ཕྱི་ཟླ་ ༡༠ ཚེས་ ༨ ཉིན་བོད་ཀྱི་གཞོན་ནུ་ལྷན་ཚོགས་དང་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པ། ཡུ་རོབ་བོད་རིགས་ཚོགས་པ་བཅས་ཀྱི་ཐུན་མོང་ནས་༸གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
དེ་རིང་ཕྱི་ཚེས་ ༢༩ ནས་ཉིན་གྲངས་བདུན་རིང་དྷ་ཤོད་བོད་ཕྲུག་ཁྱིམ་སྡེའི་ཚོགས་ཁང་དུ། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ ༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཚོགས་གཞོན་སྒྲོལ་མ་ཚེ་རིང་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག དེ་བཞིན་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་ཀརྨ་ཡེ་ཤེས་ལགས་དང་། འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས། བཀའ་ཟུར་བློ་བཟང་སྙན་གྲགས་ལགས། སྤྱི་འཐུས་རྒྱུན་ལས་ཁག་ཅིག གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ཐེངས་འདིའི་ཚོགས་ཆེན་ཐོག་རྒྱ་གར་དང་བལ་ཡུལ་ནས་ས་གནས་ཁག་མི་འདྲ་བ་ ༤༥ ནས་ཚོགས་མི་ ༢༠༠ ཙམ་མཉམ་ཞུགས་གནང་སོང་།
ཐེངས་འདིའི་ཚོགས་ཆེན་གྱི་སྐོར་ལ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་གསར་འགོད་པར། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞིའི་དགོངས་དོན་གྱི་ཐོག་ནས་ཚོགས་འདུ་གནད་འགག་ཆེ་ཤོས་དེ་ཆགས་ཡོད། ལོ་གསུམ་རེའི་མཚམས་སུ་ཚོགས་ཆེན་ནང་གྲོས་ཆོད་གཏན་འབེེབ་སོགས་ཀྱི་ལས་དོན་གལ་འགངས་ཆེ་ཤོས་ཤིག་ཆགས་ཡོད། ད་ལན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པའི་ནང་དུ་དབུས་སྤྱི་ཁྱབ་རྒྱུན་ལས་ཁང་གི་སྒྲིག་གཞིའི་དགོངས་དོན་ཐོག་ཁྱབ་ཁོངས་སུ་གཏོགས་པའི་ས་གནས་ཁག་ཚང་མར་གྲོས་གཞི་རྣམས་ཕུལ་ཟིན་པ་ཡིན། ཐེངས་འདིར་གྲོས་གཞི་དོན་ཚན་བརྒྱད་དང་ནང་གསེས་གསུམ་ཁྱོན་བཅུ་གཅིག་ཆགས་ཡོད། ད་ལན་གྱི་ཚོགས་ཆེན་ནང་སྒྲིག་གཞིི་བསྐྱར་བཅོས་གཙོ་བོ་ཚོགས་དུས་དང་འབྲེལ་བའི་ཐོག་ནས་ཡིན། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞིའི་ནང་འགན་འཛིན་ལྷན་ཚོགས་དང་ཚོགས་ཆེན་གང་ཡིན་ཡང་ཕྱི་ཟླ་ ༩ པའི་ནང་དུ་འཚོག་དགོས་པ་སྒྲིག་གཞིའི་ནང་གཏན་འབེབ་གནང་ཡོད། ཡིན་ནའང་དུས་ཚོད་དེ་ནི་དེང་སང་གི་གནས་སྟངས་ལ་དཔག་པའི་རྒྱ་གར་ནང་གི་ས་ཁུལ་མང་པོ་ཞིག་དགུན་ཚོང་གི་དུས་རེད། ཚོགས་བཅར་ཐུབ་མིན་གྱི་གནས་སྟངས་ཤིག་ཡོང་གི་འདུག ཅེས་འགྲེལ་བརྗོད་གནང་བྱུང་།
སྐབས་དེར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ང་ཚོ་བོད་མི་རིགས་ཆབ་སྲིད་ཀྱི་སྐྱབས་བཅོལ་བ་ཆགས་ཏེ་ལོ་དྲུག་ཅུ་ལྷག་འགྲོ་བཞིན་ཡོད་ཅིང་། དུས་ཚོད་དེའི་ནང་དུ་གཞིས་བཞུགས་བོད་མི་རྣམས་དང་།གཙོ་བོ་ ༸གོང་ས་རྒྱལ་བ་རིན་པོ་ཆེ་མཆོག་གིས་དབུ་ཁྲིད་པའི་ང་ཚོའི་མི་རབས་རྒན་པ་རྣམ་པ། གནས་ཡུལ་རྒྱ་གར་གཞུང་། དེ་བཞིན་ཕྱི་རྒྱལ་གྱི་གཞུང་དང་གཞུང་འབྲེལ་མ་ཡིན་པའི་ཚོགས་པ་བཅས་ཀྱི་མཐུན་སྦྱོར་ལ་བརྟེན་ནས་བོད་མི་རིགས་ཀྱི་འཐབ་རྩོད་དེ་གསོན་ཐུབ་པ་དགའ་ཚོར་བྱ་འོས་པ་ཞིག་ཆགས་ཡོད། དེའི་ཆ་ཤས་ཤིག་ནི་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་གལ་ཆེན་པོ་ཆགས་ཡོད། གཞོན་ནུའི་ཁྱབ་ཁོངས་སུ་ཡོད་པའི་འགན་འཁུར་བ་རྣམ་པས་ལྷག་བསམ་རྣམ་དག་གི་ཐོག་ནས་སོ་སོའི་སེམས་སུ་སྤོབས་པ་འཁུར་ཐུབ་དགོས་པ་ཞིག་རེད། བོད་ཀྱི་བདེན་མཐའ་གསལ་བའི་གནས་སྟངས་ཐོག་མུ་མཐུད་དུ་བརྩོན་ལེན་དགོས་པ་ཞིག་ཆགས་ཡོད། ད་དུང་ཡང་ལོ་རྒྱུས་ཀྱི་གནས་བབ་ཐོག་སེམས་ཤུགས་མ་ཉམས་པའི་ཐོག་སོ་སོའི་རྣམ་དཔྱོད་ཤུགས་ཆེ་རུ་བཏང་སྟེ་བདེན་དོན་འཐབ་རྩོད་བྱེད་དགོས་པའི་དུས་ཚོད་གལ་ཆེན་ཞིག་ཆགས་ཡོད། ཅེས་གསུངས་སོང་།
བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། རྩ་བའི་བླ་མ་༸གོང་ས་རྒྱལ་བ་རིན་པོ་ཆེ་མཆོག་གི་དབུས་བླ་ཆེན་མང་པོ་ཞིག་སོ་སོའི་ལུང་པ་བཞག་སྟེ་སྐྱབས་བཅོལ་དུ་ཕེབས་པའི་གནས་བབ་ཅིག་ཏུ་ལྷག་བསྡད་ཡོད། རྒྱལ་ཁབ་ཅིག་ལ་འདི་འདྲའི་སྡུག་དགོས་པའི་གནས་སྟངས་ཤིག་ཡོང་རྒྱུ་མེད་ཀྱང་། ༸གོང་ས་མཆོག་གི་ཐུགས་རྗེའི་འོག་ཏུ་བོད་མིའི་སྒྲིག་འཛུགས་དང་བོད་མི་རིགས་ཀྱི་འཐབ་རྩོད་ཅེས་པ་ཞིག་ཡོད་ལ། སོ་སོའི་རྒྱལ་ཁབ་ཀྱི་འཐབ་རྩོད་མུ་མཐུད་དུ་བྱེད་པའི་སྤོབས་པ་ཡོད། དེ་དང་མཉམ་དུ་ཡིད་ཆེས་ཀྱི་ཐོག་ནས་རྒྱལ་ཞེན་གྱི་ཚོར་བ་ཉམས་མི་བཅུག་པ་གལ་ཆེ་ཤོས་ཤིག་རྩི་བཞིན་ཡོད། ལྷག་པར་བོད་ཀྱི་འཐབ་རྩོད་ནང་འགན་ཆེ་ཤོས་འཁུར་མཁན་གཞུང་འབྲེལ་མིན་པའི་ཚོགས་པ་བོད་ཀྱི་གཞོན་ནུ་ལྷན་ཚོགས་སོགས་ཀྱིས་བོད་ནང་དུ་ལོག་རྒྱུ་ཡོད་པའི་ཡིད་ཆེས་ཐོག་ཕྱག་ལས་གནང་རྒྱུ་ཧ་ཅང་གལ་ཆེན་པོ་མཐོང་གི་འདུག ཅེས་དང་། གཞུང་འབྲེལ་མིན་པའི་ཚོགས་པ་ཁག་གིས་བོད་ནང་གི་གནས་སྟངས་ལ་བལྟས་ཏེ་རྒྱ་ནག་གི་བྱེད་ཕྱོགས་ལ་གདོང་ལེན་བྱས་ཏེ་ལས་འགུལ་སྤེལ་དགོས་རྒྱུ་གལ་ཆེན་པོ་རེད། ཁྱོད་ཚོས་རང་བཙན་དང་དབུ་མའི་དབྱེ་བ་མེད་པའི་ཐོག་ལས་འགུལ་སྤེལ་བཞིན་འདུག ནུས་པ་མཉམ་དུ་སྤུངས་ཏེ་བོད་པ་ཡིན་པའི་འགན་འཁུར་རྒྱུ་དེ་དུས་ཀྱི་དགོས་མཁོ་རེད། ཅེས་གསུངས་སོང་།
༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས། བོད་ཀྱི་གཞོན་ནུ་ལྷན་ཚོགས་ནི་བཙན་བྱོལ་ནང་གཞུང་འབྲེལ་མིན་པའི་ཚོགས་པ་རྙིང་ཤོས་དང་གལ་ཆེ་ཤོས་ཤིག་ཆགས་ཡོད་ལ། ཚོགས་མི་ཡང་མང་ཤོས་ཆགས་ཡོད། ལས་དོན་སྤེལ་ཕྱོགས་ཀྱང་བོད་ཀྱི་བདེན་པའི་འཐབ་རྩོད་དང་། རིག་གཞུང་སྲུང་སྐྱོབ། མི་སྣ་བསྐྱེད་སྲིང་། སྤྱི་ཚོགས་ཞབས་ཞུ་སོགས་གྲུབ་འབྲས་གཟེངས་སུ་ཐོན་ཡོད། བོད་གཞིས་བྱེས་གཉིས་ཀྱི་བོད་མི་རྣམས་ཀྱིས་གཞོན་ལྷན་གྱི་གྲུབ་འབྲས་ངོས་འཛིན་ཡོད་པའི་ཐོག་ནས་མུ་མཐུད་དུ་གནས་པའི་ཐུགས་རེ་ཡོད་པ་རེད། ངས་ཀྱང་རེ་བ་ཆེན་པོ་ཞུ་བཞིན་ཡོད། གཞོན་ལྷན་གྱི་ཚོགས་འདུའི་ཐོག་ཕེབས་མཁན་ཕལ་ཆེ་བ་གཞོན་སྐྱེས་ནང་ནས་ཡོང་གི་ཡོད། གཞོན་སྐྱེས་ཞེས་པ་དམིགས་བསལ་ནུས་པ་ཡོད་པའི་མི་རབས་ཤིག་ཆགས་ཡོད། ནུས་པ་དེའང་གསར་གཏོད་ཀྱི་རྣམ་དཔྱོད་དང་། འཐབ་རྩོད་ཀྱི་སྙིང་སྟོབས་ཡོད་པ། ཞབས་ཞུའི་ནུས་པ་དང་ལྡན་པའི་མི་རབས་ཤིག་ཆགས་ཡོད། བོད་ཀྱི་འཐབ་རྩོད་ནི་དུས་རབས་ཉི་ཤུ་བའི་དཀྱིལ་དུ་མགོ་བཙུགས་པ་ཞིག་ཡིན་ཡང་། དུས་རབས་ཉི་ཤུ་རྩ་གཅིག་པའི་ནང་དུ་ངེས་པར་དུ་རྒྱུན་མཐུད་དགོས་པ་ཞིག་ཆགས་ཡོད། འདི་འདྲའི་དུས་ཚོད་ཞིག་ལ་བོད་དོན་དྲིལ་བསྒྲགས་བྱེད་པར་དུས་རབས་དང་མཐུན་པའི་ཚན་རིག་དང་བརྡ་འཕྲིན་སོགས་དགོས་ཀྱི་ཡོད་པས། ད་ལྟའི་གཞོན་སྐྱེས་རྣམས་ལ་དེ་དག་ཐོག་ནས་དམིགས་བསལ་གོ་སྐབས་ཤིག་ཆགས་ཡོད། འཐབ་རྩོད་སྙིང་སྟོབས་ཀྱི་ཆ་ནས་འཛམ་གླིང་ཤར་ནུབ་གང་དུ་གཟིགས་ཀྱང་། གཞོན་སྐྱེས་ཀྱི་སྣེ་ཁྲིད་ཐོག་དབང་ཆ་གཅིག་སྡུད་པར་འཐབ་རྩོད་དང་། རང་དབང་དང་དམངས་གཙོ་སྲུང་སྐྱོབ་ཀྱི་ཆེད་དུ་གྲུབ་འབྲས་ཐོན་དང་འཐོན་བཞིན་པ་རེད། ཉེ་ཆར་ཁྱིམ་མཚེས་རྒྱལ་ཁབ་ཏུ་གཞོན་སྐྱེས་ཀྱི་སྣེ་ཁྲིད་ཐོག་བཟང་ཕྱོགས་ཀྱི་གྲུབ་འབྲས་ཤིག་ཐོན་ཡོད་པ་མཁྱེན་གསལ་རེད། དེ་བཞིན་བོད་ཕྱི་ནང་གཉིས་སུ་༸གོང་ས་མཆོག་གི་བཀའ་དགོངས་དང་བོད་ཀྱི་རིག་གཞུང་བསྟན་སྲིད་བཅས་ཀྱི་ཆེད་ཐུགས་འགན་བཞེས་ཡོད། བོད་ཀྱི་གཞོན་ལྷན་གྱི་གྲུབ་ཆ་དེ་གཞོན་སྐྱེས་ཡིན་པ་མ་ཟད། ཆོལ་ཁ་དང་ཆོས་བརྒྱུད། ཕོ་མོ་དབྱེ་མེད་ཐོག་ཕེབས་ཀྱི་ཡོད་པ་ཧ་ཅང་གི་རྩ་ཆེན་པོ་ཞིག་རེད། ད་ལྟའི་ཆར་བོད་ཀྱི་གནས་སྟངས་ཧ་ཅང་ཉག་ཕྲ་བོ་ཆགས་ཡོད་པའི་ཐོག ང་ཚོའི་ནང་ཁུལ་དུ་མཐུན་སྒྲིལ་རྡོག་རྩ་གཅིག་སྒྲིལ་མེད་པའི་དཀའ་ངལ་ཡོད་པ་མཁྱེན་གསལ་རེད། འདི་འདྲའི་སྐབས་སུ་ང་ཚོ་མཐུན་སྒྲིལ་རྡོག་རྩ་གཅིག་སྒྲིལ་དགོས་པ་ཧ་ཅང་གལ་ཆེན་པོ་རེད། དེས་ང་ཚོའི་མ་འོངས་བའི་འཐབ་རྩོད་དང་གཞིས་བྱེས་བོད་མིི་མཉམ་འཛོམས་ཡོང་བའི་ནུས་པ་གཙོ་བོ་ཞིག་ཆགས་ཡོད། བོད་ཀྱི་གཞོན་ནུ་ལྷན་ཚོགས་དེ་སྤྱི་ཚོགས་གཅིག་ཏུ་སྒྲིལ་ཐུབ་པའི་གོ་སྐབས་ཡོད་པའི་སྡིངས་ཆ་གལ་ཆེན་པོ་རེད་བསམ་ཡོད། གཞོན་སྐྱེས་རྣམས་ཀྱིས་བོད་པ་གཅིག་ཡིན་བསམ་པའི་འདུ་ཤེས་ཀྱི་ཐོག་ནས་ནུས་པ་གཅིག་ཏུ་སྒྲིལ་བའི་ཐོག་ཐུགས་འཁུར་བཞེས་རོགས། ཅེས་གསུངས་སོང་།
ཚོགས་ཆེན་ཐེངས་ ༡༩ པའི་ཐོག་གྲོས་གཞི་དོན་ཚན་བརྒྱད་ཡོད་པའི་ནང་། ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་དགུ་བཅུར་ཕེབས་པར་གཞོན་ལྷན་ནས་གོ་སྟོན་སྲུང་བརྩི་ཞུ་ཕྱོགས་ཇི་དགེའི་སྐོར། ྋགོང་ས་ྋསྐྱབས་མགོན་ཆེན་པོའི་དགོངས་གཞི་ལམ་སྟོན་ལྟར་བོད་ཀྱི་ངོ་བོ་མཚོན་པའི་རྩ་ཆེའི་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོའི་སླད། གཞོན་ལྷན་གྱིས་ལས་དོན་སྤེལ་ཕྱོགས་ཇི་དགེའི་གྲོས་གཞི་དོན་ཚན་ལྔ་པ། གཞོན་ལྷན་གྱི་དམིགས་ཡུལ་བོད་རང་བཙན་སླར་གསོ་དང་འབྲེལ་བའི་ལས་འགུལ་སྤེལ་ཕྱོགས་དང་། རང་བཙན་ འཐབ་རྩོད་རྒྱུན་ཁྱོངས་ཡོང་སླད་གཞོན་ལྷན་ནས་ལས་འགུལ་བརྩམ་ཕྱོགས། ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་ཡོང་ཆེད་དང༌། ཁོང་རྣམ་པའི་མངོན་འདོད་སྒྲུབ་ཐབས་གཞོན་ལྷན་ནས་ལས་འགུལ་སྤེལ་ཕྱོགས་ཇི་དགེའི་སྐོར། བོད་ནང་གི་ཛ་དྲག་གནས་སྟངས་ལ་གཞིགས་པའི་བོད་ཀྱི་གཞོན་ནུ་ལྷན་ཚོགས་ནས་ལས་འགུལ་སྤེལ་ཕྱོགས་ཇི་དགེའི་སྐོར་སོགས་བགྲོ་གླེང་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
