ལྷ་སར་མི་ ༣༡ འཛིན་བཟུང་བྱས་ཏེ་འཁྲུག་འཛིང་ནང་ཞུགས་ཚེ་རྒྱ་ནག་གི་དམག་མི་དང་གཞུང་ཞབས་ཀྱི་ལས་ཀར་འཛུལ་ཞུགས་བྱེད་མི་ཆོག་པའི་ཉེན་བརྡ་བཏང་འདུག
ཟླ་འདིའི་ཕྱི་ཚེས་ ༧ ཉིན་གྱི་ཞོགས་པའི་ཆུ་ཚོད་ ༤ ཙམ་ལ་བོད་ཀྱི་རྒྱལ་ས་ལྷ་ས་གྲོང་ཁྱེར་གྱི་ནུབ་ཁུལ་དུ་མི་མང་མཉམ་རུབ་ཀྱི་འཁྲུག་འཛིང་དོན་རྐྱེན་ཞིག་བྱུང་ཡོད་པ་དང་། རྒྱ་གཞུང་གིས་དོན་རྐྱེན་དེ་ནི་རང་བཙན་ནམ་ཡང་ན་འཇིགས་སྐུལ་བའི་བྱ་སྤྱོད་ལ་འབྲེལ་བ་ཡོད་པའི་དོགས་གཞིའི་འོག་མི་ ༣༡ འཛིན་བཟུང་བྱས་ཏེ་ཉེས་ཆད་བཅད་ཡོད་འདུག
ལྷ་ས་གྲོང་ཁྱེར་ཉེན་རྟོག་ཁང་གིས་དེའི་སྐོར་ལ་གསལ་བསྒྲགས་ཤིག་སྤེལ་བའི་ནང་། འཁྲུག་འཛིང་དོན་རྐྱེན་དེ་ལྷ་ས་གྲོང་ཁྱེར་གྱི་ཆང་ཁང་ཞིག་གི་ནང་བྱུང་ཡོད་སྐོར་དང་།འཁྲུག་འཛིང་རྒྱག་མཁན་ཚང་མ་བྲོས་ཕྱིན་ཡོད་ཀྱང་། ཉེན་རྟོག་པས་རྗེས་འདེད་བྱས་ཏེ་མི་གྲངས་ ༣༡ འཛིན་བཟུང་བྱས་ཡོད་པ་མ་ཟད། ལྷ་ས་གྲོང་ཁྱེར་ནུབ་ཁུལ་དུ་རང་བཙན་དང་འཇིགས་སྐུལ་གྱི་བྱ་སྤྱོད་སྤེལ་བར་དོགས་ཟོན་ལྟ་རྟོག་ནན་པོ་བྱེད་བཞིན་ཡོད་སྐོར་བསྒྲགས་འདུག
ཡང་གསལ་བསྒྲགས་དེའི་ནང་། བོད་ནང་དུ་འཁྲུག་འཛིང་གི་དོན་རྐྱེན་ནང་མཉམ་ཞུགས་བྱས་ཚེ། རྒྱ་ནག་གི་དམག་མིའི་ནང་ཞུགས་པ་དང་གཞུང་ཞབས་ཀྱི་ལས་ཀར་འཛུལ་ཞུགས་བྱེད་མི་ཆོག་པའི་ཉེན་བརྡ་བཏང་ཡོད་པ་མ་ཟད། འཁྲུག་འཛིང་ཁྲོད་རྨས་སྐྱོན་དང་སྲོག་སྐྱོན་བཟོས་ཚེ་དངུལ་ཆད་ཕོན་ཆེན་དང༌། བཙོན་འཇུག སྲོག་ཁྲིམས་ཀྱང་གཅོད་རྒྱུ་ཡིན་སྐོར་དང་། དེ་བཞིན་འཁྲུག་རྩོད་ཀྱི་ནང་དུ་མཉམ་ཞུགས་བྱས་ཏེ་རྒྱལ་ཁ་ཐོབ་མཁན་རྣམས་བཙོན་ཁང་དུ་འཇུག་རྒྱུ་ཡིན། ཞེས་བརྗོད་འདུག
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་དེའི་སྐོར་ལ་གནས་ཚུལ་ཞིག་སྤེལ་བའི་ནང་། རྒྱ་ནག་དང་བོད་ནང་དུ་རྒྱ་གཞུང་གིས་མི་ཚོགས་འདུ་འཛོམས་དང་འཁྲུག་འཛིང་བྱུང་བའི་དོན་རྐྱེན་ཐོག་དམིགས་བསལ་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད།རྒྱ་ནག་དབང་འཛིན་པ་ཚོས་བོད་ནང་དུ་ཉེན་རྟོག་པའི་སྟོབས་ཤུགས་བེད་སྤྱོད་བྱས་ཏེ་སྤྱི་ཚོགས་ཀྱི་བརྟན་བརླིང་དང་། རང་བཙན་ལས་འགུལ་གྱི་དོན་རྐྱེན་ལ་དམིགས་ཏེ་རྟག་ཏུ་འགོག་རྒོལ་བྱེད་བཞིན་ཡོད། ཅེས་བརྗོད་འདུག
འདས་ལོར་རྒྱ་ནག་གི་རྒྱལ་སྟོན་དུས་ཆེན་གྱི་སྐབས་སུ། རྒྱ་ནག་གི་སྲིད་ཁྲིམས་ལྷན་ཁང་གི་ཚོགས་གཙོ་ཁྲིན་ཝིན་ཆིང་གིས་བོད་རང་སྐྱོང་ལྗོངས་དང་དཀར་མཛེས་བོད་རིགས་རང་སྐྱོང་ཁུལ་ནང་སྐོར་སྐྱོད་དུ་ཕྱིན་ཏེ་དམག་མི་རྣམས་ཀྱིས་ཁ་བྲལ་རིང་ལུགས་ཀྱི་བྱ་སྤྱོད་ལ་དམ་དྲག་ཤུགས་ཆེན་བྱ་དགོས་སྐོར་བཀོད་མངགས་བྱས་ཡོད་པ་མ་ཟད། ཕྱི་ལོ་ ༢༠༡༥ ལོའི་ཟླ་ ༨ པའི་ནང་རྒྱ་ནག་དབུས་ཆབ་སྲིད་ལྷན་ཁང་གིས་བོད་སྐོར་གྱི་ཚོགས་འདུ་ཞིག་གི་ཐོག བོད་ནི་རྒྱལ་ཁབ་ཀྱི་བདེ་འཇགས་སྲུང་སྐྱོབ་གལ་ཆེན་ཞིག་ཡིན་པ་དང་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་འཐབ་ས་མདུན་མར་གནས་ཡོད་ཅེས། བོད་ལྗོངས་ཀྱི་གོང་འོག་ཚང་མས་བོད་བརྟན་ལྷིང་ཐོག་སྔར་ལས་ཤུགས་གནོན་རྒྱག་དགོས་སྐོར་བཀའ་བཏང་ཡོད་པ་རེད།
ལོ་ལྟར་རྒྱ་ནག་གཞུང་གིས་རྒྱལ་སྟོན་དུས་ཆེན་དང་། བོད་ཀྱི་གསུམ་བཅུའི་དུས་དྲན། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར། དེ་བཞིན་བོད་ཀྱི་ལོ་སར་སོགས་ཀྱི་སྐབས་སུ་བོད་ཀྱི་རྒྱལ་ས་ལྷ་ས་གཙོ་བོ་གྱུར་བའི་མི་མང་འདུ་འཛོམས་བྱེད་ས་ཆེ་ཁག་ཏུ་དམག་མི་འབོར་ཆེན་འགྲེམ་འཇོག་བྱས་ཏེ། མི་མང་གི་འགྲོ་འདུག་སྤྱོད་གསུམ་ལ་དམ་དྲག་དོགས་ཟོན་ནན་མོ་བྱེད་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
