སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཌའི་གྲོས་ཚོགས་འཐུས་མི་དང་གཞུང་འབྲེལ་མཐོ་རིམ་མི་སྣ་ཁག་ཅིག་ལ་མཇལ་འཕྲད་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་ཡང་སྲིད་ཀྱི་གནད་དོན་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞུ་གཏུག་གནང་ཡོད་འདུག
ཉེ་སྔོན་ཕྱི་ཟླ་ ༩ ཚེས་ ༢༥ ནས་དེ་རིང་ཕྱི་ཟླ་ ༡༠ ཚེས་ ༧ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། ཁེ་ན་ཌའི་ཊོ་རོན་ཊོ། ཨོ་ཐ་ཝ་བཅས་སུ་གཞུང་འབྲེལ་ཕྱོགས་ཕེབས་གནང་ཡོད་པ་ལྟར། ཟླ་འདིའི་ཕྱི་ཚེས་ ༣ ཉིན་ཁེ་ན་ཌའི་ཨོ་ཊ་ཝར་རྟེན་གཞི་བྱས་པའི་མེ་ཁི་ཌོ་ནལ་ཊི་ལུ་རིར་ཉམས་ཞིབ་ཁང་ (Macdonald-Laurier Institute) དུ། སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གི་སྲིད་ཇུས་ཐོག་ཉམས་ཞིབ་བྱེད་མཁན་ཆེད་མཁས་པ་རྣམས་དང་ལྷན་དུ། འཛམ་གླིང་དམངས་གཙོའི་མཉམ་ལས་དང་རྒྱ་ནག་གི་དབང་སྒྱུར་ཤུགས་རྐྱེན་ཆེ་རུ་འགྲོ་བཞིན་པའི་གནས་སྟངས་འོག་བོད་དོན་རྒྱབ་སྐྱོར་གྱི་འཐབ་ཇུས་ཐོག་བགྲོ་གླེང་གནང་ཡོད་འདུག
དེ་བཞིན་ཨོ་ཊ་ཝ་གཙུག་ལག་སློབ་གླིང་གི་མིའི་རིགས་རིག་པའི་སྡེ་ཚན་གྱི་སློབ་དཔོན་སི་ཁོ་ཌི་སི་མོན་(Scott Simon) ལགས་ཀྱི་སློབ་ཁང་དུ། སྲིད་སྐྱོང་མཆོག་གིས་བོད་ཀྱི་ཁྲིམས་མཐུན་གནས་བབ་དང་། རིག་གཞུང་སྲ་བརྟན། བོད་མཐོ་སྒང་གི་འཛམ་གླིང་གལ་གནད་ཐོག་གཏམ་བཤད་གནང་ཡོད་པ་མ་ཟད། སློབ་གཉེར་བ་རྣམས་ལ་རྒྱལ་སྤྱིའི་འགྲོ་བ་མིའི་ཐོབ་ཐང་དང་ས་ཁོངས་ཆབ་སྲིད་ཀྱི་རྒྱ་ཆེ་བའི་ནང་དོན་དང་འབྲེལ་ནས་བོད་དོན་ཐོག་བལྟ་རྒྱུ་གལ་ཆེན་པོ་ཡིན་སྐོར་གསུངས་འདུག
ཟླ་འདིའི་ཕྱི་ཚེས་ ༢ ཉིན་ཁེ་ན་ཌ་ཨོ་ཊ་ཝ་གྲོས་ཚོགས་ཀྱི་གསར་འགོད་ལྷན་ཚོགས་སུ། སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་བོད་ནང་ཆེད་འཛུགས་བྱས་པའི་མི་སེར་སྤེལ་ཡུལ་བཅའ་སྡོད་སློབ་གྲྭའི་ངན་བྱུས་ཐེར་འདོན་གནང་བའི་གསར་འགོད་གསལ་བསྒྲགས་ཤིག་སྤེལ་ཡོད་ཅིང། སྐབས་དེའི་གསར་འགོད་གསལ་བསྒྲགས་ཐོག་ཁེ་ན་ཌའི་གྲོས་ཚོགས་འཐུས་མི་གྷར་ནེཊ་ཇི་ནི་སི་ (Garnett Genuis) ལགས་དང་། གྲོས་ཚོགས་འཐུས་མི་ཨེ་ལེག་སི་བུ་རུ་ནེལ་ (Alexis Brunelle) ལགས། གྲོས་ཚོགས་འཐུས་མི་ཀ་རིམ་སྦར་ཌཱི་སི་ (Karim Bardeesy) ལགས། ཁེ་ན་ཌ་བོད་དོན་ལྷན་ཚོགས་ཀྱི་སློབ་སྟོན་པ་ཆར་ལེ་སི་བྷར་ཊོན་ (Charles Burton) ལགས་སོགས་ནས་མཉམ་ཞུགས་གནང་ཡོད་པ་མ་ཟད། རྒྱ་ནག་གཞུང་གིས་བོད་ནང་ཆེད་འཛུགས་བྱས་པའི་མི་སེར་སྤེལ་ཡུལ་གཏན་འཇགས་སློབ་གྲྭའི་གནད་དོན་ཐོག་ཐུགས་འཚབ་བསྟན་ཡོད་འདུག སྐབས་དེར་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་ནང་གི་བོད་ཕྲུག་རྣམས་བཙན་དབང་གིས་མི་སེར་སྤེལ་ཡུལ་བཅའ་སྡོད་སློབ་གྲྭ་ཁག་ཏུ་སློབ་འཇུག་གིས་བོད་མིའི་སྐད་ཡིག་དང་། རིག་གཞུང་། ངོ་བོ་རྩ་གཏོར་བྱེད་བཞིན་ཡོད། གལ་སྲིད་རྒྱ་ནག་གཞུང་གིས་མུ་མཐུད་དུ་སྲིད་ཇུས་འདི་ལག་བསྟར་བྱས་ཚེ། བོད་ཀྱི་མི་རབས་རྗེས་མ་རྒྱ་རིགས་སུ་འགྱུར་རྒྱུ་རེད། དེ་ནི་ང་ཚོས་ད་ལྟ་མཐོང་བཞིན་པའི་བོད་ཀྱི་འཇིགས་སྣང་ཆེ་བའི་གནད་དོན་ཞིག་ཡིན། ཁེ་ན་ཌ་ནི་དམངས་གཙོ་དང་རང་དབང་ལ་བརྩི་བཀུར་བྱེད་མཁན་གྱི་རྒྱལ་ཁབ་ཅིག་ཡིན་པས། རྒྱ་ནག་གཞུང་གིས་བོད་མིའི་ངོ་བོ་རྩ་གཏོར་གཏོང་བར་ཁ་གཏད་གཅོག་ཐུབ་པའི་ནུས་པ་ཆེན་པོ་ཡོད་པར་ངོས་འཛིན་གནང་བཞིན་ཡོད་སྐོར་གསུངས་འདུག
ཟླ་འདིའི་ཕྱི་ཚེས་ ༡ ཉིན་ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇེམ་སི་མ་ལོ་ནི་ (James Maloney) ལགས་ཀྱི་གོ་སྒྲིག་འོག སྲིད་སྐྱོང་སྤེན་པ་ཚེ་རིང་མཆོག་ལ་ཉིན་གུང་གསོལ་སྟོན་ཞིག་ཕུལ་ཡོད་ཅིང་། སྐབས་དེར་ཁེ་ན་ཌའི་གྲོས་ཚོགས་འཐུས་མི་ཡི་ཝན་བྷེ་ཀར་ (Yvan Baker) ལགས་དང་། གྲོས་ཚོགས་འཐུས་མི་ཀ་རིམ་སྦར་ཌཱི་སི་ (Karim Bardeesy) ལགས། གྲོས་ཚོགས་འཐུས་མི་ཊེ་རི་ཤི་ཧན་ (Terry Sheehan) ལགས། གྲོས་ཚོགས་འཐུས་མི་ཨེ་ལི་ཛེ་བྷི་ཐི་མཱེ་ (Elizabeth May) ལགས་བཅས་དང་མཇལ་འཕྲད་གནང་ཡོད་པ་མ་ཟད། དགོང་མོའི་གསོལ་ཚིགས་ཐོག་ཁེ་ན་ཊའི་ཆབ་སྲིད་ཚོགས་པའི་( Bloc Quebecois )གྲོས་ཚོགས་འཐུས་མི་ཕ་རན་ཀི་ཧི་སི་བྷེ་ལེན་ཅིཊ་ (Francois Blanchet) ལགས་དང་། གྲོས་ཚོགས་འཐུས་མི་ཨེ་ལེག་སི་བུ་རུ་ནེལ་( Alexis Brunelle) ལགས་བཅས་སུ་མཇལ་འཕྲད་གནང་སྟེ། ༧གོང་ས་རྒྱལ་བ་རིན་པོ་ཆེ་མཆོག་གི་མ་འོངས་༸སྐུའི་ཡང་སྲིད་ངོས་འཛིན་གྱི་གནད་དོན་ཐོག་ཕྱིའི་རྒྱལ་ཁབ་ཁག་གིས་ཐེ་གཏོགས་མི་བྱེད་པ་དང་། བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ། གྲོས་མོལ་ལམ་ནས་བོད་རྒྱའི་དཀའ་རྙོག་ཞི་འགྲིག་ཡོང་སླད་རྒྱལ་སྤྱིིའི་སྤྱི་ཚོགས་ནས་ཐུགས་ཁུར་ཡོང་བའི་ཞུ་སྐུལ་གནང་ཡོད་འདུག
མཛད་འཆར་ལྟར་ན། དེ་རིང་ཕྱི་ཚེས་ ༧ བར་སྲིད་སྐྱོང་མཆོག་གིས་བོད་དོན་དྲིལ་བསྒྲགས་ཀྱི་ལས་དོན་ལ་ཤུགས་སྣོན་དང་། བོད་དོན་རྒྱབ་སྐྱོར་ཐབས་འཚོལ་སླད་ཁེ་ན་ཌའི་རྒྱལ་ས་ཨོ་ཊ་ཝར་ཁེ་ན་ཌའི་གྲོས་ཚོགས་འཐུས་མི་དང་། གཞུང་འབྲེལ་མཐོ་རིམ་མི་སྣ། གསར་འགོད་པ་སོགས་དང་མཇལ་འཕྲད་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
