ཨོ་གླིང་གི་ཡེ་ཤུའི་ཆོས་དཔོན་བྷིལ་ཁི་རུ་སི་མཆོག་གིས་རྒྱ་གཞུང་གིས་བོད་བཙན་བཟུང་བྱས་པའི་་ལེགས་སྐྱེས་ཡག་ཤོས་ནི་བོད་པའི་རིག་གཞུང་དང་ཆོས་ལུགས་འཛམ་གླིང་ཡོངས་སུ་ཁྱབ་བཅུག་པ་དེ་རེད་ཅེས་གསུངས་སོང་།
དེ་རིང་ཕྱི་ཚེས་ ༩ ཉིན་བཞུགས་སྒར་རྒྱལ་བའི་ཕོ་བྲང་དུ། ཨོ་གླིང་གི་ཡེ་ཤུའི་ཆོས་ཚོགས་ཀྱི་ཆོས་དཔོན་བྷིལ་ཁི་རུ་སི་མཆོག་གིས་ ( Bill Crews )༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་ཅིང་། མཇལ་ཁ་གྲུབ་མཚམས་ཡེ་ཤུའི་ཆོས་དཔོན་བྷིལ་ཁི་རོ་སི་མཆོག་གིས་འདི་གར་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་དང་ངེད་གཉིས་ལོ་ངོ་བཞི་བཅུའི་རིང་གི་གྲོགས་པོ་ཡིན། ལོ་རེ་རེ་བཞིན་ངས་༧གོང་ས་མཆོག་ལ་མཇལ་བཅར་གྱི་འབད་བརྩོན་ཞུ་བཞིན་ཡོད། ༧གོང་ས་མཆོག་ཨོ་གླིང་གི་ངའི་ཡེ་ཤུའི་ལྷ་ཁང་དུ་ཕེབས་མྱོང་ཡོད་ཅིང་། ངེད་གཉིས་ཀྱིས་མཉམ་དུ་སྡོད་གནས་མེད་པའི་མི་མང་ ༤༠༠ ལ་ཟས་སྦྱིན་མྱོང་། སྡོད་གནས་མེད་པའི་མི་མང་རྣམས་ཁོང་ལ་ཧ་ཅང་དགའ་བོ་ཡོད། ༧གོང་ས་མཆོག་ནས་ཁོང་ཚོར་ངོས་རང་ཡང་སྡོད་གནས་མེད་མཁན་ཞིག་ཡིན་ཞེས་གསུང་གི་ཡོད། སྐབས་དེར་མི་མང་མཉམ་འཛོམས་བྱུང་ཐུབ་ཀྱི་ཡོད། དེ་ནི་ངའི་མི་ཚེ་ནང་གི་ཉམས་མྱོང་ཧ་ཅང་ཡག་པོ་ཞིག་ཡིན་པས། ངེད་གཉིས་ཀྱིས་རྟག་ཏུ་དེའི་སྐོར་ལ་གླེང་མོལ་བྱེད་ཀྱི་ཡོད། ངས་ཁོང་ཉིད་ཡེ་ཤུ་ཆོས་པ་ཡག་པོ་ཞིག་ཡིན་ཟེར་གྱི་ཡོད་ལ། ཁོང་གིས་རང་ཉིད་ནང་པ་ཧ་ཅང་ཡག་པོ་ཞིག་ཡིན་གསུངས་ཀྱི་འདུག ངེད་གཉིས་གྲོགས་པོ་ཡག་པོ་ཞིག་ཡིན། ཞེས་གསུངས་སོང་།
གསར་འགོད་པས་དེ་རིང་༧གོང་ས་མཆོག་དང་ལྷན་དུ་དམིགས་བསལ་བཀའ་མོལ་ཞུས་ཡོད་མེད་དྲིས་པར། ངེད་གཉིས་ཀྱིས་འདས་ཟིན་པའི་སྐོར་ལ་ཁ་བརྡ་བྱས་ཡིན་ལ། ངས་ཁོང་གི་དབུ་ལ་འོ་ཞིག་བྱས་པ་ཡིན། ཁོང་ནི་ང་ལ་ཧ་ཅང་བཀའ་དྲིན་ཆེན་པོ་ཡིན། ངས་ཁོང་ཉིད་ནི་དེང་སང་གི་འཛམ་གླིང་འདིའི་འགྲོ་བ་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན་པ་ཤེས་ཀྱི་ཡོད།ཅེས་གསུངས་སོང་། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་མཇལ་འཕྲད་གནང་བའི་སྐོར་དང་འབྲེལ་ནས་ཁོང་གིས། ང་ནི་བོད་པའི་གྲོགས་པོ་ཡག་པོ་ཞིག་ཡིན། ངས་སྲིད་སྐྱོང་མཆོག་ལ་བོད་པའི་སྤྱི་ཚོགས་དང་མཉམ་དུ་གདུང་སེམས་མཉམ་བསྐྱེད་བྱེད་བཞིན་པའི་སྐོར་བཤད་ཡོད། བོད་མི་ཡོངས་རྫོགས་རྡོག་རྩ་གཅིག་སྒྲིལ་བྱ་དགོས། རྒྱ་ནག་གཞུང་གིས་བོད་བཙན་བཟུང་བྱས་པའི་ལེགས་སྐྱེས་ཡག་ཤོས་ནི་བོད་པའི་རིག་གཞུང་དང་ཆོས་ལུགས་འཛམ་གླིང་ཡོངས་སུ་ཁྱབ་བཅུག་པ་དེ་རེད། འཛམ་གླིང་ལ་ཧ་ཅང་དགོས་མཁོ་ཆེ་བའི་དུས་སྐབས་ཤིག་ཆགས་ཡོད་ཅེས་གསུངས་སོང་།
ཡང་ཁོང་གིས། ངའི་ཐེབས་རྩ་ཚོགས་པས་ཨོ་གླིང་གི་སྡོད་གནས་མེད་པའི་མི་མང་པོར་ཟས་སྦྱིན་གནང་ཡོད། འཛམ་གླིང་གི་འབར་རྫས་གས་ཐོར་བྱུང་བའི་རྒྱལ་ཁབ་ཁག་ཏུའང་ང་ཚོས་ལས་ཀ་བྱེད་བཞིན་ཡོད། དེ་བཞིན་ལྷོ་སུ་ཌན་དང་གྷ་ཛ་ནང་དམག་འཁྲུག་བྱུང་སྟེ་དཀའ་ངལ་ནང་ཡོད་པའི་མི་མང་ལ་རོགས་རམ་བྱེད་བཞིན་ཡོད། བོད་མི་རྣམས་ཀྱིས་དྲང་བདེན་གྱི་ཐོག་ནས་ལས་དོན་བསྒྲུབ་དགོས། རྒྱ་ནག་གཞུང་དེ་རླུང་གཡུག་པ་ལྟར་རྫོགས་ནས་འགྲོ་སྐབས། བོད་པའི་བདེན་པ་དུས་བརྟན་དུ་གནས་ཐུབ་ཀྱི་རེད། ཅེས་གསུངས་སོང་།
ཨོ་གླིང་གི་ཡེ་ཤུའི་ཆོས་དཔོན་བྷིལ་ཁི་རུ་སི་མཆོག་ནི་ཕྱི་ལོ་ ༡༩༤༤ ལོར་དབྱིན་ཡུལ་དུ་འཁྲུངས་ཡོད་ཅིང་། ཕྱི་ལོ་ ༡༩༨༦ ལོར་ཡེ་ཤུ་མཉམ་འབྲེལ་ཆོས་ཚོགས་ཀྱི་མཐོ་སློབ་ནས་བསླབ་པ་མཐར་སོན་སྟེ། ཨོ་གླིང་སི་ཌི་ནི་ཡེ་ཤུའི་ཆོས་ཚོགས་ཀྱི་བློན་ཆེན་དུ་བསྐོས། ཕྱི་ལོ་ ༡༩༨༩ ལོར་ཨེ་ཛོ་དྷུ་སི་ཐེབས་རྩ་ཁང་(Exodus Foundation) བཙུགས་ཏེ་སྡོད་གནས་མེད་པ་དང་བདག་མེད་བྱིས་པ་སོགས་སུ་རོགས་རམ་བྱས། ཁོང་ལ་ཕྱི་ལོ་ ༡༩༩༢ ལོའི་ཨ་ཕའི་ལོ་དང་འགྲོ་བ་མིའི་ལོ་ཞེས་པའི་མཚན་སྙན་དང་། ཨོ་གླིང་རྒྱལ་ཡོངས་རིན་ཆེན་བརྒྱ། ཨོ་གླིང་ཆེ་བསྟོད་སོགས་ཀྱི་གཟེངས་རྟགས་ཐོབ་ཡོད། ཕྱི་ལོ་ ༢༠༠༧ ལོར་༧གོང་ས་རྒྱལ་བ་རིན་པོ་ཆེ་མཆོག་ཨོ་གླིང་དུ་ཆིབས་བསྒྱུར་བསྐྱངས་སྐབས་ཐེངས་དང་པོ་མཇལ་འཕྲད་གནང་ཡོད་འདུག ཕྱི་ལོ་ ༢༠༡༣ ལོར་༧གོང་ས་མཆོག་དང་ཆོས་དཔོན་བྷིལ་ཁི་རུ་སི་རྣམ་གཉིས་ཀྱིས་མཉམ་དུ་ཁུལ་དེའི་མི་མང་སྐྱོ་བོར་ཟས་སྦྱིན་གནང་ཡོད་འདུག ཁོང་གིས་འཆར་ཅན་ལྟར་༧གོང་ས་མཆོག་ལ་མཇལ་བཅར་ཞུ་བཞིན་འདུག་ལ། དྲ་ལམ་བརྒྱུད་ནས་༧སྐུའི་འཁྲུངས་སྐར་ལ་འཚམས་འདྲི་ཞུས་འདུག དེ་བཞིན་ཨོ་གླིང་ནང་བོད་དོན་ཐོག་རྒྱབ་སྐྱོར་གནང་མཁན་ཞིག་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
