ཨོ་གླིང་གི་གྲོས་ཚོགས་གོང་མའི་འཐུས་མི་བྷར་བྷ་ར་ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་ལ་གྷི་རེ་མི་ཡི་གཟེངས་རྟགས་ཐོབ་པར་འཚམས་འདྲི་ཞུས་ཡོད་འདུག
ཁ་སང་ཕྱི་ཚེས་ ༣ ཉིན་གྱི་དགོང་མོར་ཨོ་གླིང་གི་གྲོས་ཚོགས་སུ་གྲོས་ཚོགས་གོང་མའི་འཐུས་མི་བྷར་བྷ་ར་ (Barbara Pocock) ལགས་ཀྱིས། དེ་རིང་༸གོང་ས་མཆོག་གི་སྐོར་ལ་སྐད་ཆ་བཤད་རྒྱུ་བྱུང་བ་དང་། ཉེ་ཆར་དྷ་རམ་ས་ལར་ཕྱིན་ནས་༸གོང་ས་མཆོག་ལ་མཇལ་བཅར་ཞུ་རྒྱུའི་གོ་སྐབས་བྱུང་བ། བོད་མིའི་སྒྲིག་འཛུགས་སུ་སྐོར་སྐྱོད་བྱས་པ་སོགས་ནི་གཟི་བརྗིད་ཅིག་ལ་ངོས་འཛིན་གྱི་ཡོད། དེ་རིང་གྲོས་ཚོགས་ར་བའི་ནང་ཀརྨ་སེངྒེ་ལགས་ཀྱི་མདུན་ནས་སྐད་ཆ་བཤད་རྒྱུ་བྱུང་བར་དགའ་སྤོབས་ཡོད། འཛམ་གླིང་ནང་སྙན་གྲགས་ཆེ་བའི་གྷི་རེ་མི་རྒྱལ་སྤྱིའི་རོལ་དབྱངས་གཟེངས་རྟགས་སྤྲོད་པའི་མཛད་སྒོ་སྐབས་ ༦༨ པ་འཚོགས་ཡོད་ཅིང་། སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་གི་བྱམས་སྙིང་རྗེ་དང་ཞི་བདེའི་གསུང་སྐད་ལྡན་པའི་རོལ་དབྱངས་ཤིག་ལ་གྷི་རེ་མི་ཡི་གཟེངས་རྟགས་ཐོག་མ་དེ་ཐོབ་ཡོད་པ་རེད། ཅེས་གསུངས་འདུག
གྲོས་ཚོགས་གོང་མའི་འཐུས་མི་བྷར་བྷ་ར་ལགས་ཀྱིས། བྱམས་སྙིང་རྗེ་དང་ཞི་བདེའི་གསུང་སྐད་ལྡན་པའི་རོལ་དབྱངས་ཤིག་ལ་གཟེངས་རྟགས་ཐོབ་པ་ཙམ་མིན་པར། ཕྱི་ལོ་ ༡༩༥༩ ལོར་༸གོང་ས་མཆོག་བོད་ནས་རྒྱ་གར་བཙན་བྱོལ་དུ་ཕེབས་ཏེ་འགྲོ་བ་མིའི་ཐོབ་ཐང་གི་ཆེད་དུ་ཕྱག་ལས་གནང་བ་སོགས་འཛམ་གླིང་ཁྱོན་ཡོངས་ཀྱིས་ངོས་འཛིན་བྱེད་ཀྱི་ཡོད། ༸གོང་ས་རྒྱལ་བ་རིན་པོ་ཆེ་མཆོག་ལ་གྷི་རེ་མི་ཡི་གཟེངས་རྟགས་ཐོབ་པར་འཚམས་འདྲི་ཞུ་རྒྱུ་ཡིན། ཞེས་གསུངས་འདུག
ཡང་བྷར་བྷ་ར་ལགས་ཀྱིས། རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་སོགས་ཆབ་སྲིད་ཀྱི་ལག་ཆ་ལྟ་བུར་བེད་སྤྱད་དེ། རྒྱ་ནག་གཞུང་གིས་གཟེངས་རྟགས་དེ་རྒྱ་ནག་ལ་ངོ་རྒོལ་བྱེད་པའི་ཆབ་སྲིད་ཀྱི་གཡོལ་ཐབས་ཤིག་ཡིན་སྐོར་བརྗོད་དེ་སྐྱོན་བརྗོད་ཤུགས་ཆེན་བྱེད་བཞིན་ཡོད་ཀྱང་། ༸གོང་ས་མཆོག་གི་བྱམས་སྙིང་རྗེ་དང་ཞི་བདེའི་གསུང་སྐད་ལྡན་པའི་རོལ་དབྱངས་ལ་ཉན་མཁན་སུ་འདྲ་ཞིག་གིས་རྒྱ་ནག་གིས་སྐྱོན་བརྗོད་བྱས་པ་དེ་རྒྱུ་མཚན་ལྡན་པ་ཞིག་མེད་པ་ཤེས་ཐུབ་ལ། བོད་ཀྱི་ལོ་རྒྱུས་དང་། ༸མགོན་པོ་གང་ཉིད་མཆོག་གིས་བོད་ནང་དམངས་གཙོ་གོང་འཕེལ་གཏོང་བའི་ཆོད་སེམས་སྐོར་ཤེས་རྟོགས་ཡོད་མཁན་ཚོས། རྒྱ་གཞུང་གིས་བོད་མིའི་སྨྲ་བརྗོད་རང་དབང་དང་། རང་དབང་སོགས་རྩིས་མེད་རྡོག་རོལ་གཏོང་གི་ཡོད་པ་ཤེས་ཐུབ། ཅེས་འགྲེལ་བརྗོད་གནང་འདུག
༸གོང་ས་མཆོག་གི་རོལ་དབྱངས་བརྩམས་ཆོས་དེ་ནི། འཇིག་རྟེན་ཀུན་ཁྱབ་ཀྱི་འགན་འཁྲི་དང་ཞི་གནས། བྱམས་བརྩེ་དང་ཞི་བདེ་སོགས་༸གོང་ས་མཆོག་གི་བཀའ་སློབ་ཀྱི་སྙིང་བོ་དག་གཞས་དབྱངས་གསར་པ་བརྒྱུད་ནས་མི་རྣམས་ལ་སྐུལ་མ་གཏོང་གི་ཡོད་པ་ཞིག་ཡིན་འདུག་ལ། རོལ་དབྱངས་བརྩམས་ཆོས་དེའི་ནང་དུ་ཆུ་ཚོད་ ༡༠༠ ལྷག་གི་༸གོང་ས་མཆོག་གི་བཀའ་སློབ་དང་གསུང་བཤད་སོགས་སྒྲ་འཇུག་བྱས་ཡོད་པ་རེད།
༸གོང་ས་མཆོག་གི་རོལ་མོའི་བརྩམས་ཆོས་དེ་ཕྱི་ལོ་ ༢༠༢༥ ཟླ་ ༨ པའི་ནང་ཐོག་མར་འགྲེམས་སྤེལ་བྱས་པ་དང་། འདས་ལོའི་ཟླ་ ༡༡ ནང་གྷི་རེ་མི་ཡི་གཟེངས་རྟགས་ཀྱི་འོས་གཞིའི་ཁོངས་སུ་ཚུད་ཡོད། བརྩམས་ཆོས་དེ་ནི་ཕྱི་ལོ་ ༢༠༠༩ ཙམ་ནས་རྒྱ་གར་གྱི་རོལ་མོའི་སྒྱུ་རྩལ་བ་ཨམ་ཇཱ་ཨ་ལི་ཁན་ (Amjad Ali Khan ) ལགས་དང་ཀ་བྷིར་སེ་གྷལ་(Kabir Sehgal) ལགས་གཉིས་ཀྱིས་བཟོ་བསྐྲུན་བྱེད་མགོ་བཙུགས་པ་ཞིག་ཡིན་འདུག
གསར་འགོད་པ། བསྟན་འཛིན་ཕུར་བུ།
