སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་ཨ་རིའི་གྲོས་ཚོགས་ཀྱི་དཔེ་མཛོད་ཁང་དུ་སྨོན་ལམ་བོད་ཀྱི་ཚིག་མཛོད་ཆེན་མོ་དེབ་གྲངས་ ༢༢༣ ཨ་རིའི་མི་མང་ལ་ལེགས་སྐྱེས་སུ་ཕུལ་ཡོད་འདུག
ཁ་སང་ཕྱི་ཚེས་ ༡༢ ཉིན་གྱི་ཉིན་རྒྱབ་ཆུ་ཚོད་ ༢ པའི་སྟེང་ཨ་རིའི་རྒྱལ་ས་ཝ་ཤིང་ཊོན་ཌི་སི་རུ་རྟེན་གཞི་བྱས་པའི་ཨ་རིའི་གྲོས་ཚོགས་ཀྱི་དཔེ་མཛོད་ཁང་ (Thomas Jefferson) ཁང་དུ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་ཨ་རིའི་གྲོས་ཚོགས་ཀྱི་དཔེ་མཛོད་ཁང་གི་བོད་ཡིག་ཚན་པར་སྨོན་ལམ་བོད་ཀྱི་ཚིག་མཛོད་ཆེན་མོའི་དེབ་གྲངས་ ༢༢༣ ལེགས་སྐྱེས་སུ་འབུལ་བཞེས་ཀྱི་མཛད་སྒོ་འཚོགས་ཡོད་ཅིང་། མཛད་སྒོའི་ཐོག་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་མཆོག རྒྱལ་སྤྱིའི་བོད་ཀྱི་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་མཆོག། ༧སྐྱབས་རྗེ་ཨ་ཀྱཱ་རིན་པོ་ཆེ་མཆོག དེ་བཞིན་འབྲེལ་ཡོད་མི་སྣ་ཁྱོན་ ༧༠ ལྷག་མཉམ་ཞུགས་གནང་ཡོད་འདུག
སྐབས་དེར་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim Mc. Govern) མཆོག་གིས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་འབྲེལ་ཡོད་མི་སྣ་ཁག་ཕེབས་པར་འཚམས་འདྲི་དང་སྦྲགས། རྒྱ་ནག་གཞུང་གིས་བོད་ནང་དུ་བོད་ཀྱི་རིག་གཞུང་རྩ་མེད་བཏང་དང་གཏོང་མུས་ཡིན་པའི་སྐབས་སུ། དགེ་བཤེས་བློ་བཟང་སྨོན་ལམ་ལགས་ཀྱིས་བོད་ཀྱི་རིག་གཞུང་དར་སྤེལ་ཐོག་ལ་ཕྱག་ལས་གནང་བར་བསྔགས་བརྗོད་ཡོད། ཅེས་སོགས་གསུངས་འདུག
འབུམ་རམས་པ་དགེ་བཤེས་བློ་བཟང་སྨོན་ལམ་ལགས་ཀྱིས། ཁོང་གི་མི་ཚེའི་བརྒྱུད་རིམ་དང་། སྨོན་ལམ་ཚིག་མཛོད་ཆེན་མོའི་ནང་དོན་དང་ལས་དོན་གནང་ཕྱོགས་སོགས་ངོ་སྤྲོད་གནང་བ་མ་ཟད། སྨོན་ལམ་བོད་ཀྱི་ཚིག་མཛོད་ཆེན་མོ་དང་གནའ་བོའི་ཤེས་རབ་ཀྱི་ཆེད་དེང་དུས་ཀྱི་འཕྲུལ་ཆས་ཞེས་པའི་བརྗོད་གཞིའི་ཐོག རིག་ནུས་བཀོལ་སྤྱོད་ཀྱི་གསར་གཏོད་ལས་བོད་ཡིག་ཡིག་སྒྱུར་དང་བོད་ཀྱི་སྐད་ཡིག་གི་ཤུལ་བཞག་མི་རབས་གསར་པར་རྒྱུད་སྤྲོད་བྱེད་པ་དང་འབྲེལ་བའི་གཏམ་བཤད་གནང་ཡོད་འདུག་ལ། སྨོན་ལམ་ཚིག་མཛོད་ཆེན་མོ་ཨ་རིའི་གཞུང་མང་ལ་ལེགས་སྐྱེས་སུ་ཕུལ་ཏེ་བོད་མི་རིགས་ཀྱི་ཆོས་དང་རིག་གཞུང་མཉམ་སྤྱོད་བྱེད་པ། དེ་བཞིན་དེང་རབས་འཕྲུལ་རིག་དང་བོད་ཀྱི་གནའ་རབས་ཤེས་ཡོན་ཟུང་འབྲེལ་ཐོག་བོད་ཡིག་ཡིག་སྒྱུར་དང་། བོད་ཀྱི་མི་རབས་གསར་པའི་ཆེད་དུ་སྐད་ཡིག་ཤུལ་བཞག་རིག་གནས་སྲུང་སྐྱོབ་དང་དར་སྤེལ་སླད། མིས་བཟོས་རིག་ནུས་ (AI) དང་ (OCR) བེད་སྤྱོད་བྱས་པའི་ཐོག་ནས་ལས་དོན་ཡར་རྒྱས་གཏོང་མུས་ཡིན་སྐོར་སོགས་འགྲེལ་བརྗོད་གནང་སོང་།
སྨོན་ལམ་ཚིག་མཛོད་ཆེན་མོ་ཨ་རིའི་གཞུང་མང་ལ་ལེགས་སྐྱེས་སུ་ཕུལ་བའི་དགོས་དམིགས་དང་འབྲེལ་ནས་དགེ་བཤེས་བློ་བཟང་སྨོན་ལམ་ལགས་ཀྱིས། སྤྱིར་བཏང་རྩོམ་པ་པོ་སུ་རུང་གིས་དེབ་ཅིག་པར་སྐྲུན་བྱས་པ་ཡིན་ན་དེ་འཇོག་ཡུལ་ཞིག་དགོས་ཀྱི་ཡོད། དེར་བརྟེན་འཛམ་གླིང་ཁྱོན་ཡོངས་ནས་ཨ་རིའི་གྲོས་ཚོགས་ཀྱི་དཔེ་མཛོད་ཁང་དེ་གལ་ཆེ་ཤོས་ཤིག་ལ་ངོས་འཛིན་གྱི་ཡོད་པ་རེད། ང་ཚོའི་རིག་གཞུང་ཉར་ཚགས་བྱེད་པར་འཇོག་ཡུལ་ཞིག་དགོས་ཀྱི་ཡོད་པས། ཨ་རིའི་གྲོས་ཚོགས་ཀྱི་དཔེ་མཛོད་ཁང་དུ་སྨོན་ལམ་བོད་ཀྱི་ཚིག་མཛོད་ཆེན་མོའི་དེབ་འཇོག་པ་ནི་རིམ་པ་དང་པོ་དེ་ཆགས་ཀྱི་ཡོད། རིམ་པ་གཉིས་པ་དེ་ཨ་རིའི་གཞུང་མང་གཉིས་དང་བོད་པ་ཚོའི་དབར་ལ་ལོ་རྒྱུས་རིམ་པའི་འབྲེལ་བ་ཡོད་པ་ཞིག་ཆགས་ཀྱི་ཡོད་ལ། འདས་པའི་ལོ་ངོ་མང་པོའི་རིང་ལ་ཨ་རིའི་གཞུང་མང་གཉིས་ཀྱིས་ང་ཚོར་རོགས་སྐྱོར་མང་པོ་གནང་ཡོད་པ་རེད། ཁོང་ཚོས་རོགས་སྐྱོར་གནང་བ་ལ་བརྟེན་ནས་ང་ཚོའི་ཆོས་དང་རིག་གཞུང་སྲུང་སྐྱོབ་བྱས་ཡོད་པ་དཔང་པོའི་ཆེད་དུ་སྨོན་ལམ་བོད་ཀྱི་ཚིག་མཛོད་ཆེན་མོ་དེབ་གྲངས་ ༢༢༣ ལེགས་སྐྱེས་སུ་ཕུལ་བ་ཞིག་ཡིན། གཞན་ཡང་། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་བཞེངས་ཕྱོགས་ཐད་ཁྱེད་ཚོས་མཁྱེན་གྱི་རེད། ༧མགོན་པོ་གང་ཉིད་མཆོག་གི་ཤེས་ཡོན་དེ་དག་ང་ཚོའི་བོད་ཀྱི་ཆོས་དང་རིག་གཞུང་ནས་ཡོང་བ་ཞིག་ཡིན་པས། ཚིག་མཛོད་འདི་བོད་ཀྱི་རིག་གཞུང་གི་སྙིང་པོ་དེ་རེད། དེར་བརྟེན། ཚིག་མཛོད་དེ་ནས་མ་འོངས་པར་ཨ་རིའི་མི་མང་ལ་ཕན་ཐོགས་ཡོང་གི་རེད་བསམ་སྟེ་ཕུལ་བ་ཞིག་ཡིན། ཞེས་བརྗོད་བྱུང་།
སྨོན་ལམ་བོད་ཀྱི་ཚིག་མཛོད་ཆེན་མོ་ནི་ཕྱི་ལོ་ ༢༠༡༢ ལོར་༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་ལམ་སྟོན་འོག བོད་ཀྱི་ཆོས་བརྒྱུད་རིས་མེད་ཀྱི་རྩོམ་སྒྲིག་སྡེ་ཚན་ ༣༥ ནས་རྩོམ་སྒྲིག་པ་ ༢༠༠ ལྷག་གིས་ལོ་ངོ་དགུའི་རིང་རྩོམ་སྒྲིག་གནང་བའི་བོད་ཀྱི་སྐད་ཡིག་དང་འབྲེལ་བའི་བཙན་བྱོལ་བོད་མིའི་མཉམ་རུབ་ཀྱི་ལས་གཞི་གལ་ཆེན་ཞིག་ཡིན་ཞིང་། ཕྱི་ལོ་ ༢༠༢༡ ཟླ་ ༡༢ ཚེས་ ༣༡ ཉིན་ལས་གཞི་དེ་ལེགས་པར་གྲུབ་སྟེ། ཕྱི་ལོ་ ༢༠༢༢ ཟླ་ ༥ ཚེས་ ༢༧ ཉིན་བཞུགས་སྒར་དྷ་རམ་ས་ལའི་ཐེག་ཆེན་གཙུག་ལག་ཁང་གི་ཆོས་རའི་ནང་དུ་པོད་ ༢༢༣ ཅན་གྱི་སྨོན་ལམ་བོད་ཀྱི་ཚིག་མཛོད་ཆེན་མོ་དེ་༧གོང་ས་རྒྱལ་བ་རིན་པོ་ཆེ་མཆོག་ནས་དབུ་འབྱེད་བཀའ་དྲིན་བསྐྱངས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
