བོད་དོན་རྒྱབ་སྐྱོར་བ་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ།

བོད་དོན་རྒྱབ་སྐྱོར་བ་དང་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་གཟེངས་རྟགས་ཐོག་མ་ (Visionary Award) ཞེས་པ་ཕུལ་ཡོད་འདུག

ཟླ་འདིའི་ཕྱི་ཚེས་ ༡༤ ཉིན་ཨ་རིའི་ནེའུ་ཡོག་གྲོང་ཁྱེར་གྱི་གྷོ་ཐམ་ཚོགས་ཁང་ (Gotham Hall) དུ། བོད་དོན་རྒྱབ་སྐྱོར་བ་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆར་ཌེ་གྷེ་རེ་ལགས་སུ་འགྲོ་བ་མིའི་ཐོབ་ཐང་ཚོགས་པའི་གཟེངས་རྟགས་ཐོག་མ་ (Visionary Award) ཞེས་པ་ཕུལ་ཡོད་ཅིང་། སྐབས་དེར་ཁོང་གིས། འཛམ་གླིང་ཁྱོན་ཡོངས་སུ་བོད་ནང་གི་གནས་སྟངས་སྐོར་མུ་མཐུད་དུ་གོ་རྟོགས་སྤེལ་གྱི་ཡིན། མི་དེང་སྐབས་དང་མི་ལོ་དྲུག་ཅུ་ལྷག་གི་རིང་བོད་ནང་གི་བོད་མི་རྣམས་ལ་མུ་མཐུད་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་ཚབས་ཆེན་གཏོང་བའི་དཀའ་ངལ་འཕྲད་བཞིན་ཡོད་པས། འཛམ་གླིང་ཁྱོན་ཡོངས་ཀྱིས་གནད་དོན་དེ་དག་ཤེས་དགོས་ལ། ང་ཚོས་ཁ་ཁུ་སིམ་པོར་སྡོད་མི་རུང་། ཞེས་འགྲེལ་བརྗོད་གནང་འདུག

བོད་དོན་རྒྱབ་སྐྱོར་བ་གྷེ་རེ་ལགས་ཀྱིས། བོད་ཀྱི་རིག་གཞུང་ནང་ཞི་བདེ་དང་གུས་ཞབས། སྲོག་ཆགས་ཡོངས་ལ་འབྲེལ་བ་གཏིང་ཟབ་ཡོད་པ་བཅས་ནི་འགྲོ་བ་མི་སྤྱི་ལ་ཕུལ་བའི་ལེགས་སྐྱེས་ཤིག་ཡིན་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་ངེས་པར་དུ་རྒྱ་ནག་གིས་བོད་ཀྱི་སྲོལ་རྒྱུན་འདི་དག་མེད་པར་བཟོ་ཐབས་བྱེད་པའི་འབད་བརྩོན་ལ་ངོ་རྒོལ་དང་གླེང་སློང་བྱེད་དགོས་པའི་ནན་སྐུལ་དང་། ཚོགས་བཅར་བ་རྣམས་ཀྱིས་བོད་ཀྱི་ཤེས་རབ་ཀྱི་འོད་སྣང་གསོན་པོར་བཞག་རྒྱུའི་ཁས་ལེན་བྱེད་དགོས་པ་དང་། བོད་ཀྱི་བླ་སྲོག་དང་འགྲོ་བ་མི་ཀུན་ལ་མཚོན་པའི་དོན་སྙིང་རྣམས་ནམ་ཡང་མ་ཡལ་བ་དང་མ་ཉམས་པར་འགན་ལེན་འཁུར་དགོས་པའི་འབོད་སྐུལ་ཞུ་ཡི་ཡོད། ཅེས་གསུངས་འདུག

བོད་དོན་རྒྱབ་སྐྱོར་བ་རེ་ཆར་ཌི་གྷེ་རེ་ལགས་ཀྱིས་མི་ཚེ་ཧྲིལ་པོར་འཛམ་གླིང་ནང་དྲག་གནོན་ཐེབས་བཞིན་པའི་མི་མང་གི་གཞི་རྩའི་ཐོབ་ཐང་དང་རང་དབང་སོགས་ཀྱི་ཆེད་དུ་བདེན་པའི་འཐབ་རྩོད་བྱས་པ་དང་ལྷག་པར་དུ་བོད་མི་རྣམས་ཀྱི་འགྲོ་བ་མིའི་ཐོབ་ཐང་གི་ཆེད་དུ་སྐུ་ལས་བསྐྱོན་པ་སོགས་ལ་ཆེ་བསྟོད་ངོས་འཛིན་མཚོན་སླད། ཁོང་ལ་འགྲོ་བ་མིའི་ཐོབ་ཐང་གཅེས་འཛིན་ཚོགས་པའི་གཟེངས་རྟགས་ཐོག་མ་ (Visionary Award) ཕུལ་བ་ཞིག་ཡིན་འདུག

དེ་འབྲེལ་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་གཅེས་འཛིན་ཚོགས་པས། རེ་ཆར་ཌི་གྷེ་རེ་ལགས་ཀྱིས་གློག་བརྙན་འཁྲབ་སྟོན་པ་དང་། བཟོ་སྐྲུན་པ། པར་ལེན་པ་བཅས་ཀྱི་ཐོག་ནས་འཛམ་གླིང་ནང་སྒྱུ་རྩལ་ཐོག་ཕྱག་ལས་གནང་བ་ཙམ་དུ་མ་ཟད། འཛམ་གླིང་ཡུལ་གྲུ་གང་སར་དྲག་གནོན་འོག་གནས་པའི་མི་མང་གི་གཞི་རྩའི་ཐོབ་ཐང་དང་རང་དབང་སོགས་སྲུང་སྐྱོབ་ཀྱི་ཕྱག་ལས་གནང་ཡོད། ལྷག་པར་དུ་ཁོང་གིས་རྒྱལ་སྤྱིའི་བོད་དོན་ལས་འགུལ་ཁང་གི་སྣེ་འཁྲིད་པ་དང་ཨ་རིའི་བོད་ཁང་མཉམ་འབྲེལ་གསར་འཛུགས་ཀྱིས་ཨ་རིའི་ཆབ་སྲིད་ཚོགས་པ་ཁག་དང་རྒྱལ་སྤྱིའི་སྲིད་ཇུས་ཁག་ལ་བཟོ་བཅོས་བྱས་ཏེ། རྒྱ་ནག་དམར་ཤོག་ཚོགས་པས་བོད་ཀྱི་རིག་གཞུང་རྩ་མེད་གཏོང་བའི་སྲིད་ཇུས་ཁག་གི་ཁ་གཏད་དུ་ལངས་ཡོད། ཁོང་གིས་མི་ཚེ་ཧྲིལ་པོ་བོད་མི་རྣམས་ཀྱི་འགྲོ་བ་མིའི་ཐོབ་ཐང་གི་རྩོད་ལེན་ཆེད་བཏང་གནང་ཡོད། ཅེས་བརྗོད་འདུག

རེ་ཆར་ཌི་གྷེ་རེ་ལགས་ནི་ཕྱི་ལོ་ ༡༩༤༩ ཟླ་ ༨ ཚེས་ ༣༡ ཉིན་ཨ་རིའི་མངའ་སྡེ་པེན་སིལ་ཝེ་ནི་ཡ་ (Pennsylvania) རུ་ཡོད་པའི་ཧྥི་ལ་ཌལ་ཧྥི་ཡ་ (Philadelphia) གྲོང་ཁྱེར་དུ་སྐྱེས་ཤིང་། ཕྱི་ལོ་ ༡༩༦༧ ལོར་བྱང་སི་ཡ་ཀུ་སི་དབུས་སློབ་འབྲིང་ (North Syracuse Central High School) ནས་སློབ་མཐར་ཕྱིན། དེ་ནས་མཱ་ས་ཆུ་སེ་ཊི་གཙུག་ལག་སློབ་གཉེར་ཁང་དུ་ལུས་རྩལ་གྱི་སློབ་ཡོན་ཐོབ་སྟེ། མཚན་ཉིད་རིག་པའི་ཐོག་སློབ་སྦྱོང་བྱས། འོན་ཀྱང་། ལོ་གཉིས་ཀྱི་རྗེས་སུ་སློབ་གྲྭ་ནས་ཕྱིར་ཐོན་རྐྱེན་སློབ་མཐར་ཕྱིན་མེད་པ་རེད། ཕྱི་ལོ་ ༡༩༦༩ ནས་གློག་བརྙན་དུ་ཆེད་ལས་ཐོག་ནས་ལས་ཀ་བྱེད་མགོ་ཚུགས་ཏེ། ཕྱི་ལོ་ ༡༩༧༠ ཟླ་དཀྱིལ་ཙམ་ནས་བཟུང་ཧོ་ལི་ཝུ་ཌིའི་གློག་བརྙན་ནང་འཁྲབ་སྟོན་བྱེད་མགོ་བཙུགས་ཡོད་འདུག་ལ། ཕྱི་ལོ་ ༡༩༧༡ ལོར་ (Rock Opera) ཞེས་པའི་གློག་བརྙན་ཐོག་མར་འཁྲབ་སྟོན་གནང་། ཕྱི་ལོ་ ༡༩༧༣ ལོར་ (Grease) ཞེས་པའི་གློག་བརྙན་འཁྲབ་སྟོན་བྱས་ཏེ། ཧོ་ལི་ཝུ་ཌི་ (Hollywood) ནང་འཁྲབ་སྟོན་པ་གྲགས་ཅན་ཐོག་མའི་གྲས་ཤིག་ཡིན་ཞིང་། རྒྱལ་སྤྱིའི་སྟེང་གློག་བརྙན་སྣ་མང་འཁྲབ་སྟོན་གནང་བ་སོགས་ཨ་རིའི་གློག་བརྙན་འཁྲབ་སྟོན་པ་གྲགས་ཅན་ཞིག་ཡིན་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་རྩོད་ལེན་པ་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ། དེ་བཞིན་བོད་དོན་རྒྱབ་སྐྱོར་བ་དང་བོད་དོན་ལས་འགུལ་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་པར་སོང་། རྒྱ་ནག་གཞུང་གིས་ཁོང་རྒྱ་ནག་ནང་དུ་འགྲོ་འོང་བཀག་སྡོམ་བྱས་ཡོད་པ་རེད།

གློག་བརྙན་འཁྲབ་སྟོན་པ་སྐུ་ཞབས་རི་ཆར་ཌི་གྷེར་ལགས་ནི། བོད་བརྒྱུད་ནང་བསྟན་ལ་དད་མོས་བྱེད་མཁན་ཞིག་དང་དུས་རྟག་ཏུ་༸གོང་ས་མཆོག་ལ་རྒྱབ་སྐྱོར་གནང་མཁན་གྱི་མི་སྣ་ཞིག་ཡིན་པར་མ་ཟད། ཕྱི་ལོ་ ༢༠༠༨ ལོར་རྒྱ་ནག་ནང་ཨོ་རྩེད་འགྲན་ཚོགས་མ་ཚོགས་པའི་ཡར་སྔོན་ཏུ་རྒྱ་ནག་གཞུང་གིས་བོད་ནང་དྲག་གནོན་མཚམས་འཇོག་དང་བོད་ལ་རང་བཙན་སྤྲོད་དགོས་པའི་ཐད་རྒྱལ་སྤྱིའི་སྤྱི་ཚོགས་ལ་འབོད་སྐུལ་གནང་བ་དང་།  ལོ་དེར་བོད་དོན་དྲིལ་བསྒྲགས་ཀྱི་ལས་འགུལ་ཐེངས་མང་སྤེལ་ཡོད་ལ། བོད་ཀྱི་འགྲོ་བ་མིའི་ཐོབ་ཐང་ལ་དོ་སྣང་དང་མཉམ་འབྲེལ་རྒྱལ་ཚོགས་སོགས་སུ་སྐད་གསེང་མཐོན་པོས་བོད་ཀྱི་བདེན་དོན་གླེང་སློང་གནང་བ་ཉུང་ཉུང་མིན་ལ། དམིགས་བསལ་འདས་པའི་ལོ་ངོ་མང་པོའི་རིང་རྒྱལ་སྤྱིའི་བོད་དོན་ལས་འགུལ་ཁང་དུ་ཕྱག་ལས་གནང་སྟེ། བོད་ནང་འགྲོ་འོང་འདྲ་མཉམ་དང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སོགས་ལ་དངོས་ཤུགས་བརྒྱུད་གསུམ་ཐོག་ནས་རྒྱབ་སྐྱོར་ཤུགས་ཆེན་ཡོད། ད་ལྟ་དགུང་ལོ་ ༧༦ ཡིན་པའི་སྐུ་ཞབས་རི་ཆར་ཌི་གྷེར་དང་ཁོང་གི་བཟའ་ཟླ་ (Alejandra Silva) གཉིས་ལ་བུ་གཉིས་ཡོད་ཅིང་། འདས་ལོར་ཨ་རི་ནས་རང་ཉིད་ཀྱི་བཟའ་ཟླའི་རྒྱལ་ཁབ་སི་པན་དུ་གནས་སྤོར་བྱས་ཡོད།

གསར་འགོད་པ། བསྟན་འཛིན་ཕུར་བུ།