བོད་ཀྱི་ན་གཞོན་ཉམས་ཞིབ་པ་དཀོན་མཆོག་བསྟན་འཛིན་ལགས་ཀྱིས་སྤྱི་ཚོགས་དྲ་ལམ་ཁག་ཏུ་བོད་ཡིག་ཐོག་དབྱེ་ཞིབ་ལྡན་པའི་ཉིན་རེའི་རྒྱལ་སྤྱིའི་གསར་འགྱུར་སྤེལ་བཞིན་ཡོད་པ་མ་ཟད། མ་འོངས་བར་དྲ་ཚིགས་དང་གཉེན་ཆས་བཟོ་འཆར་ཡོད་འདུག
བོད་ཀྱི་དུས་བབ་གསར་ཁང་གི་པར། ༢༠༢༥།༦།༢༥
༸གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་ཕེབས་བསུའི་མཆོད་སྤྲིན་དུ། དེ་རིང་སྔ་དྲོའི་ཆུ་ཚོད་ ༡༡ ཙམ་གྱི་སྟེང་གངས་སྐྱིད་ཀྱི་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོགས་ཁང་དུ། བོད་ཀྱི་ན་གཞོན་ཉམས་ཞིབ་པ་དཀོན་མཆོག་བསྟན་འཛིན་ལགས་ཀྱིས་ཐོན་མིའི་གཙུག་ལག་ཉིན་རེའི་རྒྱལ་སྤྱི་གསར་འགྱུར་ཞེས་པ་གཞུང་འབྲེལ་དབུ་འབྱེད་ཀྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། དམིགས་བསལ་སྐུ་མགྲོན་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་འབུམ་རམས་པ་བློ་བཟང་སྨོན་ལམ་ལགས། བོད་མི་མང་སྤྱི་འཐུས་དོན་གྲུབ་བཀྲ་ཤིས་ལགས། ལོ་རྒྱུས་མཁས་དབང་དང་ཉམས་ཞིབ་པ། དྷ་ས་ཁུལ་གྱི་སེར་སྐྱ་མི་མང་བཅས་མཉམ་ཞུགས་གནང་སོང་།
ཐོན་མིའི་གཙུག་ལག་ཉིན་རེའི་རྒྱལ་སྤྱིའི་སྐོར་ལ་བོད་ཀྱི་ན་གཞོན་ཉམས་ཞིབ་པ་དཀོན་མཆོག་བསྟན་འཛིན་ལགས་ཀྱིས་གསར་འགོད་པར། ཕྱི་ལོ་ ༢༠༢༢ ལོའི་ལོ་མགོར་ཨུ་རུ་སུ་དང་ཡུག་ཁི་རིན་གཉིས་དམག་འཁྲུག་རྒྱག་མགོ་ཚུགས་པ་རེད། དེ་དུས་ཏོག་དབྱིབས་གཉན་རིམས་ན་ཚའི་འཛམ་གླིང་ཡོངས་སུ་དཀའ་ངལ་འཕྲད་བཞིན་པ་རེད། དམག་འཁྲུག་གི་གནས་ཚུལ་ཆེན་པོ་ཆགས་ཡོད་པས་བོད་པ་མང་པོས་ཀྱང་བརྒྱུད་ལམ་ཁག་ནས་གནས་ཚུལ་དེ་དག་རག་པའི་ཐབས་ཤེས་བྱས་ཡོད་པ་རེད། སྤྱིར་ལོ་རྒྱུས་ཐོག་ནས་ང་ཚོ་ཨུ་རུ་སུ་ལ་ཆོས་དང་རིག་གཞུང་ཐོག་ནས་འབྲེལ་བ་ཡོད་ཀྱང་། ཕུ་ཌིན་ཨུ་རུ་སུའི་སྲིད་འཛིན་དུ་བསྡད་པ་ནས་བཟུང་ཆབ་སྲིད་རྒྱ་ནག་ལ་ཁ་ཕྱོགས་པ་རེད། ཡུག་ཁི་རན་དང་བོད་ལ་བཙན་འཛུལ་བྱེད་པའི་རྒྱབ་ལྗོངས་འདྲ་བོ་ཡིན་པས། བོད་པའི་བཟང་སྤྱོད་ཀྱི་ཐོག་ནས་ཡུག་ཁི་རན་ལ་ཤ་ཚ་བྱེད་རྒྱུ་བྱུང་བ་རེད། གནས་ཚུལ་དེ་དག་བོད་པ་མང་པོས་ཤེས་འདོད་བྱེད་ཀྱི་འདུག དེའི་སྐོར་གྱི་གནས་ཚུལ་ང་ཚོའི་གྲོགས་པོ་ཁག་ཤས་ཀྱིས་ཌེ་ལི་གྷི་རམ་ (telegram) སྤྱི་ཚོགས་དྲ་ལམ་གྱི་ཚོགས་པའི་ནང་གཏོང་བཞིན་ཡོད། བར་སྐབས་དེའི་སྐོར་གྱི་གནས་ཚུལ་གང་ཡང་སྤེལ་མ་ཐུབ། རྗེས་སུ་མི་མང་པོས་དེའི་སྐོར་ལ་སྐད་ཆ་འདྲི་བཞིན་འདུག་པས། རང་ཉིད་ལའང་སེམས་ཤུགས་འཕར་སྟེ་སྤྱི་ཚོགས་དྲ་ལམ་དུ་གནས་ཚུལ་སྤེལ་མགོ་ཚུགས་པ་ཡིན། ད་ལྟ་བར་དུ་རྒྱལ་སྤྱིའི་གསར་འགྱུར་ཁག་རང་ཉིད་གཅིག་པུས་སྤེལ་བ་ཡིན། ཕྱི་རྒྱལ་དུ་ཡོད་པའི་འབྲེལ་ཡོད་རྣམས་ཀྱིས་གསར་འགྱུར་གྱི་སྒྱུར་དང་དཔལ་འབྱོར་ཐོག་རོགས་རམ་བྱས་ཡོད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ད་ལྟ་བར་ང་ཚོའི་གསར་འགྱུར་ཁག་ངོ་དེབ་དང་ཌེ་ལི་གྷི་རམ་སྤྱི་ཚོགས་དྲ་ལམ་དུ་སྤེལ་བཞིན་ཡོད། མ་འོངས་བར་ཁ་པར་ནང་དུ་ཕབ་ལེན་བྱེད་ཆོག་པའི་གཉེན་ཆས་ཤིག་བཟོ་བའི་རེ་བ་ཆེན་པོ་རྒྱག་གི་ཡོད། གཉེན་ཆས་ཤིག་བཟོས་པ་ཡིན་ན་གནས་ཚུལ་རྒྱས་པ་འགོད་ཐུབ་པ་དང་། གནས་ཚུལ་རྙིང་པ་རྣམས་བང་རིམ་བཞིན་དུ་ཉར་ཚགས་བྱེད་པའི་ཁྱད་པར་འདུག་ལ། དེས་ཀློག་པ་པོ་རྣམས་ཀྱིས་ལྟ་ཀློག་བྱེད་པར་སྟབས་བདེ་ཡིན་པའི་ཕན་ཐོགས་ཆེན་པོ་འདུག མཐུན་སྦྱོར་ལ་བལྟས་ཏེ་གཉེན་ཆས་ཤིག་བཟོ་ཐུབ་པའི་རེ་བ་ཡོད། ད་ལྟའི་བར་དུ་དྲ་ཚིགས་བཟོས་མེད་ཀྱང་། མགྱོགས་པོ་དྲ་ཚིགས་ཤིག་བཟོ་བའི་འཆར་གཞི་ཡོད། ཅེས་འགྲེལ་བརྗོད་གནང་བྱུང་།
སྐབས་དེར་བོད་མི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་མཆོག་གིས། ང་ཚོ་དཀའ་ངལ་ཆེན་པོ་འཕྲད་བསྡད་པའི་འཐབ་རྩོད་པའི་མི་ཆགས་ཡོད། གཙོ་བོ་༧གོང་ས་རྒྱལ་བ་རིན་པོ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ང་ཚོ་བཙན་བྱོལ་ནང་ཡག་པོ་ཆགས་བསྡད་ཡོད། ང་ཚོས་གདོང་ལེན་བྱེད་དགོས་པ་དང་ལས་འགན་སྒྲུབ་དགོས་པ་མང་པོ་ཞིག་ཡོད། སོ་སོའི་གནས་སྟངས་ཤེས་དགོས་རྒྱུ་གལ་ཆེན་པོ་མཐོང་གི་འདུག ད་ལྟ་ང་ཚོ་འཛམ་གླིང་གི་ས་ཕྱོགས་གང་སར་སྡོད་བཞིན་ཡོད། དེ་ཡིན་དུས་ང་ཚོར་ནུས་པ་ཡོད་ལ་ཞན་ཆ་ཞིག་ཀྱང་ཡོད། དེ་རིང་ང་ལ་སྐད་ཆ་ཞིག་བཤད་ལབ་དུས་བསྔགས་བརྗོད་ཞུ་རྒྱུ་ནི་བོད་ཡིག་ཐོག་འཛམ་གླིང་གི་གནས་སྟངས་བཤད་པ་དང་། བཙན་བྱོལ་ནང་ཙམ་མ་ཟད་བོད་ནང་གི་བོད་མི་ཚོ་ལ་རྒྱལ་སྤྱིའི་ཆབ་སྲིད་ཀྱི་གནས་སྟངས་ལ་དཔྱད་ཞིབ་བྱས་ཏེ་བཤད་རྒྱུ་དེ་གནད་དགག་ཆེན་པོ་རེད་བསམ་གྱི་འདུག རྩ་བའི་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་གཞི་རྩ་འཇོག་ས་དམིགས་ཡུལ་གསུམ་ཡོད། རྒྱ་ནག་གི་ཆབ་སྲིད་ཀྱི་འགྱུར་ལྡོག་དང་། བོད་ནང་གི་གནས་སྟངས། དེ་བཞིན་རྒྱལ་སྤྱིའི་ཆབ་སྲིད་ཀྱི་གནས་སྟངས་བཅས་རེད། ཅེས་གསུངས་སོང་།
ཡང་ཁོང་གིས། བོད་ཀྱི་འཐབ་རྩོད་ནང་ལ་ང་ཚོས་བོད་པ་གཅིག་པོའི་གནས་ཚུལ་ལ་བལྟས་ནས་བོད་སྐྱོང་རྒྱུ་ཁག་པོ་རེད། ང་ཚོ་བོད་ཀྱི་ས་ཆར་སྡོད་ཀྱིན་ཡོད་ཀྱང་ད་ལྟ་དུས་རབས་ཉི་ཤུ་རྩ་གཅིག་ནང་བསྡད་ཡོད་དུས། སྤྱི་ཚོགས་དེ་འཁྲུག་ཆ་དོད་པོ་ཆགས་བསྡད་ཀྱི་ཡོད་པ་དང་། ང་ཚོས་བསམ་བློ་གུ་དོག་བྱས་ཏེ་ཕྱིའི་གནས་ཚུལ་མ་ཤེས་ན། ང་རང་ཚོ་འཛམ་གླིང་ཆུང་ཆུང་ཞིག་ཆགས་པ་རེད། འཛམ་གླིང་ཡོངས་ཀྱི་འགྱུར་ལྡོག་དང་བསྟུན་ནས་གོམ་པ་རྒྱག་མ་ཐུབ་ཚེ་རྗེས་ལུས་ཆེན་པོ་ཞིག་ཐེབས་ཡོད། ད་ལྟ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་སློབ་གྲྭ་སོགས་གང་ཅིའི་ཐད་ལ་ཕུན་སུམ་ཚོགས་པ་ཞིག་ཆགས་ཡོད། ང་ཚོས་རང་ཉིད་ཀྱི་ནུས་པ་གང་ཡིན་པ་ངོ་ཤེས་དགོས་རྒྱུ་དེ་གལ་ཆེན་པོ་རེད་བསམ་གྱི་འདུག ཅེས་གསུངས་སོང་།
སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་འབུམ་རམས་པ་བློ་བཟང་སྨོན་ལམ་ལགས་ཀྱིས། ཐོན་མིའི་གསར་འགྱུར་དེ་རང་ཉིད་ཐོག་དང་པོའི་དུས་ནས་ཀློག་མཁན་གྱི་གྲས་ཡིན། ཡིན་ནའང་གསར་འགྱུར་སྤེལ་མཁན་སུ་ཡིན་མིན་ཤེས་ཀྱི་མེད། རྗེས་སུ་ཤེས་དུས་དཀོན་མཆོག་བསྟན་འཛིན་རེད་འདུག དངོས་གནས་ཧ་ཅང་དགའ་བོ་བྱུང་། ང་ཚོའི་སྐད་ཡིག་དང་རིག་གཞུང་། ཆབ་སྲིད་ཀྱི་གནས་བབ་སོགས་གང་ཅིའི་ཐད་ནས་ཧ་ཅང་གནད་འགག་ཆེན་པོ་རེད། རང་ཉིད་ཀློག་མཁན་ཞིག་ཡིན་པའི་ངོས་ནས་ཁོང་གི་གསར་འགྱུར་ནི་བརྗོད་བྱ་དང་བརྗོད་བྱེད་དངོས་གནས་ཚད་དང་ལྡན་པ་རེད། དེ་ཡང་གནས་ཚུལ་ཞིག་སྤེལ་བ་ཙམ་མིན་པར་དབྱེ་ཞིབ་རང་བཞིན་ཅན་དང་ཁ་ཕྱོགས་ཡོད་པ་ཞིག་རེད། ང་ཚོ་བཙན་བྱོལ་བོད་མི་ལ་རང་ཉིད་ཀྱི་ལངས་ཕྱོགས་དང་ཁ་ཕྱོགས་ཤིག་དགོས་པ་རེད། ཁོང་གི་གསར་འགྱུར་གྱི་བརྗོད་བྱ་རྒྱལ་སྤྱིའི་གསར་འགྱུར་གལ་ཆེ་བ་དག་རེད། ཡི་གེའི་དག་ཆ་ཡག་པོ་དང་བརྗོད་བྱེད་ཕུན་སུམ་ཚོགས་པོ་རེད་ལ། དབྱེ་ཞིབ་ཡོད་པ་དང་ཁ་ཕྱོགས་ཡོད་པ་ཞིག་ཏུ་མཐོང་སོང་། དེ་ནི་རང་ཉིད་ཀློག་མཁན་ཞིག་ངོས་ནས་ཞུ་བཞིན་ཡོད། ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
བོད་ཀྱི་ན་གཞོན་ཉམས་ཞིབ་པ་དཀོན་
གསར་འགོད་པ། བསྟན་འཛིན་ཉི་སྒྲོན། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
