ཡ་མུ་ན་གཙང་པོ་ཤུགས་ཆེར་རྒྱས་རྐྱེན་ལྡི་ལིའི་བསམ་ཡས་གླིང་དང་བྷོ་དྷི་ཝི་ཧར་ས་གནས་ཀྱི་བོད་མིའི་སྡོད་ཁང་དང་མགྲོན་ཁང་བཅས་སུ་ཆུ་བླུགས་ཏེ་མི་མང་པོ་གནས་སྤོར་དང་ཅ་དངོས་ཕྱི་ལོགས་སུ་འདོན་བཞིན་ཡོད་འདུག
ཉིན་འདི་ཚོར་རྒྱ་གར་བྱང་ཤར་གྱི་མངའ་སྡེ་མང་པོ་ཞིག་ཏུ་ཆར་ཞོད་ཆེན་པོ་བབས་ཏེ། གཙང་ཆུ་རྒྱས་པ་དང་རི་ཉིལ་བ། ལམ་དང་ཟམ་པ་ཆད་པ་སོགས་ཀྱི་གནས་ཚུལ་མང་པོ་འབྱུང་བཞིན་ཡོད་པ་ལྟར། ཡ་མུ་ནཱ་གཙང་པོ་ཤུགས་ཆེན་པོ་རྒྱས་ཏེ་རྒྱ་གར་རྒྱལ་ས་ལྡི་ལི་གྲོང་ཁྱེར་གྱི་ས་ཁུལ་མང་པོར་ཆུའི་དཀའ་ངལ་ཤུགས་ཆེན་འཕྲད་བཞིན་ཡོད་ཅིང་། གཙང་འགྲམ་གྱི་ལྡི་ལི་བོད་སྒར་བསམ་ཡས་གླིང་དང་ལ་དྭགས་ངྷ་རམ་ས་ལའི་བོད་མི་ཚོའི་སྡོད་ཁང་དང་ཁྲོམ་རའི་སྲང་ལམ་བཅས་ལ་ཆུ་བླུགས་ཏེ་དཀའ་ངལ་འཕྲད་བཞིན་ཡོད་འདུག
དེའི་སྐོར་ལ་འདི་གའི་གསར་འགོད་པས་ཁ་པར་བརྒྱུད་ལྡི་ལི་བསམ་ཡས་གླིང་ས་གནས་མགོ་འཛིན་རྡོ་རྗེ་ཚེ་རིང་ལགས་སུ་དྲིས་པར་ཁོང་གིས། དེང་སང་རྒྱ་གར་གྱི་ཧི་མ་ལ་ཡའི་རི་རྒྱུད་ཁག་དང་། པན་ཇེབ་མངའ་སྡེ། ཧཱ་རི་ཡ་ན་སོགས་སུ་ཆར་ཞོད་ཆེན་པོ་རྒྱག་བཞིན་ཡོད་པས། ས་ཁུལ་དེ་དག་ཏུ་ཡོད་པའི་ཆུ་རགས་ཀྱི་ཆུ་བསགས་པ་ཚད་ལས་བརྒལ་ཏེ་ཆུ་ཕྱིར་བཏང་ཡོད་རྐྱེན། རྒྱལ་ས་ལྡི་ལི་ཁུལ་དུ་ཆུ་བླུགས་ནས་ཉིན་ཁ་ཤས་འགྲོ་བཞིན་ཡོད་པ་རེད། ཁ་སང་ཕྱི་ཚེས་ ༣ ཉིན་གྱི་ཞོགས་པ་ཙམ་ལ་ཡ་མུ་ན་གཙང་པོའི་ཆུ་རྒྱས་ཡོད་པ་དང་། ཉིན་རྒྱབ་ནས་བཟུང་ཆུ་ཤུགས་ཆེན་པོ་རྒྱས་ཏེ། གཙང་འགྲམ་གྱི་མི་སྒེར་གྱི་སྡོད་ཁང་ཚང་མའི་ནང་ཆུ་བླུགས་ཡོད་པ་མ་ཟད། ཚུར་ཕྱོགས་ཀྱི་མགྲོན་ཁང་མང་པོ་ཞིག་གི་འོག་ཤོད་ནང་ཆུ་བླུགས་ནས་མི་རྣམས་གནས་སྤོར་བྱས་ཡོད་ཀྱང་། ཅ་དངོས་འབོར་ཆེན་འཕྲོ་བརླག་ཏུ་ཕྱིན་ཡོད་འདུག ལྡི་ལི་ཡ་མུ་ན་གཙང་པོའི་འགྲམ་གྱི་ས་ཁུལ་ཡོངས་སུ་ཆུ་བླུགས་ཡོད་པ་རེད།ཅེས་འགྲེལ་བརྗོད་གནང་བྱུང་།
ཡང་ཁོང་གིས། ད་ལྟ་ཡ་མུ་ན་གཙང་པོའི་ཉེ་འགྲམ་དུ་ཡོད་པའི་བསམ་ཡས་གླིང་གི་འོག་གི་ཁང་པ་དེ་དག་གི་ནང་ཆུ་བླུགས་ཏེ་མི་སྡོད་ཐུབ་ཀྱི་མི་འདུག་ལ།ཟ་ཁང་དང་། ཚོང་ཁང་། མགྲོན་ཁང་བཅས་བེད་སྤྱོད་མེད་པ་ཆགས་བསྡད་ཡོད། དེ་བཞིན་བྷོ་རྡི་བྷི་ཡ་རུ་ཁང་རྩེག་འོག་མ་ཕལ་ཆེ་བ་ཆུ་ནང་དུ་འཐིམས་བསྡད་ཡོད་འདུག ཡ་མུ་ནའི་གཙང་འགྲམ་ལས་སྒང་དུ་ཡོད་པའི་བོད་སྒར་བསམ་ཡས་གླིང་གི་ཚོང་ཁང་དང་མགྲོན་ཁང་དག་ནམ་རྒྱུན་བཞིན་འགྲོ་མུས་ཡོད། ད་ལྟ་དཀའ་ངལ་འཕྲད་ཀྱི་ཡོད་པ་རྣམས་ཀྱི་ཆེད་དུ་བསམ་ཡས་གླིང་བརྒྱ་དཔོན་གྱི་ཚོགས་ཁང་དང་། ཆུ་བཞི་སྒང་དྲུག་གི་ཚོགས་ཁང་གཉིས་གཡར་སྟེ་སྡོད་ས་གྲ་སྒྲིག་བྱས་ཡོད། དེ་བཞིན་རྒྱ་གར་གཞུང་གི་གནོད་ཐེབས་མྱུར་སྐྱོབ་ཚན་པས་གྲུ་གཟིངས་སོགས་ཀྱི་མྱུར་སྐྱོབ་བྱེད་དགོས་ཚེ་གྲ་སྒྲིག་ཡོད་པ་རེད། ད་ལྟའི་ཆར་ཆུ་རྒྱས་པ་ཉུང་དུ་འགྲོ་རྒྱུར་སྒུག་བསྡད་རྒྱུ་ལས་དམིགས་བསལ་ལས་ཀ་བྱ་ཐུབ་རྒྱུ་མི་འདུག ཅེས་འགྲེལ་བརྗོད་གནང་བྱུང་།
བྷོ་དྷི་ཝི་ཧར་ས་གནས་ཀྱི་གནས་སྟངས་སྐོར་ལ་བརྒྱ་དཔོན་བསྟན་འཛིན་དཔལ་ལྷ་ལགས་ཀྱིས་འདི་གའི་གསར་འགོད་པར། ཡ་མུ་ན་གཙང་པོ་ཤུགས་ཆེན་རྒྱས་ཏེ་ད་ལྟའི་ཆར་བྷོ་རྡི་བྷི་ཡ་ས་གནས་སུ་ཆུ་ཧྥི་ཊི་ལྔ་ལྷག་གིས་ཁེངས་ཡོད་རྐྱེན། བྷོ་རྡི་བྷི་ཡ་ཁུལ་དུའང་ཆུ་བླུགས་ཏེ་མི་མང་པོ་གནས་སྤོ་བྱེད་བཞིན་ཡོད་པ་དང་། ཁང་པ་ཐོག་རྩེག་དག་གི་འོག་ཤོད་ཀྱི་ཅ་དངོས་དག་ཀྱང་འོར་འདྲེན་བྱེད་ཀྱི་ཡོད། མི་མང་ལ་འཐུང་ཆུ་དང་གློག་གི་དཀའ་ངལ་འཕྲད་ཀྱི་ཡོད་ཀྱང་། དེ་རིང་ནས་ལྡི་ལི་བསམ་ཡས་གླིང་ས་གནས་མགོ་འཛིན་ལས་ཁུངས་གཙོས་ཚོགས་པ་ཁག་གིས་ཆུའི་མཐུན་སྦྱོར་དང་སྡོད་གནས་གྲ་སྒྲིག་ཡག་པོ་བྱས་འདུག རྒྱ་གར་གཞུང་ནས་ཀྱང་ཞོགས་ཟས་དང་གུང་ཟས་མཁོ་སྤྲོད་གནང་བྱུང་། དེ་བཞིན་ས་གནས་རྒྱ་གར་གཞུང་གིས་གྲུ་བཏང་ནས་ཅ་དངོས་སྐྱེལ་འདྲེན་རོགས་རམ་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།
རྒྱ་གར་བྱང་ཕྱོགས་ཁུལ་དུ་ཆར་དུས་ཡིན་པ་ལྟར། ཨུ་ཊར་ཁཱན་མངའ་སྡེ་དང་ཧི་མ་ཅལ། ཧཱ་རེ་ཡ་ནཱ། ལྡི་ལི་བཅས་སུ་ཆར་ཞོད་ཆེན་པོ་བབས་ཏེ། གཙང་པོ་རྒྱས་པ་དང་ཆུ་ལོག་བྱུང་བ། རི་ཉིལ་བ། ལམ་ཁ་དང་ཟམ་པ་ཆད་པ། ཁང་པ་བརྡིབས་པ་སོགས་ཀྱིས་མི་མང་པོ་རྐྱེན་ལམ་དུ་ཤོར་ཡོད་འདུག ད་བར་ཧི་མ་ཅལ་མངའ་སྡེ་གཅིག་པུའི་ནང་ཉུང་མཐར་མི་གྲངས་ ༣༤༠ རྐྱེན་འདས་དང་། མི་གྲངས་ ༣༠༡ ལ་རྨས་སྐྱོན། མི་གྲངས་ ༤༡ བོར་བརླག་ཏུ་གྱུར་ཡོད་པ་མ་ཟད། མངའ་སྡེ་གཞུང་ལ་ཧིན་སྒོར་ས་ཡ་ ༡༧༥༣ ལྷག་གི་གྱོང་གུད་ཐེབས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
