༧གོང་ས་རྒྱལ་བ་རིན་པོ་ཆེ་མཆོག་ནས་དཔལ་ན་ལེནྡྲའི་ཆོས་བརྒྱུད་ནང་གཞི་ལམ་འབྲས་གསུམ་གྱི་རྣམ་གཞག་རིས་མེད་ལམ་ནས་གཏན་ལ་ཕབ་པ་ཧ་ཅང་ཞིབ་ཚགས་པོ་དང་རྒྱ་ཆེན་པོ་རེད་ཅེས་བཀའ་སློབ་སྩལ་འདུག
དེ་རིང་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་སྟོང་འཁོར་མཉྫུ་ཤྲཱི་ཧུ་ཐོག་ཐུས་གཙོས་པའི་སོག་པོ་ ༡༤༨ ལ་མཇལ་ཁ་དང་བཀའ་སློབ་སྩལ་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ཆེད་མངགས་འབྱོར་བའི་སོག་པོའི་སྤུན་ཟླ་རྣམས་གཙོ་བོ་བྱས་པའི་སོག་རིགས་ཚང་མ་ལ་བཀྲ་ཤིས་བདེ་ལེགས་ཞུ། བོད་སོག་གཉིས་ལ་ཐུན་མོང་མ་ཡིན་པའི་འབྲེལ་བ་ཡོད་བསྡད་པ་ཞིག་རེད། ངོས་རང་ལ་ཆ་བཞག་ནའང་ངོས་ཀྱི་དགེ་རྒན་གཙོ་བོ་གཅིག་ནི་དངོས་གྲུབ་མཚོ་གཉིས་རེད། ཁོང་སོག་པོ་རེད། ཧ་ཅང་བཀའ་དྲིན་ཆེན་པོ་ཡིན། ང་ཚོ་བོད་སོག་གཉིས་ལ་ཐུན་མོང་མིན་པའི་འབྲེལ་བ་ཞིག་ཡོད་པ་རེད། དེ་རིང་འདིར་སོག་རིགས་མང་པོ་ཞིག་ཆེད་མངགས་ཡོང་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན། ངོས་རང་ལ་རྟགས་གསལ་སློབ་མཁན་གྱི་དགེ་རྒན་གཙོ་བོ་དེ་དངོས་གྲུབ་མཚོ་གཉིས་རེད། ཁོང་སོག་པོ་རེད། དུས་ཚོད་ལ་ཧ་ཅང་འགྱུར་བ་ཞིག་འགྲོ་བཞིན་ཡོད་པ་རེད། ཡིན་ནའང་། སངས་རྒྱས་ཆོས་ཀྱི་གཟི་བརྗིད་ལ་ཉམས་རྒྱུ་ཁྱོན་ནས་མི་འདུག དེ་རིང་ཁ་སང་ཚན་རིག་པའི་ནང་ནས་སེམས་ཁམས་རིག་པའི་སྐོར་ལ་དམིགས་བསལ་དོ་སྣང་བྱེད་བཞིན་འདུག ངོས་ཀྱིས་ཚན་རིག་དང་འབྲེལ་ནས་ཀླད་པའི་རྣམ་གཞག་གི་ཐོག་འགྲེལ་བཤད་རྒྱག་གི་ཡོད། གང་ལྟར་ང་ཚོའི་བོད་ལ་ཡོད་བསྡད་པའི་སངས་རྒྱས་ཀྱི་ཆོས་དང་། དེའི་ནང་ཚན་ནས་ན་ལེནྡྲའི་ཆོས་བརྒྱུད་ཀྱི་ནང་དུ་གཞི་ལམ་འབྲས་གསུམ་གྱི་རྣམ་གཞག་དེ་རིས་མེད་ལམ་ནས་གཏན་ལ་ཕབ་པ་ཧ་ཅང་ཞིབ་ཚགས་པོ་དང་རྒྱ་ཆེན་པོ་འདུག ངོས་རང་ཚུར་རྒྱ་གར་དུ་བསླེབ་སྟེ་མོན་ནས་བཟུང་དྷ་རམ་ས་ལར་བསྡད་པའི་རིང་། རྒྱ་གར་གཙོས་འཛམ་གླིང་གི་ནང་པ་དང་། སེམས་ཁམས་རིག་པའི་སྐོར་ལ་དོ་སྣང་ཡོད་མཁན། ཚན་རིག་ལའང་དོ་སྣང་ཡོད་མཁན་སོགས་ལ་ཐུག་རྒྱུ་མང་པོ་བྱུང་སོང་། ཞེས་གསུངས།
ཡང་༧མགོན་པོ་གང་ཉིད་མཆོག་ནས། ངོས་རང་ལྷ་སར་བསླེབ་སྟེ་ཡོངས་འཛིན་རྡོ་རྗེ་འཆང་གི་འགྲམ་ནས་དཔེ་ཆ་བཀའ་ཁྲིད་ཞུས་པ་རེད། དེ་དག་གི་ཐུགས་རྗེའི་བཀའ་དྲིན་ལ་བརྟེན་ནས་ངོས་ཀྱི་རྣམ་དཔྱོད་གོང་དུ་འཕེལ་ནས་ཧ་ཅང་ཡག་པོ་བྱུང་། གང་ལྟར་ནང་པ་སངས་རྒྱས་པའི་ཆོས་བརྒྱུད་སྤྱི་དང་། ལྷག་པར་དུ་དཔལ་ན་ལེནྡྲའི་བརྒྱུད་པ་དེ་རིག་པའི་ལམ་གཏན་ལ་ཕབ་པ་གཙོ་བོ་རེད་འདུག ངོས་རང་མོན་རྟ་དབང་བརྒྱུད་ནས་རྒྱ་གར་དུ་འབྱོར་ཏེ་འདིར་གཞིས་ཆགས་པ་རེད། ལུང་པ་འདྲ་མིན་གྱི་ཆོས་དང་རིག་གཞུང་། གོམས་གཤིས་སོགས་འདྲ་མིན་ཡོད་པའི་མི་རྣམས་དང་ཐུག་གི་ཡོད། ངོས་རང་ལ་བློ་བསྐྱེད་ཡོང་གི་འདུག་ལ། ཁོང་ཚོར་ཡང་བློ་བསྐྱེད་ཡོང་གི་འདུག་པས། ཧ་ཅང་ཡག་པོ་འདུག སེམས་ཁམས་རིག་པའི་སྐོར་ལ་བོད་ཡིག་ཐོག་འགྱུར་ཡོད་པའི་ནང་ཆོས་ཁྲོད་བཤད་ཡོད་པ་ལས་གཏིང་ཟབ་པ་དང་རྒྱ་ཆེ་བ་ཞིག་ཡོད་པ་མ་རེད། ང་ཚོ་བོད་པ་བཙན་བྱོལ་བ་ཆགས་ཏེ་སྤྱིར་བཏང་གི་འགྲོ་སྟངས་ཐོག་ནས་ཉམས་དམའ་བོ་ཞིག་རེད། ཡིན་ནའང་། དེ་སྔ་སློབ་སྦྱོང་བྱས་ཡོད་པའི་གཟི་བརྗིད་དེ་མུ་མཐུད་དུ་འཕྲོས་བསྡད་པ་མ་གཏོགས་ཉམས་རྒྱུ་མི་འདུག ང་ཚོ་རྒྱ་གར་དུ་བསླེབ་སྟེ་ལོ་མང་པོ་ཕྱིན་པ་རེད། སངས་རྒྱས་ཀྱི་ཆོས་དང་ལྟ་གྲུབ་ཐོག་ཏུ་འཛམ་གླིང་གི་གང་སར་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག ངོས་ཀྱིས་ཆུང་ཆུང་སྐབས་སུ་ལྟ་གྲུབ་ཀྱིི་འགྲོ་སྟངས་ཐོག་སློབ་སྦྱོང་བྱས་ཡོད་པ་དེས། དེ་རིང་ཁ་སང་ཧ་ཅང་ཕན་ཐོགས་འདུག ཅེས་གསུངས་སོང་།
མཛད་འཆར་ལྟར་ན། ཟླ་འདིའི་ཕྱི་ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་གོ་སྟོན་དང་བསྟུན། བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ནས་བོད་ཟླ་ ༥ ཚེས་ ༥ ཉིན་གྱི་སྔ་དྲོ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོ་མཆོག་སྐུ་ཚེ་ཞབས་པད་བརྟན་ཆེད་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག ཕྱི་ཟླ་ ༧ ཚེས་ ༥ ཉིན་གྱི་སྔ་དྲོ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག དེ་བཞིན་ཕྱི་ཟླ་ ༧ ཚེས་ ༦ ཉིན་༸གོང་ས་རྒྱལ་བ་རིན་པོ་ཆེ་མཆོག་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གོ་སྒྲིག་ཞུས་པའི་མགོན་པོ་གང་ཉིད་མཆོག་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱང་རྒྱུ་བཅས་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
