བོད་དོན་རྒྱབ་སྐྱོར་བ་སྐུ་ཞབས་རི་ཆ་ཌི་གྷེར་ལགས་བོད་དོན་ཞུ་གཏུག་གི་ཉིན་མོ་དང་བསྟུན་ཁེ་ན་ཌའི་ཨོ་ཊ་ཝ་གྲོས་ཚོགས་ནང་ཉན་ཞིབ་ལ་ཕེབས་ཏེ་བོད་ནང་གི་འགྲོ་བ་མིའི་ཐོབ་ཐང་མཚོན་པའི་བོད་དོན་གླེང་སློང་གནང་འདུག
ཁ་སང་ཕྱི་ཚེས་ ༡༧ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་མཆོག་སྐུ་ཞབས་རི་ཆ་ཌི་གྷེར་(Richard Gere) ལགས་བོད་དོན་ཞུ་གཏུག་གི་ཉིན་མོ་དང་བསྟུན། ཁེ་ན་ཌའི་ཨོ་ཊ་ཝ་གྲོས་ཚོགས་ནང་ཉན་ཞིབ་ལ་ཕེབས་ཏེ། བོད་ནང་གི་འགྲོ་བ་མིའི་ཐོབ་ཐང་དང་། རྒྱ་ནག་གཞུང་གིས་བོད་ནང་དམ་དྲག་བྱེད་མུས་ཡིན་པའི་གནད་དོན་སོགས་ཀྱི་ཐད་ཁེ་ན་ཌ་གྲོས་ཚོགས་ཀྱིས་གླེང་སློང་དགོས་སྐོར་སོགས་གསུངས་འདུག
བོད་དོན་རྒྱབ་སྐྱོར་བ་གྲགས་ཅན་སྐུ་ཞབས་རི་ཆ་ཌི་གྷེ་རེ་མཆོག་གིས། གལ་ཏེ་ཁྱེད་ཀྱིས་འཛམ་གླིང་ཡོངས་སུ་རྒྱ་ནག་གིས་བཟོས་པའི་གྲོས་མཐུན་དག་ལ་བལྟས་ན། དེ་དག་སུ་ལའང་ལེགས་པོ་བྱུང་མེད། དེར་བརྟེན། ངས་བལྟས་ན་ང་ཚོས་གྲོས་མཐུན་དེ་དག་ལ་དོགས་པ་ཆེན་པོ་བྱེད་ཐུབ། ང་རང་ཨ་རི་དང་ཁེ་ན་ཌའི་འབྲེལ་བར་སེམས་ཁྲལ་ཆེ་བ་ཡོད། ད་ལྟ་ཅུང་ཙམ་དཀའ་ངལ་ཡོད་ཀྱང་། ངས་འཛིན་སྐྱོང་འདི་རྟག་ཏུ་གནས་མི་སྲིད་པ་དྲན་གྱི་ཡོད། ཅེས་དང་། བོད་ནང་གི་འགྲོ་བ་མིའི་ཐོབ་ཐང་ལ་རྒྱབ་སྐྱོར་དང་བོད་རང་བཙན་ལས་འགུལ་ལ་རྒྱབ་སྐྱོར་བྱེད་པ་ཚུད་པའི་བོད་ནང་གི་དངོས་ཡོད་ཀྱི་གནས་བབ་རྒྱུས་ལོན་བྱ་དགོས་སྐོར་སོགས་གསུངས་ཡོད་འདུག
ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཇེམ་སི་ (James Maloney) མཆོག་གིས་གྲོས་ཚོགས་ཀྱི་དྲི་བ་དྲི་ལན་གྱི་དུས་སྐབས་ཤིག་ལ། བཀུར་འོས་སྐུ་ཞབས་ཚོགས་གཙོ། ལོ་འདིར་ང་ཚོས་༸གོང་ས་ཏཱ་ལའི་བླ་མ་མཆོག་དགུང་གྲངས་ ༩༠ ལ་ཕེབས་པའི་འཁྲུངས་སྐར་སྲུང་བརྩི་ཞུ་བཞིན་ཡོད། ༸གོང་ས་རྒྱལ་བ་རིན་པོ་ཆེ་མཆོག་གིས་དེ་སྔའི་སྲིད་བློན་ལེ་སི་ཊར་པར་སོན་(Lester Pearson) ལ་ཞུ་སྐུལ་གནང་བ་ལྟར། ཕྱི་ལོ་ ༡༩༧༠ ལོའི་ཟླ་ ༡༠ ཚེས་ ༡༥ ཉིན་བོད་མི་སྐྱབས་བཅོལ་བ་རྣམས་ཁེ་ན་ཌར་འབྱོར་ཏེ་ལོ་ངོ་ ༥༥ ལྷག་ཙམ་འགྲོ་བཞིན་ཡོད། དེ་ནས་བཟུང་བོད་མི་ཁེ་ན་ཌ་བ་ཚོས་ཁེ་ན་ཌའི་དཔལ་འབྱོར་དང་། སྤྱི་ཚོགས། རྒྱལ་ཁབ་ཀྱི་སྤྱི་ཚོགས་ལ་ཞབས་འདེགས་ཞུ་བཞིན་ཡོད། ཅེས་གསུངས་འདུག
ཡང་ཁོང་གིས། ༸གོང་ས་རྒྱལ་བ་རིན་པོ་ཆེ་མཆོག་གི་ཤུགས་རྐྱེན་ནི་རྒྱ་ཆེ་བ་དང་། ཁོང་གི་ཞི་བདེ་དང་། འཚེ་མེད་ཞི་བ། མཐུན་སྒྲིལ་དང་བདེ་སྐྱིད་འཚོལ་བའི་བཀའ་སློབ་ཀྱིས་འཛམ་གླིང་འདི་ཡག་ཏུ་གཏོང་བཞིན་ཡོད། འགྲོ་བ་མིའི་ཐོབ་ཐང་རྩོད་ལེན་པ་དག་གིས། ཕྱི་ལོ་ ༡༩༥༩ ལོར་༧གོང་ས་ཏཱ་ལའི་བླ་མ་མཆོག་དང་བོད་མི་སྟོང་ཕྲག་མང་པོ་རྒྱ་ནག་དམར་ཤོག་ཚོགས་པས་བོད་ས་བཙན་བཟུང་བྱས་རྗེས་བཙན་བྱོལ་དུ་འགྲོ་དགོས་བྱུང་བ་རྗོད་ཀྱི་ཡོད། ངས་དེ་རིང་གྲོས་ཚོགས་ར་བའི་ནང་བོད་དོན་ཞུ་གཏུག་ཉིན་མོ་སྲུང་བརྩི་བྱེད་པར་ཡོང་མཁན་རྣམས་ལ་དགའ་བསུ་ཞུས་པ་དང་། དེ་ནི་བོད་མིའི་ཐོབ་ཐང་དང་རང་དབང་ཆེད་དུ་རྒྱབ་སྐྱོར་བྱེད་པའི་ལོ་འཁོར་གྱི་བྱེད་སྒོ་ཞིག་རེད། ཅེས་གསུངས་འདུག
ཕྱི་ལོ་ ༢༠༢༢ ལོར་ཁེ་ན་ཌ་སྲིད་གཞུང་གིས་བོད་རྒྱ་ཞི་མོལ་དང་བོད་ནང་གི་གནས་བབ་ཐད་ཀྱི་ཡིག་ཆ་ཨང་ ༠༠༠༥༠ ཅན་ཞིག་སྤེལ་བའི་ཁྲོད། ཁེ་ན་ཌས་བོད་ནི་རྒྱ་ནག་གི་ནང་དུ་རིག་གཞུང་གི་ངོ་བོ་ཐུན་མོང་མ་ཡིན་པ་ལྡན་པའི་ས་ཁུལ་ཞིག་ཡིན་པར་ངོས་འཛིན་བྱེད་ཀྱི་ཡོད། བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་ཤུགས་རྐྱེན་ཐེབས་པའི་ཐད་སེམས་ཁུར་ཆེན་པོ་བྱེད་ཀྱི་ཡོད། དེའི་ནང་དུ་རང་དབང་གི་བསམ་བློ་དང་ཆོས་དད་རང་དབང་ལ་བཀག་སྡོམ་བྱེད་པ་དང་། སྐད་ཡིག་དང་རིག་གཞུང་གི་ཐོབ་ཐང་སྲུང་སྐྱོབ་བྱེད་པ་བཅས་ཚུད་ཡོད། ཁེ་ན་ཌའི་དཔོན་རིགས་ཚོས་རྒྱ་ནག་གི་འགན་འཁུར་མཁན་ཚོ་དང་མཉམ་དུ་སྤྱི་དང་སྒེར་གཉིས་ཀའི་ཐོག་ནས་བོད་མི་ཚོར་སེམས་ཁུར་བྱེད་པ་དང་། བཙོན་པ་རྣམས་ཀློད་གྲོལ་གཏོང་བ། བོད་ཀྱི་ས་ཁུལ་དུ་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་བའི་ཆེད་དུ་བོད་མི་ཚོའི་ཐོབ་ཐང་ལ་བརྩི་བཀུར་བྱེད་པའི་ཐད་ལ་སེམས་ཁུར་མུ་མཐུད་དུ་བྱེད་ཀྱི་ཡོད། རྒྱ་ནག་གཞུང་དང་༧གོང་ས་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་བར་དུ་ཕན་ཚུན་གཉིས་ཀར་དོན་སྙིང་ལྡན་པ་དང་དོན་དངོས་ཀྱི་གྲོས་མོལ་བྱེད་པར་རྒྱབ་སྐྱོར་བྱེད་ཀྱི་ཡོད། ཁེ་ན་ཌས་༧གོང་ས་ཏཱ་ལའི་བླ་མ་མཆོག་གི་དབུ་མའི་ལམ་གྱི་ཐབས་ལམ་ལ་བསྔགས་བརྗོད་དང་། ཁོང་ནི་ཆོས་ཀྱི་དབུ་ཁྲིད་གལ་ཆེན་ཞིག་དང་། ནོ་བྷེལ་ཞི་བདེའི་གཟེངས་རྟགས་འཐོབ་མཁན། ཁེ་ན་ཌའི་མི་སེར་གྱི་གཟེངས་བསྟོད་འཐོབ་མཁན་ཞིག་ཡིན་པར་ངོས་འཛིན་བྱེད་ཀྱི་ཡོད། ཅེས་གསལ་འདུག
གློག་བརྙན་འཁྲབ་སྟོན་པ་སྐུ་ཞབས་རི་ཆར་ཌི་གྷེར་ལགས་ནི། བོད་བརྒྱུད་ནང་བསྟན་ལ་དད་མོས་བྱེད་མཁན་ཞིག་དང་དུས་རྟག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་པོ་ཡིན་པ་མ་ཟད། ཕྱི་ལོ་ ༢༠༠༨ ལོར་རྒྱ་ནག་ནང་ཨོ་རྩེད་འགྲན་ཚོགས་མ་ཚོགས་པའི་ཡར་སྔོན་ཏུ་རྒྱ་ནག་གཞུང་གིས་བོད་ནང་དྲག་གནོན་མཚམས་འཇོག་དང་བོད་ལ་རང་བཙན་སྤྲད་དགོས་པའི་ཐད་རྒྱལ་སྤྱིའི་སྤྱི་ཚོགས་ལ་འབོད་སྐུལ་གནང་བ་དང་། ལོ་དེར་བོད་དོན་དྲིལ་བསྒྲགས་ཀྱི་ལས་འགུལ་ཐེངས་མང་སྤེལ་ཡོད་ལ། བོད་ཀྱི་ནང་གི་འགྲོ་བ་མིའི་ཐོབ་ཐང་ལ་དོ་སྣང་དང་མཉམ་འབྲེལ་རྒྱལ་ཚོགས་སོགས་སུ་སྐད་གསེང་མཐོན་པོས་བོད་ཀྱི་བདེན་དོན་གླེང་སློང་གནང་བ་ཉུང་ཉུང་མིན་ལ། དམིགས་བསལ་འདས་པའི་ལོ་ངོ་མང་པོའི་རིང་རྒྱལ་སྤྱིའི་བོད་དོན་ལས་འགུལ་ཁང་དུ་ཕྱག་ལས་གནང་སྟེ། བོད་ནང་འགྲོ་འོང་འདྲ་མཉམ་དང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སོགས་ལ་དངོས་ཤུགས་བརྒྱུད་གསུམ་ཐོག་ནས་རྒྱབ་སྐྱོར་ཤུགས་ཆེན་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
