བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་གཉིས་པ་མགོ་འཛུགས་གནང་།  

ཉིན་གྲངས་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ནོར་བུ་གླིང་ག་དང་། ཟློས་གར་ཚོགས་པ། མཉམ་ལས་བཟོ་གྲྭ། མི་སྒེར་སོགས་ཀྱི་བརྩམས་ཆོས་འགྲེམས་སྤེལ་གྱིས་བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་གཉིས་པ་གནང་བཞིན་འདུག

དེ་རིང་སྔ་དྲོར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་གཉིས་པ་མགོ་འཛུགས་གནང་ཡོད་ཅིང་། སྒོ་འབྱེད་མཛད་སྒོའི་ཐོག་༧སྐྱབས་རྗེ་ཡང་སྟེང་རིན་པོ་ཆེ་མཆོག་གི་དབུས་དྷ་སའི་ཁུལ་གྱི་སྒྱུ་རྩལ་བ་དང་རྩོམ་པ་པོ། དོན་གཉེར་བ་ཅན་སོགས་ཕེབས་འདུག་ལ། འདི་ལོའི་ཚོང་ཁྲོམ་ཁག་ཉི་ཤུ་ལྷག་གིས་འགྲེམས་སྟོན་བྱེད་བཞིན་འདུག

སྐབས་དེར་ཡང་སྟེང་རིན་པོ་ཆེ་མཆོག་གིས་འདི་ག་གསར་ཁང་ལ། ད་ལན་གྱི་བཟོ་རིག་སྒྱུ་རྩལ་འགྲེམས་སྟོན་འདིའི་སྟེང་དོ་སྣང་བྱ་དགོས་པ་དང་མཇལ་དགོས་པ་མང་པོ་ཞིག་འདུག བཟོ་རིག་སྒྱུ་རྩལ་དེ་དག་མཐོང་སྐབས་རེ་རེ་ལ་དམིགས་བསལ་གྱི་ཁྱད་ཆོས་ཡོད་པ་ཚོར་ཡོང་གི་འདུག་ལ། མཐོང་གི་ཡང་འདུག དེ་བཞིན་བོད་དང་འབྲེལ་བའི་ཆོས་དང་རིག་གཞུང་གི་ནང་དོན། དེ་དང་དེ་ལྟ་བུའི་དོན་ག་རེ་ཡིན་ནའང་སྒྱུ་རྩལ་དང་། རི་མོ་སོགས་ཐབས་མི་འདྲ་བའི་སྒོ་ནས་མཚོན་པར་བྱས་ཏེ། དེང་དུས་ཀྱི་མི་ལ་ངོ་སྤྲོད་དང་རིག་གཞུང་དར་སྤེལ་གཏོང་བའི་ལས་གཞི་སྤེལ་བར་ཡག་པོ་འདུག ཅེས་གསུངས་སོང་།

དེའི་ཐད་ཆོས་རིག་ལས་ཁུངས་ཀྱི་རིག་གཞུང་ཚན་པའི་འགན་འཛིན་དོན་གྲུབ་ཚེ་རིང་ལགས་ཀྱིས་འདི་གའི་གསར་འགོད་པར། ཕྱི་ལོ་ ༢༠༢༤ ལོ་ནས་ཨ་རིའི་རོགས་ཚོགས་ཀྱི་དཔལ་འབྱོར་གྱི་མཐུན་འགྱུར་འོག བོད་པའི་སྒྱུ་རྩལ་བ་རྣམས་དང་སྒྱུ་རྩལ་བའི་ཚོགས་པ་དང་། མི་སྒེར་སོགས་ཀྱིས་བཏོན་པའི་སྒྱུ་རྩལ་བརྩམས་ཆོས་རྣམས་གཅིག་ནས་འགྲེམས་སྤེལ་ཐུབ་རྒྱུ་དང་། དྷ་ས་ལྟ་བུར་མཚོན་ན་ཕྱི་རྒྱལ་ཡུལ་གྲུ་ཀུན་ནས་སྐུ་མགྲོན་མང་པོ་ཞིག་ཕེབས་ཀྱི་ཡོད་སྟབས། བོད་པའི་རིག་གཞུང་དང་འབྲེལ་བའི་དངོས་རིགས་ངོ་སྤྲོད་བྱ་རྒྱུ། གཉིས་ནས་སྒྱུ་རྩལ་བ་དག་གིས་སོ་སོའི་བརྩམས་ཆོས་རྣམས་འགྲེམས་སྟོན་དང་སྦྲགས་ནས། ཁྱབ་བསྒྲགས་དང་འགྲེམས་སྤེལ་གྱི་སྡིངས་ཆ་ཞིག་བསྐྲུན་སླད་གོ་སྒྲིག་ཞུས་པ་ཞིག་རེད། ཅེས་བརྗོད་བྱུང་། 

ཡང་ཁོང་གིས།  འདི་ལོའི་བཟོ་རིག་སྒྱུ་རྩལ་འགྲེམས་སྟོན་ཁྲོད། ཚོང་ཁྲོམ་ཁག་ཉི་ཤུ་ཙམ་ཡོད་པའི་ཁྲོད། གཅིག་ཆོས་རིག་ལས་ཁུངས་ཀྱིས་གོ་སྟོན་སྐབས་རི་མོ་འགྲན་སྡུར་ཞིག་གོ་སྒྲིག་ཞུས་པའི་རི་མོ་རྣམས་འགྲེམས་སྟོན་བྱས་ཡོད་ལ། རི་མོ་དེ་དག་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་དང་འབྲེལ་བ་ཡོད་པ་རྐྱང་རྐྱང་རེད། དེ་བཞིན་ཚོང་ཁྲོམ་གཞན་རྣམས་ཀྱི་ཁྲོད་ནོར་བུ་གླིང་ག་དང་། ཟློས་གར་ཚོགས་པ། མཉམ་ལས་བཟོ་གྲྭ། མི་སྒེར་སོགས་མང་པོ་ཞིག་གིས། རང་རང་གིས་བརྩམས་ཆོས་དང་ཐོན་རྫས་རྣམས་འགྲེམས་སྤེལ་བྱེད་ཀྱི་ཡོད་པ་རེད། ཅེས་བརྗོད་བྱུང་།

འདས་ལོའི་ཕྱི་ཟླ་ ༦ ཚེས་ ༢༢ ནས་ཉིན་གྲངས་གཉིས་རིང་ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་སྒྱུ་རྩལ་བ་རྣམས་ལ་ཆེ་མཐོང་དང་སྒྱུ་རྩལ་ལས་རིགས་གོང་སྤེལ་གཏོང་སླད། བོད་ཀྱི་སྲོལ་རྒྱུན་དང་དེང་རབས་ཀྱི་བོད་ཀྱི་བཟོ་རིག་སྒྱུ་རྩལ་གྱི་འགྲེམས་སྟོན་ཐེངས་དང་པོ་དེ་གནང་བའི་ཁྲོད། བོད་སྨན་དང་། དཔེ་དེབ། ཆས་གོས། སྐུ་འདྲ། རུམ་གདན། ཐང་ག་སོགས་འགྲེམས་སྟོན་གནང་ཡོད་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།