རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཟེར་བས། ཟླ་འདིའི་ཕྱི་ཚེས་ ༩ ནས་ ༡༢ བར་ཉིན་གྲངས་བཞིའི་རིང་བཀྲ་ཤིས་ལྷུན་པོ་དགོན་དུ་དུས་འཁོར་དབང་ཆེན་གྱི་བཀའ་དབང་གནང་རྒྱུ་ཡིན་ལུགས་བསྒྲགས་འདུག
རྒྱ་ནག་གཞུང་གིས་པཎ་ཆེན་རྒྱལ་མཚན་ནོར་བུ་ཟེར་བ་ཆོས་སྲིད་གཉིས་ཀྱི་ཐོག་ཏུ་བཀོལ་ནས་བོད་ནང་གི་བོད་མི་རྣམས་ལ་ཤུགས་རྐྱེན་བཟོ་ཐབས་དང་། བོད་ནང་ཆེད་དུ་རྒྱལ་མཚན་ནོར་བུའི་དབང་ཤུགས་དང་གོ་གནས་སྐྱེད་བཅུག་གི་ཡོད་པ་ལྟར། ཟླ་འདིའི་ཕྱི་ཚེས་ ༩ ནས་ ༡༢ བར་ཉིན་གྲངས་བཞིའི་རིང་རྒྱལ་མཚན་ནོར་བུས་བཀྲ་ཤིས་ལྷུན་དགོན་དུ་དུས་འཁོར་དབང་ཆེན་གྱི་བཀའ་དབང་གནང་རྒྱུ་ཡིན་པ་དང་། མི་མང་གིས་དགོན་པའི་སྒྲིག་ཁྲིམས་ཟེར་བར་བརྩི་འཇོག་དང་ཡུལ་དངོས་ཀྱི་ལས་དོན་མི་སྣ་ཟེར་བའི་བཀོད་སྒྲིག་སོགས་ལ་ཉན་འཇོག་བྱ་དགོས་ལུགས་བསྒྲགས་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་ཐད་ཀར་མཁོ་སྤྲོད་གནང་བའི་བཀྲ་ཤིས་ལྷུན་པོ་དགོན་གྱི་གསལ་བསྒྲགས་ཤིག་གི་ཁྲོད། རྒྱ་ཆེའི་དད་ལྡན་སེར་སྐྱ་མང་ཚོགས་རྣམས་དང་ཕྱོགས་བཞིའི་སློབ་བུ་ཡོངས་ལ། འཛམ་གླིང་ཞི་བདེ་དང་མེས་རྒྱལ་དར་ཞིང་རྒྱས་པ། མི་དམངས་བདེ་འཁོད། འགྲོ་བའི་ཚེ་བསོད་དགེ་སྦྱོར་འཕེལ་བ་སོགས་ལེགས་ཚོགས་དུ་མའི་ཆེད་དུ་༧གོང་ས་སྐྱབས་མགོན་པཎ་ཆེན་ཐམས་ཅད་མཁྱེན་པ་མཆོག་ནས་ཐུགས་བརྩེ་བ་ཆེན་པོས་སྤྱི་ལོ་ 2025 ལོའི་ཟླ་ 10 ཚེས་ 9 ནས་ 12 བར་ ( བོད་ཤིང་སྦྲུལ་ལོའི་ཟླ་ 8 ཚེས་18 ཉིན་ནས་21 བར་) བོད་ལྗོངས་གཞིས་ཀ་རྩེ་གྲོང་ཁྱེར་བཀྲ་ཤིས་ལྷུན་པོ་དགོན་པའི་སྐྱིད་སྐྱིད་ན་ཁར་དཔལ་དུས་ཀྱི་འཁོར་ལོའི་བཀའ་དབང་བསྩལ་གནང་རྒྱུ་ཡིན་པས། བཀའ་དབང་ལ་ཕེབས་མཁན་རྒྱ་ཆེའི་དད་ལྡན་སེར་སྐྱ་མང་ཚོགས་ཀྱིས་དགོན་པའི་སྒྲིག་སྲོལ་ཁག་ལ་སྲུང་བརྩི་ཞུ་དགོས་པ་དང་། ས་ཡུལ་དངོས་ཀྱི་ལས་དོན་མི་སྣའི་བཀོད་སྒྲིག་ལ་ཉན་འཇོག་བྱེད་དགོས་ཤིང་། གྲི་རིགས་སོགས་མཚོན་ཆ་དང་འབར་སླ་བའི་ཉེན་ཁའི་དངོས་རྫས། ཆང་རག་སོགས་ཆོས་རྭར་འཁྱེར་མི་ཆོག་པ་མ་ཟད། ཆོས་གསན་པའི་ཀུན་སློང་ཀུན་སྤྱོད་ཀྱི་རིམ་པ་ལྟར་ཁ་ཁུ་སིམ་པོའི་སྒོ་ནས་དཔལ་དུས་ཀྱི་འཁོར་ལོའི་དབང་བསྐུར་ཟབ་མོ་གསན་གནང་རྒྱུ། ཞེས་གསལ་འདུག
གནད་དོན་དེ་དང་འབྲེལ་ནས་བོད་ཀྱི་སྲིད་ཇུས་ཉམས་ཞིབ་ཁང་གི་བོད་གནས་ཉམས་ཞིབ་པ་ཕན་ཐོགས་ལགས་ཀྱིས་འདི་གའི་གསར་འགོད་པར། རྒྱ་ནག་གཞུང་གིས་པཎ་ཆེན་རྒྱལ་མཚན་ནོར་བུ་ཟེར་བར་ཕྱི་ལོ ༢༠༡༦ ལོའི་ཕྱི་ཟླ ༧ ཚེས་ ༢༡ ནས་ ༢༤ བར་བོད་གཞིས་ཀ་རྩེའི་བཀྲ་ཤིས་ལྷུན་པོའི་ཉེ་འགྲམ་གྱི་བདེ་ཆེན་ཕོ་བྲང་དུ་དུས་འཁོར་དབང་ཆེན་ཐོག་མར་གནང་བཅུག་ཡོད་ཅིང་། སྐབས་དེར་རྒྱ་ནག་གཞུང་གིས་མི་མང་ཁག་ལ་ཆེད་དུ་སྒོར་མོ་སྤྲད་པ་དང་། ཁག་ཅིག་ལ་བཙན་གྱིས་དུས་འཁོར་དབང་ཆེན་ཞུ་བཅུག་ནས། བོད་ནང་མི་ལོ་དྲུག་ཅུའི་རྗེས་དུས་འཁོར་དབང་ཆེན་གྱི་ཆོས་ཕྱོགས་ཀྱི་བྱེད་སྒོ་ཆེ་ཤོས་ཆགས་ཡོད་ཟེར་ནས་དྲིལ་བསྒྲགས་ཤུགས་ཆེན་བྱས་ཡོད། ཅེས་བརྗོད་བྱུང་།
ཡང་ཁོང་མོས། སྤྱིར་ན་རྒྱལ་མཚན་ནོར་བུ་ཆོས་ཕྱོགས་བྱེད་སྒོར་ཞུགས་པར་ཉུང་ནའང་། ད་ལན་ཡང་བསྐྱར་དུས་འཁོར་དབང་ཆེན་ཟེར་བའི་བྱེད་སྒོ་སྤེལ་གྱི་ཡོད་སྟབས། ད་བར་རྒྱ་ནག་གཞུང་གིས་རྒྱལ་མཚན་ནོར་བུ་བོད་ནང་གི་ས་གནས་མང་དག་ཅིག་ཏུ་ཆེད་དུ་མངགས་ནས། བོད་མི་རྣམས་ཀྱིས་མི་རིགས་མཐུན་སྒྲིལ་བྱ་དགོས་པ་དང་། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་དགོས་ལུགས་ཀྱི་ཆབ་སྲིད་ཀྱི་དྲིལ་བསྒྲགས་ཤུགས་ཆེན་བྱེད་བཅུག་གི་ཡོད་པའི་ཁར། འདི་ལོར་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱལ་མཚན་ནོར་བུར་མཇལ་ཟེར་ནས་དྲིལ་བསྒྲགས་ཤུགས་ཆེན་བྱས་ཡོད་སྟབས། ད་ལན་ཆོས་ཕྱོགས་ཀྱི་བྱེད་སྒོ་དག་ཆབ་སྲིད་ཀྱི་ལག་ཆའི་ངོ་བོར་བསྒྱུར་ནས་རྒྱ་ནག་གཞུང་གི་འཁྱོག་བཤད་དག་བསྒྲུབ་ཐབས་བྱེད་མུས་ཡིན་སྐོར་སོགས་བརྗོད་བྱུང་།
ཕྱི་ལོ་ ༢༠༡༦ ཟླ་ ༧ ཚེས ༢༡ ནས་ ༢༤ བར་གཞིས་ཀ་རྩེ་ནང་པའི་མཐུན་ཚོགས་ཀྱི་གོ་སྒྲིག་འོག པཎ་ཆེན་རྒྱལ་མཚན་ནོར་བུ་ཟེར་བས་བོད་གཞིས་ཀ་རྩེའི་བཀྲ་ཤིས་ལྷུན་པོའི་ཉེ་འགྲམ་གྱི་བདེ་ཆེན་ཕོ་བྲང་དུ་དུས་འཁོར་དབང་ཆེན་ཟེར་བ་ཐོག་མ་གནང་། དེ་ནི་རྒྱལ་མཚན་བུའི་བོད་ནང་དུས་འཁོར་དབང་ཆེན་ཟེར་བ་གནང་ཐེངས་དང་པོར་གྱུར་ཡོད་པས་དྲིལ་བསྒྲགས་ཤུགས་ཆེན་བྱས་ཡོད་ལ། སྐབས་དེར་རྒྱ་ནག་གཞུང་གིས་རྒྱལ་མཚན་ནོར་བུས་དུས་འཁོར་དབང་ཆེན་ཟེར་བ་གནང་སྐབས། སྤྲིན་པ་དམིགས་བསལ་འཁྲིགས་པ། འཇའ་ཚོན་སྣ་ལྔ་ཤར་ཡོད་ལུགས་དང་། པཎ་ཆེན་རྒྱལ་མཚན་ནོར་བུ་ཟེར་བ་དེ་རྒྱ་ནག་གཞུང་གིས་ཆེད་དུ་གསེར་བུམ་དཀྲུགས་ནས་བདམས་པ་ཡིན་ལུགས་ཀྱི་དྲིལ་བསྒྲགས་ཤུགས་ཆེན་བྱས་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
