ཀུ་ཤུ་ཁ་པར་གྱི་མཉེན་མཛོད་ལས་མཚན་མཐུན་དགའ་རོགས་སྒྲིག་སའི་མཉེན་ཆས་གཉིས་ཕྱིར་འཐེན་བྱས།

ཀུ་ཤུ་ཚོང་གཉེར་ཁང་གིས་རྒྱ་ནག་ཏུ་བཀོལ་མུས་ཡིན་པའི་ཀུ་ཤུའི་མཉེན་མཛོད་ལས་མཚན་མཐུན་དགའ་རོགས་སྒྲིག་སའི་མཉེན་ཆས་གཉིས་ཕྱིར་འཐེན་བྱ་དགོས་ཁེལ་འདུག

དེ་རིང་རྒྱལ་སྤྱིའི་གསར་ལམ་ཁག་ཏུ་ཐོན་པའི་གནས་ཚུལ་ལྟར་ན། ཀུ་ཤུ་རྟགས་ཅན་གྱི་ཚོང་གཉེར་ཁང་གིས། རྒྱ་ནག་གཞུང་གི་ཁྲིམས་སྒྲིག་བརྩི་སྲུང་བྱེད་མུས་ཡིན་ལུགས་བཤད་ནས། བྷུ་ལུ་ཌི་( Blued) དང་ཧྥན་ཁ་( Finca ) ཞེས་པའི་མཚན་མཐུན་དགའ་རོགས་སྒྲིག་སའི་མཉེན་ཆས་གཉིས། རྒྱ་ནག་ཏུ་ཀུ་ཤུ་རྟགས་ཅན་གྱི་མཉེན་ཆས་ཕབ་ལེན་གྱི་མཛོད་ལས་བླངས་ཡོད་སྟབས། རྒྱལ་སྤྱིའི་མཚན་མཐུན་དགའ་རོགས་ཀྱི་ཨེལ་ཇི་བྷི་ཊི་ ( LGBT) ཚོགས་སྡེ་ཁག་གིས། ཀུ་ཤུ་རྟགས་ཅན་ཚོང་གཉེར་ཁང་གིས་འགྲོ་བ་མིའི་གཞི་རྩའི་ཐོབ་ཐང་ལ་བརྩི་འཇོག་བྱས་མེད་སྐོར་གྱི་སྐྱོན་བརྗོད་བྱེད་མུས་ཡིན་འདུག

ཀུ་ཤུ་ཚོང་གཉེར་ཁང་གི་མགྲིན་ཚབ་པས། ང་ཚོས་ལས་དོན་སྤེལ་སའི་རྒྱལ་ཁབ་ཁག་གི་ཁྲིམས་ལུགས་ལ་བརྩི་སྲུང་བྱེད་ཀྱི་ཡོད། རྒྱ་ནག་གི་དྲ་རྒྱའི་བདག་སྐྱོང་ལས་ཁུངས་ཀྱི་བཀའ་རྒྱ་ཞིག་གཞིར་བཟུང་ནས་ང་ཚོས་མཉེན་ཆས་འདི་གཉིས་རྒྱ་ནག་གི་ཁྲོམ་ར་ནས་ཕྱིར་འཐེན་བྱས་པ་ཡིན། ཞེས་བརྗོད་འདུག

ཀུ་ཤུ་ཚོང་གཉེར་ཁང་གིས། རྒྱ་ནག་རྒྱལ་ཁབ་ཀྱི་དམ་དྲག་ཆེ་བའི་དྲ་རྒྱའི་ཁྲིམས་ལུགས་དང་མཐུན་པའི་ལོགས་སུ་བཀོལ་སྤྱོད་བྱ་ཐུབ་པའི་མཉེན་མཛོད་( App Store ) ཞིག་བཟོས་ཡོད། རྒྱ་ནག་ནང་དུ་ཨིན་སི་ཊ་གྷ་རམ་(Instagram)དང་ཝ་ཊ་སི་ཨེབ་ (Whatsapp) ལྟ་བུའི་དར་ཁྱབ་ཆེ་བའི་མཉེན་ཆས་རྣམས་བཀོལ་མི་ཐུབ་ལ། རྒྱ་ནག་ནང་གི་ཨན་ཌོ་རོའི་ (Android) ཡོ་བྱད་བེད་སྤྱོད་བྱེད་མཁན་ཚོས་ས་གནས་དང་བསྟུན་པའི་ཨན་ཌོ་རོའི་མ་ལག་བེད་སྤྱོད་བྱེད་ཀྱི་ཡོད་པ་ལས།  གྷུ་གྷལ་གྱི་མཉེན་མཛོད་(Google Play Store) ཀྱང་རྒྱ་ནག་ནང་དུ་བཀག་འགོག་བྱས་ཡོད།

ཕྱི་ལོ་ ༢༠༢༢ ལོར་ཨ་རིར་གནས་སྡོད་མཚན་མཐུན་དགའ་རོགས་རྣམས་ཀྱི་དྲ་རྒྱ་གྲགས་ཅན་གྲིན་ཌར་(Grindr) ཞེས་པ་དེ་རྒྱ་ནག་གི་ཀུ་ཤུའི་མཉེན་མཛོད་ལས་ཕྱིར་འཐེན་བྱས་ཏེ། རྒྱ་ནག་གི་དྲ་རྒྱའི་བདག་སྐྱོང་ལས་ཁུངས་ཀྱིས་ནང་དོན་ཁྲིམས་འགལ་ཡིན་པས་འོས་འཚམ་མིན་ལུགས་བརྗོད་ནས་དམ་དྲག་བྱེད་མགོ་བཙུགས་རྗེས།  ཕྱི་ལོ་ ༢༠༢༣ ལོར་རྒྱ་ནག་གཞུང་གིས་ཀུ་ཤུ་དང་ཨེན་ཌོ་རོ་མ་ལག་གི་མཉེན་ཆས་ཚང་མར་ཆོག་མཆན་ཐོ་འགོད་བྱ་དགོས་པའི་སྒྲིག་གཞི་གསར་པ་གསལ་བསྒྲགས་ཏེ། ཕྱི་རྒྱལ་གྱི་མཉེན་ཆས་མང་པོ་མཉེན་མཛོད་ནས་ཕྱིར་འཐེན་བྱས་ཡོད།

ཕྱི་ལོ་ ༢༠༡༧ ལོར་རྒྱ་ནག་གཞུང་གིས་མཚན་མཐུན་དགའ་རོགས་འབྲེལ་འདྲིས་བྱེད་སའི་ (Zank) ཟེར་བའི་མཉེན་ཆས་དེའི་ནང་། འཆལ་སྤྱོད་ཀྱི་རྣམ་འགྱུར་དང་འབྲེལ་བའི་གནད་དོན་ཡོད་པའི་སྐྱོན་བརྗོད་བྱས་ཏེ་མཉེན་ཆས་དེ་བཀག་སྡོམ་བྱས་ཡོད་པ་དང་།  ཞི་ཅིན་ཕིན་གྱིས་སྣེ་འཁྲིད་པའི་རྒྱ་གཞུང་གིས་དྲ་ཐོག་གི་དཀྲོག་གཏམ་དང་ཆགས་སྤྱོད་ཀྱི་རིགས། རྨོངས་དད་ལ་སོགས་པར་སྟངས་འཛིན་བྱེད་ཀྱི་ཡོད་ལུགས་བརྗོད་ནས། ཆེད་དུ་ཨེལ་ཇི་བྷི་ཊིའི་སྤྱི་ཚོགས་དང་འབྲེལ་བའི་དྲ་ཐོག་གི་མཉེན་ཆས་དང་བྱེད་སྒོ་ཡོངས་སྒོ་རྒྱག་གི་ཡོད་པ་མ་ཟད། རྒྱ་ནག་ཏུ་ཡོད་པའི་རྒྱལ་སྤྱིའི་ཚོང་ལས་དང་ཁྲིམས་ཀྱི་ཁོར་ཡུག་སོགས་མེད་པར་བཟོས་ཏེ་ཨེལ་ཇི་བྷི་ཊི་སྤྱི་ཚོགས་ལ་དཀའ་ངལ་ལྷག་མ་འཕྲད་ཀྱི་ཡོད་སྐོར་སོགས་བརྗོད་འདུག

ཕྱི་ལོ་ ༡༩༩༧ ལོར་རྒྱ་ནག་གཞུང་གིས་མཚན་མཐུན་འཁྲིག་སྦྱོད་ནི་ཁྲིམས་འགལ་མིན་པར་ངོས་འཛིན་བྱས་ཡོད་ཅིང་། རྒྱལ་ཚོགས་ཀྱི་ལྷན་ཚོགས་སྐབས་རིམ་པར་རྒྱ་ནག་གཞུང་གིས་མཚན་མཐུན་དང་མ་ནིང་མ་ལོག་གི་ཐོབ་ཐང་ལ་རྒྱལ་སྐྱོར་བྱས་དང་བྱེད་མུས་ཡིན་པའི་ཁས་ལེན་བྱས་ཡོད་ཀྱང་། ད་ལྟ་ད་དུང་རྒྱ་ནག་ནང་མཚན་མཐུན་གཉེན་སྒྲིག་དང་མཚན་མཐུན་གྱི་སྤྱི་ཚོགས་ལ་ཁྲིམས་ཐོག་ནས་རྒྱབ་སྐྱོར་དང་ངོས་འཛིན་ཐོབ་མེད་པར་བརྟེན། ཁོ་ཚོར་ད་དུང་རང་དབང་ངང་རང་ཉིད་ཀྱི་བཟའ་ཟླ་འཚོལ་བའམ་མཚན་མཐུན་འཁྲིག་སྤྱོད་བྱེད་པའི་ཐོབ་ཐང་མེད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།