དེ་རིང་བོད་རང་བཙན་སློབ་ཕྲུག་ཚོགས་པས་ཕྱི་ལོ་ ༢༠༢༥ ལོའི་གསར་འགོད་རིག་པའི་ལྷག་དཀར་གཟེངས་རྟགས་དེ། ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ལ་འབུལ་གཏན་ཁེལ་བ་ཡོངས་བསྒྲགས་བྱས་འདུག
བོད་རང་བཙན་སློབ་ཕྲུག་ཚོགས་པས་དྲ་ཐོག་ཏུ་གནས་ཚུལ་སྤེལ་བར་གཞིགས་ན། བོད་རང་བཙན་སློབ་ཕྲུག་ཚོགས་པའི་ཕྱི་ལོ་ ༢༠༢༥ ལོའི་ལྷག་དཀར་གཟེངས་རྟགས་ཐོབ་མཁན་གྱི་ཁྲོད་དུ། ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་དང་། རྒྱ་ནག་གི་བཙོན་འཇུག་འོག་ཡོད་པའི་བོད་ཀྱི་ཁོར་ཡུག་སྲུང་སྐྱོབ་ལས་འགུལ་བ་ཨ་ཉག་སེང་སྒྲ་ལགས་དང་། ཧྥ་རན་སི་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བཀྲ་ཤིས་དབྱངས་ཅན་ལགས། ཧོང་ཀོང་གི་དམངས་གཙོའི་ལས་འགུལ་བ་ཨན་ནཱ་ (Anna Kwok) ལགས་བཅས་ཁྱོན་ཚོགས་སྡེ་གཉིས་དང་མི་སྒེར་གསུམ་བཅས་ཡོད་པ་རེད།
ཕྱི་ལོ་ ༢༠༢༥ ལོ་ནི་བོད་རང་བཙན་སློབ་ཕྲུག་ཚོགས་པ་དབུ་བརྙེས་ནས་ལོ་ངོ་ ༣༡ འཁོར་བའི་ལོ་ཡིན་ཞིང་། ཟླ་འདིའི་ཕྱི་ཚེས་ ༣༠ ཉིན་ནེའུ་ཡོག་ནེའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་བོད་རང་བཙན་སློབ་ཕྲུག་ཚོགས་པའི་ལོངས་ཤོག་མཚན་འཛོམས་ཀྱི་སྟེང་ནས། ཕྱི་ལོ་ ༢༠༢༥ ལོའི་ལྷག་དཀར་གཟེངས་རྟགས་དེ་ཚོགས་སྒེར་ལྔ་ལ་འབུལ་རྒྱུ་ཡིན་འདུག་ཅིང་། ལྷག་དཀར་གཟེངས་རྟགས་དེ། བོད་མིའི་སྤྱི་ཚོགས་སུ་ཞབས་འདེགས་སྒྲུབ་མཁན་གྱི་ཚོགས་སྡེ་ཁག་དང་མི་སྒེར་གྱི་སྙིང་སྟོབས་དང་། ལྷག་བསམ་སོགས་ལ་ཆེ་བསྟོད་མཚོན་སླད་འབུལ་བཞིན་ཡོད་འདུག
ཨ་རིའི་རླུང་འཕྲིན་ཁང་བོད་སྐད་སྡེ་ཚན་ནི་ཕྱི་ལོ་ ༡༩༩༡ ལོར་དབུ་བརྙེས་པ་དང་། ཨེ་ཤ་ཡ་རང་དབང་རླུང་འཕྲིན་ཁང་བོད་སྐད་སྡེ་ཚན་ནི་ ༡༩༩༦ ལོར་དབུ་བརྙེས། རླུང་འཕྲིན་ཁང་འདི་གཉིས་དབུ་ཚུགས་པ་ནས་རང་དབང་ལྡན་པའི་གསར་འགྱུར་དང་གནས་ཚུལ་མཁོ་སྤྲོད་བྱ་རྒྱུ་དང་། ལྷག་པར་དུ་བོད་ནང་གི་བོད་མི་རྣམས་ལ་ཕྱི་ཕྱོགས་ཀྱི་གནས་ཚུལ་དང་། འཛམ་གླིང་གི་གནས་བབ། བཙན་བྱོལ་བོད་མིའི་གནས་ཚུལ་སོགས་མཁོ་སྤྲོད་བྱེད་ཀྱི་ཡོད་པ་རེད།
ཕྱི་ལོ་ ༢༠༢༤ ལོའི་ལྷག་དཀར་གཟེངས་རྟགས་ཐོབ་མཁན་གྱི་ཁོངས་སུ། ཨ་རི་གྲོང་ཁྱེར་ཧྥི་ལ་ཌེལ་ཧྥི་ཡཱ་ནང་དུ་བོད་དོན་ཞུ་གཏུག་དང་གོ་རྟོགས་ཀྱི་ལས་འགུལ་བསྟུད་མར་སྤེལ་མཁན་ཐུབ་བསྟན་ཆོས་ཉིད་ལགས་དང་། གློག་སྡོང་དཔའ་མོ་ཞེས་ཨ་རི་དང་ཧྥ་རན་སི་སོགས་ནས་གློག་སྡོང་ལ་འཐམ་འཁྱིག་གིས་བོད་ཀྱི་རྒྱལ་དར་སྒྲེང་འཕྱར་བྱས་ཏེ་རྒྱ་ནག་གི་སྲིད་འཛིན་ཞི་ཅིན་ཕིན་ལ་ལས་འགུལ་གྱི་རྣམ་པ་གསར་བའི་ཐོག་ནས་ངོ་རྒོལ་གནང་མཁན་ཚེ་ལྷ་རྫོགས་སངས་ལགས། རྒྱ་ནག་གི་ཆུ་མཛོད་གསར་རྒྱག་གི་ལས་གཞི་ལ་ཞི་བའི་ངོ་རྒོལ་གནང་མཁན་བོད་ཁམས་སྡེ་དགེ་མི་མང་བཅས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
