བོད་དོན་རྒྱབ་སྐྱོར་བ་དང་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་གཟེངས་རྟགས་ཐོག་མ་ (Visionary Award) ཞེས་པ་འབུལ་གཏན་ཁེལ།
བོད་དོན་རྒྱབ་སྐྱོར་བ་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རེ་ཆར་ཌི་གྷེ་རེ་ལགས་སུ། འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་གཟེངས་རྟགས་ཐོག་མ་ (Visionary Award) འབུལ་གཏན་ཁེལ་ཡོད་ཅིང་། དེ་ནི་ཁོང་གིས་མི་ཚེ་ཧྲིལ་པོར་འཛམ་གླིང་ནང་དྲག་གནོན་ཐེབས་བཞིན་པའི་མི་མང་གི་གཞི་རྩའི་ཐོབ་ཐང་དང་རང་དབང་སོགས་ཀྱི་ཆེད་དུ་བདེན་པའི་འཐབ་རྩོད་བྱས་པ་དང་ལྷག་པར་དུ་བོད་མི་རྣམས་ཀྱི་འགྲོ་བ་མིའི་ཐོབ་ཐང་གི་ཆེད་དུ་སྐུ་ལས་བསྐྱོན་པ་སོགས་ལ་ཆེ་བསྟོད་ངོས་འཛིན་མཚོན་ཕྱིར་ཕུལ་བ་ཞིག་ཡིན་འདུག་ལ། གཟེངས་རྟགས་དེ་ཟླ་འདིའི་ཕྱི་ཚེས་ ༡༤ ཉིན་ཨ་རིའི་ནེའུ་ཡོག་གྲོང་ཁྱེར་དུ་ཕུལ་རྒྱུ་ཡིན་འདུག
དེ་འབྲེལ་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་གཅེས་འཛིན་ཚོགས་པས། རེ་ཆར་ཌི་གྷེ་རེ་ལགས་ཀྱིས་གློག་བརྙན་འཁྲབ་སྟོན་པ་དང་། བཟོ་སྐྲུན་པ། པར་ལེན་པ་བཅས་ཀྱི་ཐོག་ནས་འཛམ་གླིང་ནང་སྒྱུ་རྩལ་ཐོག་ཕྱག་ལས་གནང་བ་ཙམ་དུ་མ་ཟད། འཛམ་གླིང་ཡུལ་གྲུ་གང་སར་དྲག་གནོན་འོག་གནས་པའི་མི་མང་གི་གཞི་རྩའི་ཐོབ་ཐང་དང་རང་དབང་སོགས་སྲུང་སྐྱོབ་ཀྱི་ཕྱག་ལས་གནང་ཡོད། ལྷག་པར་དུ་ཁོང་གིས་རྒྱལ་སྤྱིའི་བོད་དོན་ལས་འགུལ་ཁང་གི་སྣེ་འཁྲིད་པ་དང་ཨ་རིའི་བོད་ཁང་མཉམ་འབྲེལ་གསར་འཛུགས་ཀྱིས་ཨ་རིའི་ཆབ་སྲིད་ཚོགས་པ་ཁག་དང་རྒྱལ་སྤྱིའི་སྲིད་ཇུས་ཁག་ལ་བཟོ་བཅོས་བྱས་ཏེ། རྒྱ་ནག་དམར་ཤོག་ཚོགས་པས་བོད་ཀྱི་རིག་གཞུང་རྩ་མེད་གཏོང་བའི་སྲིད་ཇུས་ཁག་གི་ཁ་གཏད་དུ་ལངས་ཡོད། ཁོང་གིས་མི་ཚེ་ཧྲིལ་པོ་བོད་མི་རྣམས་ཀྱི་འགྲོ་བ་མིའི་ཐོབ་ཐང་གི་རྩོད་ལེན་ཆེད་བཏང་གནང་ཡོད། ཅེས་བརྗོད་འདུག
འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་ཁེ་གཉེར་བ་དང་འགན་འཛིན་ཨུ་ཛ་ར་ཛེ་ཡ་ལགས་ཀྱིས། རེ་ཆར་ཌི་གྷེ་རེ་ལགས་ནི་འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་གཟེངས་རྟགས་ (Visionary Award) ཞེས་པ་ཐོབ་མཁན་དང་པོ་ཡིན་པའི་ཆ་ནས། རི་ཆར་ཌི་གྷེ་རི་ཡི་དཔེ་མཚོན་གྱིས་འགྲོ་བ་མིའི་ཐོབ་ཐང་དེ་མི་ཚང་མའི་ཆེད་དུ་ཡིན་པ་དང་། མི་ཚང་མར་ཐོབ་ཐང་དེ་འོས་ཤིང་འཚམས་པ་ཡིན་པའི་དྲན་སྐུལ་བྱེད་ཀྱི་ཡོད། ཅེས་བརྗོད་འདུག་ལ། ལྕམ་ཨུ་ཛ་ར་ཛེ་ཡ་ལགས་ནི་ཨ་རིའི་སྲིད་འཛིན་བྷའེ་ཌན་སྐབས་བསྐོ་གཞག་བྱས་པའི་ཨ་རིའི་བོད་དོན་དམིགས་བསལ་འབྲེལ་མཐུད་པ་ཟུར་བ་ཡིན་འདུག
རེ་ཆར་ཌི་གྷེ་རེ་ལགས་ནི་ཕྱི་ལོ་ ༡༩༤༩ ཟླ་ ༨ ཚེས་ ༣༡ ཉིན་ཨ་རིའི་མངའ་སྡེ་པེན་སིལ་ཝེ་ནི་ཡ་ (Pennsylvania) རུ་ཡོད་པའི་ཧྥི་ལ་ཌལ་ཧྥི་ཡ་ (Philadelphia) གྲོང་ཁྱེར་དུ་སྐྱེས་ཤིང་། ཕྱི་ལོ་ ༡༩༦༧ ལོར་བྱང་སི་ཡ་ཀུ་སི་དབུས་སློབ་འབྲིང་ (North Syracuse Central High School) ནས་སློབ་མཐར་ཕྱིན། དེ་ནས་མཱ་ས་ཆུ་སེ་ཊི་གཙུག་ལག་སློབ་གཉེར་ཁང་དུ་ལུས་རྩལ་གྱི་སློབ་ཡོན་ཐོབ་སྟེ། མཚན་ཉིད་རིག་པའི་ཐོག་སློབ་སྦྱོང་བྱས། འོན་ཀྱང་། ལོ་གཉིས་ཀྱི་རྗེས་སུ་སློབ་གྲྭ་ནས་ཕྱིར་ཐོན་རྐྱེན་སློབ་མཐར་ཕྱིན་མེད་པ་རེད། ཕྱི་ལོ་ ༡༩༦༩ ནས་གློག་བརྙན་དུ་ཆེད་ལས་ཐོག་ནས་ལས་ཀ་བྱེད་མགོ་ཚུགས་ཏེ། ཕྱི་ལོ་ ༡༩༧༠ ཟླ་དཀྱིལ་ཙམ་ནས་བཟུང་ཧོ་ལི་ཝུ་ཌིའི་གློག་བརྙན་ནང་འཁྲབ་སྟོན་བྱེད་མགོ་བཙུགས་ཡོད་འདུག་ལ། ཕྱི་ལོ་ ༡༩༧༡ ལོར་ (Rock Opera) ཞེས་པའི་གློག་བརྙན་ཐོག་མར་འཁྲབ་སྟོན་གནང་། ཕྱི་ལོ་ ༡༩༧༣ ལོར་ (Grease) ཞེས་པའི་གློག་བརྙན་འཁྲབ་སྟོན་བྱས་ཏེ། ཧོ་ལི་ཝུ་ཌི་ (Hollywood) ནང་འཁྲབ་སྟོན་པ་གྲགས་ཅན་ཐོག་མའི་གྲས་ཤིག་ཡིན་ཞིང་། རྒྱལ་སྤྱིའི་སྟེང་གློག་བརྙན་སྣ་མང་འཁྲབ་སྟོན་གནང་བ་སོགས་ཨ་རིའི་གློག་བརྙན་འཁྲབ་སྟོན་པ་གྲགས་ཅན་ཞིག་ཡིན་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་རྩོད་ལེན་པ་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ། དེ་བཞིན་བོད་དོན་རྒྱབ་སྐྱོར་བ་དང་བོད་དོན་ལས་འགུལ་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་པར་སོང་། རྒྱ་ནག་གཞུང་གིས་ཁོང་རྒྱ་ནག་ནང་དུ་འགྲོ་འོང་བཀག་སྡོམ་བྱས་ཡོད་པ་རེད།
གློག་བརྙན་འཁྲབ་སྟོན་པ་སྐུ་ཞབས་རི་ཆར་ཌི་གྷེར་ལགས་ནི། བོད་བརྒྱུད་ནང་བསྟན་ལ་དད་མོས་བྱེད་མཁན་ཞིག་དང་དུས་རྟག་ཏུ་༸གོང་ས་མཆོག་ལ་རྒྱབ་སྐྱོར་གནང་མཁན་གྱི་མི་སྣ་ཞིག་ཡིན་པར་མ་ཟད། ཕྱི་ལོ་ ༢༠༠༨ ལོར་རྒྱ་ནག་ནང་ཨོ་རྩེད་འགྲན་ཚོགས་མ་ཚོགས་པའི་ཡར་སྔོན་ཏུ་རྒྱ་ནག་གཞུང་གིས་བོད་ནང་དྲག་གནོན་མཚམས་འཇོག་དང་བོད་ལ་རང་བཙན་སྤྲོད་དགོས་པའི་ཐད་རྒྱལ་སྤྱིའི་སྤྱི་ཚོགས་ལ་འབོད་སྐུལ་གནང་བ་དང་། ལོ་དེར་བོད་དོན་དྲིལ་བསྒྲགས་ཀྱི་ལས་འགུལ་ཐེངས་མང་སྤེལ་ཡོད་ལ། བོད་ཀྱི་འགྲོ་བ་མིའི་ཐོབ་ཐང་ལ་དོ་སྣང་དང་མཉམ་འབྲེལ་རྒྱལ་ཚོགས་སོགས་སུ་སྐད་གསེང་མཐོན་པོས་བོད་ཀྱི་བདེན་དོན་གླེང་སློང་གནང་བ་ཉུང་ཉུང་མིན་ལ། དམིགས་བསལ་འདས་པའི་ལོ་ངོ་མང་པོའི་རིང་རྒྱལ་སྤྱིའི་བོད་དོན་ལས་འགུལ་ཁང་དུ་ཕྱག་ལས་གནང་སྟེ། བོད་ནང་འགྲོ་འོང་འདྲ་མཉམ་དང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སོགས་ལ་དངོས་ཤུགས་བརྒྱུད་གསུམ་ཐོག་ནས་རྒྱབ་སྐྱོར་ཤུགས་ཆེན་ཡོད། ད་ལྟ་དགུང་ལོ་ ༧༦ ཡིན་པའི་སྐུ་ཞབས་རི་ཆར་ཌི་གྷེར་དང་ཁོང་གི་བཟའ་ཟླ་ (Alejandra Silva) གཉིས་ལ་བུ་གཉིས་ཅིང་། འདས་ལོར་ཨ་རི་ནས་རང་ཉིད་ཀྱི་བཟའ་ཟླའི་རྒྱལ་ཁབ་སི་པན་དུ་གནས་སྤོར་བྱས་ཡོད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
