ཕྱི་ལོ་གསར་ཚེས་ལ་ཨ་རིའི་ནང་མི་གསོད་དོན་རྐྱེན་བྱུང་།

ཨ་རིའི་གྲོང་ཁྱེར་ནེའུ་ཨོར་ལན་སིའི་ནང་མི་ཞིག་གིས་འདུ་འཛོམས་ཆེ་བའི་མང་ཚོགས་ཁྲོད་རླངས་འཁོར་བསྐོར་ནས་དྲག་སྤྱོད་སྤེལ་སྐབས་མི་བཅོ་ལྔ་རྐྱེན་འདས་དང་མི་ ༣༥ ལ་རྨས་སྐྱོན་བཟོས་ཡོད་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཕྱི་ལོ་ཚེས་ཉིན་ཨ་རིའི་གྲོང་ཁྱེར་ནེའུ་ཨོར་ལན་སི་ (New Orleans) རུ་མང་ཚོགས་ཀྱིས་ལོ་གསར་བར་བསུ་མ་ཞུ་བཞིན་པའི་སྐབས་སུ། མི་ཞིག་གིས་སྐྱེལ་འདྲེན་རླངས་འཁོར་ཞིག་ཏུ་འགད་རྫས་དང་མཚོན་ཆ་སོགས་འཁྱེར་ནས་མང་ཚོགས་ཁྲོད་གང་བྱུང་བརྒྱུགས་ཏེ། མི་གྲངས་ ༡༥ བསད་པ་དང་ཉུང་མཐར་མི་གྲངས་ ༣༥ ལ་རྨས་སྐྱོན་ཕོག་ཡོད་ཅིང་། དེ་ནི་ཕྱི་ལོ་ ༢༠༢༥ ལོར་ཨ་རིའི་ནང་བྱུང་བའི་དྲག་རྒོལ་དོན་རྐྱེན་ཐོག་མ་དེ་ཆགས་པ་མ་ཟད། དྲག་རྒོལ་དོན་རྐྱེན་དེ་ནི་ཁ་ཆེའི་དྲག་སྤྱོད་པར་འབྲེལ་བ་ཡོད་སྐོར་བརྗོད་ཀྱིན་འདུག

དོན་རྐྱེན་དེའི་ཐད་ཨ་རིའི་སྲིད་འཛིན་རྗོ་བྷའེ་ཌན་ (Joe Biden) མཆོག་གིས། ངའི་ངོས་ནས་ནེའུ་ཨོར་ལན་སིའི་མི་མང་ཡོངས་ལ་མྱ་ངན་དང་གདུང་སེམས་མཉམ་སྐྱེད་ཞུ་ཡི་ཡོད། ཅེས་དང་། ཨ་རིའི་གནད་ཡོད་མི་སྣ་དང་དཔོན་རིགས་ཁག་གིས་འབར་གས་ཀྱི་དོན་རྐྱེན་དང་འབྲེལ་ནས་ཞིབ་འཇུག་བྱས་དང་བྱེད་མུས་ཡིན་སྐོར་གསུངས་ཡོད་འདུག

དོན་རྐྱེན་དེ་ནི་རང་ལོ་ ༤༢ ཡིན་པའི་ཤམ་སུ་ཌིན་ཇ་བྷར་ (Shamsud-Din Jabbar) ཟེར་བ་ཞིག་གིས་བསྒྲུབས་པ་དང་ཁོས་སྤྱི་ཚོགས་དྲ་ལམ་སྟེང་། ཁ་ཆེའི་དྲག་སྤྱོད་ཚོགས་པ་ (ISIL) ཡི་མི་གསོད་ལས་འགུལ་གྱིས་ཡིད་སེམས་བཀུག་སྟབས། ་དྲག་སྤྱོད་ཀྱི་ལས་འགུལ་སྤེལ་བ་ཞིག་ཡིན་ཚུལ་འགྲེལ་བརྗོད་བྱས་ཡོད་འདུག་ལ། རླངས་འཁོར་དེའི་ནང་དུ་ཁ་ཆེའི་དྲག་སྤྱོད་ཚོགས་པའི་དར་ཆ་ཞིག་ཀྱང་འང་ཡོད་འདུག མི་དེས་འདུ་འཛོམས་ཆེ་བའི་མང་ཚོགས་ཁྲོད་རླངས་འཁོར་གང་བྱུང་བསྐོར་ནས་རྒྱུག་སྐབས་མི་མང་པོར་གདོང་ཐུག་བརྒྱབ་པ་དང་། དེ་རྗེས་མོ་ཊ་ནས་ཕྱིར་ཐོན་ཏེ་ཉེན་རྟོག་པར་མེ་མདའ་གང་བྱུང་འཕངས་རེས་བྱས་རྐྱེན། དོན་རྐྱེན་འབྱུང་ཡུལ་དུ་འདས་གྲོངས་སུ་གྱུར་བ་དང་། ཉེན་རྟོག་པ་གཉིས་ལ་མེ་མདས་རྨས་སྐྱོན་བཟོས་ཡོད་ཀྱང་གཟུགས་གཞིའི་གནས་སྟངས་ཡག་པོ་ཡོད་འདུག

ཨ་རིའི་དབུས་ཞིབ་དཔྱོད་ལས་ཁུངས་ (FBI) ཀྱིས་མི་གསོད་དོན་རྐྱེན་དང་འབྲེལ་ནས་ཞིབ་འཇུག་བྱས་པ་བརྒྱུད། འབར་གས་དོན་རྐྱེན་དེ་ནི་ཨ་རིའི་མངའ་སྡེ་ཊེག་སེ་སིའི་ (Texas) རུ་གནས་སྡོད་བྱེད་མཁན་གྱི་ཨ་རིའི་མི་སེར་ཞིག་གིས་བསྒྲུབས་པ་མ་ཟད། འདས་ལོའི་ཕྱི་ཟླ་ ༡༢ ཚེས་ ༣༠ ཉིན་དོགས་ཡོད་ཤམ་སུ་ཌིན་ཇ་བྷར་ཟེར་བས་སྐྱེལ་འདྲེན་རླངས་འཁོར་ཞིག་གཡར་ཡོད་པ་ཤེས་རྟོགས་བྱུང་འདུག ད་དུང་ཨ་རིའི་དབུས་ཞིབ་དཔྱོད་ལས་ཁུངས་ཀྱི་དམིགས་བསལ་གྱི་གསང་བའི་ལས་བྱེད་ཨེ་ལི་ཐི་ཡ་ (Alethea Duncan) ཡིས་གསར་འགོད་གསལ་བསྒྲགས་ཤིག་སྤེལ་བའི་ནང་། ཞིབ་དཔྱོད་ལས་ཁུངས་ཀྱི་ངོས་ནས་དོན་རྐྱེན་དེེ་ནི་ཤམ་སུ་ཌིན་ཇ་བྷར་ཁོ་ནས་དྲག་སྤྱོད་ལས་འགུལ་སྤེལ་བ་ཞིག་མིན་པ་དང་། ད་ལྟའི་ཆར་ཨ་རིའི་དབུས་ཞིབ་དཔྱོད་ལས་ཁུངས་ཀྱིས་དོན་རྐྱེན་དེ་དང་འབྲེལ་ནས་ཇ་བྷར་དང་མཉམ་དུ་ལས་རོགས་གཞན་ཡོད་མེད་ཞིབ་འཇུག་བྱས་དང་བྱེད་མུས་ཡིན། ཞེས་དང་། རླངས་འཁོར་དེའི་ནང་དུ་མེ་མདའ་ཚུད་པའི་གོ་མཚོན་དང་། འགད་རྫས་གཉིས་ཡོད་ཅིང་། ནེའུ་ཨོར་ལན་སིའི་ཉེ་འགྲམ་དུ་ཡོད་པའི་ཧྥ་རན་སིའི་སྡོད་ཁང་ (French Quarter) དུ་འགད་རྫས་གཅིག་ཉེན་རྟོག་པའི་ལག་ཏུ་རྙེད་སོན་གྱིས་གས་འཐོར་བྱུང་མེད་པ་རེད། ད་བར་དོན་རྐྱེན་དང་འབྲེལ་ནས་ཁ་ཆེའི་དྲག་སྤྱོད་ཚོགས་པ་ (ISIS) དང་རྒྱལ་སྤྱིའི་དྲག་སྤྱོད་པའི་ཚོགས་སྡེ་ཁག་གིས་ངོས་ལེན་བྱས་མེད་འདུག

དེ་འབྲེལ་བྷི་བྷི་སི་གསར་ཁང་གིས་གནས་ཚུལ་བཀོད་པའི་ནང་། ཤམ་སུ་ཌིན་ཇ་བྷར་ (Shamsud-Din Jabbar) ནི་ཨ་རིའི་དམག་མི་ཡིན་ཞིང་། འགྲོ་བ་མིའི་ཐོན་ཁུངས་དང་འཕྲུལ་རིག་ (IT) ཐོག་ལས་ཀ་བྱས་མྱོང་འདུག ཕྱི་ལོ་ ༢༠༠༩ ཟླ་ ༢ པ་ནས་ཕྱི་ལོ་ ༢༠༡༠ ལོའི་ཟླ་ ༡ པོའི་བར་དམག་དོན་ཆེད་ཨབ་གྷན་ནི་སི་ཐན་དུ་མངག་གཏོང་བྱས། ཕྱི་ལོ་ ༢༠༡༥ ནས་ ༢༠༡༧ བར་ལོ་ངོ་གསུམ་རིང་གྷོར་གྷི་ཡ་མངའ་སྡེའི་གཙུག་ལག་སློབ་ཁང་དུ་ (Georgia State University) གློག་ཀླད་ཆ་འཕྲིན་ (Computer Information Systems) ཐད་སློབ་མཐར་ཕྱིན། ཁོས་ས་ཁང་གི་ཚོང་ལས་ཉར་མྱོང་བ་མ་ཟད། འགྲིམ་འགྲུལ་གྱི་ཁྲིམས་འགལ་དང་། རྐུན་མ་བརྐུས་པ་སོགས་ནག་ཉེས་ཀྱི་ལོ་རྒྱུས་ཡོད་པ་ཞིག་ཡིན་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།