རྒྱ་ནག་གཞུང་གིས་བལ་ཡུལ་གྱི་གཞུང་གསར་པར་མཉམ་འབྲེལ་གྱིས་རྒྱུད་གཅིག་ལམ་གཅིག་གི་ལས་གཞི་ལག་བསྟར་དང་མ་འཇོག་སོགས་བྱེད་འདུན་ཡོད་ལུགས་བཤད་འདུག
FM Shisir Khanal with Chinese envoy Zhang Maoming on April 7, 2026 (Photo/The Kathmandu Post)
ཉེ་ལམ་བལ་ཡུལ་ནང་ན་གཞོན་ཡར་ལངས་དང་སྲིད་འགྱུར་བྱུང་ནས། ཕྱི་ཟླ་ ༣ ཚེས་ ༢༧ ཉིན་བལ་ཡུལ་གྱི་སྲིད་བློན་གསར་པ་བྷ་ལེན་དྷ་ར་ (Balendra Shah) ལགས་ཀྱིས་སྲིད་བློན་གྱི་དམ་འབུལ་ཞུས་རྗེས། བལ་ཡུལ་ནང་སྲིད་འབྱོར་རིག་གསུམ་གྱི་ཐོག་ནས་འགྱུར་བ་ཆེན་པོ་ཞིག་གཏོང་མུས་ཡིན་པའི་མུར། དེ་སྔ་བལ་ཡུལ་དམར་ཤོག་སྲིད་གཞུང་གིས་རྒྱལ་ཁབ་གཞན་དང་ལྷན་དུ་བཟུང་བའི་སྲིད་ཇུས་ཁག་ལ་འགྱུར་བ་ཐེབས་གྲབས་ཡོད་པའི་མཚམས་འདིར། ཟླ་འདིའི་ཕྱི་ཚེས་ ༧ ཉིན་བལ་ཡུལ་དུ་གནས་སྡོད་རྒྱ་ནག་གཞུང་ཚབ་པ་ཀྲང་མོ་མིང་(Zhang Maoming) གིས་བལ་ཡུལ་ཕྱི་སྲིད་བློན་ཆེན་ལས་ཁུངས་ཀྱི་བློན་ཆེན་གསར་པ་ཤི་ཤལ་ཀ་ནལ་(Shisir Khanal) ལགས་སུ་ཐུག་འཕྲད་བྱེད་སྐབས། བལ་ཡུལ་གཞུང་གིས་རྒྱ་ནག་གཅིག་གི་སྲིད་ཇུས་ལ་བཟུང་བའི་ལངས་ཕྱོགས་ལ་འགྱུར་བ་མེད་ལུགས་བཤད་འདུག
རྒྱ་ནག་གཞུང་གི་བལ་ཡུལ་གཞུང་ཚབ་པ་ཐུག་འཕྲད་སྐབས། བལ་ཡུལ་ཕྱི་སྲིད་བློན་ཆེན་གྱིས། བལ་ཡུལ་གཞུང་གིས་ཕྱི་སྲིད་ལ་བཟུང་བའི་རྩ་ཁྲིམས་གཏན་འབེབས་བྱས་ཡོད་པ་ལྟར། ང་ཚོས་མུ་མཐུད་དུ་རྩ་དོན་གྱི་ལངས་ཕྱོགས་བརྟན་པོའི་ཐོག་ནས་རྒྱུན་འཁྱོངས་བྱ་རྒྱུ་ཡིན་ལ། ང་ཚོའི་ལངས་ཕྱོགས་སྔར་བཞིན་རང་འཇགས་ཡིན། རྒྱ་ནག་ཚུད་པའི་རྒྱལ་ཁབ་གཞན་གང་ལའང་ང་ཚོའི་ས་ཁོངས་བེད་སྤྱོད་གཏོང་དུ་འཇུག་རྒྱུ་མིན་ཡང་། ང་ཚོས་རྒྱ་ནག་གཅིག་གི་རྩ་དོན་ལ་རྒྱབ་སྐྱོར་བྱ་རྒྱུ་ཡིན། ཞེས་བརྗོད་འདུག
ཡང་གནད་དོན་དེ་དག་འབྲེལ་ནས་བལ་ཡུལ་གཞུང་གསར་པའི་སྲིད་བློན་གྱི་སློབ་སྟོན་པ་རུ་པག་སབ་ཀོ་ཏ་(Rupak Sapkota) ལགས་ཀྱིས། རྒྱ་ནག་གཙོས་རྒྱལ་ཁབ་མང་དག་གིས་བལ་ཡུལ་དང་ལྷན་དུ་མཉམ་འབྲེལ་གྱི་ལས་དོན་གཉེར་འདོད་ཡོད་པ་མ་ཟད། ཚང་མས་གཅིག་མཚུངས་ཀྱིས་བལ་ཡུལ་གྱི་ཆབ་སྲིད་དང་སྲིད་ཇུས་སྲ་བརྟན་ཡོང་སླད་སེམས་ཁྲལ་བྱེད་ཀྱི་ཡོད། བལ་ཡུལ་ནང་གི་འདས་པའི་ཞན་ཆ་ཆེ་ཤོས་ནི་ཆབ་སྲིད་དང་སྲིད་ཇུས་སྲ་བརྟན་མེད་པ་དེ་རེད། བལ་ཡུལ་གཞུང་སྟོབས་ཆེན་དུ་གྱུར་བའི་དུས་སྐབས་དང་བསྟུན། བལ་གཞུང་དང་འབྲེལ་འདྲིས་ཡོད་པའི་རྒྱལ་ཁབ་ཁག་གིས་ཀྱང་སྲ་བརྟན་དང་སྲིད་ཇུས་ཀྱི་ཁ་ཕྱོགས་གསལ་པོ་ཞིག་འཚོལ་གྱིན་ཡོད། ལྷག་པར་རྒྱ་ནག་གཞུང་གིས་རྒྱ་བལ་གཉིས་ཀྱི་གྲོས་མཐུན་ཁག་ལག་བསྟར་ཡོང་རྒྱུར་འགོར་འགྱངས་ཡོང་ཉེན་ཡོད་པའི་སེམས་འཚབ་བྱེད་ཀྱིན་ཡོད། ཅེས་བརྗོད་འདུག
བལ་ཡུལ་ཕྱི་སྲིད་བློན་ཆེན་དང་བལ་ཡུལ་དུ་རྟེན་གཞི་བྱས་པའི་རྒྱ་ནག་གཞུང་ཚབ་པ་གཉིས་ཐུག་འཕྲད་སྐབས། བལ་ཡུལ་གཞུང་གསར་པའི་ཕྱི་འབྲེལ་སྲིད་ཇུས་དང་། རྒྱ་བལ་གཉིས་ཀྱི་གྲོས་མཐུན་ཁག་གི་ཐད་ལ་གསལ་འདེབས། དེ་བཞིན་རྒྱ་བལ་གཉིས་ཀྱི་མཉམ་ལས་འཕེལ་རྒྱས་ཟེར་བ་སོགས་ཀྱི་སྐོར་ལ་གླེང་སློང་བྱས་ཡོད་འདུག སྤྱིར་འདི་ལོའི་བལ་ཡུལ་གྱི་འོས་བསྡུའི་ཁྲོད་ཨར་སི་པི་(RSP) སྲིད་དོན་ཚོགས་པར་འོས་བསྡུའི་རྒྱལ་ཁབ་ཐོབ་ནས། བལ་ཡུལ་གྱི་སྲིད་བློན་གསར་པ་བྷ་ལེན་དྷ་ར་ (Balendra Shah) ལགས་བལ་ཡུལ་གྱི་སྲིད་བློན་དུ་འགྱུར་སྐབས་ཀྱང་། རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་བློན་ཆེན་ཝང་ཡེ་ཡིས། བལ་ཡུལ་གྱི་སྲིད་བློན་དང་ཕྱི་སྲིད་བློན་ཆེན་སོགས་ལ་འཚམས་འདྲི་བྱས་ཏེ། རྒྱ་ནག་གཞུང་གིས་མུ་མཐུད་དུ་བལ་ཡུལ་གཞུང་གསར་པར་མཉམ་ལས་བྱ་འདུན་ཡོད་ལུགས་སོགས་བཤད་ཡོད་པའི་ཁར། ཀ་ཐི་མན་ཌུ་གསར་ཁང་ལྟར་ན། བལ་ཡུལ་གཞུང་གསར་པས་ལས་ཁུར་བྱས་རྗེས། རྒྱ་ནག་གཞུང་གིས་འཐབ་ཇུས་ཀྱི་ཁེ་ཕན་དང་མ་འཇོག དེ་བཞིན་བལ་ཡུལ་ནང་ཚོང་དོན་དང་ཡུལ་སྐོར་གྱི་ཁྱབ་རྒྱ་ཇེ་ཆེར་གཏང་རྒྱུ་དང་། རྒྱུད་གཅིག་ལམ་གཅིག་གི་ལས་གཞི་ལག་བསྟར། དེ་བཞིན་སྔོན་ཆད་ཀྱི་གྲོས་མཐུན་ཁག་སྲུང་སྐྱོབ་བྱེད་ཆེད་དུ་བལ་ཡུལ་ནང་སྐུ་ཚབ་ཚོགས་ཆུང་དང་འཐུས་མི་སོགས་ཆེད་དུ་མངགས་ནས། བལ་ཡུལ་གཞུང་གསར་པའི་མགོ་ཁྲིད་དང་གནད་ཡོད་མི་སྣ་སོགས་དང་ཐུག་འཕྲད་བྱེད་ཀྱིན་ཡོད་འདུག
རྒྱུད་གཅིག་ལམ་གཅིག་གི་ལས་གཞི་ནི་ཕྱི་ལོ་ ༢༠༡༣ ལོའི་མཇུག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཐོག་མར་གླེང་སློང་བྱས་པ་དང་ཕྱིས་སུ་གཏན་ལ་ཕབ་ཡོད་ཅིང་། ཕྱི་ལོ་ ༢༠༡༧ ཙམ་ནས་བལ་ཡུལ་ནང་ལྕགས་ལམ་གསར་རྒྱག་དང་། མ་འཇོག་སོགས་ཚུད་པའི་རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་ལག་བསྟར་བྱེད་མགོ་བཙུགས། ཕྱི་ལོ་ ༢༠༢༣ ལོར་དོན་ཚན་བཅུ་གཉིས་ཀྱི་ཐོག་ནས་བལ་ཡུལ་ནང་སྲིད་ཇུས་དེ་སྔར་ལྷག་སྤེལ་རྒྱུའི་གྲོས་མཐུན་བྱུང་འདུག འོན་ཀྱང་། རྒྱ་ནག་གཞུང་གི་གནོན་ཤུགས་ཀྱི་དབང་གིས། ལོ་མང་རིང་བལ་ཡུལ་དུ་གནས་སྡོད་བོད་མི་རྣམས་ལ་གསུམ་བཅུའི་དུས་དྲན་དང་། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་སྲུང་གཙི་ཚུད་པའི་བོད་དོན་དང་། བོད་མིའི་ཐད་དམ་དྲག་ཤུགས་ཆེན་བྱས་དང་བྱེད་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
