ལོ་རྒྱུས་སློབ་དཔོན་ཆེན་མོ་བྱམས་པ་བསམ་གཏན་ལགས་ཀྱིས་ང་ཚོ་བོད་པ་ཞིག་ཏུ་སྐྱེས་ཡོད་དུས་བོད་ཀྱི་རིག་གཞུང་མི་ཉམས་རྒྱུད་འཛིན་བྱས་ཏེ་མི་རབས་རྗེས་མར་རྩིས་སྤྲོད་བྱ་རྒྱུ་ད་ལྟའི་མི་རབས་འདིའི་ཕྲག་ཏུ་བབ་པའི་འོས་འགན་ཡིན་སྐོར་བརྗོད་སོང་།
དེ་རིང་ཕྱི་ཚེས་ ༢༧ ནས་ ༣༠ བར་དྷ་སའི་ཉེ་འཁྲིས་གྷོ་པལ་པུར་རང་བྱུང་ལང་ཚོ་གསོལ་མགྲོན་ཁང་(nature bloom hotel and resort Gopalpur)དུ། དབུས་གཙང་གཞོན་སྐྱེས་ཚོགས་ཆེན་ཐེངས་དང་པོ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་ཏུ་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་དང་། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་ཆེན་མོ་བྱམས་པ་བསམ་གཏན་ལགས། བོད་མི་མང་སྤྱི་འཐུས་ཁག་ཅིག གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། དབུས་གཙང་གཞོན་སྐྱེས་རྣམས་བཅས་མཉམ་ཞུགས་གནང་འདུག
སྐབས་དེར་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། ཉེ་ལམ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་ཉི་ཧོང་གི་རྒྱལ་ས་ཌོ་ཀྱོ་རུ་འཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་བ་དེ་འཛམ་གླིང་ཡོངས་སུ་ཐད་གཏོང་བྱས་ཡོད། དེ་འདྲའི་ཐད་གཏོང་བྱེད་དགོས་དོན་ནི་འཛམ་གླིང་ཡོངས་སུ་བོད་དོན་ཐོག་རྒྱབ་སྐྱོར་བྱེད་མཁན་ཅི་ཙམ་ཡོད་མེད་དང་། རྒྱལ་ཁབ་དེ་དག་གིས་བོད་དོན་ཐོག་འཛིན་པའི་ལྟ་ཕྱོགས་ཙམ་མིན་པར་བོད་ཀྱི་གཞོན་སྐྱེས་རྣམས་ལ་བོད་ནང་གི་ལེགས་པའི་ཆ་དང་ཞེན་ཆའི་ཐོག་བསླབ་བྱ་སྤྲོད་ཀྱི་ཡོད། དེའི་ཁྲོད་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཟུར་བའམ་གྲོས་ཚོགས་གོང་མའི་འཐུས་མི་ཤྲི་སུ་ཇེ་ཀུ་མར་མཆོག་གིས་བོད་དོན་འཐབ་རྩོད་ཐོག་བོད་ཀྱི་གཞོན་སྐྱེས་རྣམས་ཀྱིས་ནུས་པ་ཏག་ཏག་སྤུངས་ཐུབ་ཀྱི་མི་འདུག་པས་ཤུགས་རྒྱག་དགོས་ཀྱི་འདུག་ཅེས་གསུངས་ཡོད། ནུས་པ་ཇི་ལྟར་སྤུངས་དགོས་རྒྱུ་དེ་ང་ཚོའི་གཞོན་སྐྱེས་རྣམས་ཀྱི་དྲི་བ་ཞིག་རེད། ཅེས་གསུངས་སོང་།
ཡང་ཚོགས་གཞོན་མཆོག་གིས། དབུས་གཙང་གཞོན་སྐྱེས་ཚོགས་འདུ་ཐེངས་དང་པོ་སྔ་ས་ནས་གྲ་སྒྲིག་བྱས་ཡོད་ཀྱང་། མ་སྒྲིག་ལྷུན་འགྲུབ་ཀྱིས་༧གོང་ས་རྒྱལ་རིན་པོ་ཆེ་མཆོག་གི་གོ་སྟོན་གྱི་དུས་ཚིགས་དང་ཉེ་བའི་སྐབས་སུ་ཆགས་ཡོད། ང་ཚོས་༧གོང་ས་མཆོག་གི་སྐུ་ཚེ་ཞབས་པད་བརྟན་པའི་བརྟན་བཞུགས་དང་དགའ་སྟོན་བྱེད་དགོས་པ་ཞིག་ཡིན་པ་མ་ཟད། གཙོ་བོ་༧གོང་ས་མཆོག་དགུང་ལོ་བཅུ་དྲུག་ནས་རྒྱལ་སྲིད་ཆོས་སྲིད་བཞེས་ཏེ། ད་ལྟ་བར་དུ་ཁོང་ལ་གསོལ་བ་བཏབ་ནས་དགུང་ལོ་དགུ་བཅུ་ཕེབས་ཀྱང་ད་དུང་བཞུགས་རོགས་མཛོད་ཟེར་དུས། ང་ཚོས་ཅི་ཞིག་བྱ་དགོས་པ་རེད། གཞོན་སྐྱེས་རྣམས་ཀྱིས་ཅི་ཞིག་བྱ་དགོས་པ་རེད། ང་ཚོར་དམ་བཅའ་ཞིག་གཏན་གཏན་དགོས་ཀྱི་རེད་བསམ་གྱི་འདུག དམ་བཅའ་དེ་ཡང་ཁ་དང་ཚིག་ཙམ་གྱིས་ཕྱིར་བསྒྲགས་པ་ཙམ་མིན་པར་མི་རེ་ངོ་རེའི་དོ་སྣང་བྱེད་ཕྱོགས་ཐོག་ནས་དགོས་པ་ཞིག་རེད། ཐེེངས་འདིའི་གཞོན་སྐྱེས་ཚོགས་འདུ་ཐོག་མཁས་དབང་རྣམས་ཀྱིས་གནས་ཚུལ་སྣ་མང་གསུང་ཡོང་གི་ཡོད་ཀྱང་། གཞོན་སྐྱེས་རྣམས་ཀྱིས་ཚ་ཚ་འུར་འུར་ཐོག་དོགས་འདྲི་བྱེད་དགོས་པ་རེད། ཅེས་སོགས་གསུངས་སོང་།
ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་ཆེན་མོ་བྱམས་པ་བསམ་གཏན་ལགས་ཀྱིས། ང་ཚོས་བོད་ཀྱི་ལོ་རྒྱུས་དང་སྐད་ཡིག་རིག་གཞུང་སོགས་དར་སྤེལ་རྒྱུད་འཛིན་བྱེད་དགོས་ཞེས་སྐད་རྒྱག་བཞིན་ཡོད་པ་རེད། དེ་དག་རྒྱུད་འཛིན་གྱི་དགོས་པར་སྡོམ་ཞིག་བརྒྱབ་ན། ༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་དེབ་གསར་བ་བོད་དང་བོད་མིའི་མགྲིན་ཚབ་པའི་ལེའུ་བཅུ་དྲུག་པ་རེ་སྐུལ་གྱི་ནང་དུ། ༧གོང་ས་མཆོག་གིས་བོད་མི་རིགས་དང་བོད་རྒྱལ་ཁབ་ཀྱི་ལོ་རྒྱུས་ནང་དུ་ད་ལྟ་ནང་བཞིན་གནས་སྟངས་ངན་པ་ཞིག་བྱུང་མྱོང་མེད་ཀྱང་། ཉི་མ་སྤྲིན་པའི་འོག་ནས་དྭངས་བའི་དུས་སྐབས་ཤིག་སླེབས་ཀྱི་རེད། ཅེས་དང་། འདས་བའི་ལོ་ངོ་ཉིས་སྟོང་ལྷག་གི་རིང་བོད་ཀྱི་ལོ་རྒྱུས་ནང་དར་རྒུད་སྣ་ཚོགས་བྱུང་ཡོད་ཀྱང་། བོད་ཀྱི་སྐད་ཡིག་དང་། རིག་གཞུང་། ཆོས་ལུགས་སོགས་མི་རིགས་གཞན་དང་མི་འདྲ་བར་ཁྱད་དུ་འཕགས་པའི་ངོ་བོ་མཚོན་གྱི་ཡོད། ཅེས་གསུངས་ཡོད། ད་ལྟ་བོད་འདིར་གཉན་འཕྲེང་དང་ཆག་འཇིག་གི་གནས་སྐབས་སུ་ལྷུང་བསྡད་ཡོད། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སོགས་བདག་གཅེས་དགོས་པ་རེད་དམ། གལ་སྲིད་ཆོས་དང་རིག་གཞུང་བདག་གཅེས་བྱེད་དགོས་ན། ད་ལྟའི་ང་ཚོའི་མི་ཐོག་འདི་བོད་པ་ཞིག་ཏུ་སྐྱེས་ཡོད་པས། བོད་ཀྱི་རིག་གཞུང་མི་ཉམས་རྒྱུད་འཛིན་བྱས་ཏེ་མི་རབས་རྗེས་མར་རྩིས་སྤྲོད་བྱ་རྒྱུ་ནི་འདོད་པ་མེད་ན་རྡོག་ཁྲེས་རེད་ལ། ཡག་པོ་བཤད་ན་ང་ཚོའི་འོས་འགན་རེད། དེ་ང་ཚོས་ཤེས་དགོས་པ་རེད། ཅེས་བརྗོད་སོང་།
དེ་བཞིན་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས། རྣམ་པ་ཚོ་ནི་མ་འོངས་བའི་བོད་ཀྱི་དབུ་ཁྲིད་དང་སྤྱི་ཚོགས་ཀྱི་མགོ་ཁྲིད་ཆགས་བསྡད་ཡོད། མ་འོངས་བའི་དབུ་ཁྲིད་ཞེས་པ་བོད་ཀྱི་སྤྱི་ཚོགས་ཆོལ་ཁ་གསུམ་གྱི་ཁོངས་སུ་ཐོན་དགོས་པ་རེད། སོ་སོ་ཆོལ་ཁ་གང་གི་ཁོངས་གཏོགས་ཡིན་ཡང་། སོ་སོའི་ལས་གནས་སུ་སྤྱི་བའི་སྤྱི་མི་སྡོད་དགོས་པ་མ་གཏོགས། ཆོལ་ཁའི་ཕྱོགས་ལྷུང་དུ་མ་འགྲོ་བའི་དགོངས་པ་བཞེས་རྒྱུ་གནད་འགག་ཆེན་པོ་རེད། ལས་གནས་དེའི་ཐོག་མི་ཚང་མར་ལྟ་སྟངས་གཅིག་གྱུར་དགོས་རྒྱུ་ཧ་ཅང་གལ་ཆེན་པོ་རེད། ཕྱོགས་ལྷུང་དང་ཕྱོགས་རིས་ཟེར་བ་དེ་མགོ་ཁྲིད་ཞིག་གིས་དུས་ནམ་ཡང་བྱ་རྒྱུ་ཡོད་པ་མ་རེེད། ཕྱི་ལོགས་ཀྱི་མིར་ལྟ་སྟངས་ཅི་ཞིག་ཡོད་མེད་གནས་ཚུལ་ཐ་དད་རེད། སོ་སོའི་ངོས་ནས་བླ་མ་དཀོན་མཆོག་བྱས་ཏེ་ཕྱོགས་ལྷུང་མ་ཡོང་བ་དགོས་རྒྱུ་གལ་ཆེན་པོ་རེད། དབུ་ཁྲིད་ཞེས་སྒང་དུ་བསྡད་སྐབས་ལས་དོན་གང་ཡིན་ཡང་བརྟག་དཔྱད་དང་ཞིབ་འཇུག་གནང་རྒྱུ་དགོས། ཞེས་སོགས་གསུངས་སོང་།
དེ་རིང་གི་ཚོགས་འདུའི་ཐོག་དགའ་ལྡན་ཕོ་བྲང་གི་དྲུང་ཆེ་ཟུར་པ་བཀྲས་མཐོང་བསྟན་འཛིན་དགེ་བྱེད་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྣམ་དང་འབྲེལ་བོད་དང་བོད་མིའི་མགྲིན་ཚབ་ཕྱག་དེབ་ཀྱི་གལ་གནད་གང་གཟིགས་སྐོར་དང་། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་ཆེན་མོ་བྱམས་པ་བསམ་གཏན་ལགས་ཀྱིས་བོད་བཙན་པོའི་དུས་སྐབས་ཀྱི་སྲིད་དབང་ཁྱབ་ཚད། ས་རཱ་མཐོ་སློབ་ཀྱི་འབུམ་རམས་པ་གཙང་ཕྲུག་སྟོབས་ལགས་ཀྱིས་ཆིངས་ཡིག་དོན་ཚན་བཅུ་བདུན་གྱི་རྒྱབ་ལྗོངས། རྒན་ཐུབ་བསྟན་ཡར་འཕེལ་མཆོག་གིས་བོད་ཀྱི་ཆོས་སྲིད་མཚོན་དོན་ཕོ་བྲང་པོ་ཏ་ལའི་མཚོན་དོན་གསུང་བཤད་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
