བོད་མིའི་ཆོས་ལུགས་ཚོགས་ཆེན་ཐེངས་བཅོ་ལྔ་བའི་ཐོག་གྲོས་གཞི་ཁག་དྲུག་དང་གྲོས་ཆོད་དོན་ཚན་ཁག་སྤྱི་མོས་གཏན་འབེབས་གནང་འདུག
དེ་རིང་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་མིའི་ཆོས་ལུགས་ཚོགས་ཆེན་ཐེངས་ ༡༥ བའི་ཐོག་ཕེབས་པའི་བསྟན་བདག་བླ་སྤྲུལ་རྣམ་པ་དང་ཚོགས་བཅར་བ་ཡོངས་ལ་མཇལ་ཁ་སྩལ་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ལ་ཐེངས་འདིའི་བོད་མིའི་ཆོས་ལུགས་ཚོགས་ཆེན་སྟེང་སྤྱི་མོས་གཏན་འབེབས་བྱུང་བའི་གྲོས་ཆོད་ཁག་སྙན་སེང་ཞུས་ཡོད་འདུག
མཇལ་བཅར་གྲུབ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གསར་འགོད་པར། ཆོས་ཚོགས་ཐེངས་བཅོ་ལྔ་བའི་ཐོག་གྲོས་གཞི་དོན་ཚན་ཁག་གི་ཐོག་གྲོས་ཆོད་རིམ་པ་མང་པོ་བཞག་ཡོད་པ་རེད། བརྒྱུད་ལམ་ཐོག་ནས་ཐད་སྲིང་གནང་ཡོད་པས་ཚང་མས་མཁྱེན་ཡོད་བཞག་བྱེད་བཞིན་ཡོད། གལ་ཆེན་ཆེ་ཤོས་ཚོགས་ཆེན་གྱི་ཉིན་དང་པོར་༧གོང་ས་རྒྱལ་བ་རིན་པོ་ཆེ་མཆོག་ནས་བརྙན་འཕྲིན་གྱི་ཐོག་ནས་བཀའ་སློབ་ཕེབས་པར་དམིགས་བསལ་ཐུགས་རྗེ་ཆེ་ཞུ་རྒྱུའི་གྲོས་ཆོད་དེ་ལོ་རྒྱུས་ཀྱི་གནས་བབ་ཞིག་ཆགས་ཀྱི་ཡོད། དེ་རིང་ཚོགས་ཉིན་གསུམ་པར་བསྟན་བདག་བླ་ཆེན་རྣམ་པ་དང་ཚོགས་བཅར་བ་རྣམས་༧གོང་ས་མཆོག་ལ་མཇལ་བཅར་ཞུ་བའི་གོ་སྐབས་བྱུང་བ་དང་། དེའི་རྗེས་སུ་ ༧གོང་ས་མཆོག་དབུ་བཞུགས་ཐོག་བསྟན་བདག་བླ་ཆེན་རྣམ་པའི་སྐར་མ་ལྔ་རེ་བཀའ་སློབ་གནང་བའི་ལས་རིམ་གྲུབ་ཟིན་པ་ཡིན། ཉིན་རྒྱབ་༧གོང་ས་མཆོག་གི་བཀའ་སློབ་ཕེབས་པ་དེ་ཟུར་ཉན་གྱི་གྲོས་ཆོད་འཇོག་རྒྱུ་ཅེས་དང་། ཚོགས་ཆེན་ཐོག་བསྟན་བདག་བླ་ཆེན་རྣམ་པ་དབུས་བའི་ཚོགས་བཅར་བ་ཡོངས་ཀྱིས་སྤྱི་མོས་ཐོག་གྲོས་ཆོད་བཞག་སྟེ་༧གོང་ས་མཆོག་གི་དགོངས་པ་གང་ཡིན་པར་རྒྱབ་སྐྱོར་དང་མ་འོངས་བར་ལག་བསྟར་བྱ་རྒྱུའི་ཐད་ཞལ་བཞེས་ཡག་པོ་བྱུང་སོང་། ཞེས་གསུངས་སོང་།
ཡང་ཆོས་རིག་བཀའ་བློན་མཆོག་ནས། དེ་རིང་ནི་ལོ་རྒྱུས་ཀྱི་གནས་བབ་ཐོག་ནས་གལ་ཆེན་པོ་ཆགས་ཀྱི་ཡོད། ཕྱི་ལོ་ ༢༠༡༡ ཟླ་ ༩ ཚེས་ ༢༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ཡང་སྲིད་དང་འབྲེལ་བའི་བཀའ་སློབ་ཕེབས་པའི་དགོངས་དོན་བཞིན། ད་ལན་དགུང་ལོ་ ༩༠ ཕེབས་སྐབས་བཀའ་སློབ་ཕེབས་པ་དེ་བརྙན་འཕྲིན་དང་ཡིག་ཐོག་གཉིས་ནང་ཡོད་པ་རེད། རྒྱ་ནག་གི་ངོས་ནས་ནམ་རྒྱུན་འཁྱོག་བཤད་བྱས་བསྡད་པ་དང་། འཛམ་གླིང་ཁྱོན་ཡོངས་ཀྱི་བརྒྱུད་ལམ་ཁག་ནས་༧གོང་ས་མཆོག་གི་དགོངས་པ་གང་ཡིན་པ་གསལ་བོ་གསལ་རྐྱང་ཆགས་པ་རེད། མ་འོངས་པར་༧སྐུའི་ཡང་སྲིད་ཕེབས་དགོས་པའི་དུས་ཚོད་ཤར་བའི་སྐབས་སུ་གནང་ལུགས་གནང་སྟངས་གསལ་བོ་འཁོད་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་མཚན་ཐོག་ཏུ་ཡོད་པའི་དགའ་ལྡན་ཕོ་བྲང་གི་ཐེབས་རྩའི་ལས་བྱེད་རྣམ་པའི་འགན་བཞེས་རྒྱུ་དང་། བསྟན་བདག་བླ་ཆེན་རྣམ་པ། ༧རྒྱལ་དབང་སྐུ་ཕྲེང་རིམ་བྱོན་གྱི་སྐུ་ཐོག་མང་པོ་དང་འབྲེལ་བ་ཡོད་པའི་ཆོས་སྐྱོང་ཚོར་བཀའ་འདྲི་ཞུ་རྒྱུ་དེ་རེད། དུས་རྒྱུན་༧གོང་ས་མཆོག་ནས་བཀའ་གནང་བཞིན་ཡོད་པ་ལྟར་ལོ་བཅུ་ཕྲག་གཉིས་ལྷག་བཞུགས་པའི་དགོངས་པ་ཡོད་དུས། ང་ཚོ་བོད་པའི་ངོས་ནས་ད་ལྟ་སྔ་དྲག་པ་ཞིག་ལ་ངོས་འཛིན་ཞུས་བསྡད་ཡོད། ཡིན་ནའང་། རྒྱལ་སྤྱིའི་ཁྱོན་ཡོངས་སུ་གནས་ཚུལ་དེ་གསལ་བོ་ཆགས་པའི་རེ་བ་ཞུ་བཞིན་ཡོད། ཅེས་གསུངས་སོང་།
བོད་མིའི་ཆོས་ལུགས་ཚོགས་ཆེན་ཐེངས་ ༡༥ པའི་ཐོག་སྤྱི་མོས་ཐོག་གཏན་འབེབས་བྱུང་བའི་གཞི་དང་གྲོས་ཆོད་ཁག་ནི། གྲོས་གཞི་དང་པོ། ༸གོང་ས་ྋསྐྱབས་མགོན་ཆེན་པོའི་བཀའ་དགོངས་ལྟར་མི་དམངས་བྱིངས་ཀྱི་ནང་བའི་ལྟ་གྲུབ་ཤེས་ཐབས་སུ་ས་གནས་སུ་ནང་ཆོས་ངོ་སྤྲོད་ཚོགས་ཆུང་ཡོད་པའི་ཐོག དང་བླངས་ཀྱིས་ནང་ཆོས་ངོ་སྤྲོད་ཚགས་ཚུད་གནང་མཁན་རིགས་ཡོད་པ་བཞིན། དགོན་སྡེ་གྲྭ་ཚང་ཁག་ནས་ཀྱང་དེ་ལྟ་བུ་གནང་ཐབས་ཇི་དགེའི་སྐོར།
གྲོས་ཆོད། ༡༽ ༸གོང་ས་༸སྐྱབས་མགོན་ཆེན་པོ་མཆོག་གིས་འཕྲལ་ཕུགས་རྒྱང་གསུམ་ལ་གཟིགས་ནས་ནང་ཆོས་ངོ་སྤྲོད་གནང་དགོས་པའི་བཀའ་སློབ་ལམ་སྟོན་གྱི་དགོངས་དོན་ལྟར། མི་མང་བྱིངས་ལ་ནང་ཆོས་ངོ་སྤྲོད་གནང་ཕྱོགས་དགོན་སྡེ་གྲྭ་ཚང་ཁག་གཅིག་མཚུངས་ཡོང་དཀའ་ཡང་། ས་གནས་སོ་སོའི་གནས་བབ་ལ་གཞིགས་ཏེ་དགོན་སྡེ་གྲྭ་ཚང་ཁག་གིས་མི་མང་གི་བློ་ཁ་དང་འཚམ་པའི་སློབ་དེབ་གསར་སྒྲིག་དང༌། ཚོགས་ཆུང་ཟུར་འཛུགས་ཀྱིས་ནང་ཆོས་ངོ་སྤྲོད་གནང་དགོས་རྒྱུ།
༢༽ འཆད་ཁྲིད་མཁས་པ་གདན་ཞུས་ཀྱིས་ཕྱི་དྲིལ་བོད་ཀྱི་བརྙན་འཕྲིན་བརྒྱུད་མི་མང་གི་བློ་དང་འཚམ་ཞིང༌། ཕལ་ཚིག་གམ་གོ་སླ་བའི་ཐོག་ནས་ནང་ཆོས་ངོ་སྤྲོད་ཀྱི་དམིགས་བསལ་ལེ་ཚན་ཞིག་གསར་གཏོད་གནང་དགོས་རྒྱུ།
༣༽ ས་གནས་སོ་སོའི་ཉེ་འཁྲིས་སུ་ཡོད་པའི་མཐོ་སློབ་ཁག་ཏུ་གུང་སེང་དང་སྟབས་བསྟུན་ནང་ཆོས་ངོ་སྤྲོད་ཚོགས་ཆུང་གི་ཚོགས་མི་ཆེད་བཅར་གྱིས་ནང་ཆོས་ངོ་སྤྲོད་གནང་ཐབས་གནང་རྒྱུ།
༤༽ ཆོས་རིག་ལས་ཁུངས་ནས་རིས་མེད་དགོན་སྡེ་གྲྭ་ཚང་ཁག་གི་ནང་ཆོས་ངོ་སྤྲོད་གནང་མཁན་རྣམས་ལ་དེང་དུས་དང་མཐུན་པའི་སློབ་ཁྲིད་ཐབས་ལམ་ཟབ་སྦྱོང་དང་མཐུན་རྐྱེན་སྦྱོར་སྤྲོད་གནང་དགོས་རྒྱུ།
༥༽ བོད་མིའི་ཆོས་ཚོགས་ཐེངས་བཅོ་ལྔ་པའི་སྟེང་ཆོས་རིག་ལས་ཁུངས་ནས་གནས་སྐོར་ཞེས་པའི་བཀོལ་སྤྱོད་མཉེན་ཆས་དབུ་འབྱེད་གནང་བ་ལྟར། དགོན་སྡེ་གྲྭ་ཚང་ཁག་ནས་གནས་སྐོར་དང༌། ཡུལ་སྐོར་བ་རྣམས་ལ་སྐབས་དུས་དང་བསྟུན་ནས་གསང་བའི་དྲྭ་མིག་དང་འཕྲུལ་རིག་བེད་སྤྱད་ཀྱིས་གནས་བཤད་དང༌། ནང་ཆོས་ངོ་སྤྲོད་གནང་ཐབས་གནང་རྒྱུ།
༦༽ ནང་ཆོས་ངོ་སྤྲོད་བྱེད་སྐབས་བསྡུ་བའི་དངོས་པོ་བཞི་ཡི་ཐབས་ལམ་གལ་ཆེན་ཡིན་པ་ལྟར། དགོན་སྡེ་གྲྭ་ཚང་ཁག་དང་འབྲེལ་ཡོད་ཆོས་དད་མི་མང་དབར་སེམས་ཐག་ཉེ་པོ་ཡོང་ཆེད་གང་ལ་གང་དགོས་ཀྱི་ཐབས་ལམ་དང་དམིགས་བསལ་མི་མང་སྐྱོ་པོའི་རིགས་ལ་དཔལ་འབྱོར་གྱི་མཐུན་རྐྱེན་སྦྱོར་ཕྱོགས་ཐད་དགོངས་བཞེས་གནང་དགོས་རྒྱུ།
གྲོས་གཞི་གཉིས་པ། ཆོས་བརྒྱུད་བྱེ་བྲག་པའི་བསླབ་པ་མཐར་སོན་པའི་གྲྭ་བཙུན་གང་རུང་ཆོས་བརྒྱུད་གཞན་གྱི་གཞུང་ཆེན་སྦྱོང་འདོད་ཡོད་རིགས་ལ་བཞུགས་ཡུལ་འབྲེལ་ཡོད་དགོན་སྡེ་གྲྭ་ཚང་ནས་མཐུན་འགྱུར་གནང་ཐབས་ཇི་དགེའི་སྐོར།
གྲོས་ཆོད། ༡༽ ཆོས་བརྒྱུད་བྱེ་བྲག་པའི་བསླབ་པ་མཐར་སོན་མཚམས་ཆོས་བརྒྱུད་གཞན་གྱི་གཞུང་ཆེན་སྦྱོང་འདོད་ཡོད་རིགས་ཀྱི་གྲྭ་བཙུན་ལ་འབྲེལ་ཡོད་དགོན་སྡེ་གྲྭ་ཚང་སོ་སོ་ནས་ངོ་སྤྲོད་རྒྱབ་གཉེར་ཡོད་ཚེ་དགེ་རྒན་དང༌། བཞུགས་གནས། ཞལ་ལག་སོགས་མཐུན་འགྱུར་གང་ཐུབ་སྦྱོར་གནང་རྒྱུ་དང་། དགོན་སྡེ་གྲྭ་ཚང་དེའི་ཆོས་ཁྲིམས་ལ་བརྩི་སྲུང་ལམ་དམ་དོན་ཞུ་དགོས་རྒྱུ།
༢༽ དགོན་སྡེ་གྲྭ་ཚང་སོ་སོས་ཅི་སྟེ་མཐུན་འགྱུར་གནང་དཀའ་བའི་རིགས་མཆིས་ཚེ། དོ་བདག་ནས་རྒྱབ་གཉེར་ཚད་ལྡན་དང་བཅས་ཆོས་རིག་ལས་ཁུངས་ལ་སྙན་འབུལ་གྱིས་མཐུན་འགྱུར་རག་ཐབས་ཞུ་རྒྱུ།
༣༽ ཆོས་བརྒྱུད་སོ་སོའི་དབྱར་ཆོས་དང་དཔྱིད་ཆོས་སོགས་ཚོགས་བཞིན་པར་ཆོས་བརྒྱུད་གཞན་ཁག་ནས་ཆོས་ཚན་དེའི་འཛིན་གྲྭའི་སློབ་གཉེར་བར་མཉམ་ཞུགས་གནང་ཐུབ་ན་དགེ་མཚན་ཆེ།
གྲོས་གཞི་གསུམ་པ། དགོན་སྡེ་གྲྭ་ཚང་ཁག་ནས་གོ་སྟོན་སྲུང་གཙིའི་ལོར་༧མགོན་པོ་མཆོག་གི་ཐུགས་བསྐྱེད་དམ་བཅའ་བཞི་དང་མཐུན་པའི་ཐོག་གཞི་རྒྱ་ཆེ་བའི་ཐུན་མོང་གི་ལས་གཞི་སྤེལ་ཐབས་ཇི་དགེའི་སྐོར།
གྲོས་ཆོད། ༡༽ འདི་ལོ་༸རྒྱལ་བའི་འཁྲུངས་སྐར་ཉིན་ནས་བཟུང་ལོ་འཁོར་མོ་བྱམས་བརྩེའི་ལོར་སྲུང་གཙི་ཞུ་མུས་བཞིན། བོད་མིའི་སྒྲིག་འཛུགས་ཆོས་རིག་ལས་ཁུངས་དང་དགོན་སྡེ་གྲྭ་ཚང་ཁག་མཉམ་རུབ་ཀྱིས་༸རྒྱལ་བའི་བཀའ་དྲིན་རྗེས་དྲན་ཞུ་སླད་གཞི་རྒྱ་ཆེ་བའི་རིས་མེད་བགྲོ་གླེང་ཞིག་གོ་སྒྲིག་གནང་གལ།
༢༽ ཆོས་རིག་ལས་ཁུངས་ཀྱི་གོ་སྒྲིག་འོག་ཆོས་བརྒྱུད་ཁག་ནས་སྨོན་ལམ་ཚོགས་སྐབས་དང་བསྟུན་ཏེ། རྒྱ་གར་གྱི་རྒྱལ་ས་ལྡི་ལི་ལྟ་བུར་རྒྱལ་སྤྱིའི་ནང་པའི་ལྷན་ཚོགས་ (IBC) དང༌། ཧི་མཱ་ལ་ཡ་ན་ལེཎྜ་ནང་པའི་སྲོལ་རྒྱུན་ལྷན་ཚོགས་བཅས་དང་མཉམ་རུབ་ཀྱིས་ནང་བསྟན་རྗེས་འཇུག་པའི་མཁས་པ་ལྷན་འཛོམས་ཐོག་ལྟ་གྲུབ་བགྲོ་གླེང་ཞིག་གནང་གལ།
༣༽ གནས་ཡུལ་རྒྱ་གར་གྱི་གཙོས་མི་རིགས་གཞན་ལ་སྐད་ཡིག་གཞན་པའི་ཐོག་ནས་ཐུགས་བསྐྱེད་དམ་བཅའ་བཞིའི་འགྲེལ་བཤད་དང་། རྒྱ་གར་མཐོ་སློབ་ཕྱེད་ཀར་༧རྒྱལ་བ་རིན་པོ་ཆེའི་ཐུགས་བསྐྱེད་དམ་བཅའ་བཞིའི་སྐོར་སློབ་ཕྲུག་གི་བློ་དང་འཚམ་པའི་ཐོག་ནས་ངོ་སྤྲོད་གནང་གལ།
༤༽ ཐུགས་བསྐྱེད་དམ་བཅའ་བཞི་བ་རྒྱ་གར་གྱི་གནའ་བོའི་རིག་གཞུང་མི་ཉམས་རྒྱུད་འཛིན་གནང་རྒྱུ་དེ་རྩལ་དུ་བཏོན་ནས་གནས་ཡུལ་རྒྱ་གར་དུ་ལས་གཞི་སྣ་ཚོགས་དང་། ༧གོང་ས་མཆོག་གི་དགོངས་གཞི་ལྟར་ངོ་སྤྲོད་གསལ་བོ་ཡོང་ཐབས་ཆེད་བརྙན་འཕྲིན་སོགས་ཀྱི་ལམ་ནས་འགྲེལ་བརྗོད་ཁ་གསལ་ཡོང་ཐུབ་པ་དགོས་རྒྱུ།
༥༽ བོད་ཀྱི་ཆོས་ལུགས་ཆོས་བརྒྱུད་དང་བཅས་པས་༸རྒྱལ་བའི་གོ་སྟོན་སྲུང་གཙི་ཞུ་རྒྱུ་གལ་ཆེན་ལ་སོང་། ཆོས་བརྒྱུད་ཆེན་པོ་བཞི་གཡུང་དྲུང་བོན།ཇོ་ནང་དང་བཅས་པའི་ཆོས་སྡེ་ཁག་དང༌། ཆོས་ཚོགས་ཁག་གིས་མི་མང་དང་མཐོ་སློབ་འདྲ་མིན་ནང་༧རྒྱལ་བའི་ཐུགས་བསྐྱེད་དམ་བཅའ་བཞིའི་སྐོར་གོ་རྟོགས་སྤེལ་ཐབས་གནང་རྒྱུ།
གྲོས་གཞི་བཞི་པ། རྒྱ་ནག་དང༌། དོལ་རྒྱལ་རྗེས་འབྲང་པ་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་དང་ངོ་རྒོལ་ཞུ་བཞིན་པའི་ཐོག དེང་གི་ཆར་དེ་དག་གི་རྒྱུག་ཁྱི་བོད་པ་རེ་འགས་ཀྱང་༸གོང་ས་མཆོག་ལ་མངོན་སུམ་འཛེམས་མེད་མཚན་སྨད་དང་སྐུ་ཕྱྭ་དང་འབྲེལ་བའི་སྐད་ཆ་ཚབས་ཆེན་ཤོད་མཁན་རིགས་ལ་འཚེ་མེད་ཞི་བའི་སྒོ་ནས་གདོང་ལེན་གནང་ཐབས་ཇི་དགེའི་སྐོར།
གྲོས་ཆོད། ༡༽ ༸གོང་ས་༸སྐྱབས་མགོན་ཆེན་པོ་མཆོག་ལ་སྐུར་འདེབས་མཚན་སྨད་ཞུ་མཁན་རིགས་སྣང་མེད་དུ་མི་འཇོག་པར་འབྲེལ་ཡོད་དགོན་སྡེ་གྲྭ་ཚང་ཁག་དང༌། ཆོས་རིག་ལས་ཁུངས། བདེ་སྲུང་ལས་ཁུངས་སོགས་ཀྱི་འགན་འཁུར་བ་རྣམས་ཀྱིས་སྐབས་བསྟུན་སོ་སོར་དབྱེ་འབྱེད་ཐུབ་པ་བྱས་ཏེ། མ་འོངས་པར་དེ་ལྟར་མི་ཡོང་བའི་སྔོན་འགོག་གམ། སྐབས་བསྟུན་སོ་སོར་དྲང་བདེན་གྱི་ལན་འདེབས་དང་ཐག་གཅོད་ཇི་དགོས་བྱ་རྒྱུ།
༢༽ གཞན་གྱི་མགོ་སྐོར་བསླུ་བྲིད་འོག་ཚུད་ནས་མཚན་སྨད་ཞུ་མཁན་རིགས་ལ་གོ་བསྐོན་སློབ་གསོ་དང༌། ཤེས་བཞིན་དུ་མཚན་སྨད་ཞུ་མཁན་རིགས་ལ་ཡུལ་ཁྲིམས་དང་མཐུན་པའི་སྒོ་ནས་བརྡ་འདེད་ནན་པོ་གནང་དགོས་རྒྱུ།
༣༽ ༧གོང་ས་མཆོག་ལ་མཚན་སྨད་ཞུ་མཁན་རིགས་ལ་གདོང་ལེན་བྱེད་སྐབས་ཚོགས་སྡེ་དང་། སྡེ་ཚན་སོགས་ཀྱི་ཞེན་ཁོག་དོར་ནས་སྤྱི་བ་གལ་ཆེར་བརྩིས་ནས་འགན་འཁུར་ལེན་དགོས་རྒྱུ།
༤༽ ༧གོང་ས་༧སྐྱབས་མགོན་ཆེན་པོ་མཆོག་ལ་དྲ་ཐོག་ནས་མཚན་སྨད་ཞུ་མཁན་ཚོགས་སྒེར་སུ་ཡིན་རུང་དེ་དག་ལ་དགའ་རྟགས་དང་། རྗེས་འབྲང་། བརྒྱུད་སྤེལ་སོགས་མི་བྱེད་རྒྱུ་དང་། མཚན་སྨད་ཞུ་མཁན་ཡོངས་ལ་ད་ལན་ཆོས་ཚོགས་ཐེངས་བཅོ་ལྔ་བ་འདིའི་ཐོག་ནས་དགག་པ་མཐའ་གཅིག་ཏུ་བྱ་རྒྱུ།
གྲོས་གཞི་ལྔ་པ། དགོན་སྡེ་གྲྭ་ཚང་སོ་སོའི་ནང་ཆོས་རིག་ལས་ཁུངས་ནས་ཡིག་འབྲེལ་སོགས་འབྲེལ་ལམ་ཚགས་ཚད་ཡོང་ཐབས་སུ་དགོན་སྡེ་གྲྭ་ཚང་སོ་སོ་ནང་འབྲེལ་མཐུད་པ་བསྐོ་བཞག་གནང་ཐབས་བྱེད་དགོས་སྐོར།
གྲོས་ཆོད། ༡༽ ཆོས་རིག་ལས་ཁུངས་ནས་དགོན་སྡེ་གྲྭ་ཚང་ཁག་ལ་འབྲེལ་བ་བྱེད་བདེའི་སླད་འབྲེལ་མཐུད་པ་ཞིག་བསྐོ་གཞག་དགོས་ངེས་ལ་སོང་། དགོན་སྡེ་གྲྭ་ཚང་སོ་སོ་ནས་གོ་ཆོད་པའི་འབྲེལ་མཐུད་པ་ཞིག་དུས་ཚོད་རྒྱས་བཅད་ནང་བསྐོ་གཞག་གིས། དེའི་མཚན་དང༌། ཡིག་འབྲེལ་བྱེད་སའི་གློག་འཕྲིན། ཞལ་པར་ཨང་གྲངས་བཅས་ཆོས་རིག་ལས་ཁུངས་སུ་འབུལ་དགོས།
༢༽ ཆོས་རིག་ལས་ཁུངས་ནས་ཆོས་ཕྱོགས་དང་འབྲེལ་བའི་གལ་ཆེའི་གསལ་བསྒྲགས་ཁག་དུས་འགྱངས་མ་སོང་བར་དུས་ཐོག་ཏུ་འབྲེལ་བ་བྱེད་དགོས་རྒྱུ།
གྲོས་གཞི་དྲུག་པ། གོང་གསལ་གྲོས་གཞིར་མ་འཁོད་པའི་གནད་དོན་གཞན་ཐོག་སྤྱི་སྨན་དགོངས་འཆར་དང་བཀའ་བསྡུར།
གྲོས་ཆོད། ༡༽ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བོད་གངས་ཅན་པའི་ཆོས་དང་རིག་གཞུང་རྣམས་དར་ཞིང་རྒྱས་པ་བྱུང་ཡོད་ནའང༌། ད་ལྟའི་མི་རབས་གསར་པ་རྣམས་ལ་ནང་ཆོས་ཀྱི་གོ་རྟོགས་མེད་པ་ཆགས་ཉེན་ལ་བརྟེན། རང་རེའི་སློབ་གྲྭ་ཁག་གི་དམའ་རིམ་འཛིན་གྲྭ་ནས་བཟུང་སྟེ་ནང་ཆོས་ཀྱི་གོ་རྟོགས་སྤེལ་བར་ཤུགས་སྣོན་དགོས་རྒྱུ།
༢༽ བོད་ཕྱི་ནང་གཉིས་སུ་ཇོ་ནང་པས་སྦྱོར་དྲུག་ཉམས་ལེན་སོགས་ལ་སྦྱང་བརྩོན་མཐིལ་ཕྱིན་བྱེད་བཞིན་ཡོད་པ་མཁྱེན་གསལ་ལྟར། བཙན་བྱོལ་སྤྱི་ཚོགས་ཁྲོད་ད་དུང་དཀའ་ངལ་འདྲ་མིན་འཕྲད་མུས་ལ་སོང༌། བཅའ་ཁྲིམས་ནང་མཚན་གནས་འཁོད་ཐབས་ཡོང་བའི་འབོད་སྐུལ་ཞུ་རྒྱུ།
༣༽༸སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གིས་ཕྱོགས་བསྒྲིགས་གནང་བའི་སློབ་དེབ་བློ་གསལ་འགུལ་རྒྱན་དེ་ཉིད་ལག་བསྟར་གནང་མཁན་གྱི་ཆོས་སྡེ་ཁག་ལ་ཆོས་རིག་ལས་ཁུངས་ནས་མཐུན་འགྱུར་གནང་ཐབས་དགོས་རྒྱུ།
༤༽ རྒྱ་གར་གཞུང་ལ་འབྲེལ་ལམ་གྱིས་དགོན་སྡེ་གྲྭ་ཚང་སོ་སོའི་སློབ་གཉེར་བའི་ཕྱག་འཁྱེར་ཚད་ལྡན་ངོས་འཛིན་ཡོང་ཐབས་ལ་མུ་མཐུད་འབད་བརྩོན་གནང་གལ།
༥༽དགེ་འདུན་པའི་ནང་དུ་ཁྱིམ་པ་སུན་འབྱིན་གྱི་ལས་བྱེད་མཁན་བྱུང་ཚེ། འབྲེལ་ཡོད་དགོན་སྡེ་གྲྭ་ཚང་སོ་སོ་ནས་དམ་ཆོས་འདུལ་བ་དང་མཐུན་པར་དམ་དོན་གནང་གལ།
༦༽ དགོན་སྡེ་གྲྭ་ཚང་ཁག་ལ་གྲྭ་རྒྱུན་གྱི་དཀའ་ངལ་སེལ་ཐབས་ལ། གྲྭ་བཙུན་སློབ་མཐར་ཕྱིན་པ་རྣམས་ལ་བདག་སྐྱོང་གནང་དགོས་པ་དང༌། སློབ་གཉེར་བ་རྣམས་ལ་དེང་དུས་དང་འཚམ་པའི་སློབ་སྦྱོང་སྤྲོད་ཐབས་གནང་གལ།
༧༽རིས་མེད་གྲྭ་བཙུན་སྔགས་གསུམ་རྣམས་མི་ཚེ་ཧྲིལ་པོར་ཐོས་བསམ་སྒོམ་གསུམ་གནང་དང་གནང་མུས་ལ་བརྟེན། སྐུ་གཟུགས་འཕྲོད་བསྟེན་ཐད་འཐུས་ཤོར་མེད་པ་གནང་རྒྱུ་གལ་ཆེན་ལ་སོང༌། དགོན་སྡེ་གྲྭ་ཚང་ཁག་གི་སྤྱི་ཐབ་ཀྱི་ཞལ་ལག་གཙོ་བོར་གྱུར་པའི་འཕྲོད་བསྟེན་གནང་ཕྱོགས་ཐད་ལམ་སྟོན་གནང་གལ།
༨༽ རང་གཞུང་ཆོས་རིག་ལས་ཁུངས་ནས་རིས་མེད་ལྟ་གྲུབ་བགྲོ་གླེང་སོགས་ལས་གཞི་མང་པོ་ཞིག་སྤེལ་མུས་ལ་བསྔགས་བརྗོད་དང༌། འབྱུང་འགྱུར་ཡང་ཆོས་འབྱུང་ལོ་རྒྱུས་ཀྱི་སྐོར་ལ་བགྲོ་གླེང་གོ་སྒྲིག་གནང་རྒྱུ། གཞན་ཡང་ཆོས་རིག་གི་ལས་གཞི་ཁག་གི་ནང་དགོན་སྡེ་གྲྭ་ཚང་ཆེ་ཆུང་ཚང་མ་ལ་གོ་སྐབས་འདྲ་མཉམ་གནང་རྒྱུ།
༩༽གཞུང་འབྲེལ་མཆོད་འབུལ་སྨོན་ལམ་གྱི་ཞལ་འདོན་ནང་རིས་སུ་མ་ཆད་པའི་ཆོས་ལུགས་དང་ཆོས་བརྒྱུད་ཚང་མས་འདོན་རྒྱུ་ཡོད་པ་ཞིག་ཕྱོགས་བསྒྲིགས་བྱེད་ཐུབ་ན་དགེ་མཚན་ཆེ།
༡༠༽ ཆོས་རིག་ལས་ཁུངས་ཀྱིས་གོ་སྒྲིག་ཞུ་བཞིན་པའི་རིས་མེད་བགྲོ་གླེང་དེར་དཀའ་ངལ་མེད་ན། སྐབས་རེར་བལ་ཡུལ་དུ་ཚོགས་ཐུབ་ཐབས་གནང་གལ།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
