དེང་སང་རྒྱ་ནག་གཞུང་གི་ལས་བྱེད་ཡིན་པའི་བོད་མི་ཚོའི་ཁྱིམ་མི་འདས་གྲོས་སུ་གྱུར་བ་ཡིན་ནའང་ཆོས་ཕྱོགས་ཀྱི་བྱེད་སྒོར་ཞུགས་ཆོག་གི་མེད་སྐོར་བརྗོད་བྱུང་།
ལོ་ལྟར་བོད་ཀྱི་ལོ་སར་སྐབས་རྒྱ་ནག་གཞུང་གིས་བོད་ཁུལ་ཡོངས་སུ་དམ་དྲག་དོགས་གཟོན་སྔར་ལྷག་བྱེད་བཞིན་ཡོད་པ་ལྟར། བོད་ཀྱི་རྒྱལ་ས་ལྷ་སར་གནས་སྡོད་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ལོ་སར་སྐབས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཁུལ་དུ་དམག་མི་ཕོན་ཆེན་འགྲེམས་འཇོག་བྱས་ཏེ། བོད་མི་རྣམས་གཙུག་ལག་ཁང་དང་པོ་ཏ་ལའི་ནང་མཆོད་མཇལ་དུ་འགྲོ་བར་དམ་དྲག་དང་ཞིབ་བཤེར་ནན་མོ་བྱས་ཡོད་པ་མ་ཟད། སྲིད་གཞུང་གི་ལས་བྱེད་ཡིན་པའི་བོད་མི་རྣམས་དགོན་པ་སོགས་ཀྱི་ནང་སྤྲོ་འཆམ་དང་ལྟ་སྐོར་དུ་འགྲོ་ཆོག་གི་ཡོད་ཀྱང་། མཆོད་མཇལ་དང་ཕྱག་འཚལ་བ་སོགས་དད་མོས་བྱེད་མི་ཆོག གལ་སྲིད་གཞུང་གི་ལས་བྱེད་ཅིག་གིས་དད་མོས་བྱས་ཚེ་དམར་ཤོག་ཚོགས་པའི་ཁྲིམས་སྒྲིག་དང་འགལ་གྱི་ཡོད་པའི་ཉེན་བརྡ་བཏང་འདུག
འབྲེལ་ཡོད་བོད་མི་དེས་འདི་གའི་གསར་འགོད་པར། རྒྱ་ནག་གཞུང་གི་ལས་བྱེད་ཚོ་ཆོས་ཕྱོགས་ཀྱི་བྱེད་སྒོ་ཁག་ལ་ཞུགས་པར་སྨྲོས་ཅི་ལ་དགོས། རང་གི་ནང་མི་ཞིག་འདས་གྲོངས་སུ་གྱུར་ཀྱང་བདུན་ཚིགས་དང་འདས་མཆོད་སྐབས་སུ་མཉམ་ཞུགས་བྱེད་ཆོག་གི་མེད་པ་དང་། མཐའ་ན་ཕུང་པོ་མེར་སྲེག་གམ་དགོན་པ་སོགས་སུ་དུར་ལས་བྱེད་སྐབས་ཀྱང་མཉམ་ཞུགས་བྱ་ཆོག་གི་མེད་སྐོར་བརྗོད་བྱུང་།
རྒྱ་ནག་དམར་གཞུང་གི་དམ་དྲག་འོག བོད་ནང་གི་བོད་མི་ཚོས་མི་སྒེར་གྱི་སྤྱི་ཚོགས་དྲ་ལམ་ཁག་ཏུ་ལོ་སར་གྱི་སྨོན་འདུན་རིགས་མང་པོ་སྤེལ་བའི་ནང་དུ། བོད་ཀྱི་རྒྱལ་ས་ལྷ་སའི་པོ་ཏ་ལའི་མདུན་དང་བར་སྐོར་ནང་དུ་བོད་མི་སྟོང་ཕྲག་མང་པོ་འཛོམས་པའི་པར་རིས་བཞག་སྟེ། ང་ཚོའི་ཕ་གཞིས་བདེ་ཞིང་སྐྱིད་པར་སྨོན། ཞེས་པ་དང་། ཡང་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་གཉིས་ཐལ་མོ་སྦྱར་བའི་སྐུ་པར་བཞག་སྟེ། བོད་ཀྱི་སྐད་ཡིག་གི་མེ་སྟག་ཕྱོགས་བཞིར་ཁྱབ་པ་དང་། ཡིད་བཞིན་ནོར་བུའི་སྐུ་ཚེ་བརྟན་པར་སྨོན། ཞེས་བྲིས་པ་ཞིག་འདི་གའི་གསར་འགོད་པས་ལག་གསོན་བྱུང་ཡོད་ཀྱང་། བོད་ནང་གི་བོད་མི་རྣམས་ཀྱི་བདེ་འཇགས་སླད་འདིར་སྤེལ་མེད།
དེ་བཞིན་ཕྱི་ལོ་ ༢༠༢༣ ལོའི་ལོ་སར་དང་བསྟུན་རྒྱ་ནག་གཞུང་གིས་ལྷ་སའི་ཁུལ་དུ་དམག་མི་སྔར་ལས་མང་པོ་འགྲེམས་འཇོག་བྱས་ཡོད་པ་མ་ཟད། ལྷ་སའི་བར་སྐོར་གཙོ་བོར་གྱུར་བའི་ས་ཚིགས་ཁག་ཏུ་གསང་བའི་བརྙན་མིག་སྔར་ལས་མང་བ་གསར་དུ་བཙུགས་ཏེ། བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་ལྟ་ཞིབ་དང་དོགས་ཟོན་ནན་པོ་བྱས་ཡོད་ལ། ལྷ་ས་གྲོང་ཁྱེར་ཁུལ་དུ་དམག་མི་མང་པོ་འགྲེམས་འཇོག་བྱས་ནས་བོད་མི་རྣམས་གང་བྱུང་འབོད་འགུག་བྱས་ཏེ་ཁ་པར་སོགས་ཀྱི་ནང་སྔོག་བཤེར་དང་ཞིབ་བཤེར་ནན་པོ་བྱས་ཡོད་ལ། སྐབས་དེར་ལྷ་ས་གྲོང་ཁྱེར་འགྲིམ་འགྲུལ་སྐྱེལ་འདྲེན་ཕྱོགས་བསྡུས་ཁྲིམས་འཛིན་རུ་ཁག་ཟེར་བས། བོད་ཀྱི་ལོ་སར་སྐབས་བྱ་ཐབས་སྣ་ཚོགས་སྤྱད་དེ་ཁྲིམས་འགལ་ངང་སྐྱེལ་འདྲེན་བྱེད་ཀྱི་ཡོད་ལུགས་བཤད་ནས། ལྷ་ས་རྒྱ་ཆེའི་གྲོང་མི་ཚོར་བདེ་འཇགས་དང་། ཤེས་དཔལ། གོ་རིམ་ལྡན་པའི་འགྲིམ་འགྲུལ་སྒྲིག་ལམ་ཡར་རྒྱས་གཏང་རྒྱུ་ཡིན་ལུགས་བསྒྲགས་ནས། ཁྱོན་རླངས་འཁོར་ ༥༩༣ ལ་སྔོག་བཤེར་བྱས་ཏེ། རྒྱ་སྒོར་ཁྲི་ ༣༢ ལྷག་གི་ཆད་པ་བཅད་ཡོད་ལུགས་བསྒྲགས་ཡོད།
ཕྱི་ལོ་ ༢༠༢༦ ལོའི་ལོ་སར་དང་བསྟུན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་ཏང་ཡོན་ལས་བྱེད་པ་ཡུལ་གྲོགས་དང་སློབ་གྲོགས་ཀྱི་འདུ་འཛོམས་ལ་ཞུགས་མི་ཆོག་པ་སོགས་བྱེད་མི་རུང་བ་བརྒྱད་ཅེས་པའི་བཀའ་རྒྱ་ཞིག་བསྒྲགས་ཡོད་ཅིང་། དམར་ཤོག་ལས་བྱེད་པས་ལོ་སར་སྐབས་བྱེད་མི་ཆོག་པ་བརྒྱད་ནི། གཅིག སྒྲིག་སྲོལ་ལས་འགལ་ཏེ་གཞུང་དངུལ་སྤྱད་ནས་བཟའ་བཏུང་དང་། ཡུལ་སྐོར། མཐོ་རིམ་འཛད་སྤྱོད་རོལ་རྩེད་ལུས་སྦྱོང་བྱེད་སྒོར་ཞུགས་གཏན་ནས་མི་ཆོག་པ། གཉིས། གཞུང་དངུལ་སྤྱད་ནས་ལོ་སར་རྟེན་འབྲེལ་གཱ་ཤོག་དང་ཤོག་སྦག་སོགས་ལོ་ཟོག་གཏན་ནས་ཉོ་མི་ཆོག་པ། གསུམ། གཞུང་དངུལ་སྤྱད་ནས་སྣེ་ལེན་འཚམས་འདྲི་དང་ཡུལ་སྐོར་སོགས་གཞུང་དོན་མ་ཡིན་པའི་བྱེད་སྒོ་གཏན་ནས་སྤེལ་མི་ཆོག་པ། བཞི། གཞུང་འཁོར་སྒེར་སྤྱོད་དམ་ཡང་ན་སྒེར་འཁོར་གཞུང་གསོའི་རིགས་གཏན་ནས་བྱས་མི་ཆོག་པ། སྒྲིག་སྲོལ་ལས་འགལ་ནས་ལག་རྟགས་དངོས་པོ་དང་། དངུལ། འཛད་སྤྱོད་གཱ་ཤོག་སོགས་གཏན་ནས་ལེན་མི་ཆོག་པ། དྲུག སྒེར་གྱི་སྤྲོ་རྩེད་འདུ་ཁང་ནང་གཏན་ནས་འཛུལ་མི་ཆོག་པ། བདུན། སྒྲིག་སྲོལ་ལས་འགལ་བའི་ཐོག་ནས་གཉེན་སྟོན་དང་འདས་མཆོད་སོགས་ལ་ཁ་གཡར་ནས་རྒྱུ་ནོར་ལེན་ཐབས་གཏན་ནས་བྱས་མི་ཆོག་པ། བརྒྱད། ཡུལ་གྲོགས་འདུ་ཚོགས་དང་། སློབ་གྲོགས་འདུ་ཚོགས། འཐབ་གྲོགས་འདུ་ཚོགས་ལ་གཏན་ནས་ཞུགས་མི་ཆོག་པ་བཅས་རེད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
