ཨ་ཉག་སེང་སྒྲ་གཙོ་བྱས་པའི་བོད་དང་ཧོང་ཀོང་གི་རང་དབང་དང་དམངས་གཙོ། འགྲོ་བ་མིའི་ཐོབ་ཐང་སོགས་ཀྱི་ཆེད་དུ་ལས་འགུལ་སྤེལ་མཁན་གསུམ་ལ་ཕྱི་ལོ་ ༢༠༢༥ ལོའི་བོད་རང་བཙན་སློབ་ཕྲུག་ཚོགས་པའི་ལྷག་དཀར་གཟེངས་རྟགས་འབུལ་གཏན་ཁེལ།
བོད་རང་བཙན་སློབ་ཕྲུག་ཚོགས་པས་དྲ་ཐོག་ཏུ་སྤེལ་བའི་གནས་ཚུལ་ལྟར་ན། ལོ་ལྟར་ཕུལ་སྲོལ་ཡོད་པའི་བོད་རང་བཙན་སློབ་ཕྲུག་ཚོགས་པའི་ཕྱི་ལོ་ ༢༠༢༥ ལོའི་ལྷག་དཀར་གཟེངས་རྟགས་དེ། རྒྱ་ནག་གི་བཙོན་འཇུག་འོག་ཡོད་པའི་བོད་ཀྱི་ཁོར་ཡུག་སྲུང་སྐྱོབ་ལས་འགུལ་བ་ཨ་ཉག་སེང་སྒྲ་ལགས་དང་། ཧྥ་རན་སི་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བཀྲ་ཤིས་དབྱངས་ཅན་ལགས། ཧོང་ཀོང་གི་དམངས་གཙོའི་ལས་འགུལ་བ་ཨན་ནཱ་ (Anna Kwok) ལགས་བཅས་སུ་འབུལ་གཏན་ཁེལ་ཡོད་འདུག
བོད་རང་བཙན་སློབ་ཕྲུག་ཚོགས་པའི་ལྷག་དཀར་གཟེངས་རྟགས་དེ། བོད་མིའི་སྤྱི་ཚོགས་སུ་ཞབས་འདེགས་སྒྲུབ་མཁན་གྱི་ཚོགས་སྡེ་ཁག་དང་མི་སྒེར་གྱི་སྙིང་སྟོབས་དང་། ལྷག་བསམ་སོགས་ལ་ཆེ་བསྟོད་མཚོན་སླད་འབུལ་བཞིན་ཡོད་ཅིང་། དམིགས་བསལ་འདི་ལོ་ནི་བོད་རང་བཙན་སློབ་ཕྲུག་ཚོགས་པ་དབུ་བརྙེས་ནས་ལོ་ངོ་ ༣༡ འཁོར་གྱི་ཡོད་ཅིང་། ཟླ་འདིའི་ཕྱི་ཚེས་ ༣༠ ཉིན་ནེའུ་ཡོག་ནེའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་བོད་རང་བཙན་སློབ་ཕྲུག་ཚོགས་པའི་ལོངས་ཤོག་མཚན་ཚོགས་ཀྱི་སྟེང་ནས། བོད་ཀྱི་ཁོར་ཡུག་སྲུང་སྐྱོབ་ལས་འགུལ་བ་ཨ་ཉག་སེང་སྒྲ་ལགས་དང་ཧྥ་རན་སི་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་དབྱངས་ཅན་ལགས། ཧོང་ཀོང་གི་དམངས་གཙོའི་ལས་འགུལ་བ་ཨན་ནཱ་ (Anna Kwok) ལགས་བཅས་སུ་ཕྱི་ལོ་ ༢༠༢༥ ལོའི་ལྷག་དཀར་གཟེངས་རྟགས་དེ་འབུལ་རྒྱུ་ཡིན་འདུག
བོད་ཀྱི་ཁོར་ཡུག་སྲུང་སྐྱོབ་ལས་འགུལ་བ་དང་ལྐོག་ཟ་རུལ་སུངས་ཐེར་འདོན་པ་ཨ་ཉག་སེང་སྒྲ་ལགས་ཀྱིས་ས་གནས་སྲིད་གཞུང་གི་དཔོན་རིགས་ཚོས་དབང་ཆ་ལོག་སྤྱོད་དང་ལྐོག་ཟ་རུལ་སུངས། ཁྲིམས་འགལ་གྱིས་རང་བྱུང་གཏེར་ཁ་སྔོག་འདོན་དང་རྩ་ཆེའི་རི་སྐྱེས་སེམས་ཅན་རྔོན་པ་བཅས་ལ་ངོ་རྒོལ་གྱི་ལས་འགུལ་སྤེལ་ནས་ས་གནས་འབྲོག་པ་མང་ཚོགས་ཀྱིས་ཁོང་ལ་རྒྱབ་སྐྱོར་དང་དགའ་མགུ་ཡི་རངས་བྱེད་ས་ཞིག་ཏུ་གྱུར་རྗེས། ཕྱི་ལོ་ ༢༠༡༤ ལོར་རྒྱ་ནག་གཞུང་གིས་ཨ་ཉག་སེང་སྒྲས་ཁྲིམས་འགལ་བྱས་ཡོད་ཚུལ་བརྗོད་ནས་འཛིན་བཟུང་གིས་ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཐག་བཅད། ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་ཟི་ལིང་ཏུང་ཁྲན་ (东川) བཙོན་ཁང་ནས་ཀློད་གྲོལ་བཏང་། ཕྱི་ལོ་ ༢༠༡༨ ལོར་རྒྱ་གཞུང་གིས་་ཚོགས་དཀྲུག་རྐྱེན་བཟོས་མིང་འོག་ཨ་ཉག་སེང་སྒྲ་ལགས་བསྐྱར་དུ་འཛིན་བཟུང་བྱས། ཕྱི་ལོ་ ༢༠༡༨ ལོ་མཇུག་དང་ ༢༠༡༩ ལོ་མགོར་ཨ་ཉག་སེང་སྒྲའི་བཟའ་ཟླ་གཡང་སྐྱིད་དང་ཁྲིམས་རྩོད་པ་ལིན་ཆི་ལི་སོགས་ཀྱིས་ཁྲིམས་གཏུག་རིམ་པ་བྱས་ནའང་། ཕྱི་ལོ་ ༢༠༡༩ ལོའི་ཟླ་ ༡༢ ཚེས་ ༦ ཉིན་ཨ་ཉག་སེང་སྒྲ་ལགས་སུ་དཀྲུག་རྐྱེན་བསླངས་བ་དང་སྤྱི་ཚོགས་སྒྲིག་གཞིར་གཏོར་བཤིག་བཏང་བའི་འདུ་འཛོམས་བྱས་པ་སོགས་ཀྱི་ཉེས་མིང་འོག ཨ་ཉ་སེང་སྒྲ་ལགས་སུ་ལོ་ ༧ བཙོན་འཇུག་ཁྲིམས་ཆད་བཅད།
ཧྥ་རན་སིའི་སློབ་རང་བཙན་སློབ་ཕྲུག་ཚོགས་པའི་དྲ་རྒྱར་གཞིགས་ན། བཀྲ་ཤིས་དབྱངས་ཅན་ལགས་ནི་ད་ལྟ་རང་ལོ་བཅུ་དྲུག་ཡིན་ཞིང་། ཕྱི་ལོ་ ༢༠༢༤ ལོ་ནས་དབྱངས་ཅན་ལགས་ཀྱིས་ཧྥ་རན་སིའི་ (Guimet) འགྲེམས་སྟོན་ཁང་གིས་བོད་ཀྱི་ཚབ་ཏུ་ཧི་མ་ལ་ཡའི་འཇིག་རྟེན་ཞེས་བྲིས་ཡོད་པ་བཅོས་བསྒྱུར་དགོས་པའི་འབོད་སྐུལ་དང་ཞུ་གཏུག་སོགས་ཀྱི་ལས་འགུལ་ཐེངས་ ༢༦ ཙམ་སྤེལ་ཡོད་པའི་ཁར། བཀྲ་ཤིས་དབྱངས་ཅན་ལགས་ལོ་ན་བཅུ་གསུམ་བཅུ་བཞིའི་སྐབས་ནས་གསུམ་བཅུའི་དྲན་གྱི་གཙོས་བོད་དོན་དང་འབྲེལ་བའི་ལས་འགུལ་ནང་ཞུགས་ཏེ། འདས་ལོ་ནས་ཧྥ་རན་སིའི་བོད་རང་བཙན་སློབ་ཕྲུག་ཚོགས་པའི་མགྲིན་ཚབ་པ་དང་བོད་རིགས་ཚོགས་པ་ཁག་གི་བོད་དོན་དང་འབྲེལ་བའི་ལས་འགུལ་སོགས་ཀྱི་སྐབས་སུའང་ཧྥ་སྐད་ཀྱི་ལམ་ནས་གཏམ་བཤད་སྤེལ་བ་སོགས་བོད་དོན་འཐབ་རྩོད་དང་འབྲེལ་བའི་ལས་ཀ་མང་པོ་ཞིག་བྱས་དང་བྱེད་བཞིན་པ་ཡིན་འདུག
ཧོང་ཀོང་གི་དམངས་གཙོའི་ལས་འགུལ་བ་ཨན་ནཱ་ལགས་ནི་ད་ལྟ་རང་ལོ་ཉེར་བརྒྱད་ཡིན་པ་དང་། ཕྱི་ལོ་ ༢༠༡༩ ལོར་ཧོང་ཀོང་ནང་ཉེས་ཅན་རྒྱ་ནག་ལ་རྩིས་སྤྲོད་དང་ཕྱི་ལོ་ ༢༠༢༠ ལོར་རྒྱལ་ཁབ་བདེ་འཇགས་ཟེར་བའི་ཁྲིམས་ལག་བསྟར་བྱས་སྟབས། རྒྱ་ནག་གི་གནོན་ཤུགས་འོག་ཧོང་ཀོང་སྲིད་གཞུང་གིས་ཧོང་ཀོང་གི་དམངས་གཙོ་དང་འགྲོ་བ་མིའི་ཐོབ་ཐང་གི་ལས་འགུལ་བ་སོགས་འཛིན་བཟུང་བྱས་ཡོད། དེར་བརྟེན། ཨན་ནཱ་ལགས་ཀྱིས་ཕྱི་ལོ་ ༢༠༡༩ ལོ་ནས་ཧོང་ཀོང་ནང་དམངས་གཙོ་དང་སྨྲ་བརྗོད་རང་དབང་། གཞུང་གི་སྲིད་ཇུས་གཏན་འབེབས་ཁྲོད་མང་ཚོགས་ཀྱི་བསམ་ཚུལ་དགོས་གལ་ཆེ་བ་སོགས་བརྗོད་ནས་ལས་འགུལ་སྤེལ་ཡོད། ཕྱི་ལོ་ ༢༠༢༣ ལོར་རྒྱ་ནག་དམར་ཤོག་ཚོགས་པའི་རྒྱུགས་ཁྱི་ལྟ་བུའི་ཧོང་ཀོང་གི་སྤྱི་ཁྱབ་ཇོན་ལི་ཟེར་བ་ཨ་རིར་ (APEC) ཚོགས་འདུར་མཉམ་ཞུགས་བྱེད་པར་བཀག་སྡོམ་དགོས་པའི་ངོ་རྒོལ་ལས་འགུལ་སྤེལ་བར་བརྟེན། ཧོང་ཀོང་སྲིད་གཞུང་གིས་ཁོང་མོ་ཧོང་ཀོང་གི་རྒྱལ་སྲིད་བདེ་འཇགས་ལ་ཉེན་ཁ་ཆེ་ཟེར་བའི་ནག་ཉེས་ཀྱི་ཁོངས་གཏོགས་སུ་བཅུག ཕྱི་ལོ་ ༢༠༢༤ ལོར་ཁོང་མོའི་ཧོང་ཀོང་མི་སེར་གྱི་ཐོབ་ཐང་ལག་འཁྱེར་ཕྱིར་བསྡུ་བྱས། ཁོང་མོའི་ལས་འགུལ་གྱི་ཤུགས་རྐྱེན་འོག་ཁོང་མོའི་པ་ལགས་དང་གཅེན་པོི་སོགས་འཛིན་བཟུང་བཀག་ཉར་ཐེངས་མང་རིང་བྱས་མྱོང་ཡོད་འདུག
