བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་ལོ་རྒྱུས་ཀྱི་ཉམས་མྱོང་འཁྱེར་ནས་མ་འོངས་པའི་རང་དབང་འཐབ་རྩོད་ནང་མདུན་སྐྱོད་བྱ་རྒྱུ་གལ་ཆེན་པོ་ཡིན་སྐོར་བརྗོད་སོང་།
དེ་རིང་ཕྱི་ཚེས་ ༥ ཉིན་གྱི་སྔ་དྲོའི་ཆུ་ཚོད་ ༡༠ པར་དྷ་ས་ས་གནས་མགོ་འཛིན་གྱི་ཚོགས་ཁང་དུ། བོད་ཀྱི་བུད་མེད་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག ཕྱི་ལོ་ ༡༩༩༥ ལོར་རྒྱ་ནག་གི་པེ་ཅིང་དུ་རྒྱལ་ཚོགས་ཀྱི་བུད་མེད་ཚོགས་ཆེན་ཐེངས་བཞི་པའི་སྐབས་བཙན་བྱོལ་བུད་མེད་དགུས་སྨྲ་བརྗོད་རང་དབང་དང་ལྟ་རྟོག་ཁྲིམས་སྲོལ་རྡོག་རོལ་གཏོང་བཞིན་པར་ངོ་རྒོལ་གསལ་སྟོན་བྱས་ནས་ལོ་ངོ་ ༣༠ འཁོར་བའི་དུས་དྲན་སྲུང་གཙི་ཞུས་སོང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། སྤྱི་ཟུར་ངག་དབང་ལྷ་མོ་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས། གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ། དེ་བཞིན་དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག
ཐེངས་འདིའི་དུས་དྲན་དང་འབྲེལ་བའི་སྐོར་ལ་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་འདི་གའི་གསར་འགོད་པར། དེ་རིང་ཕྱི་ལོ་ ༡༩༩༥ ལོར་རྒྱ་ནག་གི་པེ་ཅིང་དུ་རྒྱལ་ཚོགས་ཀྱི་བུད་མེད་ཚོགས་ཆེན་ཐེངས་བཞི་པའི་སྐབས་སུ་བོད་ཀྱི་བུད་མེད་ཀྱི་སྐུ་ཚབ་དགུ་བཅར་ཐུབ་པ་བྱུང་བ་རེད། དེ་ནི་ལོ་རྒྱུས་ཐོག་བསྡད་དགོས་པའི་གལ་གནད་ཅིག་ཆགས་ཡོད། རྒྱ་ནག་ནང་ཚོགས་འདུ་འདྲ་མིན་འཚོགས་ཡོད་ཀྱང་། བཙན་བྱོལ་ནང་གི་བོད་པ་རྣམས་མཉམ་ཞུགས་བྱེད་པའི་གོ་སྐབས་རག་གི་མེད་པས། བོད་ནང་གི་དཀའ་ངལ་གང་ཡོད་མེད་བཤད་ཐུབ་ཀྱི་ཡོད་པ་མ་རེད། འདི་དང་འདི་འདྲ་བའི་ཚོགས་འདུའི་གོ་སྐབས་ལེན་རྒྱུ་གལ་ཆེན་པོ་རེད། དེ་བཞིན་འཛམ་གླིང་གི་རྒྱལ་ཁབ་འདྲ་མིན་ནང་དུ་ཁོར་ཡུག་དང་འགྲོ་བ་མིའི་ཐོབ་ཐང་སོགས་ཀྱི་མཚོན་པའི་བརྗོད་གཞི་འདྲ་མིན་ཐོག་ཚོགས་འདུ་འཚོགས་ཡོད། བཙན་བྱོལ་བོད་མི་རྣམས་ལ་མཚོན་ན་ཚོགས་འདུ་དེ་དག་གལ་ཆེན་པོ་ཆགས་ཡོད། ང་ཚོ་རང་དབང་ལུང་པའི་ནང་ཡོད་དུས་སྐད་ཆ་བཤད་པའི་གོ་སྐབས་ཡོད་པ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ང་ཚོ་སློབ་སྦྱོང་ཐོབ་ཡོད། རྒྱལ་ཁབ་གང་གི་སྐད་རིགས་ཐོག་ནས་སྐད་ཆ་བཤད་ཐུབ་པའི་མཐུན་རྐྱེན་ཡོད། རྒྱལ་སྤྱིའི་ཚོགས་འདུ་ཁག་ཏུ་མཉམ་ཞུགས་བྱེད་པའི་ཐབས་ཤེས་བྱ་རྒྱུ་གལ་ཆེན་པོ་རེད། རྒྱལ་ཁབ་མང་པོའི་སྐུ་ཚབ་འཛོམས་པའི་ཚོགས་འདུ་ཐོག་ཏུ་མཉམ་ཞུགས་བྱ་ཐུབ་ཚེ་རྒྱབ་སྐྱོར་ཐོབ་རྒྱུ་ཕན་ཐོགས་ཆེན་པོ་ཡོད། ཅེས་འགྲེལ་བརྗོད་གནང་བྱུང་།
པེ་ཅིང་གི་རྒྱལ་ཚོགས་ཚོགས་ཆེན་ཐོག་ངོ་རྒོལ་གྱི་གལ་གནད་སྐོར་ལ་སྤྱི་ཟུར་ངག་དབང་ལྷ་མོ་ལགས་ཀྱིས་འདི་གའི་གསར་འགོད་པར། ང་ཚོས་ཕྱི་རྒྱལ་ཁག་ཏུ་བོད་དོན་ལས་འགུལ་སྤེལ་བཞིན་ཡོད་ཀྱང་། རྒྱ་ནག་ནང་དུ་བོད་དོན་ཐོག་ལས་འགུལ་སྤེལ་ཐུབ་ཀྱི་ཡོད་པ་མ་རེད། ཕྱི་ལོ་ ༡༩༩༥ ལོར་པེ་ཅིང་གི་རྒྱལ་ཚོགས་ཀྱི་བུད་མེད་ཚོགས་ཆེན་ཐོག་བོད་དོན་ལས་འགུལ་སྤེལ་ཐུབ་ཡོད་ལ། ཕྱི་རྒྱལ་གྱི་སྐུ་ཚབ་རྣམས་ལ་བོད་ཀྱི་དཀའ་ངལ་བཤད་པ་དངོས་ཡོད་གནས་ཚུལ་ཡིན་པ་ངོ་སྤྲོད་བྱུང་སྟེ། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྙན་ཐོ་ནང་དུ་བཀོད་ཐུབ་པ་བྱུང་བ་རེད། དེ་ཡང་རྒྱ་ནག་ནང་དུ་འགྲོ་བ་མིའི་ཐོབ་ཐང་མེད་པ་མ་ཟད། བོད་ཀྱི་ཆོས་དང་རིག་གཞུང་། དེ་བཞིན་བོད་མི་རིགས་རྩ་མེད་གཏོང་བཞིན་ཡོད་པའི་གནས་སྟངས་དེ་རྒྱལ་སྤྱིའི་ཐོག་བསྒྲགས་ཐུབ་པ་བྱུང་བ་རེད། དེང་སྐབས་ཀྱང་འཛམ་གླིང་ཐོག་བོད་པའི་གནས་སྟངས་ཧ་མ་གོ་བ་མང་པོ་ཡོད་པས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། བོད་ནང་གི་ཛ་དྲག་ཆེ་བའི་གནས་སྟངས་ཐོག་རྒྱལ་སྤྱིའི་སྡིངས་ཆའི་ཐོག་མཉམ་རུབ་ཀྱི་ལས་འགུལ་སྤེལ་རྒྱུ་གལ་ཆེན་པོ་རེད། ཅེས་འགྲེལ་བརྗོད་གནང་བྱུང་།
སྐབས་དེར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། ལོ་ངོ་ ༣༠ དུས་དྲན་ལ་ཕྱིར་བལྟས་བྱེད་དུས། འདི་ནི་བཙན་བྱོལ་ནང་བོད་ཀྱི་རང་དབང་འཐབ་རྩོད་ཀྱི་ལོ་རྒྱུས་ཀྱི་གནད་འགག་ཅིག་ཆགས་ཀྱི་འདུག དེ་ཡང་བུད་མེད་ཙམ་མ་ཡིན་པར་བོད་རྒྱ་ཆེའི་མི་མང་གི་ཚབ་བྱས་ཏེ། རྒྱ་ནག་ནང་བོད་ཀྱི་གནད་དོན་ཐོག་གདོང་དང་གདོང་ཐུག་ནས་སྐད་ཆ་བཤད་རྒྱུ་ལས་སླ་བོ་མ་རེད། དེའི་བརྒྱུད་རིམ་ནང་དུ་དཀའ་ངལ་མང་པོ་ཞིག་འཕྲད་ཡོད་པ་རེད། དེའི་ཐོག་ལ་རྒྱལ་སྤྱིའི་ཐོག་ནས་སྙན་ཐོ་རིང་པོ་ཞིག་བྲིས་འདུག ལོ་རྒྱུས་ཀྱི་བྱུང་བ་དེ་ཡི་རངས་ཞུ་དགོས་པ་ཞིག་རེད། ཡིན་ནའང་། མ་འོངས་པར་ང་ཚོས་ལོ་རྒྱུས་ཉམས་མྱོང་འཁྱེར་ནས་རང་དབང་འཐབ་རྩོད་ནང་མདུན་སྐྱོད་བྱ་རྒྱུ་གལ་ཆེན་པོ་ཞིག་ཆགས་ཡོད། ཅེས་དང་། དེ་བཞིན་དུས་ཚོད་ཀྱི་འགྱུར་བ་དང་མཐུན་པའི་ཐོག་ནས་རང་དབང་འཐབ་རྩོད་ཀྱི་འབྲས་བུ་བཟང་ཤོས་ཤིག་ཐོབ་པར་རིག་པ་གཏོང་རྒྱུ་གལ་ཆེན་པོ་ཡིན་སྐོར་བརྗོད་སོང་།
ཕྱི་ལོ་ ༡༩༩༥ ལོར་རྒྱ་ནག་གི་རྒྱལ་ས་པེ་ཅིང་རྒྱལ་ཚོགས་ཀྱི་བུད་མེད་ཚོགས་ཆེན་ཐེངས་བཞི་པའི་སྐབས། བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་བཙན་བྱོལ་གྱི་བུད་མེད་དགུ་མཉམ་ཞུགས་བྱས་ཐུབ་ཡོད་པའི་ཁྲོད། ཁེ་ན་ཌ་ནས་རྒྱལ་སྟོང་ཚེ་རིང་སྒྲོལ་མ་དང་ཁེ་རོལ་བསལ་གྲུབ། བསྟན་འཛིན་སྒྲོལ་དཀར་སྦྱིན་པ། ཨ་རི་ནས་འཆི་མེད་དོན་ལྡན་དང་གཡུ་སྒྲོན་དོན་ལྡན། ཕུན་ཚོགས་སྒྲོལ་མ། ཨོ་སི་ཊོ་ལི་ཡ་ནས་སྐལ་བཟང་དབང་མོ་དང་རྡོ་རྗེ་སྒྲོལ་མ་ཁེ་རེལ། ནོར་ཝེ་ནས་མཚོ་མོ་རྣམ་རྒྱལ་བཅས་ཡོད་འདུག སྐབས་དེར་རྒྱལ་ཁབ་ ༡༨༠ ནས་གཞུང་དང་གཞུང་ཁོངས་མིན་པའི་ཚོགས་བཅར་བ་ ༦༠༠ དང་། གསར་འགོད་པ་ ༢༠༠༠ ལྷག་འཛོམས་ཡོད་འདུག་ལ། དོན་ཚན་གསུམ་གྱི་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་། དང་པོ། གཞིས་ལུས་བོད་ཀྱི་བུད་མེད་ཀྱི་སྐྱེ་སྒོ་རྩ་འགོག་དང་། སྦྲུམ་ལྡན་བུད་མེད་ཀྱི་མངལ་གྱི་ཕྲུ་གུ་གསོད་པ་དང་བཏོན་པ་བཅས་བོད་ཀྱི་བུད་མེད་ཀྱི་འཕྲོད་བསྟེན་ཧ་ཅང་ཉམས་ཞན་ཡིན་པ། གཉིས་པ། བུད་མེད་འགའ་དོན་མེད་འཛིན་བཟུང་བྱས་ཏེ་བཙོན་ཁང་ནང་བཙན་གཡེམ་བྱེད་པ་སོགས་བུད་མེད་ལ་དམིགས་བསལ་མནར་གཅོད་གཏོང་བ། གསུམ་པ། བོད་ནང་རྡུལ་ཕྲན་མཚོན་ཆའི་ཚོད་ལྟ་བྱེད་པ་དང༌། རྒྱལ་ཁབ་གཞན་གྱི་རྡུལ་ཕྲན་མཚོན་ཆའི་སྙིགས་རོ་གཡུག་སྟེ་ཁོར་ཡུག་ཧ་ཅང་ཉམས་ཞན་གཏོང་གི་ཡོད། ཅེས་བཀོད་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།
