རྒྱ་གཞུང་གིས་བོད་མི་སྐལ་བཟང་གི་ནང་མིར་ཆུ་དང་གློག་གི་མཐུན་རྐྱེན་བཀག་པའི་སྐོར་སྤྱི་ཚོགས་བརྒྱུད་ལམ་དུ་བསྒྲགས་པའི་རྐྱེན་གྱིས་ཁོང་བཀག་ཉར་བྱས་འདུག
རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ཆབ་མདོ་སྟེང་ཆེན་རྫོང་གསེར་བྲག་གྲོང་བརྡལ་གྱི་བོད་མི་སྐལ་བཟང་ཞེས་པ་ཞིག་གི་ནང་མིར་ཆུ་དང་གློག་སོགས་ཀྱི་མཐུན་རྐྱེན་མ་སྤྲད་པའི་དཀའ་ངལ་འཕྲད་དེ། ཕྱི་ལོ་ ༢༠༡༩ ལོ་ནས་བཟུང་ལོ་དགུའི་རིང་སྟེང་ཆེན་རྫོང་དང་གསེར་བྲག་གྲོང་བརྡལ་གཞུང་ལ་ཞུ་གཏུགས་བྱས་ཡོད་ཀྱང་ཕན་འབྲས་གང་ཡང་མ་ཐོན་པས། འདི་ལོའི་ཕྱི་ཟླ་ ༣ ཚེས་ ༢༠ ཉིན་བོད་མི་སྐལ་བཟང་གིས་སྤྱི་ཚོགས་དྲ་ལམ་བརྒྱུད་ནས་དཀའ་ངལ་ཁྱབ་བསྒྲགས་བྱས་རྐྱེན། རྒྱ་གཞུང་གིས་སྤྱི་ཚོགས་ཀྱི་སྒྲིག་ལམ་ལ་གཏོར་སྐྱོན་བཏང་བ་དང་། ཏང་དང་སྲིད་གཞུང་ལ་གནོད་འཚེ་བཟོས་པའི་ཉེས་བཙུགས་འོག ཕྱི་ཟླ་ ༣ ཚེས་ ༢༤ ཉིན་སྟེང་ཆེན་རྫོང་ཉེན་རྟོག་པས་ཁོང་བཀག་ཉར་བྱས་ཡོད་པ་མ་ཟད། ཁོང་གི་ནང་མིར་འགྲོ་འོང་སོགས་ཀྱི་ཐད་བཀག་སྡོམ་བྱས་འདུག ཕྱིས་སུ་གློད་ཡོད་ཀྱང་ཕྱི་ཟླ་ ༤ ཚེས་ ༡༨ ཉིན་བསྐྱར་དུ་འཛིན་བཟུང་བྱས་ཏེ་ནང་མིར་ཐུག་འཕྲད་བྱེད་དུ་བཅུག་མེད་པ་མ་ཟད། གནད་དོན་དེ་ལ་ཁ་གཡར་ནས་ཁོང་གི་བྱིས་པ་ཡང་སློབ་གྲྭར་བཅུག་མ་ཐུབ་པའི་དཀའ་ངལ་བྱུང་ཡོད་འདུག
དེའི་སྐོར་ལ་སྐལ་བཟང་ལགས་ཀྱིས་སྤྱི་ཚོགས་དྲ་ལམ་དུ་སྤེལ་བའི་གོང་ཞུས་གནས་ཚུལ་ནང་དུ། གསེར་བྲག་གྲོང་བརྡལ་སྲིད་གཞུང་གིས་ས་གནས་མང་ཚོགས་ཀྱི་ཆུ་དང་གློག་གི་དཀའ་ངལ་སེལ་བའི་ཐད་འཛུགས་སྐྲུན་མང་པོ་བྱེད་བཞིན་ཡོད་ཀྱང་། ཁོང་གི་ཁྱིམ་དུ་ད་དུང་ཡང་གློག་དང་ཆུ་མེད་པའི་དཀའ་ངལ་འཕྲད་བཞིན་ཡོད་པས། ཁྱིམ་དུ་ཟ་མ་བཟོ་བ་དང་། གྱོན་པ་འཁྲུད་པ། གཙང་བཟོ་སོགས་ཉིན་རེའི་འཚོ་བར་དཀའ་ངལ་འཕྲད་ཀྱི་ཡོད་པ་མ་ཟད། མཚན་མོའི་མུན་ནག་ཁྲོད་ཕྲུ་གུའི་རྒྱུན་ལྡན་གྱི་སློབ་སྦྱོང་བྱེད་ཐུབ་པའི་ཆ་རྐྱེན་སོགས་གང་ཡང་མེད་པའི་གནས་སྟངས་ཀྱི་འོག་ལོ་ ༩ ལྷག་འགྲོ་བཞིན་ཡོད་སྐོར་དང་།ཕྱི་ལོ་༢༠༢༤ ལོའི་ཞིང་འབྲོག་མང་ཚོགས་ཀྱི་འཚོ་བ་ལེགས་བཅོས་ཀྱི་འཆར་གཞི་ཐེངས་གསུམ་པའི་མིང་ཐོ་ཁོངས་ནས་ཕྱིར་ཕུད་བཏང་ཡོད་སྐོར། ཡུལ་ཚོ་སྲིད་གཞུང་ལ་ཐེངས་མང་གནས་ཚུལ་ཡར་ཞུ་བྱས་ཀྱང་ཕན་འབྲས་གང་ཡང་ཐོན་མེད་སྟབས། ས་གནས་སྲིད་གཞུང་གིས་དྲང་བདེན་ཐོག་ནས་ཞིབ་བཤེར་བྱས་ཏེ་ཐག་གཅོད་གང་ལེགས་བྱ་དགོས་པའི་འབོད་སྐུལ་ཞུས་འདུག
འདི་གའི་གསར་འགོད་པས་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཟླ་བ་བཀྲ་ཤིས་ལགས་སུ་ལོ་དགུའི་རིང་སྐལ་བཟང་གི་ནང་མིར་ཆུ་དང་གློག་གི་མཐུན་རྐྱེན་མ་སྤྲད་པའི་རྒྱུ་མཚན་གང་ཡིན་མིན་དྲིས་པར། ཁོང་གིས། ཆུ་དང་གློག་གི་མཐུན་རྐྱེན་མ་སྤྲད་པའི་དཀའ་ངལ་ནི་ལུང་པ་དེའི་ནང་གི་རྒྱ་ནག་གཞུང་གི་སྤྱི་ཡོངས་ཀྱི་འགྲོ་སྟངས་ཤིག་རེད། ང་ཚོས་གནས་ཚུལ་ཤེས་རྟོགས་བྱུང་བ་ལྟར་ན། ལོ་རབས་ལྔ་བཅུ་བའི་ནང་སྐལ་བཟང་ལགས་ཀྱི་སྤོ་ལགས་ཀྱིས་རྒྱ་ནག་གི་དམག་མིར་འཐབ་རྩོད་དང་ངོ་རྒོལ་བྱས་ཏེ་ཚེ་སྲོག་ཤོར་ཡོད་པར་བརྟེན། རྒྱ་ནག་གཞུང་གིས་ག་དུས་ཡིན་ཡང་གཏིང་ནད་དུ་བཟུང་ནས་རྒྱ་གཞུང་ལ་ངོ་རྒོལ་བྱེད་མཁན་གྱི་ཁྱིམ་ཚང་ཞིག་ལ་ངོས་འཛིན་བྱས་ཡོད་པ་རེད། དེ་བཞིན་ཕྱི་ལོ་ ༢༠༠༨ ལོར་བོད་ས་ཡོངས་ནས་ས་བྱི་ཞི་རྒོལ་ཆེན་མོ་བྱུང་བའི་དུས་སུ་སྟེང་ཆེན་རྫོང་གསེར་བྲག་གྲོང་བརྡལ་དུ་ཡིག་ཆ་བཀྲམས་པའི་གནས་ཚུལ་འབྱུང་སྐབས་ཀྱང་། རྒྱ་གཞུང་གིས་ཡིག་ཆ་འགྲེམ་མཁན་གྱི་དོགས་གཞིའི་འོག་ནས་སྐལ་བཟང་ལགས་ཟླ་ཁ་ཤས་རིང་བཀག་ཉར་བྱས་ཡོད་འདུག སྐབས་དེར་རྒྱ་གཞུང་ལ་དཔང་རྟགས་ཁུངས་གསལ་གང་ཡང་མ་རག་པས་ལོ་ཚད་ཀྱི་བཀག་ཉར་བྱས་མི་འདུག འབྲེལ་ཡོད་ནས་རྒྱུ་རྐྱེན་དེ་འདྲ་ཞིག་ཡིན་པར་ངོས་འཛིན་གནང་གི་འདུག ཅེས་འགྲེལ་བརྗོད་གནང་བྱུང་།
རྒྱ་གཞུང་གིས་སྐལ་བཟང་གི་རྩོམ་ཡིག་མང་པོ་ནག་གསུབ་བཏང་བའི་སྐོར་ལ་ཁོང་གིས། ལོ་དགུའི་རིང་སྐལ་བཟང་ལགས་ཀྱི་ནང་མིར་ཆུ་དང་གློག་བཀག་ཡོད་པར་བརྟེན། ཁོང་གིས་རྒྱ་གཞུང་གི་འབྲེལ་ཡོད་ཀྱི་ལས་ཁུངས་དང་མགོ་ཁྲིད་རྣམས་ལ་སྙན་སེང་རབ་དང་རིམ་པ་ཞུས་ཡོད་ཀྱང་། དཀའ་ངལ་དེ་དག་ལ་ཐག་གཅོད་གང་ཡང་བྱས་མེད་པས། ཁོ་རང་ཨ་ཆད་ཨུ་ཐུག་ཀྱིས་ཐོག་ནས་རྒྱ་ནག་གཞུང་ལ་སྙན་ཞུ་བརྒྱབ་པ་དེ་དག་དྲ་རྒྱའི་ཐོག་ཏུ་བཀྲམས་སྤེལ་བྱས་པ་རེད། ཁོང་གིས་དྲ་ཐོག་ཏུ་སྤེལ་ཡོད་པའི་ནང་དོན་ནི་ཁོང་གི་དཀའ་ངལ་གྱི་བྱུང་རིམ་དེ་དག་རེད། ད་ལྟའི་ཆར་རྒྱ་གཞུང་གི་ཉེན་རྟོག་ལས་ཁུངས་ཀྱིས་ཁོ་རང་བཀག་ཉར་བྱས་པ་ལས་ཞིབ་ཕྲའི་གནས་ཚུལ་རྒྱུས་ལོན་བྱེད་ཐུབ་ཀྱི་མི་འདུག ཞེས་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
