བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས་ཀྱིས་རག་རྡིས་ཀྱི་རྗེས་སུ། རྒྱལ་མཚན་ནོར་བུ་བོད་རང་སྐྱོང་ལྗོངས་ཟེར་བའི་ནང་རྒྱ་གཞུང་གི་བསམ་དོན་བཞིན་བོད་མི་རྣམས་ལ་སྐད་ཆ་བཤད་ཐུབ་པའི་མངོན་གསལ་དོད་ཤོས་ཀྱི་མི་སྣ་ཡག་ཤོས་ཆགས་ཡོད་ཅེས་བརྗོད་སོང་།
རྒྱ་ནག་གཞུང་འབྲེལ་གྱི་གསར་ཁང་ཁག་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༦ ཉིན་རྒྱ་ནག་གི་རྒྱལ་ས་པེ་ཅིན་གྱི་ཀྲུང་ནན་ཧེ་ཚོགས་ཁང་དུ། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱལ་མཚན་ནོར་བུ་དང་ཐུག་འཕྲད་བྱས་ཡོད་ཅིང་། སྐབས་དེར་རྒྱ་ནག་རྒྱལ་ཡོངས་སྲིད་གྲོས་ཀྱི་ཚོགས་གཙོ་ཝང་ཧུའུ་ཉིང་དང་། རྒྱ་ནག་འཐབ་ཕྱོགས་གཅིག་གྱུར་ཁང་གི་འགན་འཛིན་ལི་ཀན་ཅེ། རྒྱ་ནག་ཆབ་སྲིད་རྒྱུན་ལས་ཁང་གི་མགོ་ཁྲིད་ཚའེ་ཆི་བཅས་ཡོད་འདུག་ལ། ཞི་ཅིན་ཕིན་གྱིས་རྒྱལ་མཚན་ནོར་བུར་བློ་བརྟན་འགྱུར་མེད་ཀྱིས་མེས་རྒྱལ་གཅིག་གྱུར་དང་། ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་ཇེ་བརྟན་དུ་གཏོང་བ། མ་ལག་ཆ་ཚང་བའི་སྒོ་ནས་ཆོས་ལུགས་ཀྲུང་གོ་ཅན་དུ་བསྒྱུར་བ། བོད་ལྗོངས་དེང་རབས་ཅན་དུ་འཛུགས་སྐྲུན་བྱེད་པར་མུ་མཐུད་ནུས་པ་འདོན་དགོས་ལུགས་བརྗོད་ཡོད་པ་ལྟར། རྒྱལ་མཚན་ནོར་བུས་ཀྱང་ཞི་ཅིན་ཕིན་གྱི་དགོངས་པ་ཟེར་བ་སེམས་སུ་བཅིངས་ཏེ། དམར་ཤོག་ཚོགས་པའི་སྣེ་འཁྲིད་པའི་ལས་དོན་ལ་རྒྱབ་སྐྱོར་དང་ཀྲུང་ཧྭ་མི་རིགས་གཅིག་གྱུར། གྲངས་ཉུང་མི་རིགས་མཐུན་སྒྲིལ་བྱེད་པར་ནུས་ཤུགས་ཡོད་རྒུ་བཏོན་ནས་ཞབས་འདེགས་སྒྲུབ་རྒྱུ་ཡིན་པའི་ཁས་ལེན་བྱས་ཡོད་འདུག
འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས་སུ། ཐེངས་འདིའི་ཞི་ཅིན་ཕིན་དང་རྒྱལ་མཚན་ནོར་བུ་གཉིས་ཀྱི་ཐུག་འཕྲད་དེས་བོད་བརྒྱུད་ནང་བསྟན་དང་འབྲེལ་བའི་ཐོག་གལ་གནད་ཇི་ཙམ་ཆགས་ཀྱི་ཡོད་མེད་དྲིས་པར། ཁོང་མོས། ཞི་ཅིན་ཕིན་གྱིས་ནམ་རྒྱུན་རྒྱ་ནག་གིས་བསྐོ་བཞག་བྱས་པའི་རྒྱལ་མཚན་ནོར་བུ་ལ་ཐུག་བསྡད་ཀྱི་ཡོད་པ་རེད། ད་ལྟའི་སྐབས་སུ་ཐུག་དགོས་པ་བོད་བརྒྱུད་ནང་བསྟན་ཐོག་རྒྱུ་མཚན་གཉིས་མཐོང་གི་འདུག གཅིག་ནི་བོད་རང་སྐྱོང་ལྗོངས་ཟེར་བའི་མགོ་ཁྲིད་རག་རྡིས་གྲོངས་པ་རེད། རག་རྡིས་ཀྱི་ཚེ་སྟོད་དུ་ལས་ཀ་ཅི་བྱས་བཤད་མི་དགོས་ཀྱང་། ཚེ་སྨད་དུ་བོད་རྒྱ་ཞི་མོལ་བྱེད་དུས་ཁོས་རྒྱ་ནག་འཐབ་ཕྱོགས་གཅིག་གྱུར་ཁང་དུ་ལས་ཀ་བྱས་ཡོད་ལ། རྒྱ་ནག་གཞུང་གི་བསམ་ཚུལ་ལྟར་བོད་ནང་དུ་དྲིལ་བསྒྲགས་བྱས་ཡོད། ཁོ་བོད་མི་རྣམས་ཀྱི་ཀླད་པ་དཀྲུག་མཁན་རྒྱ་ནག་གཞུང་གི་མགོ་ཁྲིད་ཆེན་པོ་ཞིག་རེད། ཁོ་རང་སྐུ་གྲོངས་དུས། རྒྱ་ནག་གཞུང་གིས་བོད་ཀྱི་མི་རབས་གསུམ་པའི་ནང་གསོ་སྐྱོང་བྱས་པའི་རྒྱལ་མཚན་ནོར་བུས་འདས་པའི་ལོ་བཅུ་ལྷག་གི་རིང་བོད་ནང་རྒྱ་ནག་ལ་དགའ་ཞེན་དང་བོད་མིའི་ཀླད་པ་དཀྲུག་པའི་ལས་གཞི་སྤེལ་ཡོད་པས། རྒྱལ་མཚན་ནོར་བུ་ནི་བོད་ཀྱི་མི་རབས་གསུམ་པའི་ནང་རྒྱ་གཞུང་ཕྱོགས་ཀྱི་སྐད་ཆ་བཤད་མཁན་གལ་ཆེན་པོ་ཆགས་ཡོད། ཞི་ཅིན་ཕིན་གྱིས་རྒྱལ་མཚན་ནོར་བུ་མི་རིགས་མཐུན་སྒྲིལ་དང་བརྟན་བརླིང་སྲུང་སྐྱོབ་བྱེད་མཁན་གྱི་དཔེ་མཚོན་ཡིན་ལུགས་བཤད་ཡོད། རག་རྡིས་ཀྱི་རྗེས་སུ་རྒྱལ་མཚན་ནོར་བུ་ནི་བོད་རང་སྐྱོང་ལྗོངས་ཟེར་བའི་ནང་རྒྱ་གཞུང་གི་བསམ་དོན་བཞིན་བོད་མི་རྣམས་ལ་སྐད་ཆ་བཤད་ཐུབ་པའི་མངོན་གསལ་དོད་ཤོས་ཀྱི་མི་སྣ་ཡག་ཤོས་དེ་ཆགས་ཡོད། དེའི་ཐོག་ནས་རྒྱལ་མཚན་ནོར་བུ་ལ་རག་རྡིས་བཞིན་ལས་ཀ་ཞིག་སྤྲོད་ཀྱི་ཡོད་པ་མཐོང་གི་འདུག གཉིས་པ། ལོ་རྒྱུས་ཐོག་གོང་མས་བླ་མ་གོང་དུ་འཇོག་གི་ཡོད་ཀྱང་། ཁོང་གཉིས་ཀྱི་ཐུག་འཕྲད་སྐབས་ཞི་ཅིན་ཕིན་མཐོ་བོ་དང་རྒྱལ་མཚན་ནོར་བུས་དམའ་བོའི་ཐོག་ནས་གུས་བརྩི་བྱས་ཡོད། དེས་རྒྱ་ནག་གི་སྲིད་ཇུས་ཐོག་ཆོས་ལུགས་དམའ་སར་འཇོག་གི་ཡོད་པ་དང་ཆོས་ལུགས་ཀྱི་དབུ་འཁྲིད་དག་གི་བདག་དབང་དེ་རྒྱ་ནག་གཞུང་ལ་ཡོད་པ་སྟོན་གྱི་འདུག ཉེ་ལམ་ཉི་ཧོང་དུ་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་སྐོར་བཤད་དུས། རྒྱ་ནག་གཞུང་གིས་༧སྐུའི་ཡང་སྲིད་སྐོར་གྱི་བདག་དབང་དེ་རྒྱ་ནག་ལ་ཡོད་སྐོར་བསྒྲགས་ཡོད་པ་རེད། རྒྱ་ནག་གཞུང་གིས་ཡང་སྲིད་སྐོར་བཤད་དུས་ཕྱི་ལོ་ ༡༩༩༥ ལོར་གསེར་བུམ་དཀྲུག་པའི་དཔེ་མཚོན་ཡག་ཤོས་རྒྱལ་མཚན་ནོར་བུ་ཆགས་ཡོད། ཅེས་འགྲེལ་བརྗོད་གནང་བྱུང་།
ད་ལྟའི་དུས་སྐབས་འདི་འདྲ་ཞིག་ལ་ཞི་ཅིན་ཕིན་དང་རྒྱལ་མཚན་ནོར་བུ་ཐུག་འཕྲད་བྱེད་པའི་གལ་གནད་སྐོར་ལ་ཁོང་མོས། ད་ལོ་བཙན་བྱོལ་ནང་ཆོས་ལུགས་རིས་མེད་ཀྱི་ཚོགས་འདུ་འཚོགས་འཆར་ཡོད་པ་རེད། རྒྱ་ནག་གཞུང་གིས་ཕྱི་ལོ་ ༡༩༥༨ ལོར་སྤྲུལ་སྐུའི་ཡང་སྲིད་མེད་པར་བཟོས་པ་རེད། རིག་གནས་གསར་བརྗེའི་རྗེས་རྒྱ་ནག་གཞུང་ནས་ཡང་སྲིད་ཀྱི་ཆོག་མཆན་ལེན་དགོས་པ་བཟོས་པ་རེད། ཕྱི་ལོ་ ༢༠༠༨ ནས་རྒྱ་གཞུང་གིས་སྤྲུལ་སྐུའི་ཡང་སྲིད་འདེམས་སྟངས་ཀྱི་ལག་འཁྱེར་སྤྲོད་པ་སོགས་བྱས་པ་རེད། རྒྱལ་མཚན་ནོར་བུར་གསེར་བུམ་དཀྲུག་པ་ནི་བོད་ཀྱི་སྲོལ་རྒྱུན་ལ་མ་བརྟེན་པའི་རྒྱ་གཞུང་གི་དཔེ་མཚོན་ཡག་ཤོས་རེད། དེ་ནི་རྒྱ་ནག་གཞུང་གིས་མངོན་གསལ་དོད་པོའི་ཐོག་དྲིལ་བསྒྲགས་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།
དེ་བཞིན་ཁོང་མོས། ཐེངས་འདིའི་ཞི་ཅིན་ཕིན་དང་རྒྱལ་མཚན་ནོར་བུ་གཉིས་ཀྱིས་ཐུག་འཕྲད་དུས་རྒྱུན་དང་མི་འདྲ་ས་གང་ཡང་མི་འདུག བརྟན་བརླིང་ལ་སྲུང་སྐྱོབ་དང་།རྒྱལ་ཁབ་ལ་དགའ་ཞེན། མི་རིགས་མཐུན་སྒྲིལ་སོགས་ལབ་འདུག རྒྱལ་མཚན་ནོར་བུ་བོད་དུ་ཕྱིན་ཏེ་ཆོས་སྤེལ་རྒྱུ་ཡིན་ལབ་ཡོད་ཀྱང་། གཙོ་བོ་རྒྱ་ནག་ལ་དགའ་ཞེན་དང་བོད་མིའི་ཀླད་པ་དཀྲུག་རྒྱུ་དེ་རེད། ཡིན་ནའང་། རྒྱལ་སྤྱིའི་ཐོག་ཏུ་ཁོས་མངོན་གསལ་དོད་པོའི་ཐོག་གང་ཡང་བྱེད་ཐུབ་མེད། རྒྱ་ནག་གི་ཆབ་སྲིད་ཀྱི་འགྲོ་སྟངས་ཐོག་ནས་བལྟས་ན་ཞི་ཅིན་ཕིན་གྱིས་ཐུག་འཕྲད་བྱས་པའི་མི་དེ་གལ་ཆེན་པོ་ཡིན་པ་མཚོན་གྱི་ཡོད་པ་རེད་ལ། རྒྱ་ནག་གཞུང་གིས་རྒྱལ་མཚན་ནོར་བུ་བེད་སྤྱད་དེ་ཆབ་སྲིད་དྲིལ་བསྒྲགས་ཀྱི་ནུས་ཤུགས་ཆེ་རུ་གཏོང་བཞིན་ཡོད་པ་ཞིག་ཏུ་མཐོང་གི་ཡོད། ཅེས་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
