བོད་འཛམ་ཐང་རྫོང་ཁོངས་ཀྱི་ནགས་ཚལ་ལ་མེ་སྐྱོན་ཆེན་པོ་བྱུང་།

རྒྱ་ནག་གཞུང་གིས་ཁ་སང་ཕྱི་ཚེས་ ༥ ཉིན་ནས་རྐ་མདའི་མེ་སྐྱོན་མཚམས་བཞག་ཐུབ་ཡོད་ལུགས་བསྒྲགས་ཡོད་ཀྱང་ད་ལྟའང་མུ་མཐུད་ནས་ནགས་ཚལ་ནང་མེ་སྐྱོན་འབྱུང་མུས་ཡིན་འདུག

ཁ་སང་ཕྱི་ཚེས་ ༥ ཉིན་བོད་རྔ་བ་ཁུལ་འཛམ་ཐང་རྫོང་གི་རྐ་མདའི་ནགས་ཚལ་ལ་མེ་སྐྱོན་ཚབས་ཆེན་བྱུང་སྟེ་ས་གནས་མི་མང་སོགས་ཀྱིས་སེམས་འཚབ་ཆེན་པོ་བྱུང་ཡོད་ཀྱང་། ཁ་སང་ཕྱི་ཚེས་ ༥ ཉིན་རྒྱ་ནག་མེ་གསོད་རུ་ཁག་གིས་མེ་སྐྱོན་མཚམས་བཞག་ཡོད་སྐོར་དང་། ད་ལྟའི་བར་དུ་མི་རྒྱུ་གཉིས་ལ་གནོད་སྐྱོན་གང་ཡང་བྱུང་མེད་སྐོར་དྲིལ་བསྒྲགས་བྱེད་ཀྱི་ཡོད་ཀྱང་། དེ་རིང་ཕྱི་ཚེས་ ༦ ཉིན་གྱི་རྒྱ་གར་གྱི་ཆུ་ཚོད་ ༡༢ དང་སྐར་མ་ ༤༥ སྟེང་རྐ་མདའི་ནགས་རིར་ད་དུང་ཡང་མེ་འབར་མུས་ཡིན་པ་མ་ཟད། ས་གནས་དཔོན་རིགས་ཚོས་དེ་རིང་མེ་ཡོངས་སུ་གསོད་ཚར་བ་བྱ་རྒྱུ་ཡིན་པའི་ཁས་ལེན་བྱས་ཡོད་སྐོར་བརྗོད་བྱུང་།

དེའི་ཐད་འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། ད་ལྟ་རྐ་མདའི་ནགས་རིར་མེ་འབར་མུས་ཡིན་ལ། མེ་སྐྱོན་དེ་ནགས་གསེང་དུ་ཡོད་པའི་གློག་སྡོང་དག་གི་གློག་སྐུད་འཚིགས་ནས་མེ་ཤོར་བ་ཡིན་པའི་ཚོད་དཔག་བྱེད་ཀྱིན་ཡོད་ཀྱང་། ད་ལྟའང་མེ་སྐྱོན་དེའི་འབྱུང་རྐྱེན་ཏག་ཏག་ཅིག་ཤེས་རྟོགས་བྱུང་མེད་པའི་ཁར། ནགས་ཚལ་ཁུལ་དེ་སྔོན་མ་ནས་རྒྱ་གཞུང་གིས་བདག་བཟུང་བྱེད་མུས་ཡིན་པ་ལས། བོད་མི་སྒེར་གྱི་ས་ཆ་དེ་འདྲ་མིན་ལ། ཁ་སང་མེ་གསོད་རུ་ཁག་གིས་རི་འདབས་ཀྱི་མེ་གསོད་ཐབས་བྱས་པ་ལས་རི་མགོའི་མེ་གསོད་ཐུབ་མེད་སྐོར་བརྗོད་བྱུང་།

ཡང་འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། འཛམ་ཐང་ཁུལ་དུ་མེ་སྐྱོན་ཤུགས་ཆེན་འབྱུང་མུས་ཡིན་པའི་སྐབས་འདིར། བོད་ནང་གི་དྲ་ཚོམས་དང་མི་སྒེར་སོགས་ལ་མེ་སྐྱོན་བྱུང་ཡུལ་གྱི་བརྙན་དང་པར་བསྐུར་ནས། མེ་སྐྱོན་ཞི་སླད་མ་ཎི་དང་སིདྷི་གཙོས་སྨོན་ལམ་གསུང་འདོན་གནང་རྒྱུར་རེ་སྐུལ་བྱེད་ཀྱི་ཡོད་སྐོར་དང་།  ནགས་རིར་གནས་པའི་རི་སྐྱེས་སྲོག་ཆགས་དང་འབའ་འབུ་སེམས་ཅན་གྲངས་མེད་ཅིག་ལ་འཚིག་སྐྱོན་བྱུང་ཡོད་སྐོར་བརྗོད་བྱུང་།

འདི་གའི་གསར་འགོད་པས་མེ་སྐྱོན་དང་འབྲེལ་བའི་བརྙན་ཐུང་གསུམ་ལག་སོན་བྱུང་བའི་ནང་། རྐ་མདའི་ནགས་རིར་མེ་ལྕེ་དམར་ལྷེམ་ལྷེམ་ངང་ཤུགས་ཆེན་འབར་ཏེ། རི་འདབས་གྲོང་རྡལ་གྱི་མཁའ་དབྱིངས་སུ་དུད་ཞགས་འཁོར་ཏེ་འཇིགས་སུ་རུང་བ་ཞིག་འདུག་ལ།  གྲོང་རྡལ་གྱི་ཧ་ཅང་ཐག་ཉེ་ས་ན་མེ་ལྕེ་མཆེད་བཞིན་འདུག

དེ་བཞིན་ཟླ་འདིའི་ཕྱི་ཚེས་ ༢ ཉིན་བོད་ཉག་ཆུ་རྫོང་ཁོངས་ཀྱི་ནགས་རི་ཞིག་ལ་གློ་བུར་དུ་མེ་སྐྱོན་བྱུང་ཡོད་ཅིང་། ནགས་རི་དེར་མེ་སྐྱོན་བྱུང་བ་ཐེངས་གསུམ་པ་དེ་ཡིན་འདུག  འདས་ལོའི་ཕྱི་ཟླ་ ༡༢ ནང་ཉག་ཆུ་རྫོང་གི་ཧི་ཁུག་ཡུལ་ཚོ་ཁྲིན་ཞང་སྡེ་བའི་ཉེ་འགྲམ་གྱི་རི་ངོས་སུ་མེ་སྐྱོན་ཤོར་ཡོད་པ་དང་། ཟླ་དེའི་ཕྱི་ཚེས་ ༡༠ ཉིན་མེ་ཤུགས་ཆེ་རུ་ཕྱིན་ཏེ་ཡུལ་མིའི་སྡོད་ཁང་སོགས་ལ་འཚིག་སྐྱོན་བྱུང་ཡོད་པ་མ་ཟད། མི་གྲངས་ ༡༤༠ ལྷག་ཉག་ཆུ་རྫོང་ཐོག་ཏུ་གནས་སྤོར་དགོས་བྱུང་ཡོད་འདུག

དེ་བཞིན་འདི་ལོའི་ཕྱི་ཟླ་ ༡ ཚེས་ ༢༨ ཉིན་བོད་ལྗོངས་གཞིས་ཀ་རྩེ་གྲོང་ཁྱེར་སྐྱིད་གྲོང་རྫོང་ས་ལེ་ཤང་སེ་ཆུང་གྲོང་ཚོའི་ཉེ་འཁྲིས་ཀྱི་ནགས་ཚལ་ཞིག་ཏུ་མེ་སྐྱོན་བྱུང་སྟེ།  རི་སྐྱེས་སྲོག་ཆགས་མང་པོ་ཞིག་ལ་གནོད་འཚེ་ཐེབས་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།