ལ་དྭགས་གླེ་རུ་ཆར་ཤུགས་ཆེ་བའི་རྐྱེན་གྱིས་ཆིབས་བསྒྱུར་ཕྱིར་འགྱངས་གནང་།

ལ་དྭགས་སུ་ཆར་པ་ཤུགས་ཆེན་འབབ་ཀྱིན་ཡོད་པའི་རྐྱེན་གྱིས་༧གོང་ས་༧རྒྱལ་བ་རིན་པོ་ཆེ་མཆོག་ལྡི་ལིར་ཆིབས་ཐོན་མཛད་ཐུབ་མེད་པ་རེད།

དེ་རིང་ཕྱི་ཚེས་ ༢༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་ཀྱི་རྒྱལ་ས་གླེ་ནས་ལྡི་ལིར་ཆིབས་བསྒྱུར་བཀའ་དྲིན་སྐྱོང་འཆར་ཡོད་ཀྱང་། གླེ་ཁུལ་དུ་ཆར་ཞོད་ཆེ་བའི་རྐྱེན་གྱིས་ཆིབས་ཐོན་མཛད་མ་ཐུབ་པར་ཕྱིར་འགྱངས་གནང་དགོས་བྱུང་འདུག

ཁ་སང་༧གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་སུ་གསུང་འཕྲིན་ཞིག་གནང་བའི་ནང་། སང་ཉིན་ངོས་རང་དྷ་རམ་ས་ལར་མ་ལོག་པའི་སྔོན་དུ་ངས་ཁྱེད་རྣམ་པ་དང་ལས་རོགས་ཚང་མས་བདུན་ཕྲག་དྲུག་རིང་ལ་སྣེ་ལེན་གཟབ་རྒྱས་གནང་བར་བཀའ་དྲིན་སྙིང་ནས་ཞུ་རྒྱུ་ཡིན། ཁྱེད་རྣམ་པས་མཁྱེན་གསལ་ལྟར་ངོས་རང་ལོ་མང་རིང་ལ་རྒྱུན་པར་ལ་དྭགས་ལ་ཡོང་བཞིན་ཡོད། དཔལ་འབྱོར་དང་ཤེས་ཡོན་སོགས་འཕེལ་རྒྱས་འགྲོ་བཞིན་པ་མཐོང་ཐོས་སུ་གྱུར་བ་ངོ་མཚར་ཆེན་པོ་རེད། ཅེས་གསུངས་འདུག

ཡང་མགོན་པོ་གང་ཉིད་ཀྱིས། ངོས་ནས་ལ་དྭགས་མི་མང་གི་དད་པ་དང་དམ་ཚིག་ལ་བསྔགས་བརྗོད་ཞུ་ཡི་ཡོད། ངོས་རང་སྟོན་པ་བཀའ་དྲིན་ཅན་གྱི་རྗེས་འཇུག་པ་ཞིག་ཡིན། ཁོང་གི་བསླབ་བྱའི་སྙིང་བཅུད་ནི་འཚེ་མེད་ཞི་བ་དང་གཞན་ལ་གནོད་འཚེ་མི་བྱེད་པར་བྱམས་དང་སྙིང་རྗེས་འགྲོ་བ་མི་གཞན་ལ་བརྩེ་བ་དང་གཅེས་སྐྱོང་བྱ་དགོས་ཞེས་གསུངས་ཡོད་སྟབས། ངོས་ནས་ཁྱེད་ཅག་གིས་གཞི་རྩའི་འགྲོ་བ་མིའི་བྱམས་བརྩེའི་ཐོག་ནས་མི་རིགས་ཀྱི་བདེ་རྩར་དམིགས་པའི་ལས་དོན་གཉེར་དགོས་པའི་སྐུལ་མ་གཏོང་གིན་ཡོད། ཅེས་གསུངས་འདུག

དགའ་ལྡན་ཕོ་བྲང་ཡིག་ཚང་གི་དྲ་ལམ་དུ་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཕྱི་ཟླ་ ༩ ཚེས་ ༡༠ བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཁའི་སྐྱིད་སྡུག་ཚོགས་པ་དང་ཨི་ཐ་ཁའི་རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་། རྒྱལ་སྤྱིའི་བོད་ཀྱི་གཞོན་སྐྱེས་བཅས་ནས་བརྟན་བཞུགས་བསྟར་འབུལ་དང་། ཕྱི་ཟླ་ ༩ ཚེས་ ༢༠ ཉིན་ལྷོ་ཤར་ཨེ་ཤི་ཡའི་ནང་པའི་རྒྱལ་ཁབ་ཁག་དང་ཀོ་རི་ཡའི་ནང་པ་རྣམས་ནས་བརྟན་བཞུགས་བསྟར་འབུལ་ཞུ་རྒྱུ། ཕྱི་ཟླ་ ༡༠ ཚེས་ ༣ ཉིན་ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་ཆོས་འབྲེལ་བཀའ་དྲིན་བསྩལ་རྒྱུ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།