ཡུ་རོབ་གྲོས་ཚོགས་ཀྱི་ཆབ་སྲིད་ཚོགས་པ་བཞི་ལས་གྲུབ་པའི་ཡུ་རོབ་གྲོས་ཚོགས་འཐུས་མི་ ༣༤ ཡིས་རྒྱ་ནག་གཞུང་གིས་སྐུའི་ཡང་སྲིད་ཀྱི་གནད་དོན་ལ་ཐེ་ཇུས་བྱེད་མཚམས་འཇོག་དགོས་པའི་སྐུལ་མ་ནན་ཏན་བྱས་འདུག
ཁ་སང་ཕྱི་ཚེས་ ༤ ཉིན་ཡུ་རོབ་གྲོས་ཚོགས་ཀྱི་ཆབ་སྲིད་ཚོགས་པ་བཞི་སྟེ། (EPP དང་། S&D, Renew Europe Greens/EFA) བཅས་ལས་གྲུབ་པའི་ཡུ་རོབ་གྲོས་ཚོགས་ཀྱི་འཐུས་མི་ ༣༤ ཡིས་མཚན་རྟགས་བཀོད་པའི་འབོད་སྐུལ་ཡིག་ཆ་ཞིག་སྤེལ་བའི་ཁྲོད། རྒྱ་ནག་གཞུང་གིས་བོད་ཀྱི་ཆོས་དད་རང་མོས་ཀྱི་ཐོབ་ཐང་ལ་བརྩི་འཇོག་དང་། ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་ལ་ཐེ་ཇུས་བྱེད་མཚམས་འཇོག་དགོས་པའི་རེ་སྐུལ་ཞུས་འདུག
རེ་སྐུལ་ཡིག་ཆ་དེ་ནི་ (EUObserver) ཞེས་པའི་དྲ་ཚོམས་སུ་སྤེལ་ཡོད་ཅིང་། དབུས་བོད་མིའི་སྒྲིག་འཛུགས་ཀྱི་དྲ་རྒྱ་ལྟར་ན། དེ་ནི་ཡུ་རོབ་གྲོས་ཚོགས་ཀྱི་ཆབ་སྲིད་ཚོགས་པའི་ངོས་ནས་༸གོང་ས་མཆོག་ལ་སྤྱི་མཐུན་གྱི་རྒྱབ་སྐྱོར་ཡོད་པ་མཚོན་གྱི་ཡོད། ༸མགོན་པོ་མཆོག་དང་ཡུ་རོབ་གྲོས་ཚོགས་བར་ཡུན་རིང་འབྲེལ་བ་ཡོད་ལ། ༸མགོན་པོ་མཆོག་ཡུ་རོབ་གྲོས་ཚོགས་སུ་ཐེངས་བདུན་ཆིབས་བསྒྱུར་བསྐྱངས་ཡོད་པ་མ་ཟད། ཡུ་རོབ་ཀྱི་སྲིད་འཛིན་དང་གྲོས་ཚོགས་འཐུས་མི་རིམ་བྱོན་དང་མཇལ་འཕྲད་གནང་ཡོད། ཅེས་གསལ་འདུག
ཡང་དབུས་བོད་མིའི་སྒྲིག་འཛུགས་ཀྱི་དབྱིན་བོད་གཉིས་ཀྱི་དྲ་རྒྱ་ལྟར་ན། ཡུ་རོབ་གྲོས་ཚོགས་འཐུས་མིའི་སྤྱི་མཐུན་གྱི་ལངས་ཕྱོགས་འདི་ནི་ཡུ་རོབ་མཉམ་འབྲེལ་ནང་རྒྱ་ནག་གིས་བོད་ལ་དྲག་གནོན་ཇེ་ཆེར་བཏང་བའི་རྐྱེན་གྱིས་འཛམ་གླིང་གི་ས་ཁམས་ཆབ་སྲིད་དང་། ཆོས་ལུགས་བཅས་ལ་གནོན་ཤུགས་ཐེབས་བཞིན་པར་བརྡ་ལན་ཞིག་ཡིན། དེ་མ་ཟད་ཡུ་རོབ་གྲོས་ཚོགས་ཀྱི་དེ་སྔོན་བོད་ཀྱི་ཆོས་ཕྱོགས་ཀྱི་གནད་དོན་ཐད་རྒྱ་ནག་གི་ཐེ་བྱུས་མེད་པའི་གྲོས་ཆོད་དང་། མང་གཙོའི་རྒྱལ་ཁབ་གཞན་གྱིས་བསྒྲགས་གཏམ་བཏོན་པ་བཅས་རྒྱལ་སྤྱིའི་འབད་རྩོལ་དང་མཐུན་གྱི་ཡོད། ཅེས་གསལ་འདུག
དེ་བཞིན། ཟླ་འདིའི་ཕྱི་ཚེས་ ༣ ཉིན་རྒྱ་གར་དབུས་བློན་ཆེན་ཀེ་རན་ར་ཅི་ཇོའུ་ (Kiren Rijiju) ལགས་ཀྱིས། ༧གོང་ས་མཆོག་གི་ཡང་སྲིད་ཀྱི་འགན་དབང་དེ་༧གོང་ས་མཆོག་སྐུ་སྒེར་ལ་ཡོད་ཅེས་གསལ་བོར་གསུངས་ཡོད་པ་མ་ཟད། རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་རྒྱ་གར་གྱིས་རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ལ་ཐད་ཇུས་བྱེད་པར་དགག་པ་ཡོད་པའི་གནས་ཚུལ་སྤེལ་ཡོད།
ཉེ་ལམ་དྷ་སར་འཚོགས་པའི་བོད་མིའི་ཆོས་ཚོགས་ཐེངས་བཅོ་ལྔ་བའི་སྟེང་༧གོང་ས་རྒྱལ་བ་རིན་པོ་ཆེ་མཆོག་ནས། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང་། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པའི་དབུས། ༧རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་བྱུས་མི་ཆོག་པའི་གནས་བབ་ལ་འགྱུར་བ་གང་ཡང་མེད། ཅེས་གསུངས་ཡོད། ཕྱི་ལོ་ ༢༠༡༩ ལོའི་ཨ་རིའི་བོད་དོན་དམིབས་བསལ་ཁྲིམས་འཆར་ཞིག་གཏན་འབེབས་བྱས་པའི་ནང་དུའང་། ༧གོང་ས་མཆོག་གི་ཡང་སྲིད་ནི་ནང་པའི་རྗེས་འབྲངས་པ་དང་༧གོང་ས་མཆོག་སྐུ་སྒེར་གྱི་ལམ་སྟོན་འོག་ནས་འགྲོ་དགོས་པ་ལས་སྲིད་གཞུང་ཞིག་གིས་ཐེ་གཏོགས་བྱ་མི་ཆོག་པ་དང་། གཉིས། མ་འོངས་པའི་༧གོང་ས་མཆོག་གི་ཡང་སྲིད་ཐད་ཐེ་གཏོགས་བྱེད་མཁན་རྒྱ་ནག་གི་མགོ་འཁྲིད་ཚོར་ཉེས་ཆད་གཅད་རྒྱུ་ཡིན་པ་སོགས་གསལ་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
