རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་བོད་ཀྱི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པས་བོད་དོན་གླེང་སློང་བྱེད་མཁན་གྱི་ཨ་རིའི་དཔོན་རིགས་སོགས་གཞུང་སྒེར་ཚང་མར་མཐའ་གཅིག་ཏུ་ངོ་རྒོལ་ཡོད་སྐོར་བསྒྲགས།
ཁ་སང་ཕྱི་ཚེས་ ༡༤ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལིང་ཅན་(Lin Jian) ཟེར་བས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་། བོད་ཀྱི་གནད་དོན་ལ་ཁ་གཡར་ནས་རྒྱ་ནག་གི་ནང་སྲིད་ལ་ཐེ་གཏོགས་བྱེད་མཁན་ཨ་རིའི་དཔོན་རིགས་ཁག་ཅིག་ལ་ཐོངས་མཆན་བཀག་སྡོམ་བྱ་རྒྱུ་ཡིན་ལུགས་དང་། བོད་དོན་གླེང་སློང་བྱེད་མཁན་གྱི་གཞུང་སྒེར་ཚང་མར་ངོ་རྒོལ་བྱ་རྒྱུ་ཡིན་ཚུལ་བརྗོད་འདུག ཡིན་ནའང་། ཨ་རིའི་བོད་དོན་རྒྱབ་སྐྱོར་གནང་མཁན་དཔོན་རིགས་སུ་དང་ག་ཚོད་ཅིག་ལ་ཐོངས་མཆན་འགོག་གི་ཡོད་མེད་ཁ་གསལ་མི་འདུག
དེ་ཡང་གསར་འགོད་ལྷན་ཚོགས་དེའི་ཐོག་ལིང་ཇེན་ཟེར་བ་དེས། བོད་ཀྱི་གནད་དོན་ནི་རྒྱ་ནག་ནང་སྲིད་ཀྱི་གནད་དོན་ཞིག་ཡིན་པ་ལས། ཨ་རིས་བོད་དང་འབྲེལ་བའི་གནད་དོན་ལ་ཁ་གཡར་ཏེ་རྒྱ་ནག་གི་དཔོན་རིགས་ལ་གང་འདོད་ཐོངས་མཆན་བཀག་པ་དེ་རྒྱལ་སྤྱིའི་ཁྲིམས་དང་འགལ་ཡོད་པར་བརྟེན། རྒྱ་ནག་གི་ཕྱི་འབྲེལ་ཁྲིམས་སྒྲིག་དང༌ཕྱི་རྒྱལ་བར་བཀག་སྡོམ་བྱེད་པའི་བཅའ་ཁྲིམས་གཞིར་བཟུང་། བོད་དང་འབྲེལ་བའི་གནད་དོན་ཐད་ཇུས་གཏོགས་བྱེད་མཁན་གྱི་ཨ་རིའི་ཆེས་མཐོའི་དཔོན་རིགས་ལ་ཐོངས་མཆན་བཀག་སྡོམ་བྱ་རྒྱུའི་ཐག་གཅོད་བྱས་ཡོད། ཅེས་བཤད་འདུག
ཡང་ཁོས། བོད་ནི་ཡུལ་སྐོར་བ་རྣམས་མངག་གཏོང་བྱ་ཡུལ་ཞིག་ཡིན། ང་ཚོས་ཕྱི་རྒྱལ་གྱི་གྲོགས་པོ་ཚོ་བོད་ཁུལ་དུ་ལྟ་སྐོར་དང་ཡུལ་སྐོར། ཚོང་ལས་གཉེར་བར་དགའ་བསུ་ཞུ་རྒྱུ་ཡིན་ལ། ང་ཚོས་རྒྱལ་ཁབ་དང་མི་སྒེར་གང་རུང་ཞིག་གིས་འགྲོ་བ་མིའི་ཐོབ་ཐང་དང་ཆོས་ལུགས། རིག་གནས་བཅས་ལ་ཁ་གཡར་ནས་བོད་ཀྱི་ལས་དོན་ལ་ཐེ་གཏོགས་བྱེད་པར་ངོ་རྒོལ་བྱེད་ཀྱི་ཡོད། བོད་ལ་འགྲོ་བའི་གོ་སྐབས་དང་བསྟུན་ནས་བྱ་འགུལ་དེ་འདྲ་སྤེལ་བའི་ཀུན་སློང་ངན་པ་འཁྱེར་མཁན་གྱི་མི་སྣས་ཐེ་གཏོགས་དང་གཏོར་བཤིག་གཏོང་བར་ངོ་རྒོལ་བྱེད་ཀྱི་ཡོད། ཅེས་བཤད་འདུག
ཉེ་སྔོན་ཕྱི་ཟླ་ ༣ ཚེས་ ༣༡ ཉིན་ཨ་རིའི་ཕྱི་སྲིད་བློན་ཆེན་མར་ཁོ་རོ་བྷིའོ་(Marco Rubio) མཆོག་གིས། ཕྱི་ལོ་ ༢༠༡༨ ལོའི་བོད་ནང་ཕར་འགྲོ་ཚུར་འོང་གི་རང་དབང་འདྲ་མཉམ་དགོས་པའི་ཁྲིམས་གཞི་ལག་བསྟར་གནང་སྟེ། བོད་ནང་དུ་ཕྱི་མི་བསྐྱོད་རྒྱུར་དམ་དྲག་བྱེད་བཞིན་པའི་འབྲེལ་ཡོད་རྒྱ་ནག་གཞུང་གི་དཔོན་རིགས་ཚོར་ཨ་རིའི་ཐོངས་མཆན་བཀག་སྡོམ་གནང་རྒྱུ་ཡིན་སྐོར་གསུངས་ཡོད་པ་རེད། སྐབས་དེར་སྤེལ་བའི་བསྒྲགས་གཏམ་ནང་དུ། ཨ་རིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་རྒྱ་ནག་གི་དཔོན་རིགས་ཚོ་ཨ་རིའི་ནང་ཡོང་བར་བཀག་སྡོམ་བྱ་རྒྱུའི་གསལ་བསྒྲགས་གནང་བ་དང་སྦྲགས། ཨ་རིའི་རྒྱལ་སྲིད་ལས་ཁུངས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། རྒྱ་ནག་དམར་ཤོག་ཚོགས་པས་དུས་ཡུན་རིང་པོར་ཨ་རིའི་གཞུང་ཚབ་པ་དང་གསར་འགོད་པ་ཚོར་བོད་རང་སྐྱོང་ལྗོངས་དང་། བོད་རིགས་ས་ཁུལ་གཞན་དག་ཏུ་འགྲོ་འོང་བྱེད་པར་བཀག་འགོག་བྱས་ཡོད། ཡིན་ནའང་། རྒྱ་ནག་གི་གཞུང་ཚབ་པ་དང་གསར་འགོད་པ་ཚོས་ཨ་རིའི་ནང་དུ་རང་དབང་གིས་འགྲོ་འོང་བྱེད་ཆོག་པ་རེད། དེ་ནི་ངོ་མ་དང་ལེན་བྱེད་ཐབས་བྲལ་བ་ཞིག་ཡིན་པས་བཟོད་བསྲན་བྱ་རྒྱུ་མིན། ཞེས་གསལ་འདུག་ལ། རྒྱ་ནག་དམར་གཞུང་གིས་བོད་དང་ཧོང་ཀོང་། ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་དང་འབྲེལ་ནས་སྔ་གཞུག་ཏུ་རྒྱ་ནག་གི་དཔོན་རིགས་ཁག་ཅིག་ལ་ཨ་རིས་ཐོངས་མཆན་བཀག་སྡོམ་མམ་ཨ་རིར་ཡོད་པའི་རྒྱུ་དངོས་གཞུང་བཞེས་བཏང་བ་སོགས་ཀྱི་ཉེས་ཆད་བཅད་ཡོད་པ་རེད།
འདས་པའི་ལོ་ཤས་ནང་རྒྱ་ནག་གི་དཔལ་འབྱོར་ལ་ཉམས་ཉེས་ཤུགས་ཆེན་ཕྱིན་རྐྱེན། ཕྱི་ལོ་ ༢༠༢༥ ལོའི་ཟླ་ ༡༢ ཚེས་ ༣༡ བར་འཛམ་གླིང་རྒྱལ་ཁབ་ ༣༨ ཀྱི་མི་སེར་རྣམས་ཟླ་ངོ་གཅིག་རིང་ཐོངས་མཆན་རིན་མེད་ཐོག་རྒྱ་ནག་ཏུ་འགྲོ་ཆོག་པ་བཟོས་ཡོད་སྟབས། ཡུ་རོབ་རྒྱལ་ཁབ་ཁག་གི་ན་གཞོན་མང་པོ་ཞིག་རྒྱ་ནག་གི་གྲོང་ཁྱེར་ཆེ་ཁག་ཏུ་ཡུལ་སྐོར་དུ་འགྲོ་ཡི་ཡོད་པ་མ་ཟད། ཡུ་རོབ་རྒྱལ་ཁབ་ཁག་གི་མི་སེར་དུ་གྱུར་བའི་བོད་མི་རྣམས་ཀྱང་བོད་ནང་གཉེན་འཕྲད་ལ་འགྲོ་ཡི་ཡོད་ཀྱང་། བོད་མི་ཁག་ཅིག་གནམ་ཐང་སོགས་ནས་ཕྱིར་ལོག་བྱས་པའི་གནས་ཚུལ་ཡང་བྱུང་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
