལ་གྱི་གསར་འགྱུར་བརྒྱུད་ལམ་ཁག་ཅིག་གིས་འུར་བསྒྲགས་ཤུགས་ཆེན་བྱས་དང་བྱེད་མུས་ཡིན་ལ། ཁ་སང་བལ་ཡུལ་གྱི་ཀ་ཐི་མན་ཌི་ཆ་འཕྲིན་ཕོ་ཉའི་གནས་ཚུལ་ནང་། བལ་ཡུལ་གྱི་སྲིད་བློན་ཤར་མཱ་གཙོས་ཕྱི་སྲིད་བློན་ཆེན་སོགས་ཀྱིས། རྒྱལ་མཚན་ནོར་བུ་བལ་ཡུལ་དུ་ཡོང་གི་ཡོད་པའི་གནས་ཚུལ་གང་ཡང་ཤེས་རྟོགས་མེད་པས་བདེན་པ་མིན་པ་དང་། བལ་ཡུལ་ཕྱི་སྲིད་ལས་ཁུངས་ཀྱིས་རྒྱལ་མཚན་ནོར་བུ་བལ་ཡུལ་དུ་ཡོང་བར་མོས་མཐུན་མེད་སྐོར་བརྗོད་ཡོད་ཅིང་། བལ་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གིས་ཀྱང་རྒྱལ་མཚན་ནོར་བུ་བལ་ཡུལ་དུ་ཡོང་གི་མེད་པའི་ལན་འདེབས་བྱས་ཡོད་པ་སོགས་གསལ་འདུག

འོན་ཀྱང་། ཟླ་འདིའི་ཕྱི་ཚེས་ ༡༢ ནས་ ༡༥ བར་རྒྱ་ནག་ལྷོ་རྒྱ་མཚོའི་ནང་པའི་ལྷན་ཚོགས་(Nanhai Buddhism Round Table) ཞེས་པ་ཞིག་བལ་ཡུལ་གྱི་རྒྱལ་ས་ཀ་ཐི་མན་ཌིར་ཡོད་པའི་གཡག་དྲེད་གསོལ་མགྲོན་ཁང་  (Hotel Yak and Yeti) དང་གནས་མཆོག་ལུམ་བི་ནི་རུ་བསྡུ་ཡི་ཡོད་པ་ནི་དངོས་ཡོད་གནས་ཚུལ་ཡིན་ཞིང་། ཁ་སང་ཕྱི་ཚེས་ ༡༢ ཉིན་ཚོགས་འདུ་དེའི་ཆེད་དང་ཡང་དམིགས་བསལ་སྐུ་མགྲོན་གཞན་གྱི་ཆེད་དུ་རྒྱ་ནག་གི་ནང་བསྟན་མཐུན་ཚོགས་ཀྱི་ཚོགས་གཞོན་ཡེ་ཧྲིན་ (Yin Shun) གྱིས་སྣེ་འཁྲིད་པའི་མི་བཅུ་འཛོམས་པའི་སྐུ་ཚབ་ཅིག་བལ་ཡུལ་གྱི་རྒྱལ་སར་འབྱོར་རྗེས། ལུམ་བི་ནིར་གྲ་སྒྲིག་བྱེད་པར་ཕྱིན་ཡོད། ཅེས་ཀ་ཐི་མན་ཌི་ཆ་འཕྲིན་ཕོ་ཉས་བརྗོད་འདུག

གནད་དོན་དེའི་ཐད་བལ་ཡུལ་འགྲིམ་འགྲུལ་བློན་ཆེན་ལས་ཁུངས་ཀྱི་གནད་ཡོད་མི་སྣས། སྤྱིར་ན་པཎ་ཆེན་བླ་མ་སྐོར་སྲུང་བ་དང་ལྷན་ཐད་ཀར་པེ་ཅིན་ནས་ལུམ་བི་ནིར་འབྱོར་གྱི་ཡོད་ཀྱང་། རེས་གཟའ་ལྷག་པའི་ཕྱི་དྲོ་བར་པེ་ཅིན་ནས་དམིགས་བསལ་མཁའ་གྲུ་གང་ཡང་འདིར་འབྱོར་མ་སོང་། མཁའ་ལམ་དེ་ནས་ཤར་སྐྱོད་བྱེད་མཁན་གྱི་མཁའ་གྲུ་མང་པོ་ཞིག་ཀྱང་འཕུར་སྐྱོད་བྱས་བཅུག་མེད་པ་རེད། ཅེས་བརྗོད་འདུག་ལ། བལ་ཡུལ་ནང་སྲིད་བློན་ཆེན་ལས་ཁུངས་ཀྱི་ཆེས་མཐོ་མི་སྣ་ཞིག་གིས། ང་ཚོས་ཐོ་ཁོངས་སུ་ཁོའི་མིང་རྙེད་མ་སོང་། ཁོ་ལ་མིང་དང་ཐོངས་མཆན་མང་པོ་ཡོད་སྲིད་པས། ང་ཚོས་དོགས་ཟོན་དང་དོགས་པ་བྱས་པ་ཡིན། ཞེས་དང་། ལུམ་བི་ནི་ཡར་སྐྱེད་ཐེབས་རྩ་( Lumbini Development Trust) ཁང་གི་འགན་འཛིན་གཞོན་པ་ལ་ཀལ་བླ་མ་(Lyarkal Lama) ཟེར་བས་རྒྱལ་མཚན་ནོར་བུ་ནི་རྒྱ་ནག་གི་གནད་ཡོད་དཔོན་རིགས་ཤིག་སྟེ་སྲིད་འཛིན་གཞོན་པ་ལྟ་བུ་ཞིག་ཡིན་པས་ང་ཚོས་ཁོའི་བདེ་འཇགས་ལ་སྲུང་སྐྱོབ་བྱ་ཐབས་བྲལ་བ་ཞིག་རེད། ཅེས་བརྗོད་འདུག 

ཡང་གསར་འགོད་པས། བོད་མི་ཞིག་གིས་ཟླ་འདིའི་ཕྱི་ཚེས་ ༡༢ ཉིན་གྱི་ཐོ་རངས་ཏེ། མཚན་དཀྱིལ་ཆུ་ཚོད་ ༡།༢༠ སྟེང་སྤེལ་བའི་བརྙན་ཞིག་ལས། རྒྱལ་མཚན་ནོར་བུ་ཐོ་རངས་ལ་སི་ཁྲོན་ཕྱོགས་ཀྱི་བོད་པའི་དགོན་པ་ཞིག་ཏུ་སེར་སྐྱ་མི་མང་དང་ལྷན་དུ་བསྐོར་ར་རྒྱག་གི་ཡོད་པའི་བརྙན་ཞིག་མཐོང་རྒྱུ་འདུག་མོད། འོན་ཀྱང་། བརྙན་དེ་ག་དུས་བླངས་ཡོད་མེད་དང་རྒྱལ་མཚན་ནོར་བུ་དོན་དངོས་ཐོག་སྔོན་མ་ཞིག་ནས་དགོན་པ་དེར་ཕྱིན་པ་ཡིན་ནམ། ཡང་ན་ཁ་སང་ཕྱིན་པ་གང་ཡིན་གསལ་ཁ་མི་འདུག

ཡང་བལ་ཡུལ་ཆ་འཕྲིན་ཕོ་ཉའི་གནས་ཚུལ་ནང་། བལ་ཡུལ་བདེ་སྲུང་བློན་ཆེན་ལས་ཁུངས་ཀྱི་མི་སྣས། ༧གོང་ས་རྒྱལ་བ་རིན་པོ་ཆེ་མཆོག་བལ་ཡུལ་ནང་ཕེབས་འཇུག་གི་མེད་པ་ལྟར། རྒྱ་ནག་གི་པཎ་ཆེན་ཡང་བལ་ཡུལ་དུ་ཡོང་གི་འཇུག་རྒྱུ་མིན། ཞེས་དང་། རྒྱ་ནག་གིས་རྒྱལ་མཚན་ནོར་བུ་བལ་ཡུལ་དུ་བསྐྱོད་ཐུབ་ཐབས་ཐེངས་མང་བྱས་ནའང་བལ་ཡུལ་གཞུང་གིས་ངོས་ལེན་བྱས་མེད་ཚུལ་དང་། ༧གོང་ས་མཆོག་དང་བཙན་བྱོལ་བོད་མི་རྣམས་ལ་ནུབ་ཕྱོགས་པའི་རྒྱབ་སྐྱོར་ཡོད་སྐོར་སོགས་བརྗོད་འདུག

སྤྱིར་ཟླ་འདིའི་ཕྱི་ཚེས་ ༡༤ ཉིན་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་རྒྱ་ནག་གི་རྒྱལ་ས་པེ་ཅིན་ནས་ཐད་ཀར་གནམ་གྲུ་བརྒྱུད་བལ་ཡུལ་གྱི་སྟོན་པའི་འཁྲུངས་གནས་ལུམ་བི་ནི་དང་། དེ་ནས་བལ་ཡུལ་ཀ་ཐི་མན་ཌུ་རུ་འགྲོ་འཆར་ཡོད་པའི་ཁར། ཁོང་དང་ལྷན་རྒྱ་ནག་གཞུང་གིས་ཆེད་གཏོང་བྱས་པའི་བདེ་སྲུང་མི་སྣ་དང་། གྲྭ་བ་གྲངས་ ༢༢༧ བཅས་སོགས་ཡོད་པ་བལ་ཡུལ་གྱི་གསར་འགྱུར་བརྒྱུད་ལམ་ཁག་གིས་བསྒྲགས་ཤིང་། ད་ལྟ་རྒྱལ་མཚན་ནོར་བུ་བལ་ཡུལ་དུ་ཡོང་རྒྱུ་མིན་པ་དང་བལ་ཡུལ་གཞུང་གིས་ངོས་ལེན་མེད་པའང་བསྒྲགས་བཞིན་འདུག་ལ། ད་དུང་རྒྱལ་མཚན་ནོར་བུ་བལ་ཡུལ་དུ་ཡོང་རྒྱུར་གོ་སྒྲིག་བྱེད་མཁན་ནི་ལུམ་བི་ནི་ཡར་སྐྱེད་ཐེབས་རྩ་( Lumbini Development Trust) ཁང་གི་འགན་འཛིན་གཞོན་པ་ལ་ཀལ་བླ་མ་(Lyarkal Lama) ཟེར་བ་ཁོ་ཡིན་ཞིང་། ཁོ་ནི་ཡུལ་ཁྲིམས་དང་འགལ་བའི་ནང་པའི་གྲྭ་བ་ཞིག་ཡིན་པ་སོགས་བརྗོད་འདུག

ད་ལན་རྒྱལ་མཚན་ནོར་བུའི་བལ་ཡུལ་གྱི་གཞུང་འབྲེལ་སྐོར་སྐྱོད་དང་འབྲེལ། དབུས་བོད་ཀྱི་གཞོན་ནུ་ལྷན་ཚོགས་ཀྱིས་དབྱིན་བོད་གཉིས་ཀྱི་ཐོག་ནས་ངོ་རྒོལ་བསྒྲགས་གཏམ་སྤེལ་བ་མ་ཟད། བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁུངས་སོགས་ཀྱང་ངོ་རྒོལ་བྱས་འདུག

རྒྱལ་མཚན་ནོར་བུའི་འགྲོ་སྐྱོད་ཐད་རྒྱ་ནག་གིས་གསང་རྒྱ་དང་དོགས་ཟོན་ཤུགས་ཆེན་བྱེད་བཞིན་ཡོད་ལ། ཕྱི་ལོ་ ༢༠༡༩ ཟླ་ ༥ རྒྱལ་མཚན་ནོར་བུ་ལགས་ཐེ་ལན་ཌིའི་ནང་གཞུང་འབྲེལ་སྐོར་སྐྱོད་དུ་ཕྱིན་ནས། ཡུལ་དེའི་ནང་པའི་གཙུག་ལག་སློབ་གྲྭ་ཆེན་མོ་གཙོ་བོར་གྱུར་བའི་ནང་པའི་བྱེད་སྒོ་ཁག་སོགས་ཀྱི་ཐོག་མཉམ་ཞུགས་ཀྱིས་གསུང་བཤད་གནང་ཡོད། འོན་ཀྱང་། རྒྱ་ནག་གཞུང་གིས་གནས་ཚུལ་དེ་ཟླ་གཅིག་གི་རྗེས་སུ་མ་གཏོགས་ཕྱི་བསྒྲགས་བྱས་མེད་ལ། ད་རེས་ཀྱང་སྔོན་མ་ནང་བཞིན་གྱི་གནས་སྟངས་བྱུང་མི་སྲིད་པ་མ་རེད།

ཕྱི་ལོ་ ༡༩༩༥ ཟླ་བ་ ༡༡ ཚེས་ ༡༡ ཉིན་རྒྱ་ནག་དམར་ཤོག་ཚོགས་པས་རྒྱལ་མཚན་ནོར་བུ་ཞེས་པ་ཞིག་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གསལ་བསྒྲགས་བྱས་ཤིང་། ཕྱི་ལོ་ ༡༩༩༥ ཟླ་བ་ ༡༢ ནང་གདན་ས་བཀྲ་ཤིས་ལྷུན་པོའི་གཡས་གཡོན་དུ་དམག་མི་ལྔ་བརྒྱ་ལྷག་བཏང་ནས་ཉེན་སྲུང་བཙན་པོའི་ངང་ཁྲི་འདོན་བྱས་ཡོད་འདུག ཕྱི་ལོ་ ༢༠༡༩ ཟླ་ ༦ ཚེས་ ༢༢ ཉིན་རྒྱལ་མཚན་ནོར་བུ་ཐོག་མར་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཤིང་། འདི་ལོའི་ཕྱི་ཟླ་ ༩ ཚེས་ ༣ ཉིན་རྒྱལ་མཚན་ནོར་བུ་བསྐྱར་དུ་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོ་བཞག་བྱས་ཡོད། ད་ལྟ་ཁོང་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཞོན་ཡང་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།