འཛམ་གླིང་གི་འཁྱགས་རོམ་བརྒྱ་ཆ་ ༤༠ ཙམ་ཞུ་ཟིན་འདུག

ཉམས་ཞིབ་པས་དེང་སྐབས་གོ་ལའི་ཚ་དྲོད་རྒྱས་པ་དང་འཁྱགས་རོམ་ཞུ་བཞིན་པའི་གནས་སྟངས་ཛ་དྲག་ཅན་དུ་གྱུར་ཏེ་འཛམ་གླིང་གི་འཁྱགས་རོམ་གྱི་བརྒྱ་ཆ་ ༤༠ ཙམ་ཞུ་ཟིན་ཡོད་སྐོར་བརྗོད་འདུག

འཛམ་གླིང་ནང་ཁོར་ཡུག་གི་གནད་དོན་ནི་གལ་ཆེན་ཞིག་ཏུ་གྱུར་ཡོད་པ་མ་ཟད། མི་མང་གིས་སེམས་འཚབ་བྱེད་དགོས་པ་ཞིག་ཀྱང་ཡིན། ཉམས་ཞིབ་བྱེད་མཁན་དག་ལ་གསར་རྙེད་བྱུང་བ་ནི་གོ་ལའི་ཚ་དྲོད་རིམ་བཞིན་རྒྱས་པའི་རྐྱེན་གྱིས། འཛམ་གླིང་ནང་འཁྱགས་རོམ་ཞུ་བཞིན་པའི་གནས་སྟངས་ཛ་དྲག་ཅན་དུ་གྱུར་ཡོད་ཅིང་། འཁྱགས་རོམ་གྱི་བརྒྱ་ཆ་ ༤༠ ཞུ་ཡོད་པའི་གྲུབ་དོན་ཡང་རྙེད་འདུག

ཉམས་ཞིབ་པས་ཕྱི་ལོ་ ༢༠༢༠ ལོར་འཛམ་གླིང་གི་འཁྱགས་རོམ་བརྒྱ་ཆ་ ༣༩ ཞུ་རྒྱུའི་ཚོད་དཔག་བྱེད་བཞིན་འདུག་ལ། དེ་ནི་མ་འོངས་པར་ཅི་ཞིག་བྱུང་ཡང་ལྡོག་ཐབས་མེད་པའི་གནད་དོན་ཞིག་ཡིན་ཁར། འཁྱགས་རོམ་ཞུ་ཚད་དེས་རྒྱ་མཚོའི་མཐོ་ཚད་མི་ལེ་ལེ་ཊར་ ༡༡༣ འཕར་རྒྱུ་ཡིན་པའི་འགྲེལ་བརྗོད་གནང་འདུག

འཛམ་གླིང་རྒྱལ་ཁབ་ཁག་གིས་ད་ལྟའི་གནམ་གཤིས་རིག་པའི་སྲིད་ཇུས་ (climate policies) དེ་མུ་མཐུད་ལག་བསྟར་བྱས་ཚེ། འཛམ་གླིང་གི་འཁྱགས་རོམ་ཞུ་ཚད་ཀྱི་བརྒྱ་ཆ་ ༧༦ ལྷག་ལ་འཕར་རྒྱུ་ཡིན་ཞིང་། གནས་སྟངས་དེའི་འོག་ནས་གོ་ལའི་ཚ་དྲོད་ ༡།༥ འོག་སྟངས་འཛིན་བྱ་རྒྱུ་ཁག་པོ་ཡིན་པ་ཨ་རིའི་ཚན་རིག་དུས་དེབ་ (Journal Science) ཀྱིས་བརྗོད་འདུག

ཞིབ་འཇུག་བྱས་པ་བརྒྱུད། ད་ལྟའི་ཆར་འཛམ་གླིང་གི་ཚ་དྲོད་རྒྱས་ཏེ་ཕྱི་ལོ་ ༢༡༠༠ ལོར་ཚ་ཚད་ ༢།༩ བར་འཕར་རྒྱུ་ཡིན་ཞིང་། གནམ་གཤིས་འགྱུར་ལྡོག་ཕྱིན་པའི་རྗེས་སུ་འཁྱགས་རོམ་གྱི་གནས་སྟངས་བརྟན་པོ་གནས་པར་ལོ་ངོ་བརྒྱ་ཕྲག་མང་པོ་འགོར་གྱི་ཡོད་ལ། ལོ་ངོ་བརྒྱ་ཕྲག་མང་པོའི་རིང་འཁྱགས་རོམ་བརྟན་པོར་གནས་ཐུབ་པར་ཐབས་ལམ་མི་འདྲ་བ་བེད་སྤྱོད་བྱས་ཏེ་གྲུབ་དོན་བཏོན་ཡོད། ད་ལྟའི་ཆར་འཁྱགས་རོམ་བརྒྱ་ཆ་ ༣༩ ཞུ་ཟིན་པ་དང་། འཛམ་གླིང་གི་ཚ་ཚད་བརྒྱ་ཆ་ ༡༥ ནས་ ༥༥ བར་གནས་ཡོད་པ་རེད།

ཨ་སི་ལན་ཌི་མཐོ་རིམ་སློབ་གཉེར་ཁང་གི་སློབ་དཔོན་ཆེན་མོ་གྷོ་ཧྥི་ན་ (Guðfinna Aðalgeirsdóttir) ལགས་ཀྱིས། ཞིབ་འཇུག་གི་ཐབས་ལམ་མང་པོ་བེད་སྤྱོད་བྱས་ཡོད་པ་ཚང་མའི་ནང་། གོ་ལའི་ཚ་དྲོད་རྒྱས་པ་ལ་བརྟེན་ནས་འཁྱགས་རོམ་ཇེ་མང་དུ་ཞུ་ཡི་ཡོད་པའི་གྲུབ་དོན་གཅིག་མཚུངས་བཏོན་ནའང་། གནམ་གཤིས་འགྱུར་ལྡོག་ལ་བརྟེན་ནས་འཁྱགས་རོམ་ཇི་ཙམ་ཞུ་ཡི་ཡོད་མེད་དེ་ས་ཁུལ་འདྲ་མིན་ལ་ཤུགས་རྐྱེན་མི་འདྲ་བ་ཡོང་གི་ཡོད་པ་གསལ་བོར་བཏོན་ཡོད་ཅེས་བརྗོད་འདུག

བློ་བཟང་སྒྲོལ་མ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།